Emiighom 49
49
Ikpo ọnhu dị ạJosef akureriom
1ẠJekob ạmagh nmụny phọ ọdi kụ ạḅeni bịdi mọ, “Iikpomoghan ẹnaghan, mị kịḅeni inyina ịdi kimitenaan inyina mem dị retu.
2“Iikpomoghan egina esi ẹnaghan, nyina ạnmuny ạJekob.
Ịnaghanan Ịzirel ọde phọ anyina.
3“Ruben, nạ kụ ọkpana ạmi, nạ kụ ịnyaam ạmi,
Rꞌọḅel ọony ugheel ạmi,
Oye ịikpo rꞌobagaam esi oomo ạnmuny phọ ạmi.
4Nạ ugiriph ịdipho ạmuum-aḍigho dị reduphuron,
Nạ káḍighi ọkaraghi oḍiemiom
Loor ịdipho nạ ạrolan bọ esi rꞌạnir phọ mị ạgaany bọ
Nạ ạḅile ạphue ẹmina ọde ạna.
5“ẠSimion rꞌaLivai ạnmuny-onhiin.
Bịdi ọsighe rẹenema ạbidi rọwaam ẹgham.
6Mị káḍighom aani rạghaaph ẹkul ạbidi
Ḅịle mꞌọrol aani aruuzue ạbidi;
Ịyaar rẹghagh ologhi ạbidi bịn ọko enu;
Kụ obunughi ruwol ilephiri ạsinam mụdi ephegh.
7Itulughian ẹrolonaan ọghagh ologhi phọ ạbidi dị raamor ịdipho ạnian;
Rꞌofughughuuny ạbidi loor esi dị akpakara ạpughan.
Mị kạwalalami bịdi sịphe ade phọ Ịzirel,
ạgbarion bịdi igbo awe phọ ạJekob.
8“Juda, abumor phọ ạna koboom ni nyịna.
Nạ kạpoghogh ghan rokpooko ạmulogh-ḍien ạna.
Ạnmuny ọde phọ ạna kokpuḍian ni ghisigh ạna.
9 #
Igb 24.9; Ogon 5.5 AJuda ạkigh ịdipho ạnam-dịka,
Dị kakiigh ẹnam mọ bịn aḅula marugh ọdi;
Ạmina ni, ạnaani kụ ịyaar kẹ́eḅaghami.
10AJuda kạpam ni ịkpara ọdaam ẹmha,
Kụ ạnmuny ạnmuny ọdi kụ kọda ghan oomo amem.
Areelhe kotuom ghan nyọdi ruphua,
Kụ okpuḍian ọngo nyọdi rughuenian.
11Ọdi kạkpo ghan mọony ẹnam adool ọdi zin avain,
Ạkpo ghan mọony ọya ạsu phọ ọdi zin avain.
Ọdi raatolom ghan rụsuoma ọdi miim dị ạtogh ịdipho ịḅaal.
12Ariḍien ọdi ẹkigh ịḅaal loor ọphughol ghan amiim;
Ạralaal ọdi mẹḅaal loor ọphughol mạmaam ạnam.
13“ẠZebiulon katughogh ghan ọgbal otu-ḅualhe.
Ọdi kạtologhu ghan risiḍia arughuugh.
Eelhe ọdi kẹkel li esi ẹpe Saidon.
14“Ịsaka ọ́nighe ópu ẹnam adool
Dị ekpuḍughian mọ ọsaany dool. 15Ọdi ạmiin ni mọ ạdol esi ophooghian phọ ọno mẹnighe ni,
Ḅịle mọ ade phọ ạḍio ọḅaal ologhi.
Kụ azumeri ọman ọdi orool adool;
Kụ ọkpaariom ni okumuan ịdipho ẹbene.
16“ẠDan kaagboonaan ghan we phọ ọdi ịiruen.
Kọsighe bịdi ogbiom omuneniom rughunughun phọ Ịzirel.
17ẠDan kạkigh ẹkaraph-ịyaar dị edi ọgbal eten,
Ḍịḅom pạ eten phọ,
Dị kalomi ghan riighim ạsu phọ,
Pịdi ọpo aḍigh bọ ameel ạghi ọman.
