MAK 10

Ge Jisus Mbisegeni Aŋ iwɛ Biyikwo Tubacɛnga

(Mat 19:1-12; Luk 16:18)

1Ti ge Jisus beni apata, bee zhe na cɛnjɛ tu Judia keeni hileniye Urefu Jodan. Ibɛ atwa ofwugwo ụlwatagwụ sasana pu bwa, nazhɛ bee mbisegeni aŋ iyi gana na tu baa shana ba nda.#Jon 10:40; 11:7 2Afarisi zhajɛ pi Jisus, ee menji bu ni unsene, ɛɛ hiɛŋ, Undwa leni suu maa bụtụ becinji biyikwo bwa?

3Ge Jisus jishijɛ aŋ, bɛɛ hiɛŋ, Gana naa tuba go Moses ihi peni-unuu?

4Ɛɛ jishijɛ bụ, ɛɛ hiɛŋ, Go Moses leni maa ga bụtụ 'nyeci utakada maa bacɛnga biyikwo bwa.#Undwa 24:1-4; Mat 5:31

5Ama ge Jisus jishijɛ aŋ, bɛɛ hiɛŋ, Iwɛ tɛshɛshɛpana ta shɛmɛ shi hiŋ, ibɛ po go Moses ihi 'nyeteni unu-tupana ata. 6Shibwonu te kwuni taa nu umozhigo na Agwatana karɛ iyi, butubwenyi ne biyikwo baa karɛ.#Umoz 1:27; 5:2 7Iwɛbɛ po bụtụ ba ganga bishi bwa no bino bwa maa togwu ne biyikwo bwa.#10:7 maa togwu ne biyikwo bwa: Tɛjɛshɛrɛga tu ko tu zasa n-ndumwa ma ata o. #Umoz 2:24 8Ebeyebi ata zhɛ a sha ya ike, shɛ iyebi aa shɛ ya o, ama a shɛ ya ike. 9Iyi elele nɛ kaa Agwatana togwowo, kede bụtụ be elele bogwu iŋ ya o.

10Aka na te e teni nu umwono uko, eseshi-iyi Jisus unseni bu sasana iwɛ ɛtɛ.

11Ge Jisus hiɛŋ aŋ, Bụtụ be elele na becinji biyikwo bwa, bee zeni biyikwo binya, asha tuwɛle baa njɛ.#Mat 5:32; Luk 16:18; 1 Kor 7:10,11; Rom 7:2,3 12Yaa shɛ kaa biyikwo beni bwolo bwa, baa cɛnɛ bwolo binya, asha tuwɛle du baa njɛ.

Ge Jisus peni Miaụŋ mu Tuweewee Uwebiye

(Mat 19:13-15; Luk 18:15-17)

13Aka na ta atwa oko suje miaụŋ mu tuweewee pi Jisus maa tumongono aŋ, ama eseshi-iyi ubwa tezhigeni aŋ.

14Ama aka na ti ge Jisus kwụbɛ iŋ, yaa gwumanɛ bụ, bɛɛ hiɛŋ aŋ, Lono ma maa miaụŋ mu tuweewee mi zhajɛ pi mi, ta lakana aŋ ma o. Iwɛnɛ ta Cɛnjɛ-ta-tugwama ta Agwatana tɛ shɛ ma tu atwa gana ga. 15Iwɛ-tɛkana Omo hi mbiso maa, Bụtụ be elele na le shi Cɛnjɛ-ta-tugwama ta Agwatana gana miaụŋ mu ga mi ticwɛŋ cwɛŋ, asha bi zha shɛ bo tono na tuba kwukwuŋ.#Mat 18:3 16Ge Jisus suji miaụŋ ma ata baa 'waŋnɛ, bee petengeni mu i'ɛlɛ ibwɛ no ohiuhiu aba, bee peni mu uwebiye.

