Luk 21
21
Ịlo inmo dị ekpukele ạnir ạlogh ologhi eekoom ikpoki phọ
(Mạk 12.41-44)
1ẠJizos aphogh ni akitonom Otu Ịiḅereghi phọ kụ ạmiin ịdi ạraalha phọ rọloghoḍi ikpoki ologhi eekoom mọ. 2Kụ ọdi ạmiin oniin uwekulom ekpukele ạnir dị ạlhogh ịyal ịkpirikpiri ikpoki dị ẹman egbem ạkobo. 3Kụ ọdi mọ, “Mị ạkar rịḅeni ghan inyina mọ ịphen ạnir phọ ọphon ạlhogh bọ ologhi eekoom ikpoki phọ ẹbugh ni epu dị ọḅophoghi oomo ịpe ạbueri phọ, 4ịdi eḍighi bọ oomo ạbueri phọ ọlogh ịdi mepeel sịphe ẹelha phọ ạbidi, kụ ạnir phọ ọphon ạlogh ni oomo phọ ịpe ọdi ạmoogh bọ bịn ạmadan.”
ẠJizos ạkaaph mọ kolereghi ni Otu Ịiḅereghi phọ
(Matiu 24.1-2; Mạk 13.1-2)
5Buniin ạbumatuan ụghaaph ghan ịlo Otu Ịiḅereghi phọ ịdi ạnighe rꞌịma asighiigh dị ọloghom rꞌinmo phọ ọngo bọ Ẹnaan. 6Kụ ạJizos ạḅem mọ, “Oomo phọ ạraraar phọ ịphen nyina rẹmiin bọ, amem ketu ni dị rꞌaḍiniin aḍighiigh ạnyu ạḍinon kọbile dị kőlhereghi.”
Ịiḅaghami rꞌịgbiphoghom
(Matiu 24.3-14; Mạk 13.3-13)
7Kụ bịdi opuru mọ, “Ọtughemia, pụr amem kụ ẹdi ịphen phọ kemite bọ? Eeghe kụ keḍighi eḍeenaan amem mọ ịphen phọ kemiteghu bọ?”
8Kụ ọdi mọ, “Igona loor anyina, ọbo kiikeleghi ghan bọ inyina, ịdi eḍighi bọ ịbadi kotu ni kụ okophora ḍien phọ ạmi kụ ọḅem ghan mọ ạbuno kụ aMesaya phọ, ḅịle kẹn mọ, ‘Amem mọ mesi sịen ẹda ạḍighaagh!’ Kẹ́daph bịdi. 9Mem lọ nyina ẹnaghan oghur ạraagham rꞌịgbaragbara, oḅio anyina kúkaph. Ạraraar phọ ịphen kẹpur ri emiteghu kụ eekuna phọ kẹ̋teeny ni.”
10Kụ ọdi ạḅile ạḅem ạloghom mọ, “Eelhe kotuphiom ni eelhe ẹgham, ẹmha otuphiom ẹmha, 11kụ ade phọ kepiigha ni iboom, ịgbakuro kẹtol li, ạreezegh ogogo kemuza ni ịminighan arikpisi. Ạraraar aruugu rꞌiboom areḍeenaan kẹḍua ni kꞌạke emiteghu. 12Tụtu oomo phọ ạraraar phọ ịphen kemiteghu, kisiphi ni inyina ọgbiphoghom. Kirorori ni inyina osoorom erugh ẹpe arubughotu phọ, ịloghoḍi inyina ikoli. Aruwo ẹmha rꞌạbudaam eelhe kịmagh ni inyina ọgba ạsiagba loor ẹmhu aḍien phọ ạmi, 13kụ nyina ẹmooghom ghụn eepoogh ọghaaph ooḅi ọghaaph phọ ọḅeni ạbidi. 14#Luk 12.11, 12Ịpur ịkpuku, kékaphian ghan oomiigh ịlo nyina kẹgba ọphelaam ạrumhu phọ anyina, 15ịdi eḍighi bọ mị kịngo ghan ni inyina ikpo ọnhu rꞌolegheri ịyaar dị rꞌoniin ẹpomoghian anyina kátue ạmerenyan mụghumo ọpharanaan. 16Ạburude rꞌaburunhiin anyina, rꞌabumor anyina rꞌasiya anyina rꞌạrighiri anyina kụ kirorori ni inyina, ọlogh buniin esi aḍuugh. 17Oomo awe kịlogh ni inyina ḍien loor ẹmhu phọ ạmi. 18Kụ rꞌaḍiniin ạḍilaal ạrumhu phọ anyina képe. 19Esi ọkparam kụ ẹdi nyina kẹmoogh ghuḍum mọ anyina.”
