Emiighom 31
31
ẠJekob akiilaan Lẹban ạḍua
1ẠJekob ạnaghan dị alephiri ạnmuny ạLeban rọḅem ghan mọ, “ẠJekob mạsighiogh oomo aruphua ọde phọ ayira. Aruphua ọde phọ ayira kụ ịdi ọdi ạsighe bọ aḍumom aḍighinom ọdaam.” 2ẠJekob ạmiin mọ ạLeban óloghoma mun nyịno ịdipho ẹḅel amem mọ. 3Pọ kụ ẹdi Ọmoogh-we phọ ạḅeni Jẹkob mọ, “Ḅula ạghi ẹpe ẹmha phọ ạburude phọ ạna rꞌọto kꞌanyina. Mị kạtol li rꞌạna.”
4ẠJekob arom dom ạghiom Rechel rꞌaLia mọ bịdi ọteeny nyọdi ẹpe eḍum mọ aḍita ịnam mọ ọdi ẹrol bọ. 5Kụ ạḅeni bịdi mọ, “Mị mạmiin mọ ọde phọ anyina ịmi úloghoma mun ịdipho ẹḅel amem mọ, kụ Ẹnaan ọde phọ ạmi edianaan ni rꞌạmi. 6Ịyal phọ anyina elegheri ni mọ mị ụsighe ni oomo ịnyaam ạmi kụ akumu ọde phọ anyina. 7Kụ nyịidipho ọde phọ anyina ruugbegheḍiom ịmi, kụ masoph ikpoki ạrunwanyu phọ ạmi akpere ḍioph amem; kụ Ẹnaan ímeera mọ ọdi uḍighi ịmi ịkaraph. 8Kụ eru mạar dị ọdi ạḅem mọ, ‘Ịpe etiagha bọ kụ eru ikpoki arukumuan ạna,’ bịn oomo ạrutu-ịga phọ kẹmar ghan ịlo etiagha; eru mạar dị ọdi ạḅem mọ, ‘Ịpe ẹpoghogha bọ kụ eru ikpoki arukumuan ạna,’ bịn oomo ạrutu-ịga phọ kẹmar ghan nmụny dị ẹpoghogha. 9Pọ ịduon phọ Ẹnaan mẹsighe aḍita ịnam ọde phọ anyina ịngo ịmi.
10“Ẹteeny mem mọ ịga phọ rẹdaarogh bọ kụ mị ạmalha ụmalha kụ mị ạmiin dị oomo arekpe phọ rẹdaarogh bọ ịga phọ itiagha ni, ẹpoghogha ẹḅanana yogh. 11Ọokpaany phọ Ẹnaan ụmagh ni ịmi ụmalha mọ, ‘Jẹkob,’ kụ mị ameera mọ, ‘Pọrono, mị odi ni sịen.’ 12Ọdi ạḅem ạloghom mọ, ‘Poophe riḍien ạna ạmiin oomo idughuna phọ rẹdaarogh bọ ịga phọ ẹpoghogha ni, etiagha ẹḅanana, ịdi eḍighi bọ mị rạmiin ghan ni oomo ịpe ạLeban raḍighi bọ nyịna. 13#Emi 28.18-22Mị kụ Ẹnaan phọ emitenaan bọ nyịna ẹpe Bẹtel, sịphe nạ ạsighe bọ ḍighiigh phọ ạmeremi aḍighi ẹko ịlo ọotughianam ghan, nyẹpe nạ ạsagharan bọ mụnum mọ kụ uguanaan bọ ịmi. Nyịidipho, ḅetenu aakoroghian aḅula ẹpe ade phọ ạna.’”
14ARechel rꞌaLia ọphagharanaan nyọdi kụ ọḅem mọ, “Iyoor ísughanaan mun erua sịphe otu ọde phọ ayoor. 15Ọdi ụpham iyoor mụdi aruuruen. Ọdi aal iyoor, kụ nyịidipho ọdi malhiom oomo ikpoki phọ ọkpe bọ ẹmhu ayoor. 16Oomo aruphua phọ ịpe Ẹnaan ạar bọ ọde phọ ayoor, ịlo ayira rꞌạnmuny ayira. Nyịidipho ịpe Ẹnaan ẹḅeni bọ nyịna pọ tụugh aḍighi.”
17ẠJekob aakolobian oḅula kꞌẠizik ọde phọ ọdi ẹpe ade phọ aKenan kụ ạsighe nmụny phọ ọdi rꞌạnmariir phọ ọdi ạsaany ạnyu ạsikamel, 18kụ ạsighe oomo aḍita ịnam mọ ọdi, rꞌoomo aruphua phọ ịpe ọdi ạmoogh bọ, ịnam mọ ịpe eru bọ ịlo ọdi rꞌịpe ọdi ạmoogh bọ ẹpe Mesopotamia, ạpham rakeelom. 19ẠLeban maten ọsam asuphuugh iyool-ịga phọ ọdi, kụ mem dị ọdi ụ́tol aRechel amiighi rạraar aghuḍum otu phọ eḍighi bọ ịpe ọde phọ ọdi. 20ẠJekob amian aḍighi ịlo ạLeban ọlo ạSiria phọ kálegheri, ọ́ḅeni nyọdi mọ ọno kakeel. 21Ọdi ạpham oomo aruphua phọ ọdi bịn aagborion asumanam. Ọdi ạḅeeny Ọphiiny aYufratis kụ anyeene ạghi ẹpe aroogbolom mọ ạGiliad.