Bụtụ na 'Yajɛ Uduciya Duwa

(Mat 19:16-30; Luk 18:18-30)

17Ti ge Jisus beni apata bɛɛ zhɛ nu uhwaŋna, ibɛ bụtụ bu ko gezhije baa zhajɛ pu bwa. Bee kwuzeni bu, bee unseni bu, bɛɛ hiɛŋ, E-Bimbisegeni bi biye, Imbe Ngee eri ma nda maa ma 'yaga uraiŋ unyizo-nomm? #Mak 1:40; Luk 10:25

18Ge Jisus heŋteni bu, bɛɛ hiɛŋ, Iwembe po ɛbi n hiɛŋ bụtụ bi biyee? I zasa bụtụ be elele na shɛ bụtụ bi biye o, semi bụtụ bu ko gba, ubwa shɛ Agwatana. 19Gabụ du bi mepi kaa unu-tupana ata na hiɛŋ, Ta kwụna bụtụ, ta nda tuwɛle, to zundo izunde, ta la tiseyida tu tukata, ta nda orugwusu o, na pana bishi bu no bino bu ụjɛrụma.#Ụban 20:12-16; Undwa 5:16-20

20Nazhɛ bụtụ ata jishijɛ Jisus, bɛɛ hiɛŋ, E-Bimbisegeni, Ma hwuga-unu onu-tupana ga hwɛɛ taa na aka na Ngaa ta shɛ yɛu tisemberi.

21Ti ge Jisus ngbaracɛ bụ, bee lubi bu kaa, bɛɛ hiɛŋ bụ, Iyi ike ta bu 'nyananɛ. Zhaga sanga iyi elele nɛ abi 'yajɛ, maa suji ukwuribi ata peni okofwo, nazhɛ zhajɛ ya n 'wa.#Mat 6:20; Luk 12:33; Ugo 2:45; 4:34,35

22Ama aka na ta bụtụ ata hwụjɛ iwɛ ɛtɛ, ibɛ po amɛ ubwa hashɛganụ ni iwɛ ɛtɛ, baa sanɛ ujiyo na amɛ-tụhaŋtụ duwa, iwɛnɛ tu baa 'yajɛ uduciya duwa.

23Ti ge Jisus mbiyanganɛ eseshi-iyi ubwa, bɛɛ hiɛŋ aŋ, Hioko ma gana na ti yaa 'yaganɛ azhɛgba ikɛnyi maa e teni na Cɛnjɛ-ta-tugwama ta Agwatana.

24Ama iwɛ ɛtɛ ge Jisus jɛmɛ dama eseshi-iyi ubwa duwa. Ge Jisus mbishi aŋ sasana, bɛɛ hiɛŋ, A-miaụŋ mi mi, i shɛ iyi nɛ gwụmɛ tebiye maa teni#10:24 iyi nɛ gwụmɛ tebiye maa teni: Tɛjɛshɛrɛga tu ko tụ ngwụshɛ ti keeni tɛɛ hiɛŋ, atwa na patanɛ uduciya wa aba rishe. na Cɛnjɛ-ta-tugwama ta Agwatana! 25I zasa iwɛ maa irihende duri ni inyɛnu yo otulo i ci maa bɛzhɛgba teni na Cɛnjɛ-ta-tugwama ta Agwatana o.

26Iwɛ ɛtɛ dama eseshi-iyi ubwa duwa, oo momo hoŋtongonu,#10:26 oo momo hoŋtongonu: Tɛjɛshɛrɛga tu ko ti hiɛŋ, ɛɛ hiɛŋ bụ. ɛɛ hiɛŋ, Asha gaaba kaa zhɛ bo bino yaa?

27Ge Jisus ngbarakacɛ aŋ, bɛɛ hiɛŋ, Atwa eri shi a nda iŋ o, ama i shɛ shɛ tuba gana ata no ofwo Agwatana o, Iyi elele zana Agwatana iwɛ tɛnda o.

28Ga Pita hiɛŋ Jisus, Hioko, tu gongwo kaa iyi elele kpaaŋ atụ bụ 'wa.#Mak 1:16-20

