MAK 9

1Ge Jisus hiɛŋ aŋ, Iwɛ-tɛkana Omo hi mbiso maa, tu'wo ti zha shɛ to tumongono atwa oko na shikekeni epe kwukwuŋ nazhɛ a kwụbɛ Cɛnjɛ-ta-tugwama ta Agwatana ti te e ci nu ukpahiŋ.#Mat 10:23; Mak 13:30; Luk 22:18

Ge Jisus Sheyingeni Eseshi-iyi Ubwa

(Mat 17:1-13; Luk 9:28-36)

2Na aba na ti ijitɛ icihiŋ keshici, ge Jisus zeriji Pita, ne Jemis, keeni Jon bee zhe ni ishɛmɛ ike i'wɛtwɛ, aba kiri bee suji. Bee sheyinji ya ne eshe aba nu gana na tu baa ga shɛ.#Mak 5:37; 13:3 3I'wɛŋnɛ nɛ bee urigeni cɛnjɛmɛ paawụụ, yaa ta tebiye. I zasa bụtụ be elele na namɛ nu unyizo ga eri ba nda tugwuno maa tɛ cɛnjɛmɛ gana ata o.#Mat 28:3 4Nazhɛ eseshi-iyi ata atatụ kwụbɛ Elaija keeni Moses ta a banɛ aa njɛ n-ndumwa ne Jisus.

5Nazhɛ ga Pita hiɛŋ Jisus, E-Bimbisegeni,#9:5 E-Bimbisegeni: Kwo kaa Agwuma-ihwɛ. itɛ zhɛmanɛ maa tu nama ma epe. Ba jala suu maa ta ta shidulo shɛ tatụ, maa uko ụ shɛ una bụ, uko ụ shɛ una Moses, maa uko ụ shɛ una Elaija? 6Iwɛnɛ ti ga Pita mepi shi ya iwɛ nɛ maa duma, iwɛnɛ ti inyɛsɛ shɛ bụ duwa.

7Nazhɛ udomu uko banɛ na azuba wee kezhe wee ubi aŋ, rụŋhwụŋ ru ko ru dumanɛ iwɛ nu udomu ata, rɛɛ hiɛŋ, Yɛu mi Omo lubo duwa na, na shɛlaga ma iwɛ ubwa.#Mat 3:17; Mak 1:11; Luk 3:22; 2 Pita 1:17,18 8Aa mbiyanganɛ kakayɛ, a kwụbɛ shɛ ya binya bụtụ be elele na namɛ na aba o, semi ge Jisus bwooko.

9Aka na te e zwe ishɛmɛ ɛtɛ, ge Jisus tɛtaganɛ eseshi-iyi ubwa unu, bɛɛ hiɛŋ, To mbiso ma bụtụ be elele iyi nɛ ahiɛ kwụbɛ epe o, semi aka na ti Yɛu Bụtụ hiɛ hwuŋ no tu'wo.#Mak 5:43; 7:36; 8:30

10Ibɛ po eseshi-iyi ubwa untanganɛ iwɛ ɛtɛ oo momo hoŋtongonu, ɛɛ hiɛŋ, Imbe shɛ tihiɛ no tu'woo? 11Ee unseni Jisus, ɛɛ hiɛŋ, Iwembe po embisegeni Undwa hiɛŋ maa ge Elaija shɛ ba zhajɛ tugwo hiiiŋ? #Mala 4:5; Mat 11:14

12Ge Jisus jishijɛ aŋ, bɛɛ hiɛŋ, Iiŋ, ge Elaija shɛ ba zhajɛ ga tugwo hiiŋ, iwɛ maa gwurocongo iyi elele no ogwungwu ibɛ. Ama iwembe tuba Iwɛ ya Agwatana hiɛŋ, I shɛ tilɛɛ maa Yɛu Bụtụ shɛ yo hioko ụbaụta duwa, maa a njɛ bụ gana ta bụtụ tɛgadagaa? #Ayiz 53:3; Mak 8:31; 9:31; 10:33 13Ama Mo hi mbiso maa ge Elaija zhogwo, aa nduwa bụ iyi nɛ kwụlanɛ aŋ gana na to o 'nywotwo iwɛ ubwa.