18“Ọmoogh-we, mị rakori ghan ọphel otene phọ ạna.
19“Gạd, aḍita ạruḅa koko ni nyọdi okitonom,
Kụ ọdi kụ kạkpar apu bịdi.
20“Ade Ạser ade ẹnuum keḍume ni eḍien iboom.
Ade phọ ọdi kemitiom ni eḍien ọngo ạbudaam.
21“ẠNaftalai ọnuen dị rakilighuan ghan bịn oopho.
Ọdi ạmaraghi nmụny dị ẹmoogh ịma aḍizu.
22“ẠJosef ọla dị ramuum ghan iimuma sịphe ọgbal aghinini.
Ịla ọdi emiteghu enyoroghuom iikpe phọ.
23Ạbumulogh-ḍien phọ ọdi ozuom nyọdi rꞌịikpo
Bụo ịtaph ịkpina ụraḅal nyọdi,
24Kụ ạkumugh ọpo ọdi óphiigha,
Ạmoogh ịnyaam, kụ ạraghaagh phọ ọdi ẹkpar ri
Esi ịikpo ạraghaagh Egbogh Ẹnaan phọ ạJekob,
Rꞌaḍien Opoghom iyool-ịga phọ, Okoriom mọ Ịzirel.
25Ẹnaan ọde phọ ạna kụ rẹloghonaan nyịna ḍịghaagh.
Ẹnaan Oomo Ịikpo phọ kụ rẹngo nyịna ḍịseph:
Ḍịseph ọlophia dị ạḍua ẹpe kꞌạke kụ aru,
Ḍịseph ạmuum dị ẹḍua ẹpe aḍigher ade kụ eru,
Ḍịseph ọoloogh ạsinam rꞌạnmuny,
26Ḍịseph ịbiakpa rꞌạsifalawa,
Ḍịseph igbaany aruugum
Rꞌaroogbolom kꞌagee-pọ.
Ạḍiseph phọ ạḍien phọ kezuom ni ẹmhu ạJosef,
Oye phọ ọpo ọsaḅar bọ sịphe ogbo abumor phọ ọdi!
27“ẠBenjamin ạkigh ịdipho elhom ẹnam dị odi ghan oghiigh bịn kạba.
Ḍịroor ọdi ạany ghan ịnam lọ ọdi ạze; dulhe adi ghan ruphua lọ ọdi awum.”
28Bụen phọ kụ aḍioph rꞌịyal arughunughun phọ Ịzirel, kụ ịphen kụ ịdi ọde phọ ạbidi ạḅaanaan tọrobo ọnyo ạbidi uwo ạḍiseph rꞌạḍiseph.
Aḍuugh phọ rꞌamaḍi phọ ạJekob
29Kụ Jẹkob ạto ạḅeni nmụny phọ ọdi mọ, “Nyịidipho mị kạki bọ ọḅophoghan rꞌawe phọ ạmi esi aḍuugh, iḍi ịmi sịphe epogh asighiigh phọ oḍi bọ bụrude phọ ạmi, 30#Emi 23.3-20ẹpe aleeny phọ aMakepela, koten bọ ẹpe erumuḍio remite ghan bọ kụ ọteeny Mamre eelhe phọ aKenan, nyẹpe Ebraham agho bọ ḍịghaagh Efron ọlo ạHitait phọ ịlo oḍiighi ghan awe. 31#Emi 25.9, 10; Emi 35.29Ịsiphe kụ ẹdi oḍi bọ Ebraham rꞌaSera ạnir phọ ọdi. Ịsiphe kụ ẹdi oḍi bọ Ạizik rꞌạRibeka ạnir phọ ọdi. Ịsiphe kụ ẹdi mị aḍi bọ Lia. 32Ugho de rꞌepogh phọ ḍịghaagh awe ạHitait. Iḍi ịmi sịphe phọ.” 33#Iiḍ 7.15ẠJekob rọghaaph bọ ịphen phọ rọmadan rọḅeni nmụny phọ ọdi, bịn ạsighe ruwol phọ ọdi ạḅam ạnyu ẹmina phọ, bịn amugh, kụ ọsighe nyọdi ọghiomonaan we phọ ọdi ẹpe ọmar iḍim.
Currently Selected:
Emiighom 49: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
