Luk 19
19
ẠJizos rꞌạZakios
1ẠJizos ạḅeeny ẹmha aJeriko raten, 2kụ oniin oye ạrol li ẹpe phọ dị oghol mọ ạZakios. Ọdi kụ uwo ẹmhu ạbuphe rọbonyi ghan bọ iisogh phọ, kụ ọolha kẹn ni. 3ẠZakios ạwa ni ọmiin ạJizos, kụ aḍikper phọ ọdi ímeera rꞌaḍita awe phọ. 4Kụ aghiil aḍia ghisigh ạsiiny ạnyu oreeny dị oghol mọ ạsikamor. Ọdi alegheri ni mọ ạJizos katen ni sịphe. 5Kụ ạJizos aru asi sịphe phọ kụ aphogh ạnyu, kụ ạḅeni nyọdi mọ, “Zạkios, gboogborion asoor! Mị kạtol kꞌạna rodon.”
6Kụ ọdi aagborion asoor, kụ ạpham Jịzos rꞌọḅaal ologhi asiom otu. 7Kụ awe phọ ọmiin bọ ugum ni mọ ọdi mạghi iiruen kꞌoḍighinom ịkaraph.
8Kụ ạZakios ạmeera kụ ạḅeni Ọmoogh-we phọ mọ, “Oye phọ, mịin aani. Mị kadi ẹelha phọ ạmi ịyal abin, kụ mị ạsighe muniin abin ạngo rukulom, kụ eḍighi ịyaar dị mị malhe ghan oye ipeel, mị kạloghonaan ni ọḅar inya amem.”
9Kụ ạJizos ạḅeni nyọdi mọ, “Rodon phọ, ạpeleeny mạteeny aani otu phọ ọphon. Oye phọ ọphon ọnyo ẹemara Ebraham kẹn ni, 10#Mat 18.11ịdi eḍighi bọ Ọony phọ Oye aru ọwa ạbuphe mophe bọ rꞌọphelom ạbidi otene.”
Aḍidogh dị ọsighe ipoḍi agol kụ odoghom
(Matiu 25.14-30)
11Kụ ạJizos adoghonaan ḍidogh phọ ạḍien we phọ ạbuphe ọnaghan bọ ịphen phọ dị ạghaaph bọ. Ọdi mạkaraghi rasi Jeruselem, kụ bịdi ugbiom ghan mọ ịduon sịen ọmar phọ kꞌẸnaan rạwa ni ọnuun oru. 12Loor ịduon phọ, ọdi ạḅem ni mọ, “Oye egbogh eghun ạḍua ni ạghi eelhe dị ẹkel iboom ịlo ozua eghoony ọdaam ẹmha. 13Tụtu ọdi kạki bọ, ọdi ạmagh ni ḍioph ạrebene phọ ọdi aakpomoghi, kụ ạngo ghan tọrobo ọnyo ạbidi oniin oniin okpoki-agol kụ ạḅeni bịdi mọ, ‘Ịsighe ikpoki phọ ịphen emuulom ghan ḍighi tụtu mị arigheel.’ 14Kụ aweye ẹmha phọ ọdi ụlogh ni nyọdi ḍien kụ orom dom ọghi ọḅem mọ, ‘Yoor úmeera mọ oye phọ ọphon ạda ẹmha phọ ayoor.’