ẠJizos ạkaaph mọ kopiemi ni Jeruselem
(Matiu 24.15-21; Mạk 13.14-19)
20“Mem dị nyina ẹmiin mọ awe ẹgham mọmeregha rokoom Jeruselem, ilegheri mọ amem amuphe phọ ọdi mẹkpulan. 21Kụ bụlo odi Judia oghiil ogheel ẹpe ạraaḅaraph phọ, kụ bụlo odi ẹmha omite ọḍua, kụ bụlo odi ịphalagbal kụ́ḅile mun uḅula ẹpe ẹmha phọ! 22#Hos 9.7Ịphen phọ, ariiḍio oḅulemian, ịlo omuneniom oomo phọ ịpe ọge bọ sịphe Ạḍinya Iigbia phọ. 23Kụ pọ eeghe ọdo ịminimiin dị kẹtolonaan nmạriir lọ odi rꞌịyal amem aloor, rꞌạbulo ọpham nmụny dị kőghin mạmaam riiḍio phọ ịpe! Ịiḅaghami dị keḍighi ruugu kẹtol li sịen eelhe phọ ẹphen, kụ ạghelhe phọ Ẹnaan kạkpaariom ni we phọ ạbuen. 24Elhool ẹgham kụ kẹze bịdi kụ osiphi bịdi ọkasaghiom ọkimom oomo areelhe ịdipho ạbuo ikoli, kụ aruuruen phọ kọozeghi ni oomo aJeruselem, tụtu amem mọ ạbidi emunughan.”
Erumom Ọony phọ Oye
(Matiu 24.29-31; Mạk 13.24-27)
25 #
Azay 13.10; Izik 32.7; Joel 2.31; Ogon 6.12, 13 “Areḍeenaan kemiteghu ni sịphe erumuḍio phọ rꞌụnwanyu phọ rꞌạraanaan phọ. Iloghi awe oomo areelhe sịen ade phọ kẹpepheghu ni. Aruugu kasiph ni bịdi loor oghur rꞌoologh ọphiiny. 26Arimiigh awe kekaphagh ni kụ ọkanyanu loor okori ghan ịpe kemiteghu bọ oomo aḅirini phọ, ịdi eḍighi bọ ịikpo phọ ịpe edi bọ kꞌạke kepiigha ni. 27#Dạn 7.13; Ogon 1.7Kụ kọmiin ni dị Ọony phọ Oye ạḍua ẹpe okuaḍio phọ kụ ratu rꞌiboom ịikpo rꞌigbogh phọ ọdi. 28Kụ mem dị nyina ẹmiin dị ạraraar phọ ịphen memiigh omiteghu yogh, ịmeremi rụmhu anyina ephogh ạnyu, ịdi eḍighi bọ amem mọ kịphel bọ inyina ọsighe mẹebeeph.”
Ịsighe oreeny dị oghol mọ ạfig ẹtuughaam olegheri-ịyaar
(Matiu 24.32-35; Mạk 13.28-31)
29Kụ ọdi adogh ḍidogh phọ ạḍien ạḅeni bịdi mọ, “Ịitughian oreeny phọ ọpo oghol bọ mọ ạfig phọ ḅịle rꞌoomo ịpheri phọ ireeny phọ. 30Mem lọ bịdi retigheel ọnam, nyina elegheri ni mọ osoor mạteeny. 31Ịduon phọ kẹn, mem dị nyina ẹmiin dị ịphen phọ remiteghu, nyina kelegheri ni mọ ọmar phọ kꞌẸnaan mạkpulan.
32“Mị ạkar rịḅeni ghan inyina mọ oghiil phọ ọphon káten kụ ịphen phọ emiteghu. 33Ạke phọ rꞌade phọ kepe ni, ikpo ọnhu phọ ạmi képe aani.”
Ẹkpe ni ogon ghan
34“Igona loor anyina. Kémeera iloghi phọ anyina ịiḅaghami inyina loor olhe ghan uruur rꞌọoko amiim, rꞌigbiriḅa ịlo ạraraar ịsien aḅirini phọ, ọbo aḍio phọ ạḍiphe kimeelom ghan bọ inyina ekperenom 35ịdipho aḍiphil, kụ esiph oomo awe aḅirini phọ. 36Ịtol esi ogon ẹeḅereghi ghan oomo amem, pịdi nyina ẹmoogh ịnyaam ọmerenyan oomo ạraraar phọ ịphen osi eekuna ḅịle rꞌọmeeraam aghisigh Ọony phọ Oye.”
37 #
Luk 19.47
Siḍughul-otu phọ ịpe phọ ạJizos ạtughemi ghan sịphe Otu Ịiḅereghi phọ, kụ amite ghan dulhe ạghi ẹpe Eegum Ọlivs kụ ạrol ghan ẹḅaal. 38Oomo awe phọ ụghi ghan eḅon ạḍiroor sịphe Otu Ịiḅereghi phọ ọnaghanan ịpe ọdi kạkaaph bọ.
Currently Selected:
Luk 21: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
