Emiighom 34
34
Ịdi ạSekem ạka Daina ạphue
1Eniin aḍio aDaina ọnyani phọ aLia ạmaranaan bọ Jẹkob ạghi ọmiin ạnmanyaan ẹmha phọ. 2Mem dị ạSekem, ọony phọ aHamor ọlo aHivait phọ, ọpo aḍighi bọ ọdaam eelhe phọ ẹpe, ạmiin ọnyani phọ bịn asiph nyọdi ạka. 3Oomo ologhi phọ ọdi odi esi aDaina ọnyani phọ ạJekob. Ọdi ạphomoghian nyọdi, alher ẹeḍiom rꞌoodugha ọnhu kụ ạghaaphan ghan rꞌọdi. 4ẠSekem ạḅeni Hamor ọde phọ ọdi mọ, “Uphinanaan ịmi ọnyani phọ ọphon.”
5ẠJekob ạnaghan mọ ạSekem mạphue Daina ọnyani phọ ọno kụ, loor esi dị ạnmuny phọ ọdi mọsighe ịnam ọkimom ịḅal, ọdi ịyaar óḍighi tụtu bịdi oḅula. 6AHamor ọde phọ ạSekem amite ạghi ọḅaanaan ạJekob 7mem dị pụruku ạnmuny phọ ạJekob rotigheel ẹpe de ịḅal ịnam mọ, kụ ephin iloghi ạbidi iboom ọnaghan ịphen phọ. Ịghagh ni iloghi phọ ạbidi ịdi eḍighi bọ ạSekem masooromi Ịzirel ạmagh elologhi; ọrolan esi ọnyani ạJekob, ịphen phọ ị́kpe oḍighi. 8AHamor rꞌạbidi ọghaaphan kụ ạḅem mọ, “Oomo ologhi ọony phọ ạmi odi esi ọnyani phọ. Mị rạaḅereghi ni nyịna, kạ́le, meera ọdi aphin ọnyani phọ. 9Eḍighi ịdi yira kooḍikuan pineen, awe ayoor rꞌawe anyina koophinighan. 10Kụ nyina kẹtolan sịen eelhe phọ rꞌayoor, nyina ketue ni etugh tọrobo ekpisi lọ ịḅeeraan inyina, emuul ḍighi rꞌẹereegh, ẹmoogh ruphua eḍumom.”
11ẠSekem ạḅeni ọde phọ rꞌabumor phọ aDaina mọ, “Iḍighi iiḅi phọ ịphen. Tọrobo ịlo nyịna ịḅeni ịmi mị kạngo ni. 12Ịḅeni ịmi tọrobo aruunmo lọ nyina ẹwa ḍịghaagh ạmi kụ eseere ikpoki ẹmhu phọ anyina ẹghiom ạnyu ịlo ịḅeeraan inyina, kụ ọlo kị́bugh ịpughan, mị kịngo inyina tọro ịyaar lọ nyina epuru; kụ ọlo ịnughenyan ni ịmi ọnyani phọ anyina.”
13Ạnmuny phọ ạJekob ọsighe ologhi ẹḍim rꞌiigbegheḍiom kụ ọphagharanaan Sẹkem rꞌaHamor ọde phọ ọdi, ịdi eḍighi bọ ọdi mạphue bọ Daina umarani phọ ạbidi. 14Bịdi ọḅeni bịdi mọ, “Yoor kómeera umor ạnir-ephoph ayoor ạghi ilhom kꞌoye dị úḍuna. Ịpe keḍighi roofola esi ayoor. 15Kụ yoor kómeera emuton dị nyina kẹtol ịduon yoor odi bọ reten oḍun ghan tọrobo olephiri ọony. 16Eḍighi ịduon, pọ yoor omeera ni ophinighan. Yoor kotugh ogbo anyina kụ oḍighi buniin awe rꞌanyina. 17Kụ eru mạar dị nyina kémeera ịphen yoor ọghaaph bọ, pọ yoor kọsighe ni ọnyani ayoor ọḍuanam.”
