Emiighom 33
33
ẠJekob azuan Ịso
1ẠJekob aphoophe ghisigh ọdi aphogh kụ ạmiin Ịso rꞌinya okuron awe phọ rꞌọdi rotu bọ, kụ ọdi adiemi nmụny phọ ọdi Rechel rꞌaLia rꞌạnmanyaan-otu phọ ọdi. 2Ạnmanyaan-otu phọ ọdi rꞌạnmuny phọ ạbidi oḍiemiom; aLia rꞌạnmuny phọ ọdi otum; aRechel rꞌạJosef ọrol eekuna ọman. 3Kụ ạJekob aḍia risigh kụ azumeri ẹmhu ọdi oḍual amem ude tụtu ạghi ạteeny umor phọ ọdi. 4Ịso aghiil ạghi ạteeny nyọdi aghurughi nyọdi, ạpham orum ọdi kụ ạkpun nyọdi, kụ ịyal ạbidi omiigh emoghi. 5Kụ Ịso aphoophe risigh ọdi ạnmanaghian kụ ạmiin nmạriir phọ rꞌạnmuny phọ, kụ apuru mọ, “Bụen phọ rꞌạna odi bọ sịen ạbuo ạnhian?”
Kụ ạJekob ạphagharanaan mọ, “Bụen phọ ạnmuny dị Ẹnaan ẹngo otelhedom mọ ạna.” 6Ạnmanyaan-otu phọ ọdi orelhe ọobeeph, bịdi rꞌạnmuny phọ ạbidi, kụ oru ozumeri yogh rụmhu ọngo. 7Ḅịle kẹn, aLia rꞌạnmuny phọ ọdi oru ọobeeph kụ ozumeri yogh rụmhu ọngo. Rọḍua kụ ạJosef rꞌaRechel oru aani ozumeri yogh rụmhu ọngo.
8Kụ Ịso apuru mọ, “Ḍịeri phọ aḍita ịnam mọ ịpe mị azuan bọ ẹpe eten phọ ẹmhu ika?”
Kụ ạJekob ạḅeni mọ, “Ịpe phọ mị ụwaam ọnma ighirigiir esi ọpo ụmoogh bọ ịmi.”
9Kụ Ịso ạḅeni nyọdi mọ, “Mị ạmoogh ni ịdi ịgbaanyan ịmi; mạar aseere ịlo nạ ạmoogh.”
10ẠJekob ạḅeni nyọdi mọ, “Eeye, mị rạaḅereghi ni nyịna, eru mạar dị nạ ạmoogh ni ghụsan ạmi, pọ ạar ri ịmi ruunmo phọ mị aruom bọ nyịna. Ọmiin aghisigh ạna, esi ạmi ẹkigh ọmiin aghisigh Ẹnaan, nyịidipho phọ yira mọrolan bọ dọl ạrighiri. 11Kạ́le, sịghe ruunmo phọ mị aruomaan bọ nyịna. Seseeny, mị rạaḅereghi ni nyịna. Ẹnaan miḍighi ịmi igeny kụ mị ạmoogh ni oomo ạraraar dị mị ạwa.” Kụ ọdi ạkpaariom nyọdi kụ ọdi ạar.
12Kụ Ịso ạḅem mọ, “Ụgua omiigh erelhe; itu ọḍua kụ mị kaḍiemi ghisigh ạna.”
13ẠJekob ạḅeni nyọdi mọ, “Oye dị ụmoogh ịmi, nạ alegheri ni mọ bụen phọ ịbam ạnmuny. Mị kụ rapogh ghan ịga phọ rꞌịnam mọ rẹngo bọ mạmaam. Eḍighi ịdi ọkpagh bịdi iboom ghạlamo ḍiniin aḍughul-otu, oomo aḍita phọ kemugh ni ẹman. 14Oye dị ụmoogh ịmi, ḍiemi ghan mị kạkoronaan ghan kụ atu, ịlo mị katue ạpamam ịnam mọ, rꞌạnmuny phọ, tụtu mị aru ạteeny nyịna ẹpe Idom.”
15Ịso ạḅem mọ, “Mị kạwilenaan nyịna buniin awe phọ ạbuen rꞌạmi oru bọ.”
Kụ ạJekob ạḅem mọ, “Oomo ịpe mị ụ́wa. Mị rạwa ọnma ighirigiir oye phọ ọpo ụmoogh bọ ịmi bịn.” 16Kụ ḍio phọ ạḍiphe phọ Ịso anyeene ogheel ẹpe Idom. 17Kụ ạJekob ạghi ẹpe Sukot, ekpisi dị ọdi ạlogh otu, asuanaan ạgalaga ịnam mọ ọdi. Ịdipho kụ iḍighi kụ oghol bọ esi phọ mọ aSukot.
18ẠJekob ạḍua bọ Mesopotamia ratigheel, kụ ạghi asi Sẹkem ẹpe eelhe phọ aKenan rꞌẹepho, kụ azu ogbogo ọdi de ạtugbiir ạroogho phọ etuman bọ ẹmha phọ kụ arugh sịphe. 19#Jos 24.32; Jọn 4.5Ọdi agho ẹkpigh ade phọ ạḍiphe ḍịghaagh ạnmuny ạnmuny aHamor ọde phọ ạSekem, ikpoki dị ẹman oniin okuron ipoḍi asilva. 20Kụ ạkan sịphe phọ enmeny ạrikia, kụ aghol ḍien mọ Ẹl-Ẹlohe-Ịzirel.
Currently Selected:
Emiighom 33: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