ẠLeban aphorogh Jẹkob
22Mem dị ịraar aḍughul-otu meten kụ ọghaaph ọḅeni Lẹban mọ ạJekob masuma. 23ẠLeban rꞌabumor ọdi ophorogh nyọdi oḍual aḍughul-otu, kụ bịdi osoph nyọdi osoor ẹpe ạraaḅaraph phọ ạGiliad. 24Ụmalha Ẹnaan eru esi ạLeban ọlo ạSiria phọ, kụ ẹḅeni nyọdi mọ, “Gona loor ạna, ụ́kiom ghan ọnhu Jẹkob mꞌigeny mꞌịkaraph.” 25ẠLeban asoph Jẹkob asoor. ẠJekob mạlhogh ogbogo ọdi ạnyu eegum mọ; kụ ạLeban rꞌabumor phọ ọdi ọlogh ogbogo ọlo ạbidi ẹpe aroogbolom mọ ạGiliad.
26ẠLeban apuru Jẹkob mọ, “Uḍighi ika kụ nạ uukeleghi bọ ịmi kụ ạsighiogh nmạnyaan ạmi ịdipho ạnmariir dị bụo ẹgham kụ uwum. 27Uḍighi ika kụ nạ uukeleghi bọ ịmi bịn ạaran ạḍua dị mị úlegheri? Mụghumo nạ ụḅeni ịmi, mị mụpam ephegh rꞌiitia rꞌạsuor kụ arororiom nyịna. 28Nạ óḍighi kẹn ịlo mị kạkpun nmụny phọ ạmi rꞌạnmanyaan phọ ạmi ạḅeni bịdi mọ ẹghi ẹnighe? Ịphen nạ aḍighi bọ ịlo elologhi, 29Ọbo mị ạmoogh ni ịikpo oḍighi ạna ịyaar, kụ Ẹnaan ọde phọ ạna ịḅeni ịmi ḍughul phọ mọ gona loor mọ mị nyịna ọnhu kụ́kiom mꞌigeny mꞌịkaraph, mị nyịna kụ́ḅeni ịyaar. 30Mị alegheri mọ nạ rakeel ịdi eḍighi bọ inyaam ọto kꞌạna resiph nyịna, kụ ịlo eeghe nạ ami bọ rạraar aghuḍum otu phọ ạmi ịlo eeghe?”
31ẠJekob ạphagharanaan Lẹban mọ, “Mị ugbi mọ nạ kạsighe ịikpo bịn ụaanyiom ịmi nmạnyaan phọ ạna. Pọ kụ ịyaar phọ mị aghiilaan bọ. 32Kụ nạ ạmiin mọ oniin odi sịen dị ạpham rạraar aghuḍum mọ ạna, kokiigh ni nyọdi. Sịen ogbo aḍita abumor ayira, tue ạmaaghi sịen ạraraar phọ ịphen ạmi ịlo eru ịlo ạna, ạsighe.” ẠJekob ólhegheri mọ aRechel kụ mamiighi bọ rạraar phọ.
33ẠLeban ạghi aḍigh ogbogo nyọpo ạJekob, aḍigh nyọpo aLia rꞌịlo ạnmanyaan-otu phọ, kụ mạar ọ́miin; ạḍua kꞌaLia amite, ạghi aḍigh kꞌaRechel. 34Pọ ịduon phọ aRechel ạsighe rạraar aghuḍum mọ ạLeban bịn adoghoḍi ologhi okuru ẹtolom-ade ạsikamel phọ bịn ạtolom, ạLeban ạwaaghi oomo phọ ogbogo phọ aRechel kụ mạar ọ́miin. 35Kụ aRechel ạḅeni ọde phọ ọdi mọ, “Mị ạpioman ni nyịna: nạ aḍigh sịen kụ mị úḅetenu úmeera. Mị odi ẹmha ạnmariir.” ẠLeban ạwaaghi kụ rạraar aghuḍum mọ ọdi ọ́miin.