18Ọghaaph phọ ạbidi ạḅeeraan Hamor rꞌạSekem ọony phọ ọdi. 19Kụ onyugheel ọony phọ óphiemi mem oḍighi ịpe bịdi ọḅem bọ, ịdi eḍighi bọ ọdi mạmoogh ẹphomoghian esi ọnyani phọ ạJekob. Ọdi kụ ạkar ạmoogh ịyaar oḍighinom sịphe eghun phọ ạbidi.
20AHamor rꞌạSekem ọony phọ ọdi ụghi ni esi ookpomoghan sịphe eḍighom ẹmha phọ kụ ọghaaphan we ẹmha phọ ạbidi mọ, 21“Awe phọ ạbuen ụphomoghian ni iyira, sighiton iyira rụ́wa kụ iḍighi ọwilenaan bịdi orugh sịen ade phọ omuul ḍighi, ịdi eḍighi bọ ade phọ ẹmanam ni bịdi orugh. Bịdi rꞌayira ooḍikuan pineen, yira ophinogh nmạnyaan bụo ạbidi, bịdi ophinogh nmạnyaan bụo ayira. 22Ịdi yira koḍighi kụ bịdi rꞌayira ooteneghian oḍighi oniin oye ịduon: oḍun ghan tọrobo olephiri ọony sịen ogbo phọ ayira, ịdipho bịdi oḍun bọ. 23Ạsinam mọ ạbidi rꞌaruphua phọ ạbidi rꞌịnam mọ ạbidi keḍighi ni ịlo ayira? Itu omeera bịdi orughan rꞌayira.” 24Kụ oomo awe phọ ọrol bọ sịphe eḍighom ẹmha phọ omeeraam Hamor rꞌạSekem ọony phọ ọdi; bịn oḍunogh oomo alephiri ạnmuny phọ ọrol bọ sịphe ẹmha phọ.
25Ịraar aḍughul-otu reten, mem dị ạrelem oḍun phọ ke̋gheel, ịyal ạnmuny phọ ạJekob, ạSimion rꞌaLivai abumor aDaina, okoph rolhool ẹgham ạbidi reten dị oye úseere ologhi oḍigh ẹmha phọ bịn ọze oomo alephiri awe phọ, 26ọḅaram Hamor rꞌạSekem ọony phọ ọdi ọziom. Kụ bịdi ọsighe Daina sịphe otu phọ ạSekem ọḍuanam. 27Mem dị mọze we ẹmha phọ, bụeri phọ ạnmuny phọ ạJekob owum ruphua ẹmha phọ oḅulemian aroofola phọ bịdi ọngo bọ umarani phọ ạbidi. 28Bịdi ọsighe ḍita iyool-ịga rꞌạrutu-ịga, sịnam mọ, ịnam adool phọ rꞌoomo ạraraar phọ ịpe ẹrol bọ sịphe ẹmha phọ rꞌịpe ẹrol bọ ẹpe iizo phọ. 29Bịdi ọsighiogh oomo aruphua phọ ạbidi, osiphi nmạriir rꞌịbam ạnmuny phọ ạbidi, kụ orool oomo ạraraar dị ẹrol iloghi aruutu ọsighiogh.
30ẠJekob ạḅeni Sịmion rꞌaLivai mọ, “Nyina mẹkom ịiḅaghami rꞌạmulogh-ḍien iseenaan ịmi. Awe phọ ạmi okom. Nyịidipho bụo aKenan phọ rꞌạbuo ạPerezait phọ rꞌayira orughan bọ kookpomoghan uzuom ịmi ịlo oghiigh ạmi ọḅile ọze ọto kꞌayira opiemi.”
31Kụ bịdi ọphagharanaan mọ, “Ị́nighe dị yoor omeera dị kọgilaam umarani phọ ayoor dịadi oliom ẹmha.”
Currently Selected:
Emiighom 34: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