Ge Jisus Nɛnjɛ Yɛu-ye-eyi nɛ Butumwa-bi-ibiri Namɛ na Amɛ Ubwa

(Mat 17:14-21; Luk 9:37-43a)

14Aka na ta atwa oko zhajɛ no ofwo eseshi-iyi Jisus, aa kwụbɛ tu ufwugwo ụ'wụtụ shɛnjɛ woo rungwutwonu aŋ, embisegeni Undwa a nda ashamanjɛ na aba. 15Gunu ata aka na ta atwamwa kwụbɛ Jisus, igɛhi 'imɛ aŋ, ee gezhiji ee zhe pu bwa aa 'walụ bụ.

16Ge Jisus unseni eseshi-iyi ubwa, bɛɛ hiɛŋ, Imbe bwa ihi shanɛ ashamanjɛ na atwa ataa?

17Nazhɛ bụtụ bu ko na namɛ na ashashɛ ufwugwo ata, jishijɛ bụ, bɛɛ hiɛŋ, N 'waŋnɛ yɛu mi ye eyi nɛ mpiala mụ wɛ mu namɛ na amɛ ubwa no ofwo bu, yɛu ɛtɛ eri shi ya dumana iwɛ o. 18Ofwo elele maa hwayɛgwa, ma pa bụ na cɛnjɛ. Unu ubwa no fwuno, bu na ya ene, bu na 'nya. Ngɛɛ hiɛŋ eseshi-iyi bu ge becinji mu, ama e eri shi o.

19Ge Jisus jishijɛ aŋ, bɛɛ hiɛŋ, Oo ahiɛba uwaŋnɛ ga zasa rishe-tɛtɛtana, ụkwụmbwụ umba Ngɛɛ zhɛ ma nama ne hiiŋ? Ụkwụmbwụ umba Ngɛɛ zhɛ ma ima-isɛbwɛ ne hiiŋ? Shapɛ ma yɛu ɛtɛ pi mi.

20Aa shapɛ ga yɛu ɛtɛ pi Jisus. Aka na tu mpiala ma ata mụ wɛ mụ kwụbɛ Jisus, gunu ata mee keri yɛu ɛtɛ tigbici. Bee leyi na cɛnjɛ, boo jirongwu, unu ubwa wo fwuno. 21Ge Jisus heŋteni#9:21 Ge Jisus heŋteni: Kwo kaa, Bee heŋteni. bishi bi yɛu ɛtɛ, bɛɛ hiɛŋ, Taa aka naa ijɛ kwuni buu?

Bishi bi yɛu ɛtɛ jishijɛ Jisus, bɛɛ hiɛŋ, Te kwuni taa na cɛnɛnɛ tu bwa. 22Aka elele tu mpiala mu ga mụ wɛ mu hwayɛgwa, ma kala bụ nu ulwa, te meni, maa mụ kwụnɛ bụ. Ama yaa shɛ ebi eri ba nda iyi elele iwɛ ibɛ, asha hioko inyɛmɛnyɛmɛ tu maa utu sumanɛ-u'uno.

23Ge Jisus hiɛŋ bụ, Yaa shɛ ebi eri! Iyi elele zana bụtụ na tɛtanɛ-rishe iwɛ tɛnda o.#Mak 11:22-24; Luk 17:6

24Ibɛ po bishi bi yɛu ɛtɛ uganɛ#9:24 uganɛ: Tɛjɛshɛrɛga tu ko ti keeni maa, na malaba. gunu ata, bɛɛ hiɛŋ, N tɛtanɛ-rishe. N sumanɛ-u'uno, okwo tu Ngaa zasa rishe-tɛtɛtana duwa.