29Ge Jisus jishijɛ aŋ, bɛɛ hiɛŋ, Iwɛ-tɛkana Omo hi mbiso maa, bụtụ be elele na genji ihwɛ ibwɛ, okwo miaụŋ-mo-bino bwa, okwo angwụfwụ ubwa, okwo bino bwa, okwo bishi bwa, okwo biyikwo bwa, okwo miaụŋ mu bwa, kwo kaa ntuma mu bwa iwɛ mi keeni iwɛ Anabarɛ Ebiye, 30bụtụ ata zhɛ ba lashɛga ule dipi-yebi na aka ga hwuwayɛ, tu nhwaŋ, ta miaụŋ-mo-bino, ta angwụfwụ, to ono, ta miaụŋ, tu ntuma, ta tɛshɛka tu na ɛɛ zhɛ a shɛka bụ. Bi zhɛ kaa ba lashɛganana hwuŋ uraiŋ unyizo-nom na aka ye te ci. 31Ama atwa ofwugwo na ashashɛ atwa na shɛ la atwa ehiiŋ, ɛ zhɛ a sha atwa umɛwɛɛ, atwa na kaa shɛ la atwa umɛwɛɛ, ɛ zhɛ a sha atwa ehiiŋ.#Mat 20:16; Luk 13:30

Ge Jisus Jɛmɛ sasana iwɛ Tu'wo tu Bwa

(Mat 20:17-19; Luk 18:31-34)

32Aka na ti ge Jisus ne eseshi-iyi ubwa namɛ nu uhwaŋna tɛ ɛ zhɛ umungwo Jɛrusalɛm, ge Jisus hwuleni eseshi-iyi ubwa umbe. Yaa dama aŋ, inyɛsɛ kaa shɛ atwa na 'wa bụ. Ge Jisus suji eseshi-iyi ubwa umpwa-na-ba-eyebi geri bu ko sasana, bee kwuni aŋ iyi nɛ zhɛ yo vwutono bu timbiso. 33Bɛɛ hiɛŋ aŋ, Hioko ma, ti zhɛ Jɛrusalɛm, ɛ zhɛ a shapa Yɛu Bụtụ a pana ehiu onongbo keeni embisegeni Undwa. Ɛ zhɛ a pana bụ n-ndumwa-tụwụma, nazhɛ a pana bụ atwa na shɛ shɛ Eju#10:33 a pana bụ atwa na shɛ shɛ Eju: Aba shɛ Orom ata untanganɛ cɛnjɛ tu Judia na aka ata. maa a kwụnɛ bụ.#Mak 8:31; 9:12 34Ɛ zhɛ a nda bụ asada, ɛ zhɛ o zwogono bu mecemi, ɛ zhɛ o kwuto bu, ɛ zhɛ a kwụna bụ, ama na aba ijitɛ itɛtu, bi zhɛ bɛ hiɛ.#Mak 14:65; 15:19,26-32

Ilupwɛ ya Ata Jemis na Jon

(Mat 20:20-28)

35Ge Jemis na Jon a na shɛ miaụŋ mi Zɛbɛdi zhajɛ no ofwo Jisus, ɛɛ hiɛŋ bụ, E-Bimbisegeni, ta jala maa iyi elele nɛ atụ bụ lụpɛ maa utu ndanɛ iŋ.

36Ge Jisus heŋteni aŋ, bɛɛ hiɛŋ, Imbe bwa ahia jala maa Ma hi ndanaa?

37Ɛɛ jishijɛ bụ, ɛɛ hiɛŋ, Lono ma bụtụ tu bu ko gɛga nu u'ala ubiye bu, maa bụtụ tu bi yebi gɛga nu u'ala ugwulwo bu no ofwo ụjɛrụma bụ.#Mat 19:28; Luk 22:30

38Ama ge Jisus mbishi aŋ, bɛɛ hiɛŋ, Hi mepi shi iyi nɛ maa hiɛ lụpɛ o. Hi eri maa hi swe ukwopi ụbaụta na Ama swa hŋ? Okwo hi eri maa a hiɛ njɛ ubaptizim#10:38 ubaptizim: Ubaptizim ga wa duma iwɛ ike ike ni iyi nɛ ukwopi wa duma, ibɛ shɛ iwɛ ụbaụta tihioko. na aa ma nda? #Luk 12:50; Jon 18:11

39Ɛɛ jishijɛ bụ, ɛɛ hiɛŋ, Ti eri.

Ge Jisus jishijɛ aŋ, bɛɛ hiɛŋ, Hi eri hia swa ukwopi na Ama swa, ɛɛ zhɛ du ma hi nda ubaptizim na aa ma nda.#Ugo 12:2; N-ndu 1:9 40Ama maa hiɛ gɛga nu u'ala ubiye kwo kaa nu u'ala ugwulwo mu, inɛ ɛtɛ shɛ shɛ inee mi maa ma pana bụtụ o, ama i shɛ inɛ ya atwa na aa imanganɛ iŋ.

