Emiighom 21
21
Ịdi ọmar bọ Ạizik
1Ọmoogh-we phọ ạseph ni Sera, ịdipho ọdi ạḅem bọ; Ọmoogh-we phọ ạtuugh ịpe ọdi aguanaan bọ Sera aḍighi. 2#Hib 11.11ASera aamor kụ ạmaranaan Ebraham olephiri ọony mem dị Ebraham mạkpo, mem mọ ạmuphe Ẹnaan ẹḅem bọ mọ kọmar nyọdi. 3Ebraham aghol ḍien ọony phọ ọpo aSera ạmaranaan bọ nyọdi mọ Ạizik. 4#Emi 17.12; Iiḍ 7.8Kụ mem dị Ạizik ạman ọphaanya aḍughul-otu, Ebraham aḍun nyọdi, ịdipho Ẹnaan ẹto bọ ẹḅeni nyọdi. 5Ebraham mạman oniin okuron ạsia kụ ọmaranaan bọ nyọdi Ạizik. 6Kụ aSera ạḅem mọ, “Ẹnaan mịngo ịmi iboh rꞌạreer; kụ oomo ạbuphe kọnaghan bọ kụdaph ni ịmi ọmilogh aani.” 7Kụ ạloghom mọ, “Ạnhian kụ mụḅeni Ebraham mọ aSera kạngo ni mọony mạmaam? Kụ ịduon phọ mị mạmaranaan nyọdi mọony, sịen ạḍikpo phọ ọdi.”
8Ọony phọ aphoph kụ ḍio phọ oghine bọ nyọdi mạmaam mọ Ebraham alhe ni eboom ẹyaal.
Ophorogh Hegar rꞌỊsmael omitiom
9Eniin aḍio Ịsmael ọpo aHegar ọlo Ijipt phọ ạmaranaan bọ Ebraham apheghan ghan Ạizik ọony phọ aSera. 10#Gal 4.29, 30ASera ạḅeni Ebraham mọ, “Porogh ẹbene-ạnir phọ ọphon rꞌọony phọ ọdi amitiom sịen otu phọ ọphon, ịdi eḍighi bọ ọony ẹbene-ạnir phọ ọphon rꞌẠizik ọony phọ ạmi kụ́ḅaran úle erua.” 11Ịphen phọ ịiḅaghami ni Ebraham iboom, loor ẹmhu ọony phọ ọdi. 12#Rom 9.7; Hib 11.18Ẹnaan ẹḅeni Ebraham mọ, “Kạ́aḅaghamian loor esi ẹmhu ọony phọ rꞌẹbene phọ ạna aHegar. Tụugh ịpe aSera ạḅeni bọ nyịna aḍighi. Nạ kạtuan Ạizik kụ ạmar ẹemara etum ẹemara. 13Mị kạngaani kẹn ni ịbadi ạnmuny ọony phọ ọpo ẹbene-ạnir phọ, ịdi bịdi koḍighi ni eelhe. Ọdi kẹn ọony ạna ni.”
14Ebraham aḅetenu eḅon ạḍiroor kụ ạsighe ạbred rꞌokuru ozu ẹnam amuzeḍi mụum ạleti ọpha aHegar rꞌọony phọ kụ arorori amitiom. Kụ ọdi ạḍua kụ aghiraan ghan ẹpe Ẹdala aBeersheba. 15Ạmuum mọ romuneen, kụ aHegar ạsighe mọony phọ aseere zin oreeny uba. 16AHegar ạḍua arelhe ạkel ạrol ạgumom ọman, esi dị epel ẹdi ọraph ẹkpina kẹ́teeny, kụ ạḅem mọ, “Mị kátue ạkparam ọmiin ịdi ọony phọ ạmi kamugh.” Kụ ạrol ạgumom ọman kụ amiigh omoghi.
