Emiighom 50
50
1ẠJosef ạghi aghurughi ọde phọ ọdi amoghi, kụ ạkpun nyọdi. 2Kụ ạJosef ạto ạḅeni riil eekonom mọ oḍighi ịdi aḍizu ọde phọ ọdi kẹnuun ẹpu tụtu oḍi, kụ bịdi ọtuugh oḍighi. 3Kụ rẹman inyadi aḍughul-otu, esi eḍighinom ịyaar ạbidi ịlo oḍim lọ oseere. Kụ awe Ijipt phọ omoghi nyọdi oḍualdi aḍughul-otu.
4Mem dị ariiḍio okughuḍi phọ emunughan bọ, ạJosef ạghaaph ạḅeni kꞌọdaam eelhe phọ mọ, “Eru mạar dị ighirigiir ạmi risiphanaan ni inyina, pọ ịḅeninaan ịmi ọdaam eelhe phọ mọ, 5#Emi 47.29-31‘Ọde phọ ạmi ụḅeni ịmi mọ mị ukunya ịduon, mọ ọno amugh, mọ mị ụki uḍi nyịno ẹpe oḍi phọ ọno aguph bọ ẹpe ade phọ aKenan.’ Kụ nyịidipho mị rạaḅereghi ni nyịna mọ meera mị ụki uḍi ọde phọ ạmi ẹpe phọ kụ mị aḅula.”
6Kụ ọdaam eelhe phọ ạḅeni nyọdi mọ, “Kịa ạtuugh ịpe nạ aghunya bọ aḍi ọde phọ ạna.”
7ẠJosef aḅetenu ạghi oḍi ọde phọ ọdi. Oomo awe iiḍighi ọdaam eelhe phọ, ikumoor awe kꞌọdaam eelhe phọ, rꞌoomo ikumoor awe phọ Ijipt ụdaph ni Jọsef. 8Kụ oomo ọto ạJosef rꞌabumor phọ ọdi, rꞌọto ọde phọ ọdi, ọghi aani. Ịbam ạnmuny, iyool-ịga rꞌạrutu-ịga, rꞌạsinam mọ ạbidi bịn kụ ịdi bịdi ụ́pam, ụwile ni ẹpe ade phọ aGosen. 9Aḍita phọ ọghi bọ ụbugh ni; bụlo oḍiku rughuugh-ude, rꞌạbudi oḍiku rụsu.
10Bịdi ọghi osi ẹpe arukue eḍien phọ ẹpe Atad, ạga emitenom erumuḍio phọ ạJodan, kụ bịdi omoghi yogh, okururu yogh. Kụ ạJosef akughuḍi ọde phọ ọdi oḍual aḍughul-otu. 11Mem dị awe eelhe phọ aKenan ọnaghan bọ ọotughu emoghi phọ, rꞌoghur ịdi awe phọ Ijipt rọkughuḍi bọ oye phọ ẹpe Atad, bịdi ọtuan ịduon phọ oghol esi phọ mọ Ebel Mizraim (ọto awe Ijipt).
12Ạnmuny phọ ọdi ọtuugh ịpe ọdi ạḅeni bọ bịdi oḍighi. 13#Iiḍ 7.16Ạnmuny phọ ọdi urool li nyọdi osiemi Kenan, oḍi nyọdi ẹpe asikol eḍum mọ aMakepela, ẹpe Ebraham agho bọ aḍighi ẹkaraph eḍum, esi Efron ọlo ạHitait phọ, oten bọ kụ ọteeny Mamre. 14ẠJosef rọghi bọ roḍi ọde phọ ọdi bịn bịdi oḅula Ijipt, ạJosef rꞌabumor phọ ọdi rꞌoomo ạbuphe ọdaph bọ nyọdi.
ẠJosef ạadereghi bumor phọ ọdi
15Mem dị abumor phọ ạJosef ọmiin bọ mọ ọde phọ ạbuno mamugh, kụ bịdi ọḅem mọ, “Oḍighom ịyaar, rolegheri ghan bọ, ạJosef kụlogh iyira ḍien uḅulemian iyira ịkaraph phọ ịpe yira oḍighi bọ nyọdi.” 16Kụ bịdi orom ọokpaany mọ ạghi ạḅeni Jọsef mọ, “Ọde phọ ạna ụḅeni ni iyoor ịyaar kụ agbi bọ omugh, 17mọ yoor oru ọoḅereghi nyịna mọ, ‘Seseeny, sạr ạwilenaan bumor phọ ạna ịkaraph phọ ịpe bịdi oḍighi bọ nyịna.’ Kụ nyịidipho yoor rọḅeni ghan nyịna mọ seseeny, sạr ạwilenaan ịkaraph phọ ạbuphe rooseeny ghan bọ Ẹnaan phọ ọde phọ ạna.” ẠJosef amoghi ni mem mọ ọdi ạnaghan bọ dom mọ ạḍien.
18Kụ abumor phọ ọdi ọghi okpuḍughian ruwol ọdi kụ ọḅeni nyọdi mọ, “Yoor ạrebene ạna.”
19ẠJosef ạḅeni mọ, “Kékiil ruugu. Mịna kụ Ẹnaan phọ? Kị́duon. 20Nyina, nyina ịitughenam ni ịmi ịkaraph, kụ Ẹnaan phọ igbiighiom ni igeny, kụ eḍighi bọ ịphen phọ, ọbo ịbadi awe ọrol ịdipho bịdi odi bọ rodon. 21Nyịidipho kẹ́moogh oghiilaan. Mị kiikonom ni inyina rꞌịbam ạnmuny phọ anyina.” Kụ ọdi ạadereghi bịdi, adughe ọnhu kụ ạghaaphan rꞌạbidi.
Aḍuugh phọ ạJosef
22ẠJosef rꞌọto ọde phọ ọdi orugh ẹpe Ijipt. ẠJosef ạman oniin okuron rꞌiḍioph ạsia. 23Ọdi ạmiin ni nmụny Ifraim ịraar oghiil, rꞌạnmuny bụo aMakir ọony phọ ạManase, ụmar sịphe rụgbo ạJosef. 24ẠJosef ạḅeni bumor phọ ọdi mọ, “Mị kamugh. Kụ Ẹnaan kịsighe ni inyina sịen ade phọ ạḍien asiemi ẹpe ade phọ ạḍiphe ọdi aguanaan bọ Ebraham rꞌẠizik rꞌạJekob.” 25#Ẹḍua 13.19; Jos 24.32; Hib 11.22Pọ kụ amem dị ạJosef ạto ạḅeni nmụny phọ Ịzirel mọ oghiran ịyo kụ ạḅem mọ, “Iguanaan ịmi mọ, mem dị Ẹnaan kirorori inyina esiemi de phọ ạḍiphe, nyina kẹgba ni iphorobo phọ ạmi ẹḍuanam ẹphen.” 26ẠJosef ạman oniin okuron rꞌiḍioph ạsia kụ agbi omugh. Kụ bịdi oseere loor phọ ọdi ịlo kạ́pu, kụ ọlogh igbe oḍim ẹpe Ijipt.
Currently Selected:
Emiighom 50: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