41Aka na te eseshi-iyi umpwa a na vwɛ hwụjɛ iwɛ ɛtɛ ata Jemis na Jon jɛmɛ, yaa gwumanɛ aŋ. 42Ibɛ po ge Jisus suyanɛ eseshi-iyi ubwa pu bwa, bɛɛ hiɛŋ aŋ, Hi mepi gana na ta atwa na ɛɛ hiɛŋ aba shɛ ehiu atwa na shɛ shɛ Eju mama nda gana shɛgwangwama sha aba, gobwonu du atwa na ɛɛ hiɛŋ atwa a'wụtụ aba a nda aŋ gana na tu ụhwada wa aba shɛ.#Luk 22:25,26 43Ama kede i shɛ gana ata na ashashɛ hiŋ o, ama bụtụ be elele na ba jala maa sha bụtụ bụ 'wụtụ na ashashɛ hiŋ, asha ubwa zhɛ ba sha yɛu-ugondu ya atwa vwɛ.#Mat 23:11; Mak 9:35; Luk 22:26 44Bụtụ be elele na kaa ba jala maa sha iyɛri ya atwa vwɛ na ashashɛ hiŋ, asha ubwa zhɛ ba sha bujama ba atwa vwɛ kpaaŋ. 45Okwo Yɛu Bụtụ zhe shi nu unyizo ga maa a ndanɛ bụ iyi o, ama bi zhajɛ maa ndana atwa iyi, maa pana kaa uraiŋ ubwa maa u gwube#10:45 gwube: Tugwube na rɛjɛm ru ko, kpalụ gembi ufwugwo aa duma mu iwɛ tụtụpa maa e seeneni bujama na oo go songwo la. atwa ofwugwo.#1 Timo 2:5,6

Ge Jisus Hieci Inyɛmɛnyɛmɛ Batimios na Shɛ Olubo

(Mat 20:29-34; Luk 18:35-43)

46Aka na ti ge Jisus ne eseshi-iyi ubwa keeni atwa ofwugwo ụ'wụtụ zhɛ Jɛriko. Aka na te e beni nu Jɛriko, ga Batimios yɛu Timios na shɛ olubo jɛjɛ nụ ụzalụ uhwaŋna baa lụpa iyi.

47Aka na to olubo ata hwụjɛ maa ge Jisus bụtụ bu Nazarɛt be ci, bee kwuni n'ungwa, bɛɛ hiɛŋ, E-Jisus, Yɛu Devid, hioko ka inyɛmɛnyɛmɛ mi.#Mat 9:27

48Ama atwa ofwugwo ata tazhɛganɛ bụ, maa ga nama saiiŋ, ama bu uganɛ nazhɛ duwa, bɛɛ hiɛŋ, Gabụ Yɛu Devid, hioko inyɛmɛnyɛmɛ mi.

49Ge Jisus shikeni bɛɛ hiɛŋ, suyanɛ bu ma. Aa suyanɛ ga olubo ata. Atwa ata oko hiɛŋ bụ, Ga amɛ bu lemi ya, ishijlɛ, ba bu suyana.

50Ibɛ po olubo ata 'wɛŋ utogwo ubwa, bɛɛ ishijɛ bee jwe ungapa, baa zhajɛ pi Jisus.

51Ge Jisus heŋteni bu, bɛɛ hiɛŋ, Imbe aba jala maa Ma bu ndanaa?

Olubo ata jishijɛ Jisus, bɛɛ hiɛŋ, E-Bimbisegeni, Ma jala maa ma kwụbanana uhwaŋna.

52Ge Jisus hiɛŋ bụ, Zhaga ya, rishe rụ bụ tɛtɛtana rụ bụ nɛnjɛ. Gunu ata olubo ata hieci uhwaŋna sasana, baa 'wa Jisus nu uhwaŋna ata.#Ayiz 42:6,7; Mat 9:22; Mak 5:34; Luk 7:50; 8:48; 17:19

Currently Selected:

MAK 10: RBT

Highlight

Copy