Emiighom 23
23
ASera amugh kụ Ebraham agho de oḍi
1ASera ạman ni oniin okuron ịyaldi rꞌoḍual ạsia ḍịkpo: ịphen kụ ạsia dị aSera ạrol sịen aḅirini phọ. 2ASera amugh sịphe Kịriat Arba (egina ẹmha phọ oghol bọ mọ ạHebron) ẹpe eelhe phọ aKenan. Kụ Ebraham ạghi akughuḍi amoghi nyọdi.
3Kụ Ebraham aḅetenu sịphe ọmuneen bọ oḍim ạnir phọ ọdi, kụ ạtuonom bụo ạHitait phọ kụ ạḅeni mọ, 4#Hib 11.9, 13; Iiḍ 7.16“Mị ooruen dị atugh ni sịen rꞌanyina, ịma esi iḍeenaan ịmi, mị ụsighe nyọon umughanaan bọ ịmi ụki uḍi.”
5Kụ bụo ạHitait phọ ọphagharanaan Ebraham kụ ọḅeni nyọdi mọ, 6“Ụnaghanan iyoor. Nạ ogbogh oye dị ụmoogh iyoor. Sịghe oḍim mọ ạna ạghi ẹpe ẹkaraph eḍum mọ aphogh esi lọ ẹḅeeraan nyịna aḍi. Ọnyo ayoor dị kamirighan nyịna ólho.”
7Ebraham aḅetenu kụ ạseph we ạHitait phọ ọmoogh bọ de phọ. 8Kụ ọdi ạghaaphan rꞌạbidi kụ ạḅem mọ, “Eru mạar dị ịḅeeraan ni inyina mọ mị uḍi ni oḍim mọ umughanaan bọ ịmi sịen, iseseeny ịlom Efron ọony phọ aZohar, 9ịlo aalha ạmi epogh loor asighiigh phọ aMakepela edi bọ ẹpe eekuna aleeny phọ ọdi. Ọdi ạḅem sịen risigh anyina ọkar aḍighi esi phọ pịdi mị ạmoogh aḍighi ẹkaraph eḍum.”
10Efron rꞌaloor ạrol aani ni rꞌạbueri ạHitait phọ pạ esi aruupuruan phọ sịphe eḍighom ẹmha phọ kụ ạphagharanaan ịdi tọro lọ ạrol pạ ạnaghan ni mọ, 11“Nạghan, oye dị ụmoogh ịmi, mị kạngo ni nyịna oomo aleeny phọ ạmi rꞌepogh loor asighiigh phọ. Sịen ghisigh awe ạbuo ade phọ ạmi, mị kạngo ni nyịna esi phọ, pịdi nạ aḍi ạnir ạna.”
12Ebraham azumeri ẹmhu ọdi ạseph bụo ade phọ. 13Kụ ọdi ạḅeni Efron, kụ ạghaaph adoghoḍi rụru oomo awe ạbuo ade phọ mọ, “Eru mạar dị ẹḅeeraan ni nyịna, pọ nạghan ịphen mị kạḅem bọ, mị ạngo nyịna ịlo ade phọ ẹman, ạar ịmi ẹrol dị mị ạsighe oḍim mọ ạmi aḍi sịphe.”
14Efron ạphagharanaan Ebraham kụ ạḅeni nyọdi mọ, 15“Oye dị ụmoogh ịmi. Ụnaghanan ịmi. Ade phọ ẹman inya okuron ipoḍi asilva bịn; kụ ịphen phọ ẹman eeghe ịyaar esi ạna rꞌạmi? Kịa aḍi oḍim mọ ạna sịphe phọ.” 16Kụ Ebraham ameeraam Efron kụ ạto amitiom ẹemor ịpe Efron amuul bọ mọ ẹman sịphe ogbo ạHitait phọ: inya okuron ipoḍi asilva, ọdaph ẹemor phọ ẹpe emeera bọ esi abumuul ḍighi.
17Ịpe kụ ịdi ọoghana phọ aḍighi ghan bọ ẹlo Efron pạ Makepela koten bọ kụ ọteeny Mamre ẹpe erumuḍio phọ remite ghan bọ, aḍighi bọ ẹlo Ebraham. Aleeny phọ rꞌepogh loor asighiigh phọ rꞌoomo ireeny phọ edi bọ sịphe aleeny phọ ụḅogh bịn ọngo Ebraham. 18Oomo ạbuo ạHitait phọ ọrol bọ pạ aruupuruan phọ sịphe eḍighom ẹmha phọ ụlogh ni elegh mọ esi phọ meḍighi ẹlo Ebraham.
19Ịphen phọ reten, kụ Ebraham ạsighe Sera ạnir phọ ọdi aḍi sịphe epogh loor asighiigh phọ ẹpe aleeny phọ aMakepela, koten bọ kụ ọteeny Mamre eelhe phọ aKenan. 20Ịduon kụ iḍighi kụ ọoghana phọ aḍighi bọ ẹlo ạbuo ạHitait phọ rꞌepogh asighiigh phọ, eḍighi ephua Ebraham ịlo oḍiighi ghan awe.
Currently Selected:
Emiighom 23: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
