Emiighom 30
30
1Mem dị aRechel ạmiin bọ mọ ọno ọ́maranaan Jẹkob rꞌoniin ọony, kụ ạrolom ịghughian umarani phọ ọdi; kụ ạḅeni Jẹkob mọ, “Ụngo ịmi nmụny mị ụmar aani. Ịduon ílho, pọ mị kamugh.”
2ẠJekob ạghagham ologhi Rechel kụ ạḅem mọ, “Mị kátue ạsighe dọl Ẹnaan. Ọdi kụ oye phọ aḍue bọ ọophi ẹmaria phọ ạna.”
3ARechel ạḅeni Jẹkob mọ, “Pọrono sịen ọnyani-otu phọ ạmi. Kịa ọdi rꞌạna ẹrolan esi, ọbo mị ạmoogh aani mọony.” 4Kụ ọdi ạḅogh Bilha ọnyani-otu phọ ọdi ạngo Jẹkob ịdipho ạnir. 5ABilha aamor kụ ạmaranaan Jẹkob olephiri. 6ARechel ạḅem mọ, “Ẹnaan mesoph igheelemi ịmi, kụ mạnaghanan ẹḍogh phọ ạmi kụ mụngo ịmi mọony,” kụ aghol ḍien ọony phọ mọ ạDan. 7ABilha ọnyani-otu phọ aRechel ạḅile aamor kụ ạmaranaan Jẹkob ọnon ọony. 8ARechel ạḅem mọ, “Mị rꞌumarani phọ ạmi mọgba iboom ịnugh, kụ mị kụ mạkpar apu nyọdi,” kụ aghol ḍien ọony phọ mọ ạNaftalai.
9ALia rọmiin bọ mọ ọno mạwile ẹmaria, kụ ạsighe Zilpa ọnyani-otu phọ ọdi ạngo Jẹkob ịdipho ạnir. 10AZilpa ọnyani-otu phọ aLia ạmaranaan Jẹkob olephiri. 11ALia ạḅem mọ, “Mụen phọ amuuḅi amaazuan,” kụ ọdi aghol ḍien ọony phọ mọ ạGad. 12AZilpa ọnyani-otu phọ aLia ạḅile ạmaranaan Jẹkob ọnon olephiri. 13ALia ạḅem mọ, “Ologhi ạmi mạḅaal. Oomo arisina phọ kụmagh ghan ịmi mọ ạnir ịiseeny,” kụ ọdi aghol ḍien ọony phọ mọ Ạser.
14Ịteeny mem ogbo ịbiakpa kụ aRuben ạghi ẹpe elegheḍum kụ aḅomoghi ẹḍara dị aruomaan Lia onhiin phọ ọdi. Kụ aRechel ạḅeni Lia mọ, “Seseeny ụngaani ịmi ẹnum ẹḍara ọony phọ ạna.”
15ALia ạḅeni Rechel mọ, “Kẹ́gbaanyan nyịna ọmooghom olhom mọ ạmi? Nyịidipho nạ rạnyaaghian kẹn ọsighiogh ẹḍara ọony ạmi?”
Kụ aRechel ạḅem ịduon: “Lọ nạ kụngo ni ịmi ẹḍara ọony phọ ạna, pọ ọdi rꞌạna kẹtolan esi ḍughul phọ arodon.”
16ẠJekob ạḍua ozo ratigheel dulhe, kụ aLia amite ạghi azuan nyọdi eten, kụ ạḅeni nyọdi mọ, “Ḍughul phọ arodon nạ rꞌạmi kụ kọmina egina esi loor esi dị mị maghoom nyịna ẹḍara ọony phọ ạmi.” Sịphe kụ ịdi ịyal phọ ạbidi ọmina ḍughul phọ ạḍiphe.
17Kụ Ẹnaan ẹnaghanan Lia, kụ aamor, kụ ạmaranaan Jẹkob olephiri, amuneni oogh ạnmuny. 18Kụ aLia ạḅem mọ, “Ẹnaan mịkpe ịmi rukumuan phọ ạmi, ịdi eḍighi bọ mị ụsighe ọnyani-otu ạmi ạngo olhom ạmi,” kụ ọdi aghol ḍien ọony phọ mọ ạIsaka. 19ALia ạḅile aamor kụ ạmaranaan Jẹkob olephiri, ọḅaran rꞌọphon odiiny alephiri ạnmuny. 20Kụ aLia ạḅem mọ, “Ẹnaan mịngo ịmi ịma inmo. Nyịidipho olhom mọ ạmi kụsighe aani ịmi, ịdi eḍighi bọ mị mạmaranaan nyọdi sịen odiiny ạnmuny,” kụ ọdi aghol ḍien ọony phọ mọ ạZebiulon. 21Kụ rebia ẹnum kụ ọdi aamor kụ ạmar ọnyani, kụ aghol mọ aDaina.
22Kụ Ẹnaan ẹetughian Rechel, kụ ẹnaghanan nyọdi, kụ eghughuron oghun ẹmaria phọ ọdi. 23Ọdi aamor ạmar olephiri kụ ạḅem mọ, “Ẹnaan mẹsighiogh roofola phọ ạmi ụngo ịmi olephiri ọony.” 24Kụ ọdi aghol ḍien ọony phọ mọ ạJosef, kụ ạḅem mọ, “Ọmoogh-we phọ ạḅile ụngo ịmi ọnon ọony.”
