Luk 20
20
Aḍipuru olegheriom ịikpo phọ ịpe ạJizos ạsighe bọ kụ raḍighinom
(Matiu 21.23-27; Mạk 11.27-33)
1Eniin aḍio, ạJizos odi sịphe Otu Ịiḅereghi phọ rạtughemi ghan we phọ kạḅile ạghaaph ooḅi ọghaaph phọ ạḅeni bịdi, kụ ạbuo ạrumhu ariil ạrikia phọ rꞌạbutughemia iilogh phọ rꞌikumoor awe phọ uru ni ọteeny nyọdi, 2kụ ọḅeni mọ, “Ụḅeni iyoor. Nạ ụsighe ịghen ịikpo kụ raḍighinom ghan bọ ịphen phọ? Ḅịle kẹn, ạnhian kụ ạngo bọ nyịna ịikpo phọ ịphen?”
3Kụ ạJizos mọ, “Mị kipuru aani inyina ḍiniin aḍipuru ạgbagh. Ịḅeni ịmi. 4Ịikpo phọ ạJon awurom ghan bọ we mụum mọ ịḍua ẹghen kụ eru bọ — esi Ẹnaan ḍụghum, kụ esi oye?”
5Kụ aḍipuru phọ ạḍien ẹsighe ọogbaghanaan ịlo kọpagharanaan ẹlogh ogbo phọ ạbidi mọ, “Yira ọḅem mọ ịḍua esi Ẹnaan, pọ ọdi kạḅem mọ, ‘Iḍighi ika kụ nyina nyọdi ímeeraam bọ?’ 6Kụ yira ọḅem mọ ịḍua esi awe, pọ oomo awe phọ kuroḅol iyira ikpo, ịdi eḍighi bọ bịdi mọsighenom mọ ạJon phọ oyil Ẹnaan ni.” 7Kụ bịdi mọ bụno úlegheri esi phọ ẹḍua bọ kụ eru.
8Kụ ạJizos ạḅeni bịdi mọ, “Mị kẹn inyina rị́ḅeni ọdo ịikpo phọ mị ạsighe bọ kụ raḍighinom ghan ịphen phọ.”
Aḍidogh ịlo awe dị ọḅogh ozo ireeny amiim ọlogh ḍịghaagh
(Matiu 21.33-46; Mạk 12.1-12)
9 #
Azay 5.1
Kụ ạJizos ạsighe ḍidogh phọ ạḍien kụ ạḅeniom we phọ mọ, “Oniin oye ạzuph ozo ireeny amiim, kụ ạḅogh ozo phọ ạlogh ḍịghaagh abuḅephom iizo mọ oḍighinaan ghan nyịno, kụ ạḍua agheel ẹnon ẹmha ebianam. 10Kụ rẹteeny mem ibugha phọ, kụ ọdi arom nyoniin ẹbene mọ ạghi ạteeny bịdi aphin bin mụo ọno, kụ bịdi okuphogh ẹbene phọ ophorogh rꞌoopho ạraghaagh. 11Kụ uwozo phọ ạḅile arom ọnon ẹbene, kụ ọḅile kẹn okuphogh osiphe umugholoor kụ ophorogh rꞌoopho ạraghaagh. 12Kụ ọdi arom nyọpo amuneniom bọ ịraar phọ kụ ọḅile kẹn obenogh kụ osiph ọḍuanam. 13Kụ uwozo ireeny phọ apuruan loor mọ, ‘Mị kaḍighi bọ ika nụun? Mị katom ogina ọony phọ ạmi. Iini bịdi kokueni ni nyọdi.’ 14Kụ mem dị bụphe roḍighi bọ ozo phọ ọmiin bọ mọony phọ, bịdi uupuruan ni mọ, ‘Tọ, ọphon kụ kale bọ erua phọ ọdi. Itu oghiigh nyọdi, ọbo ozo phọ aḍighi ọlo ayira!’ 15Kụ bịdi osiph nyọdi ọḍuanam pạ ozo phọ kụ oghiigh.
