Emiighom 22
22
Ẹnaan ẹto ẹḅeni Ebraham oghiigh Ạizik oḍighinom ịyaar aghuḍum
1 #
Hib 11.17-19
Ịphen phọ reru eten, kụ Ẹnaan ẹdegh Ebraham kụ ẹmagh, “Ebraham,” kụ ọdi ameera kụ ạḅem mọ, “Pọrono, ạmi sịen.”
2 #
2 Krọ 3.1
Kụ Ẹnaan ẹḅeni nyọdi mọ, “Sịghe mọony phọ ạna, ogina phọ ọony phọ ạna Ạizik, ọpo nạ ạphomoghian bọ iboom, sịghe nyọdi ạghimom ẹpe ade phọ aMoraya, eegum dị mị kạma aḍeenaan nyịna, ạsighe nyọdi ạphighironom ẹkia oguom ạnian.”
3Eḅon ạḍieri phọ ạḍiroor phọ bịn Ebraham aḅetenu apol ịnum ịpe oḍighinom ẹkia phọ, ạsaany ẹnam adool ọdi, kụ ạsighe ịyal abutelhedom mọ ọdi rꞌẠizik ọony phọ ọdi. Bịdi ọḍua onyeene ekpisi phọ Ẹnaan ẹmha bọ eḍeenaan nyọdi. 4Esi ịraar aḍughul-otu kụ Ebraham aphoophe riḍien aphogh kụ ạmiin esi phọ kꞌẹpe egher. 5Ebraham ạḅeni we phọ ọdi mọ, “Nyina rꞌẹnam adool phọ ịtol sịen, kụ mị rꞌọbumoony phọ kọki ẹpe risigh ọoḅereghi, kụ yoor oḅula ịteeny inyina.”
6Kụ Ebraham ạsighe ịpe oḍighinom ẹkia phọ ạleti Ạizik ọony phọ ọdi; kụ ọdi rꞌaloor ạpham elhool rꞌiiḅu ạnian dị kọkpooniom nịan. Ịdipho bịdi orelhian bọ rọki, 7Ạizik apuru Ebraham ọde phọ ọdi mọ, “Ọde ạmi?”
Kụ ọdi ameera kụ ạḅem mọ, “Ii, mọony ạmi?”
Kụ Ạizik apuru nyọdi mọ, “Ḍịen phọ ạnian, ịphen phọ ịpe, kụ ọony oyool-ọga phọ koḍighinom bọ ịyaar aghuḍum mọ, odi ẹghen?”
8Ebraham ạphagharanaan mọ, “Mọony ạmi, Ẹnaan kẹngo ni ọony oyool-ọga dị koḍighinom ịyaar aghuḍum mọ.” Kụ ịyal phọ ạbidi orelhian onyeene.
9 #
Jems 2.21
Mem dị bịdi oru osi esi phọ ẹpe Ẹnaan mẹma bọ eḍeenaan nyọdi, Ebraham ạkan enmeny ạrikia phọ, ạde ịpe phọ pạ ạnyu enmeny phọ, kụ ạphaḍi Ạizik ọony phọ ọdi, ạsighe nyọdi ạḅam ạnyu enmeny phọ sịphe ạnyu ịpe phọ. 10Pạ kụ ẹdi Ebraham asele ḍịghaagh ọdi akoph elhool phọ ịlo oghiigh ọony phọ ọdi. 11Kụ ọokpaany Ọmoogh-we phọ ạrol li ẹpe kꞌạke ạmagh nyọdi mọ, “Ebraham, Ebraham!”
Kụ ọdi ameera mọ, “Ii. Pọrono ạmi sịen.” 12Kụ ạḅeni nyọdi mọ, “Káben mọony phọ, ḅịle kẹn káḍighi nyọdi ịyaar: nyịidipho mị malhegheri mọ nạ rakueni ghan ni ḅịle raḍighi ni ịto Ẹnaan esi dị nạ ọ́lhogh ạaku ọony phọ ạna, ogina phọ ọony phọ ạna, oghine ạmi.”
13Ebraham aphoophe riḍien ọdi aphogh, kụ ạmiin ẹphen ịigaany phọ ọdi odughuna dị iroghoḍigh eghinighi rạphaal phọ. Ebraham ạghi ạsighe odughuna phọ ạphighironom ẹkia oguom ạnian phọ, ẹsighe esi ọony phọ ọdi. 14Kụ Ebraham aghol esi phọ ịpa phọ mọ “Ẹnaan kẹngo ghan ni.” Rọḅem ghan ni ịduon phọ kꞌarodon mọ, “Ọmoogh-we phọ kạngo ghan ni ẹpe eegum mọ ọdi.”
15Ọokpaany phọ Ọmoogh-we phọ ạrol bọ ẹpe kꞌạke phọ ạḅile ạmagh Ebraham amuneni ịyal amem. 16#Hib 6.13, 14Kụ Ọmoogh-we phọ ạḅem mọ, “Mị maghunyan esi aḍien phọ ạmi mọ mị kạbughe ni ạḅile ạseph nyịna. Loor esi dị nạ aḍighi bọ ịduon kụ ạaku ụ́logh bọ ogina ọony phọ ạna ughine ạmi, 17#Hib 11.12mị maguanaan mọ mị kạngo nyịna ịbadi ẹemara dị kẹtol ịdipho ạraanaan phọ edi bọ kꞌạke phọ rꞌikpo ịisaar phọ edi bọ sịphe ọphiiny phọ. Ẹemara ẹemara ạna kọkpar ri opu ghan bụmulogh-ḍien ạbidi. 18#Iiḍ 3.25Kọtuan nmụny ạna kụ ọseph oomo areelhe ịsien aḅirini phọ, ịdi eḍighi bọ nạ mụnaghanan ịmi.” 19Ebraham aḅula ạghi ạteeny butelhedom mọ ọdi, kụ bịdi oḅetenu orelhian osi Beersheba, kụ Ebraham arugh ẹpe Beersheba.
Bụo ẹemara aNahor
20Ịphen phọ reru reten, kụ ọḅeni Ebraham mọ, “AMilka mạmaraghinaan Nahor umor phọ ạna nmụny: 21Ụz ọkpana ọdi, Buz umor ọdi rꞌạKemuel ọde phọ Aram, 22Kesed, Hazo, Pildas, Jidlaf rꞌạBetuel.” 23ẠBetuel ạmar Rịbeka. Ọphaanya phọ ạbuen kụ ạbudi aMilka ạmaranaan bọ Nahor umor phọ Ebraham. 24Ạnir dị odi ạgaany dị oghol mọ aRiuma ạmaranaan nyọdi Teba, Gaham, Tahas rꞌaMaaka.
Currently Selected:
Emiighom 22: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
