Emiighom 32
32
ẠJekob aakolobian ozuan Ịso
1ẠJekob aten rakeel kụ ạruukpaany Ẹnaan ozuan nyọdi. 2Mem dị ạJekob ạmiin bọ bịdi kụ ạḅem mọ, “Bụen phọ awe ẹgham kꞌẸnaan.” Kụ ọdi aghol ḍien esi phọ mọ aMahanaim.
3ẠJekob arom butelhedom ọphur ọghi ọteeny Ịso umor phọ ọdi ẹpe de aSeir ẹpe eelhe phọ Idom, 4kụ aroma bịdi mọ ọḅem ịduon: “Mị ạJekob, otelhedom phọ ạna ọpo asooromi bọ loor, rạwa ni ọghaaph ọḅeni Ịso ọde-otu phọ ạmi mọ mị odianaan ghan rꞌạLeban kụ mị aabinyemi erigheel phọ kꞌạnyiidipho. 5Mị ạmoogh sịnam, ịnam adool, iyool-ịga rꞌạrutu-ịga, rẹbene alephiri rꞌạrebene ạnmariir. Mị atom bọ dom raruom nyịna mọ ụnma ịmi ighirigiir, ạmoogh ghụsan.”
6Mem dị abutelhedom mọ oḅula ọteeny Jẹkob, bịdi ụḅem mọ, “Yoor ụghi ni ọteeny umor phọ ạna, kụ ọdi rꞌaloor rꞌinya okuron awe ọdi, oten oru ọteeny ạna.” 7Kụ aruugu asiph Jẹkob iboom, oḅio ọdi ọ́pho. Kụ ọdi adi we phọ ọrolan bọ rꞌọdi ịyal aḍita. Ịduon kẹn kụ ẹdi odi adi iyool-ịga rꞌạrutu-ịga phọ, sịnam mọ rꞌạsikamel phọ. 8Ọdi ạatughian mọ, “Eḍighi ịyaar dị Ịso aru azuom ḍịḅel aḍita phọ, pọ ạḍieri phọ kekpetenaan ni esugha.”
9ẠJekob ạaḅereghi mọ, “Nạ Ẹnaan phọ Ebraham ọde ọde phọ ạmi rꞌẸnaan Ạizik ọde phọ ạmi, ụnaghan ịmi. Nạ Ọmoogh-we phọ ọpo ụḅeni bọ ịmi mọ keel ẹpe ẹmha phọ anyina rꞌawe phọ ạna, nạ kụrolonaan ni ịmi. 10Mị ụ́man rꞌẹnum oomo ẹphomoghian rꞌighirigiir phọ nạ ụnma bọ ịmi otelhedom mọ ạna. Oopho ịkpara phọ ạmi bịn kụ ịdi mị ạsighe ạḅeenyom Ọphiiny ạJodan, kụ nyịidipho mị maḍighi ịyal aḍita. 11Kụ mị rạaḅereghi ni nyịna mọ ụphel ịmi ạsighe esi ạḍighaagh phọ Ịso umor phọ ạmi. Mị rakiilaan ni nyọdi, ịduon dị ratu bọ ozuom ayoor ọḅile ophiemi oomo ayoor rꞌạnmariir rꞌịbam ạnmuny phọ. 12#Emi 22.17Tụutughian mọ nạ uguanaan ịmi mọ nạ kaḍighi ịdi oomo ạraraar kịnighenom ịmi kụ mị ạmoogh nmụny ạnmuny dị kótue ogbi, dị kọtomaam ịdipho ịisaar ọgbal ogbogh ọphiiny.”