“Kụ uwozo phọ kaḍighi bọ bịdi ika nụun? 16Ọdi katu ạze bụen phọ, kụ ạḅogh ozo phọ ạlogh ḍịghaagh ạbunon.”
Kụ mem dị bịdi ọnaghan bọ ịphen phọ, bịdi mọ, “Ẹmugh kímeera!”
17 #
Ạsuo 118.22
Kụ ạJizos aphogh bịdi kụ apuru mọ, “Ika nụun kụ ẹmhu ọghaaph ạḍinya iigbia phọ ạḅem bọ mọ,
“‘Ẹko phọ ạbuloghom ruutu phọ oghel bọ
kụ mẹḅile eḍighi ẹko ogbo’?
18“Ilegheri mọ tọrobo oye lọ ameelom ḍighiigh phọ ạḍien kabunughian ni ạmadan, kụ eḍighi ịyaar dị aḍighiigh phọ kụ emeelom oye, kẹgbe ni nyọdi etene ịisaar.”
Aḍipuru ịlo osogh ghan iisogh
(Matiu 22.15-22; Mạk 12.13-17)
19Kụ ạbutughemia iilogh phọ rꞌạbuo ạrumhu ariil ạrikia phọ uugonoghian ni osiph ạJizos egina amem sịphe phọ, ịdi eḍighi bọ bịdi ulegheri ni mọ aḍidogh phọ ẹkpulughiom bụno, kụ bịdi ughiilaan ni we phọ. 20Bịdi ugon ghan mem lọ mẹkasian, kụ oḅian we dị opu ọghigh bugey, kụ opuru yogh ghan Jịzos sipuru ọnaghan ọphanyanaan phọ kụ osiphom ọdi, pịdi okori ọḅogh nyọdi ọlogh ḍịghaagh ạbuphe ọolha phọ ạngo bọ ịikpo phọ. 21Kụ bịdi opuru nyọdi mọ, “Ọtughemia, yoor olegheri ni mọ ọghaaph phọ rꞌịtughemi phọ ạna igey ni. Esi ạna oye oye ópu. Nạ ạkar ri rạtughemi ghan reten phọ Ẹnaan. 22Iilogh phọ ayira emeeraam ni mọ yira osogh ghan iisogh phọ aSiza ḍụghum? Ẹkpe ni ḍụghum kụ ị́kpe?”
23Kụ ạJizos alegheri ni iipheeny phọ ạbidi kụ ạḅeni bịdi mọ, 24“Iḍeenaan ịmi opoḍi asilva. Ẹphen phọ ẹkigh ẹmhu ạnhian? Ọge sịen phọ ịlo ạnhian?” Kụ bịdi mọ, “ASiza.”
25Kụ ọdi ạḅeni bịdi mọ, “Esi ịphen phọ, isogh ịlo aSiza ẹngo Siza esogh ịlo Ẹnaan ẹngo Ẹnaan.”
26Ọphagharanaan phọ ọdi ọ́ngo ọgel dị kọsighe ḍụghum ọnhu phọ ọdi kụ osiphom nyọdi pạ aghisigh awe phọ. Kụ bịdi omaghagha yogh oḅoroghian.
Aḍipuru ịlo oḅetenu esi aḍuugh phọ
(Matiu 22.23-33; Mạk 12.18-27)
27 #
Iiḍ 23.8
Kụ buniin aSadusi phọ uru ni ọteeny Jịzos. Kụ ạri awe phọ ạbuen úmeeraam mọ oye kạḅile ni aḅetenu esi aḍuugh. Kụ opuru nyọdi mọ, 28#Dut 25.5“Ọtughemia, aMozis ạlogh ni ologh ạge ụngo iyira mọ oye aphin ạnir kụ ạwile amugh kụ mọony ọ́mar, pọ umor ọdi alhe ạnir phọ erua amiteghomonaan nmụny. 29Eniin amem oḍual abumor ụrol li, kụ okumoor phọ aphin ạnir kụ amugh kụ nmụny ọ́mar. 30Kụ ọpo amuneniom bọ ịyal phọ aphin ạnir phọ, 31kụ ẹteeny nyọpo amuneniom bọ ịraar phọ. Ịdipho kẹn kụ ịdi emitenaan oomo oḍual abumor phọ — bịdi umuughu ni bịn nmụny ụ́maraghi. 32Ekureriom mọ, ạnir phọ amugh aani ni. 33Ọtuan ịphen phọ, mem oḅerenu esi aḍuugh phọ, ạnir phọ kaḍighi ọlo ạnhian ịdipho oḍual abumor phọ kụ mophin ghan bọ ni nyọdi?”