36Kụ ẹghagh ologhi ạJekob kụ ạḅaam Lẹban mọ, “Mị ụpiom nyịna eeghe? Eeghe ịkaraph kụ ịdi mị aḍighi bọ nyịna kụ nạ ạsighe bọ ọghagh ologhi kụ ruusophoghian bọ ịmi? 37Nạ mạwaaghi ni sịen oomo aruphua phọ ạmi. Nạ ạmiin ni sịen oomo phọ aruphua phọ ạmi ẹlo eru ẹlo ạna edi ni ḍụghum? Pọ usoorom ịmi erugh sịen ogbo abumor phọ ạna rꞌạbuen ạmi bịdi osoph ọoruen oye lọ ạmoogh akeel. 38Sịen ịyaldi ạsia mị ạrol bọ kꞌạna. Kꞌamem mọ ọpo mị aru bọ kꞌạna, iyool-ịga phọ ạna rꞌạrutu-ịga phọ ạna kẹ̋rol dị ụ́maraghi kụ mị kőghiigh ghan oniin ạa sịphe idughuna phọ ạna. 39Oomo ịpe ilhom ịnam mọ ẹze bọ, mị ụ́sighe ghan útuom. Mị kụ uphinom ghan muphe phọ. Nạ ụsighe ghan ạḅam ẹmhu ạmi. Mꞌumi ḍughul mꞌumi ootaany, nạ ụḅam ghan ẹmhu ạmi. 40Dọl phọ ạmi, ootaany ogogo ụsel ịmi, ḍughul ooto usoroghuom ịmina; mị útue ghan ụ́naani. 41Esi ịyaldi ạsia phọ mị ạrol bọ kꞌạna, mị akumu bọ nyịna ḍioph rꞌinya ạsia ịlo ịyal phọ ạnmanyaan phọ ạna, odiiny ạsia ịlo aḍita ịnam mọ ạna, nạ asoph ghan bọ ikpoki arukumuan phọ ạmi asooromi ḍioph amem. 42Mọ Ẹnaan ạburude phọ ạmi, Ẹnaan phọ Ebraham rꞌOghiilaan phọ Ạizik, mụ́rolonaan bọ ịmi, ọbo nạ muphorogh ni ịmi bịn mị ạḅaph oopho agheel. Ẹnaan mẹmiin ni ịminimiin phọ ạmi rꞌarukumuan phọ ạmi kụ ọdi ạḅaam nyịna ḍughul phọ.”
Ịyo phọ ạJekob rꞌạLeban oghiran bọ
43ẠLeban ạphagharanaan Jẹkob kụ ạḅeni mọ, “Ạnmanyaan phọ ạbuen mị kụ ụmar; ạnmuny ạbidi ạbuo ạmi, kụ aḍita ịnam mọ ịlo ạmi. Oomo ịphen phọ nạ rạmiin bọ ịlo ạmi. Kụ rodon loor esi dị mị kátue bọ ạpam nmạnyaan phọ ạmina rꞌạnmuny phọ ạbidi, 44mị ạnya oghiran ịyo rꞌạna. Tue, ịyal ayira okpol sighiigh ọotughianam ịyo phọ ayira.”
45ẠJekob ạsighe ḍighiigh ạmeremi ịdipho ẹko. 46ẠJekob ạḅeni bumor phọ ọdi mọ, “Ịki eekpomoghi sighiigh erool ẹsighe eru ekpol sịen,” kụ bịdi orool sighiigh phọ okpol eḅum, kụ bịdi ọrol ghan ọgbal asighiigh phọ kụ ole ghan eḍien. 47ẠLeban aghol ḍien esi phọ mọ aJegar Sahaduta; kụ ạJekob aghol mọ aGaleed. 48ẠLeban ạḅem mọ, “Egu asighiigh phọ ịphen keḍighi ọghiom ologhi ịyal ayira.” Ịduon kụ iḍighi kụ oghol bọ esi phọ mọ aGaleed. 49ẠLeban ạḅile ạḅem mọ, “Ọmoogh-we phọ akori ghan ạḅile ạrol ogbo ạna rꞌạmi mem lọ yira ọgbaranaan.” Ịduon kụ iḍighi kụ oghol aani bọ esi phọ mọ aMizpa. 50ẠLeban ạḅeni Jẹkob mọ, “Eru mạar dị nạ ạmiine nmạnyaan phọ ạmi, ḅịle nạ apinogh bụnon ạnmariir, ọnon oye sịen phọ ólho, pọ legheri mọ Ẹnaan phọ kụ kẹkaaph ịlo ịyal ayira. 51Mịin egu asighiigh phọ ịphen rꞌẹko phọ ẹphen mị ạmeremi bọ ogbo ịyal ayira. 52Egu asighiigh phọ ịphen ẹmeera ọotughianam. Mị kátenom egu phọ ẹphen ozuom ạna, kụ nạ kẹn kátenom sighiigh phọ ịphen ozuom ạmi. 53Ẹnaan phọ Ebraham rꞌaNahor kụ kesoph ọoruen ịyal ayira.” ẠJekob aghol ḍien Oghiilaan Ạizik ọde phọ ọdi kụ aghunya. 54ẠJekob ạphighiron ẹkia ịkpuy sịphe ạnyu ẹeḅaraph phọ kụ ạamaghagh bumor phọ ọdi mọ itu olhe eḍien. Bịdi ụrol sịphe eegum mọ ḍiniin aḍughul-otu kụ olhe bọ eḍien phọ. 55ẠLeban aḅon aḅetenu esoph ạḍiroor, kụ ạkpunogh nmụny ạnmanyaan phọ ọdi rꞌạnmanyaan phọ ọdi, kụ ạngo bịdi ọghor eeḅi erelhe kụ ạḍua agheel ẹmha.
Currently Selected:
Emiighom 31: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
