1 TIMOTEO 3
3
Crijcunata ricushpa yachachijcunaca, aligutami causana
1Crijcunata maijambash ricushpa yachachingapaj munashpaca, aligutami rurangapaj munan. Cashna nishca shimicunaca, pactachij shimicunami. 2Crijcunata ricushpa yachachijca, pipash na juchachijpi causajmi cana. Shujlla huarmihuan causaj, pitapash na pugllarij, aligutapacha yarishpa purij, pipash alicachijpi causajmi cana. Mingachishpapash cushijushpa mingachij, yachachitapash aliguta yachachijmi cana. 3Na machaj, na pihuambash fiñanajuj, culquita munaimandalla imatapash nalitaca na ruraj, ashtahuangarin pitapash llaquij, fiñanajui tiajpipash alichij, charijyanatapash na munaj runami cana. 4Paipaj huasipi causajcunatapash, aliguta mandaj cachun, paipaj huahuacunatapash, imapipash aliguta causachun, yachachishpa cazuchij cachun. 5(Maijambash paipaj huasipi causajcunatallata nali mandai ushashpaca, Taita Diospaj tandanajuj crijcunatacarin, imashnata mandai ushangayari). 6Ama chairalla crij cachun. Chashna cashpaca, ninanda jariyashpara, diablo urmashpa llaquichi tucujunshnallata, llaquichi tucungapaj urmanman. 7Shinallata yachachij runaca, nara crijcunapash alicachijpi causajmi cana. Nalicachishpa rimai tucunapi, diablopaj lazupi ama urmangapajmi, chashna cana.
Crijcunata ayudajcunaca, aligutami causana
8Crijcunata ayudajcunaca, alicachijpi causaj, imata parlashcatapash na shujman yalichij, na machaj, culquita munaimandalla imatapash nalitaca na ruraj cachun. 9Pipash na yachashca crinata Dios caramushcataca, ali yuyaihuambacha yariashpa causachun ninimi. 10Paicunatapash pundaca, imashna causajta, aliguta ricunarami. Chai jipaca, imamanda na jarcanapash na tiajpica, crijcunata ayudangapaj yaicui ushangami. 11Shinallata huarmicunapash, imatapash aliguta rurashpa causaj, pitapash na caita chaita parlashpa causaj, ashtahuangarin aliguta yarishpa, tucuita pactachijcuna cachun. 12Crijcunata ayudajcunaca, shujlla huarmihuan causaj cachun. Shinallata paipaj huahuacunata, paipaj huasi ucupi causajcunatapash, aliguta ricushpa yachachijcuna cachun. 13Crijcunata ayudaj aliguta pactachishpaca, ninanda alicachi tucunatami japin. Shinallata Cristo Jesustapash, ninanda crishpami yarianajun.
Diosta yarishpa causanaca, pipash na yachashca ninan juyaillagumi
14Canda ricungapaj ucha rinatapacha yariajushpapash, caigutarami escribini. 15Ñuca na ucha chayajpipash, Taita Diospaj huasipi, tandanajuj crijcunaman imashna causanata yachachinata can yachachunmi, caitaca cachamuni. Paicunaca, causajujlla Taita Diospaj tandanajuj crijcunami. Shina cashpami, na llullashpa villajuj shimitaca, pilarshna shinlli tucushpa villanajun. 16Diosta yarishpa causanaca, pipash na yachashca ninan juyaillagumi. Chaitaca, pipash na imata ni ushangachu:
Taita Diosca, aichayu tucushpami shamurca.
Diospaj Espiritumi, paitaca imatapash
cashcatapacha ruraj cajta ricuchimurca.
Angelcunapashmi, paitaca ricunajurca.
Na israelcunamambash, paimandaca villanajunmi.
Paitaca, cai pachapi causajcunapash crinajunmi.
Paitaca, jahua pacha punchapambagupipash chasquircami.
Currently Selected:
1 TIMOTEO 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