17Ẹnaan ẹnaghan ẹḍogh ọbumoony phọ, kụ Ọokpaany Ẹnaan dị ạrol ẹpe kꞌạke ạmagh Hegar kụ apuru nyọdi mọ, “Nạ ramoghi ghan eeghe? Aruugu nyịna kúsiph. Ẹnaan mẹnaghan ni ẹḍogh ọony phọ sịphe odi bọ. 18Ḅetenu ạghi aḅeton ọbumoony phọ ạphaara. Mị kạbughe ni ẹmaria phọ ọdi kụ bịdi ọda ghan eboom eelhe.” 19Kụ Ẹnaan ẹḅarion riḍien aHegar kụ ọdi ạmiin ghuḍia. Ọdi ạghi aḍu amuzeḍi okuru ozu ẹnam mọ mụum, kụ ạngo ọbumoony phọ mọ ạphughol. 20Ẹnaan ẹrolan rꞌọony phọ, kụ aphoph, arugh ẹpe ẹdala phọ. Kụ ọdi ạmaar ịtaya. 21Ọdi arugh ẹpe Ẹdala ạParan; kụ onhiin phọ ọdi aphinanaan nyọdi ạnir ọlo Ijipt.
Ịyo phọ Ebraham rꞌẠbimelek oghiran bọ
22 #
Emi 26.26
Mem mọ ạmuphe phọ, Ạbimelek rꞌaFikol uwo ẹmhu ạbuo ẹgham mọ ọdi uru ni ọḅeni Ebraham mọ, “Ẹnaan edianaan rꞌạna esi oomo ịpe nạ raḍighi bọ. 23Ịduon kụ iḍighi kol ḍien phọ Ẹnaan akunyanam mọ nạ kúukeleghi ghan ịmi rꞌạnmuny ạmi rꞌạnmuny ạnmuny ạmi, loor ọnma ighirigiir phọ mị ạnma bọ nyịna. Tụugh ịdipho ạnma ighirigiir sịen ade phọ ạḍien nạ arugh bọ.”
24Ebraham ạphagharanaan ni mọ ọno kakunya ni.
25Iru ni ẹteeny mem dị abutelhedom mọ Ạbimelek omirighan Ebraham ghuḍia ạmuum, kụ Ebraham ạghaaph ịpe emiteghu bọ ạḅeni Ạbimelek. 26Kụ Ạbimelek ạphagharanaan mọ, “Mị úlegheri oye phọ aḍighi bọ ịphen phọ. Nạ ịmi kụ̋ḅeni ghan. Mị ụ́naghan ịphen phọ tụtu arodon nạ rạkaaph bọ.” 27Kụ Ebraham ạsighe iyool-ịga rꞌạsinam ạngo Ạbimelek, kụ ịyal phọ ạbidi oghiran ịyo. 28Ebraham ạsighe oḍual ịya ạnmuny iyool-ịga amitiom aseere gem. 29Kụ Ạbimelek apuru Ebraham mọ, “Nạ ụtuan ika kụ ạsighe bọ oḍual ịya ạnmuny iyool-ịga phọ ịphen amitiom mọ aseere gem?”
30Kụ Ebraham ạphagharanaan mọ, “Sịghe aani iyool-ịga phọ ịphen, eḍighi eḍeenaan mọ mị kụ uguph ghuḍia phọ ọphon.” 31Kụ ạtuan ịduon phọ kụ aghol esi phọ aBeersheba, loor ịdi ịyal phọ ạbidi ughiran ịyo phọ sịphe phọ.
32Ọḅophan ọnhu ạbidi ọphon pạ Beersheba reten bịn Ạbimelek rꞌaFikol uwo ẹmhu ạbuo ẹgham mọ ọdi oḅula ẹpe eelhe phọ aFilistia. 33Ebraham ạzuph oreeny dị oghol mọ ạtamarisik sịphe Beersheba; kụ agholom ḍien Ọmoogh-we Ẹnaan phọ edi ghan bọ kꞌagee-pọ. 34Ebraham ạrol li iiruen ebia iboom ẹpe eelhe phọ aFilistia.
Currently Selected:
Emiighom 21: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