13Ọdi rọmina sịphe phọ rẹḅaal, kụ ạJekob ạsaḅar sịphe aḍita ịnam mọ ruunmo ọngo Ịso umor phọ ọdi: 14Ịyal okuron ịya ạrutu-ịga, ịyaldi arekpe, ịyal okuron ịya iyool-ịga rꞌịyaldi idughuna, 15Ịraardi ạsikamel rꞌịdi mạmaam ke̋ghin, inyadi ạrutu-ạsinam rꞌiḍioph ilephiri ạsinam, ịyaldi ịya ịnam adool rꞌiḍioph ilephiri ịnam adool. 16Ọdi adiighi oomo phọ ịne rịikpigh kụ ạḅogh tọro ẹkpigh ạngo oniin otelhedom ọdi; kụ ạḅeni bịdi mọ, “Idiemi ghan ghisigh kụ epholopool ẹrol ogbo ẹkpigh aghisigh rꞌẹlo ọman.” 17Kụ ạto ạḅeni ọḅel otelhedom mọ, “Mem dị Ịso umor phọ ạmi ạteeny nyịna kụ apuru nyịna mọ, ‘Nạ ọlo kꞌạnhian? Nạ rạki ẹghen? Ịnam mọ ịphen edi bọ risigh ạna ịlo ạnhian?’ 18ḅẹni nyọdi mọ, ‘Ịphen phọ ịlo ạJekob otelhedom mọ ạna. Ịphen phọ aruunmo dị ọdi rạkiomonaan ọde-otu ọdi. ẠJekob ọ́kelan sịen ọman ayoor.’” 19Kụ ạḅile ạtuugh ịphen phọ ạḅeni nyọpo atum bọ nyọdi rꞌọpo amuneniom bọ ịraar phọ, rꞌạbuphe rọdaph bọ sita ịnam mọ, mọ, “Iniin phọ ịphen kụ ịdi nyina kẹkaaph mem lọ nyina kezuan bọ nyọdi, 20ẹḅile kẹn ẹḅeni nyọdi mọ, ‘ẠJekob otelhedom mọ ạna ọ́kelan sịen ọman ayoor.’” Ọdi ạatughian mọ, “Mị ạsighe ruunmo phọ ịphen aruom nyọdi ịlo ọophoomiom ologhi ọdi kụ mị agbi ọmiin ọdi, oḍighom ịyaar ọdi kụsighenom ni ịmi rꞌogeny ologhi.” 21Ọdi ạngo ruunmo phọ oḍiemiom ghisigh kụ ọdi ạmina sịphe ogbogo phọ ḍughul phọ ạḍiphe.
ẠJekob ạgba ịnugh sịphe Pẹnuel
22Ḍiniin aḍughul phọ ạḍiphe ạJekob aḅetenu ạpham ịyal phọ ạnmariir phọ ọdi rꞌịyal ạnmanyaan-otu phọ ọdi rꞌiḍioph rꞌoniin ạnmuny phọ ọdi ạḅeenye okol ạmuum mọ ạJabok aphune. 23Mem dị ọdi mạḅeenye, ọdi ạḅile ạḅeenye oomo ạraraar phọ ọdi. 24#Hos 12.3, 4Ogina ạJekob bịn asugha ọman, kụ oniin oye aru eenaan rꞌọdi tụtu ạḍiroor retu ọḅaal. 25Mem dị oye phọ ạmiin mọ ọkpar opu nyịno rạ́tolonaan, kụ akuph olo ạJekob akpoton sịphe amatul phọ, sịphe bịdi rọgba bọ ịnugh phọ. 26Kụ oye phọ ạḅeni mọ, “Ụwile ịmi mị kakeel; ạḍiroor rẹḅaal.”
Kụ ạJekob ạḅem mọ, “Mị nyịna rạ́wile emuton dị nạ mụngo ịmi ḍịseph.” 27Kụ oye phọ apuru mọ, “Ḍịen ạna ughol ika?”
Kụ ọdi ạḅem mọ, “Jẹkob.”
28 #
Emi 35.10
Kụ oye phọ ạḅeni nyọdi mọ, “Kọ́magh ghan mun nyịna mọ ạJekob; ḍien ạna kokol mọ Ịzirel, ịdi eḍighi bọ nạ mạgba ịnugh rꞌẸnaan ḅịle rꞌawe kụ ạkpar apu bịdi.”
29 #
Ịir 13.17, 18 Kụ ạJekob ạḅeni nyọdi mọ, “Seseeny, kola ḍien ạna ụḅeni ịmi.”
Kụ ọdi ạphagharanaan mọ, “Esi ika kụ ẹdi nạ ạtu bọ apuru ḍien ạmi?” Kụ ọdi ạngo ḍịseph Jẹkob.
30ẠJekob ạḅem mọ, “Mị mạmiin Ẹnaan ghisigh rꞌaghisigh kụ mị odi ni rapooghu,” kụ ọdi aghol ḍien esi phọ mọ ạPenuel. 31Ọdi rotenom Pẹnuel bịn ogogo amite, kụ ọdi amiigh okpeku loor ịtaany phọ ọdi. 32Loor ịduon phọ ạnmuny Ịzirel rọ́ba ghan ephulupul olo ạnam kꞌarodon, loor esi dị olo phọ kụ ẹdi okuph bọ.
Currently Selected:
Emiighom 32: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