34Kụ ạJizos ạphagharanaan bịdi mọ, “Ạnmariir rꞌalephiri aḅirini phọ ọphon uphinian ghan ni, 35kụ ạnmariir rꞌalephiri dị ọman okori oḅeton esi aḍuugh ọrol aḅirini phọ ọpo katu bọ kópinian ghan. 36Bịdi ọkigh rụukpaany Ẹnaan dị kómugh. Bịdi ạnmuny Ẹnaan, ịdi eḍighi bọ moḅerion bịdi riisi aḍuugh. 37#Ẹḍua 3.6AMozis ạghaaph ni agananami mọ oḅerion ạbuphe momuughu bọ odi ghan ni. Sịkpigh phọ ịpe ẹghaaph bọ ịlo ekpu eḍum ọnuza phọ, ọdi ạghaaph ni aghol Ọmoogh-we phọ mọ, ‘Ẹnaan Ebraham rꞌẠizik rꞌạJekob.’ 38Oomo phọ ạbidi odi ni ropooghu esi Ẹnaan. Ọdi Ẹnaan ạbuphe odi bọ, kẹ́lo ạbuphe momuughu bọ.”
39Buniin ạbutughemia iilogh phọ ụḅem ni omitiom mọ, “Ọtughemia, nạ ạpagharanaan ni agey,” 40loor esi dị bịdi úḅom mun ẹmhu ọḅile opuru ọdi ịyaar.
Aḍipuru ịlo aMesaya phọ
(Matiu 22.41-46; Mạk 12.35-37)
41Kụ ạJizos apuru bịdi mọ, “Uḍighi ika kụ rọḅem ghan bọ mọ aMesaya phọ, ọony aDevid? 42#Ạsuo 110.1Ọge ni sịphe ạḍinya Ạsuor phọ mọ aDevid rꞌaloor ạḅem mọ,
“‘Ẹnaan phọ ẹḅeni Ọmoogh-we ạmi mọ:
Tọl ḍịghaagh elhiom ạmi,
43tụtu ẹteeny mem dị mị kaḍighi
bụmulogh-ḍien phọ ạna ịkasi
ọkpasaghiom aruwol.’
44“ADevid aghol li Mesaya phọ mọ Ọmoogh-we, ika kụ ẹdi ọdi aru bọ mọony phọ ọdi?”
ẠJizos ạpur rụru ịlo ạbutughemia iilogh phọ
(Matiu 23.1-36; Mạk 12.38-40)
45Oomo awe phọ odi ni rọnaghanan kụ ạJizos ạḅeni bụmatuan phọ ọdi mọ, 46“Igona loor anyina esi ạbutughemia iilogh phọ, bụphe ẹḅeeraan bọ orelhiom ghan igudaguda iinmenan phọ, rꞌomeregha ịimaghaghan eghuan ẹpe asiḍighi phọ, rꞌọrologhu ghan igbogh ạsidol ẹpe arubughotu phọ rꞌariisi eghuan mem amalhe. 47Bụen kụ rọpueghi ghan bọ rạraar arukpukele ạnmariir phọ, kụ okue bọ rọoḅereghi ghan ịidoony ịiḅereghi phọ. Ịdi kọliom bịdi kẹloghori ni iboom.”
Currently Selected:
Luk 20: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
