Ẹḍua 1
1
Ịdi bụo Ijipt ọmiine we phọ Ịzirel
1 #
Emi 46.8-27
Ịphen kụ asiḍien ạbuphe ọdaph bọ Jẹkob kụ ọghi Ijipt oye ye rꞌọto ọdi: 2Ruben, Sịmion, Livai, Juda, 3Ịsaka, Zẹbiulon, Bẹnjamin, 4Dạn, Nạftalai, Gạd rꞌẠser. 5Aḍita oomo ạnmuny phọ ạJekob ụman ni oḍualdi awe; mebia ni dị ạJosef ọony phọ ọdi odi ghan bọ ẹpe Ijipt. 6Iru ẹteeny mem dị ạJosef rꞌabumor phọ ọdi rꞌoomo oghiil phọ ọpo phọ omuughu omuneen, 7#Iiḍ 7.17kụ ọkuruḅaka ẹemara ẹemara awe phọ Ịzirel adugh ni, kụ ọmaraghi oḍiza kụ ọkpar ịikpo, ọḅile oleeny eleeny oomo ade phọ Ijipt.
8 #
Iiḍ 7.18
Kụ ẹteeny mem dị omoom ọdaam eelhe dị Jọsef úlegheri aru ạda Ijipt. 9Kụ ọdi ạḅeni we phọ ọdi mọ, “Awe Ịzirel phọ ạbuen moḍiza iboom ọkpar upu iyira. 10#Iiḍ 7.19Eḍighi mạar dị ẹgham esoor, bịdi otue ni oḍighan bụmulogh-ḍien kụ eenom iyira kụ ogbi ọḍua sịen ade phọ osumughu. Itu ọwa reten oghome aḍita phọ ạbidi.” 11Pọ kụ ẹdi bụo Ijipt phọ ọmaaghi bụo ạrumhu iiḍighi, kụ ọḅeni bịdi mọ owinighiom ruwaloor awe phọ Ịzirel, ọngo bịdi rukumuan ịlo bịdi kọmiinom. Bụen phọ kụ ạbudi ụkpaariom bọ bịdi ọloghonaan ọdaam eelhe phọ ịyal igbogh ạramha Pitom rꞌaRameses, dị keḍighi rikpisi ooko ghan aruphua phọ ọdi. 12Ịduon bịdi rọmiine bọ we phọ Ịzirel, pọ kụ amem dị awe phọ Ịzirel ọḅile roḍiza ghan kọrara de phọ. Awe phọ Ijipt omiigh oghiilaan awe phọ Ịzirel kụ oḍighi ịdi ạdol ạrebene phọ ạbidi eeph iboom. 13-14Bụo Ijipt phọ orom we phọ Ịzirel odoghoḍi aruutu rꞌoḍighi iiḍighi iizo, kụ ọnma ighirigiir ọ́rol. Kụ oseere bịdi dọl ạrebene mọ ọzer ghan ọogha ọḅolom abiriki, kụ iloghi ạbidi ị́ḅaal loor ọdo kịrokiro ịikpara arukumuan dị ịghor ụ́min.
15Pọ kụ amem dị ọdaam eelhe phọ Ijipt arom ịyal ạbumaramia phọ ạnmariir aHibru dị oghol mọ aSifra rꞌaPua. 16“Mọ mem lọ nyina reḍighi oḍighi ạbumaramia phọ anyina esi ạnmariir aHibru, ịmaar ghan ephogh. Ạmar olephiri pọ eghiigh, aḍighi ọnyani pọ ẹwile.” 17Ạbumaramia phọ ughiilaan Ẹnaan, kụ ụ́daph ịpe ọdaam eelhe phọ Ijipt ạḅeni bọ bịdi kụ oḍighi, ụḅile ghụn ọwile lephiri ạnmuny bịn ụ́ze. 18Ọdaam mọ Ijipt ạmagh bụmaramia phọ kụ apuru bịdi mọ, “Eeghe kụ iḍighi kụ nyina ị́tuugh bọ ịpe mị ịḅeni bọ inyina kụ eḍighi, nyina rẹ́ze bọ lephiri ạnmuny phọ?”
19Ạbumaramia phọ ọphagharanaan ọdaam eelhe phọ mọ, “Ạnmariir aHibru phọ ụ́tol ịdipho ạnmariir Ijipt. Bịdi ọkparagh ni dị tụtu yoor rosi aani bịdi mọmaraghi.” 20Ẹnaan ịrolonaan ni rꞌạbumaramia phọ kụ eḍighi ghan bịdi igeny. Kụ awe phọ Ịzirel oḍiza ghan rꞌịnyaam. 21Loor ịdipho ạbumaramia phọ oghiilaan bọ Ẹnaan bịdi ụḅeeraan ni nyọdi, kụ ạngo bịdi nmụny bụo ạbidi. 22#Iiḍ 7.19Ekureriom mọ, ọdaam eelhe phọ ạlogh ologh ạḅeni we phọ ọdi mọ, “Tọrobo olephiri ọony lọ ạnir ọlo aHibru ạmar isumeeny ghan Ọphiiny aNail, kụ eru ọnyani pọ ẹwile.”
Currently Selected:
Ẹḍua 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