15“Kụ uzu ni eghoony ọdaam ẹmha phọ ogbogh oye phọ ọphon phọ kụ agbi oḅula. Oru osi phọ bịn ạtooghi mọ oomo ạrebene phọ ọno ạngo bọ ikpoki phọ oru ọteeny nyịno ogbiighi sụo lọ bịdi mọmooghom ikpoki phọ. 16Ọḅel phọ amite ạḅeni nyọdi mọ, ‘Oye phọ, ọḅaram rꞌọpo nạ ụngo bọ ịmi, mị ạmoogh bọ ḍioph ipoḍi.’ 17Kụ ọdi mọ, ‘Maḍighi. Nạ ogey ẹbene. Ịduon nạ arue bọ ni ạphamaghan mọony phọ ịphen, nạ kapogh ḍioph ạrama.’ 18Ẹbene phọ ọpo amuneniom bọ ịyal phọ aru ạḅeni nyọdi mọ, ‘Oye phọ, ọḅaram rꞌọpo nạ ụngo bọ ịmi, mị ạmoogh bọ oogh ipoḍi.’ 19Ọdi ạḅeni nyọon mọ, ‘Nạ kapogh oogh ạrama.’
20“Kụ ọnon aru ạḅeni nyọdi mọ, ‘Oye phọ, pọono opoḍi ạna. Mị ụkagham ni ạpookisi bịn aseere. 21Mị ughiilaan ni nyịna ịdi eḍighi bọ nạ ạkpar ri ẹzo. Ịlo ítu ịlo ạna, nạ rạsighiogh ni. Ịlo nạ úḅeph, nạ rabugha ni.’ 22Kụ ọdi mọ, ‘Nạ ọkaraph ẹbene, mị kạsighe ḍụghum ọnhu phọ ạna kụ asophom aphume nyịna. Nạ ulegheri ni mọ mị ạkpar ri ẹzo dị rạsighiogh ghan ịlo ítu ịlo ạmi, ạḅile rabugha ghan ịlo mị úḅeph. 23Mọ nạ ụsighe ghụn ni ikpoki phọ ạmi ạlogh bạnk, ọbo mị mạmoogh ọḅar sịen mị arigheel bọ.’
24“Kụ ọdi ạḅeni bụphe ọmeregha bọ okoom mọ, ‘Ịboor opoḍi agol phọ nyọdi ẹngo nyọpo ạmoogh bọ ḍioph phọ.’ 25Kụ bịdi ọḅeni nyọdi mọ, ‘Sịs, oye phọ, ọdi ạmoogh bọ ḍioph ipoḍi.’ 26#Mat 13.12; Mạk 4.25; Luk 8.18Kụ ọdi mọ, ‘Mị rịḅeni ghan inyina mọ nyọpo ạmoogh bọ Ẹnaan kẹloghonaan ni ọḅar, kụ ọpo ụ́moogh bọ ghạlamo rꞌịyal-ikpo ịlo ạmoogh aani Ẹnaan kẹbonyi ni. 27#Mat 25.14-30Kụ ịsighe oomo phọ ạbuphe ụlogh bọ ịmi ḍien phọ kụ úmeera bọ mọ ạmi uḍighi ọdaam ẹmha ạbuno phọ eru ẹze sịen ghisigh ạmi.’”
Ọsaram Jịzos osiemi Jeruselem
(Matiu 21.1-11; Mạk 11.1-11; Jọn 12.12-19)
28ẠJizos rọghaaph bọ ịduon phọ kụ anyeene ọghi aJeruselem. 29Kụ roru bọ rotuman Betfagi rꞌaBetani, sịphe Eegum Ọlivs phọ, kụ arom ịyal ạbumatuan ọdi 30mọ, “Ịki ẹmha phọ ẹpe nyina rẹmiin bọ. Nyina esi, nyina kẹmiin ni ẹnam dị ọkpooghi, dị oye kőḍigh ghan. Ịkatan ẹsighe iruom sịen. 31Kụ oye lọ ipuru inyina mọ, ‘Ịdipho nyina reḍighi ghan ika?’ ịḅeni mọ Ọmoogh-we phọ ạmoogh ni ịyaar oḍighinom ọdi.”
32Kụ bụphe orom bọ ọghi bọ osi, ụmiin ni oomo ịdipho ọdi ạḅeni bọ bịdi. 33Bịdi odi rọkatan ghan kụ bụphe ọmoogh bọ ạsu phọ upuru ni bịdi mọ, “Iḍighi ika kụ nyina rẹkatan bọ ẹnam mọ?”