25Aka na ti ge Jisus kwụbɛ ta atwa ofwugwo e gezheji ee ci maa a ụlwatagwụ no ofwo aba, bee tezhigeni mpiala ma ata mụ wɛ, bɛɛ hiɛŋ mụ, Gabụ mpiala mi igwureni keeni mu na ma akwụrụ, M bu peni-unu, maa banɛ na amɛ ubwa, to tono ya na amɛ ubwa kwukwuŋ.

26Nazhɛ mpiala ma ata mi keri yɛu ɛtɛ tigbici, maa uganɛ duwa, maa banɛ na amɛ ubwa. Ibɛ po yɛu ɛtɛ weci ya gana maa bu 'wi, ibɛ du atwamwa hiɛŋ, Bu 'wi.

27Ama ge Jisus imɛ yɛu ɛtɛ u'ala, bɛɛ ishicinjɛ iŋ, nazhɛ yee shikeni.

28Aka na ti ge Jisus teni nu umwono uko, nazhɛ eseshi-iyi ubwa unseni bu, ɛɛ hiɛŋ, Iwembe kwuŋ po eti eri shi ta bacɛnga mpiala ma ataa?

29Ge Jisus jishijɛ aŋ, bɛɛ hiɛŋ, Mu na gana ga mi eri shi ma bana ni iyi elele o, semi na adua#9:29 semi na adua: Tɛjɛshɛrɛga tu ko ti keeni maa, ne ezumi. kiri.

Ge Jisus Dumananɛ iwɛ Tu'wo tu Bwa

(Mat 17:22-23; Luk 9:43b-45)

30Ti ge Jisus ne eseshi-iyi ubwa beni apata, ee duri Galili. I namɛ kaa na amɛ ubwa maa kede bụtụ be elele mepi ofwo na aa namɛ o, 31iwɛnɛ tu boo mbisogono eseshi-iyi ubwa, bɛɛ hiɛŋ, Ɛ zhɛ a shapa Yɛu Bụtụ a pana atwamwa maa a kwụnɛ bụ, ama aka na ta a kwụnɛ bụ, na aba ijitɛ itɛtu, bi zhɛ bɛ hiɛ.#Mak 8:31; 10:33

32Ama eseshi-iyi ubwa eshiciji shi ijɛ boo mbisogono aŋ o, inyɛsɛ kaa shɛ aŋ maa e unseni bu.#Jon 12:16

Gaaba Hwuri Atwa Vwɛ Hwɛɛɛ?

(Mat 18:1-5; Luk 9:46-48)

33Aka na te e ci Kapanaum, ee teni nu umwono uko, ge Jisus unseni eseshi-iyi ubwa, bɛɛ hiɛŋ, Ashamanjɛ imbe kwuŋ ahi ga nda nu uhwaŋnaa?

34Ama eseshi-iyi ubwa sumenji bu, iwɛnɛ ta a ga nda ashamanjɛ nu uhwaŋna ata iwɛ bụtụ na hwuri binya tusara.#Luk 22:24

35Ge Jisus jɛjɛ baa suyanɛ eseshi-iyi ata umpwa-na-ba-eyebi, bɛɛ hiɛŋ aŋ, Yaa shɛ yaa namɛ na amɛ bụtụ be elele na amɛ hiŋ maa sha iyɛri ya atwa vwɛ, asha ubwa zhɛ ba sha yɛu na atwa vwɛ hwɛɛ maa bu na ndana atwa vwɛ ugondu.#Mat 20:26,27; 23:11; Mak 10:43,44; Luk 22:26 36Baa shapɛ yɛu ike ticwɛŋ bee shikicinji iŋ na ashashɛ aba, baa untanganɛ yɛu ɛtɛ, bɛɛ hiɛŋ aŋ, 37Bụtụ be elele na ba la yɛu ticwɛŋ gɛnɛ gɛ ni izeci mi, asha Gamba bee le. Bụtụ be elele na kaa n le, shɛ Gamba kiri bee le o, ama bi le du bụtụ na n tumwanɛ.#Mat 10:40; Luk 10:16; Jon 13:20

Bụtụ na Ti Imi shi, Asha no Tu Baa Namɛ

(Luk 9:49-50)

38Ga Jon hiɛŋ Jisus, E-Bimbisegeni, tu kwụbɛ ta bụtụ bu ko ba bacɛnga atumwa-ibiri ni izeci bu, atu lakanɛ bụ iwɛnɛ baa tu 'wa sụ.

