Emiighom 35
35
Ẹnaan ẹngo ḍịseph Jẹkob ẹpe Bẹtel
1 #
Emi 28.11-17
Ẹnaan ẹḅeni Jẹkob mọ, “Ḅetenu agheel Bẹtel, arugh ẹpe, kụ ạkan sịphe phọ enmeny ạrikia ẹpe Ẹnaan emite bọ egaan esi ạna mem mọ nạ aghiilaan bọ Ịso umor phọ ạna kụ rasuma.”
2ẠJekob ạḅeni ọto ọdi rꞌoomo ạbuphe odi bọ kꞌọdi mọ, “Itoḅologhi oomo iiruen ạrumugh phọ anyina, ẹḅaal, enme rụsuoma phọ anyina. 3Oḅerenu ogheel Bẹtel. Mị kạkananaan sịphe phọ enmeny ạrikia Ẹnaan, ẹpe ịnaghanan bọ ịmi mem ịiḅaghami phọ ạmi kụ ịrolonaan bọ ịmi tọrobo ekpisi phọ ẹpe mị ạghi bọ.” 4Kụ bịdi ọsighiogh oomo iiruen ạrumugh phọ ạbidi rꞌareḅeri-sụa phọ ạbidi ọngo Jẹkob. Kụ ạJekob ạsighe ạghi ạaghi loor azin ạḍiogh dị etuman Sẹkem.
5Mem dị ạJekob rꞌạnmuny ọdi oḅetenu omiigh erelhe, aruugu Ẹnaan phọ asiph ni oomo ạramha phọ ịpe ekoom bọ bịdi, kụ bịdi úporogh nmụny phọ ạJekob. 6ẠJekob ạghi asi ẹpe Luz, ẹpe phọ ạBetel, edi bọ ẹpe eelhe aKenan, ọdi rꞌoomo awe phọ ọdi. 7Kụ ọdi ạkan sịphe phọ enmeny ạrikia, kụ aghol ḍien esi phọ mọ Ẹl Bẹtel, ịdi eḍighi bọ esi phọ ịpa kụ ẹdi Ẹnaan emite bọ egaan esi ọdi, mem mọ ọdi aghiilaan bọ umor phọ ọdi kụ rasuma bọ. 8ADebora, oobia phọ ạRibeka, amugh, kụ oḍi nyọdi zin ạḍiogh pạ esoorom ạBetel, ḍien esi phọ ughol mọ Ạḍiogh Emoghi.
9Ẹnaan ẹḅile emite esi ạJekob egaan mem mọ dị ạḍua bọ ẹpe Mesopotamia, kụ ạseph nyọdi. 10#Emi 32.28Kụ Ẹnaan ẹḅeni nyọdi mọ, “Kọmagh ghan mun nyịna mọ ạJekob, ḍien ạna kokol mọ Ịzirel.” Kụ ọdi aghol ḍien ọdi mọ Ịzirel. 11#Emi 17.4-8Kụ Ẹnaan ẹḅeni nyọdi mọ, “Mị kụ Ẹnaan Oomo Ịikpo phọ. Ọkuruḅaka ạna adugh ạmar amuzeḍi. Areelhe kọḍua esi ạna, ạbudaam-ẹmha kọḍua esi ạna kụ omite. 12Ade phọ ạḍiphe mị ạngo bọ Ebraham rꞌẠizik, mị kạngo nyịna rꞌoghiil ạna bụphe rotu bọ.” 13Ẹnaan ẹwile nyọdi sịphe bịdi ọrol bọ kụ ọghaaphan bọ ẹḍua. 14#Emi 28.18, 19Kụ ạJekob ạmeremi ḍighiigh ẹko sịphe Ẹnaan rꞌọdi ọrol bọ kụ ọghaaphan bọ, kụ amoor miim kụ ạsighe mụnum ạsagharan ẹpe ạnyu phọ. 15ẠJekob aghol ḍien esi phọ Ẹnaan rꞌọdi ọrol bọ kụ ọghaaphan bọ mọ ạBetel.
Aḍuugh phọ aRechel
16Kụ bịdi ọḍua Bẹtel omiigh erelhe ọtol ropogh Ẹfrat, kụ oghunughun rakun Rechel, dị ẹkpaariom nyọdi. 17Oghunughun phọ rakun nyọdi iboom, kụ ọmaramia phọ ạḅeni nyọdi mọ, “Aruugu nyịna kúsiph, ịdi eḍighi bọ nạ kạḅile ạmar olephiri ọony.” 18Ịnyaam ílho mun nyọdi, óloghoma mun loor, kụ amuzaan ḍuugh, kụ ọdi aghol ḍien ọony phọ mọ ạBen Oni; kụ ọde phọ aghol mọ ạBenjamin.
19ARechel amugh kụ oḍi nyọdi ẹpe eten Ẹfrat ẹpe Bẹtilihem. 20ẠJekob ạmeremi ḍighiigh aḍighi ẹko sịphe oḍi phọ, kụ ẹko phọ ẹpe phọ edi ghan sịphe oḍi phọ kꞌarodon. 21Ịzirel aḅetenu amiigh erelhe, kụ ạlogh ogbogo ẹpe ḍịeri phọ ạḍighaagh phọ otu ạnyu phọ Eder.
Ạnmuny phọ ạJekob
(1 Krọnikuls 2.1-2)
22 #
Emi 49.4
Kụ eru eten mem dị Ịzirel arugh sịphe ade phọ ạḍiphe kụ aRuben rꞌaBilha ọyuga ọde phọ ọdi ọrolan esi, kụ Ịzirel ạnaghan kụ ephin ologhi ọdi.
Ạnmuny phọ ạJekob mọman bọ ḍioph rꞌịyal. 23Bụen ạnmuny phọ aLia: aRuben ọkpana phọ ạJekob, rꞌạSimion rꞌaLivai rꞌaJuda rꞌỊsaka rꞌạZebiulon. 24Bụen ạnmuny phọ aRechel: ạJosef rꞌạBenjamin. 25Bụen ạnmuny phọ aBilha ọnyani-otu phọ aRechel: ạDan rꞌạNaftalai. 26Bụen ạnmuny phọ aZilpa ọnyani-otu phọ aLia: ạGad rꞌẠser. Bụen kụ ạnmuny phọ ọmaranaan bọ Jẹkob ẹpe Mesopotamia.
Aḍuugh phọ Ạizik
27 #
Emi 13.18
ẠJekob ạghi asi kꞌẠizik ọde phọ ọdi, ẹpe Mamre (ẹpe phọ ạKiriat Arba rꞌạHebron). Ẹpe kụ ekpisi phọ Ebraham rꞌẠizik orugh bọ. 28Ạizik ạman bọ oniin okuron rꞌọphaanyadi ạsia. 29Ạizik ạkpo ni ageny kụ agbi ọḅophoghan rꞌạburude phọ ọdi omugh, kụ Ịso rꞌạJekob ạnmuny phọ ọdi oḍi nyọdi.
Currently Selected:
Emiighom 35: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