34Kụ ạbumatuan phọ ọphagharanaan mọ, “Ọmoogh-we phọ ạmoogh ni ịyaar oḍighinom ọdi.” 35Kụ bịdi ọsighe ẹnam mọ oruom Jịzos, kụ ọkporonaan rụsuoma ạbidi ozuughiom ọman ẹnam mọ, kụ ọloghonaan nyọdi ḍịghaagh aḍigh. 36Ịdipho ọdi aghiilom bọ rạki, awe phọ ụsighe ghan ni rụsuoma ạbidi ọdeeghi oḅodo phọ.
37Ịduon ọdi rasoor bọ ḍịeri phọ ạḍighaagh Eegum Ọlivs kạabeeph Jeruselem, kụ aḍita ạbumatuan phọ ọdi omiigh ọseph roboom ghan Ẹnaan rꞌeboom ẹḍogh esi oomo iboom ịiḍaany phọ ịpe bịdi mọmiin bọ, 38#Ạsuo 118.26mọ, “Ẹnaan ẹseph ni ọdaam ẹmha phọ aghol bọ ḍien Ọmoogh-we phọ kụ aru. Ẹepho rꞌeghuan ẹrolonaan Ẹnaan, ẹpe ạnyu phọ!”
39Kụ buniin aFarisi phọ ọrol sịphe aḍita awe phọ ọḅeni Jịzos mọ, “Ọtughemia, tọ ạngo bụmatuan phọ ạna mọ oḅoroghian.”
40Kụ ạJizos mọ, “Mị rịḅeni ghan inyina mọ bịdi oḅoroghian, pọ asighiigh phọ ịphen ghụn ni kụ kẹlooghi.”
ẠJizos amoghinaan Jeruselem
41ẠJizos ạtol rapogh kụ rọmiin ẹmha phọ kụ amoghinaan 42ạḅem mọ, “Ḅẹm loon mọ rodon nyina ilegheri ni sịphe ẹepho phọ anyina edi bọ, kụ ạri nyịidipho mạaghinaan inyina, 43ịdi eḍighi bọ ariiḍio ketu ni dị ạbumulogh-ḍien anyina kọḅiir iikpe ikoom inyina ọlogh ogbo. 44Kopiemi ni ẹmha phọ rꞌoomo awe phọ ạbuphe odi bọ rokool phọ ọmadan. Rꞌaḍiniin aḍighiigh ạnyu ạḍinon kọbile dị kőlhereghi, ịdi eḍighi bọ nyina ị́logh elegh mem mọ ọpo Ẹnaan eru bọ ọphel anyina.”
ẠJizos ạki aḍigh Otu Ịiḅereghi phọ
(Matiu 21.12-17; Mạk 11.15-19; Jọn 2.13-22)
45ẠJizos aḍigh bọ sịphe Otu Ịiḅereghi phọ amiigh ni ophorogh ạbuphe romuul bọ ḍighi phọ 46#Azay 56.7; Jer 7.11kụ ạḅeni bịdi mọ, “Ọge ni sịphe Ạḍinya Iigbia phọ mọ Ẹnaan ẹḅem mọ, ‘Otu phọ ạmi kokol mọ Otu Ịiḅereghi.’ Kụ nyina mẹḅile ekiton eḍighi otu ạruḅa.”
47 #
Luk 21.37
ẠJizos ạtughemi ghan ni sịphe Otu Ịiḅereghi phọ ḍio etum ḍio. Ạbuo ạrumhu ariil ạrikia phọ, rꞌạbutughemia iilogh phọ rꞌikpolom awe phọ ụwa ghan ni oghiigh ọdi, 48kụ ịlo oḍighi úlegheri, ịdi eḍighi bọ oomo awe uzuumaam ni ọnaghanan ghan ịpe ọdi rạkaaph bọ.
Currently Selected:
Luk 19: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