39Ge Jisus hiɛŋ aŋ, Ta lakana bu ma o, iwɛnɛ ti yaa zasa bụtụ be elele na ba nda ugondu ụrụhwajɛ ni izeci mi na tɛ zhɛ na duma iwe mi iwɛ kakayɛ. 40Bụtụ be elele na shɛ shɛ bụtụ-bi-i'ime tu, asha no tu baa namɛ.#Tɛrɛ 11:27-29; Mat 12:30; Luk 11:23 41Bụtụ be elele na ihi peni okwo meni mo ohondo maa hi swe ni izeci mi iwɛnɛ ta ahiɛ shɛ atwa mi, iwɛ-tɛkana Omo hi mbiso maa, ule ubwa za ti'ina kwukwuŋ.#Mat 10:42

Tumanga ti Iwɛwɛ

(Mat 18:6-9; Luk 17:1-2)

42Ge Jisus hiɛŋ, Bụtụ be elele na zhɛ ba nda yɛu ike na ashashɛ miaụŋ mi ticwɛŋ cwɛŋ mu na mu n tɛtanɛ-rishe ukwurishi, asha i debeji maa o to bụtụ ata inɛnɛ ni i'ilu maa e keri bu ni itekwu. 43Yaa shɛ u'ala bụ ma bu nda ukwurishi#9:43 ukwurishi: Tɛjɛshɛrɛga tu koti hiɛŋ, udukwutwa. 42, 43, 45, 47. Jaja uŋ. I bu zhɛmanɛ maa teni nu uraiŋ nu u'ala uko, uhwuri maa 'yaga i'ɛlɛ iyebi maa teni nu ukwokwo ulwa na 'weji shi; #Mat 5:30 44[no ofwo na#9:44 No ofwo na: Tɛjɛshɛrɛga tu ufwugwo tu zasa shɛwala shɛ ga o 44, 46, 48. Ibɛ po abu kwụbɛ ta a jilaganɛ shụ ijɛ tikerede kerede. ojumbulu aba 'wi shi okwo tu ulwa wa aba kaa 'weji shi]. 45Yaa shɛ kaa uvwuna bụ ma bu nda ukwurishi, jaja uŋ. I bu zhɛmanɛ maa teni nu uraiŋ nu uvwuna uko uhwuri maa 'yaga ivwunɛ iyebi maa e bu keri nu ukwokwo ulwa. 46[No ofwo na ojumbulu aba 'wi shi, okwo tu ulwa wa aba kaa 'weji shi]. 47Yaa shɛ kaa rishe rụ bụ ru ma bu nda ukwurishi, asha vwa rụ kala. I bu zhɛmanɛ maa teni na Cɛnjɛ-ta-tugwama ta Agwatana ne rishe ru ko uhwuri maa 'yaga eshe eyebi maa e bi keri nu ukwokwo ulwa.#Mat 5:29 48No ofwo na ojumbulu aba 'wi shi, okwo tu ulwa wa aba kaa 'weji shi.#Ayiz 66:24

49Ulwa ụ shɛ gana manɛ mu na ɛɛ zhɛ o zwono bụtụ be elele gana na to o zwono iyi ụrụpɛ ye elele manɛ.

50Manɛ mɛ shɛ iyi ibiye, ama yaa shɛ manɛ mu lacɛmɛ shɛ, imbe ɛɛ tɛ zhɛ o zwono mu maa mu lacɛmɛɛ? Na latuma ma na anya hiŋ gana manɛ, maa hi na 'yaga amɛ-olom na anya hiŋ du.#Mat 5:13; Luk 14:34,35; Kolo 4:6; 1 Tɛsɛ 5:13

Currently Selected:

MAK 9: RBT

Highlight

Copy