Omerenyan ạJekob rꞌạLeban
25ARechel rọmar Jọsef, kụ ạJekob ạḅeni Lẹban mọ, “Meera mị ụḍua, pịdi mị aḅula kꞌayoor, kꞌayoor. 26Ụngo ịmi nmạriir phọ ạmi rꞌạnmuny phọ ạmi, bụphe mị ạtuan bọ kụ akumu nyịna, mị ukeel, ịdi eḍighi bọ nạ alegheri ni rukumuan phọ ịpe mị akumu bọ nyịna.”
27Kụ ạLeban ạḅeni nyọdi mọ, “Eru mạar dị nạ kameera ni, mọ mị ụkaaph ịphen mị rạwa bọ ọghaaph phọ. Mị ạmiin ni mọ Ọmoogh-we phọ mạtuan ẹmhu ạna ụseph ịmi. 28Kol ọnhu ikpoki lọ mị kạkpe ghan nyịna, mị ụkpe nyịna”.
29Kụ ạJekob ạḅeni nyọdi mọ, “Nạ alegheri ni ịdi mị makumu nyịna, ịdi ịnam mọ ạna meḍum esi ephoghom mọ ạmi. 30Ẹphurukpu phọ ịpe nạ ạmoogh bọ kụ mị agbi bọ oru phọ nyịidipho mẹmar emuzeḍi. Ọmoogh-we phọ rạseph nyịna kꞌaḍio phọ mị aru bọ, kụ nyịidipho mẹteeny dị mị kạmoogh aani dọl ḍịo ạmina ịlo ọphamam kꞌạmi.”
31ẠLeban apuru nyọdi mọ, “Mị ạngo nyịna eeghe?”
Kụ ạJekob ạphagharanaan mọ, “Mị ụ́wa rꞌeniin ịikpia. Mị kapogh ghan ḍita ịnam mọ ạna ạkiom ghisigh lọ nạ ameeraam ni ịitughian phọ ịphen. 32Bịle mị utelhe igbo aḍita ịga phọ ạna uten rodon kụ mị ạson ạgbarion tọrobo ọony oyool-ọga lọ awil, rꞌọony ạtu-ọga lọ ạpoghogha. Ịphen bịn kụ keḍighi ikpoki dị nạ kụkpe ịmi. 33Ghisigh kụ ẹdi kedughanaan nyịna olegheri mụghumo mị ụrol li ịdi ẹnighe. Mem dị nạ aru ophogh olegheri ịikpia phọ ạmi, eru lọ mị ạmoogh ọga lọ ụ́ḅanana, ọlo útiagha mꞌoyool-ọga lọ úbil, pọ sịghenom mọ mị umi ni.”
34ẠLeban ameera mọ, “Ẹnighe ni, ẹrol ịdipho nạ ạḅem bọ.” 35Kụ ọlo ḍio phọ ạḍiphe ạLeban ạgbarion ni rekpe ịpe ẹgonyan bọ ẹḅile etiagha, rꞌịya ạrutu-ịga phọ ẹḅanana bọ ẹḅile etiagha ịphalaḅaal loor ạbidi, rꞌoomo ịpe ẹpoghogha bọ ḍịḅaal. Ọdi ạgbarion kẹn ni oomo iḍiil iyool-ịga ạsighe ạlogh ḍịghaagh ạnmuny ọdi. 36Pọ kụ ẹdi ạLeban ạwile Jẹkob ạḍua rꞌaḍita ịga phọ ịphen ạkel ạghi ịdi ọdi arue arelhe esi ịraar aḍughul-otu. ẠJekob aphogh ghan ḍịeri aḍita ịga phọ ạLeban.
37ẠJekob ạghi ạsighiogh imoom ọdo kịrokiro ịla ireeny aagbo, aḍighi ịkpara kụ akponyon roopho phọ pịdi ịla phọ emite eganana ịphalaḅaal. 38ẠJekob ạsighe ịkpara phọ ịpe ọdi akponyon bọ asereghi risigh ịga phọ, esi dị rọloghonaan ghan ịga phọ mụum ọphughol. Ọdi ạwile yogh ịla phọ sịphe, loor esi dị ịnam mọ ịdaaran ghan mem lọ eru ọphughol ạmuum. 39Sịphe kụ ẹdi mem dị ạrutu-ịga phọ esoph rughun ghisigh ịla phọ, bịdi ẹmaraghi nmụny dị ẹḅanana, ịdi ẹpoghogha, ịdi etiagha rꞌịphalaḅaal.
40Kụ ạJekob ạgbatan iyool phọ asereghi gem, kụ asomori ịga phọ ạLeban ịpe ẹgonyan bọ ḅịle ewilogh bọ. Ẹphen kụ eten dị ọdi ạsighe ạmooghom ḍita dị ọdi ạgbatan ọ́ḅophoghiom rꞌịpe ạLeban.
41Tọrobo amem dị ịnam mọ ịpe ẹmoogh bọ ịnyaam rẹdaaran, ạJekob ạsighe ghan ịkpara phọ asereghi risigh ịnam mọ sịphe bịdi rẹki ghan bọ ọphughol ạmuum mọ; pịdi bịdi ẹrol sịphe ịkpara phọ edi bọ kụ eemorogh. 42Kụ ịga phọ ịpe ịnyaam ị́moogh bọ, ọdi ósereghiom ghan sịphe phọ. Esi dị ị́kel bịn ạLeban ạmoogh oomo ịnam mọ ịpe ịnyaam ị́moogh bọ, kụ ạJekob ạmoogh oomo phọ ịpe emoon bọ. 43Ẹphen kụ eten dị ạJekob aḍumom aḍighinom ọdaam, ạmoogh ḍita ịnam, butelhedom alephiri rꞌabutelhedom ạnmariir, sịkamel rꞌịnam adool.
Currently Selected:
Emiighom 30: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
