MAK 8

Ge Jisus peni Atwa Igbɛɛ-i-yebi Iyimɛyɛ

(Mat 15:32-39)

1Na aka oko sasana, ta atwa ofwugwo ụ'wụtụ ụlwatagwụ, a zasa kaa iyimɛyɛ o. Ge Jisus suyanɛ eseshi-iyi ubwa pu bwa, bɛɛ hiɛŋ aŋ, 2Inyɛmɛnyɛmɛ ya atwa ofwugwo ga i n shɛ, iwɛnɛ ta a ulwa hwayɛ ijitɛ itɛtu ta a namɛ ne mi, a zasa kaa iyi elele nɛ aa yɛ o. 3Yaa shɛ Ngee genji aŋ maa e ji ni imunɛ, ugiriri zhɛ wa kala aŋ nu uhwaŋna, atwa oko na amɛ aba kaa banɛ taa dụlụ.

4Eseshi-iyi ubwa heŋteni bu, ɛɛ hiɛŋ, Cee bwa bụtụ eri ba banɛ ni iyimɛyɛ nɛ eri yo shigogo atwa ga nụ ụshɛka gaa?

5Ge Jisus heŋteni aŋ, bɛɛ hiɛŋ, mbrad mu mba ahiɛ 'yajɛɛ? Ɛɛ jishijɛ bụ, ɛɛ hiɛŋ, Mi cenje.

6Ge Jisus peni atwa ata unu maa ga a gɛgaga na cɛnjɛ. Aka na ti bee suji mbrad ma ata mi cenje, baa njɛ ugwoje na Agwatana, nazhɛ boo dwonu mu, bee peni eseshi-iyi ubwa maa ge sheji mu na agba atwa ata ofwugwo. 7A 'yajɛ du ijɛnɛ maa imbɛnɛ. Aka na ti ge Jisus tabwa Agwatana maa pana iŋ uwebiye ubwa, bɛɛ hiɛŋ eseshi-iyi ubwa, shapa ma du inɛ gɛ maa hi sheji na agba aba. 8Ibɛ atwa ata yɛ ee shigeji. Nazhɛ eseshi-iyi ubwa suji owunzu mbrad ma ata mụ vwɛ, mee shini n-ngwumi mi cenje. 9Atwa na kaa yɛ iyimɛyɛ ɛtɛ namɛ atwa igbɛɛ-iyebi (4,000). Nazhɛ ge Jisus hiɛŋ atwa ata, Zhaga ma ya. 10Nazhɛ ge Jisus teni nụ ụhaŋtụ ne eseshi-iyi ubwa, ee zhe na cɛnjɛ tu Damanuta.#8:10 Damanuta: Tɛjɛshɛrɛga tu ko ti hiɛŋ, Magadan, kwo kaa Magdala.

Afarisi a Jalakaka Ụrụhwajɛ

(Mat 12:38-42; 16:1-4)

11Afarisi banɛ aa zhaganɛ Jisus, aa njɛ ashamanjɛ nu bwa, ee menji bu, ɛɛ hiɛŋ, Ta jalakaka ụrụhwajɛ na banɛ na azuba.#Mat 12:38; Luk 11:16 12Ge Jisus ngwuleni na amɛ na amɛ ubwa, bɛ hiɛŋ, Iwembe po atwa uwaŋnɛ ga a jalakaka ụrụhwajɛɛ? Iwɛ-tɛkana Omo hi mbiso maa, I zasa ụrụhwajɛ we elele na ɛɛ zhɛ a pana atwa uwaŋnɛ ga o.#Mat 12:39; Luk 11:29 13Nazhɛ ge Jisus genji aŋ, bee teni nụ ụhaŋtụ sasana bee keshi hileniye itekwu.

Ifucingɛ ya Afarisi Keeni Inɛ Hɛrod

(Mat 16:5-12)

14Na aka ga isɛbwɛ 'wi eseshi-iyi Jisus maa a 'waŋna iyimɛyɛ. Iyimɛyɛ nɛ aa 'waŋnɛ nụ ụhaŋtụ wa aba hwuri shi ibrɛd ike o. 15Ge Jisus tɛtaganɛ eseshi-iyi ubwa unu, bɛɛ hiɛŋ, No shiyono ma eshe maa hi na nda pece iwɛ Ifucingɛ ya Afarisi keeni inɛ Hɛrod.#Luk 12:1

16Nazhɛ eseshi-iyi Jisus kwuni n-ndumwa tụdụmanga abaaba, iwɛnɛ ta a zasa iyimɛyɛ.

17Ti ge Jisus mepi maa a haŋsa ba iwɛ gɛnɛ ɛtɛ na shɛmɛ sha aba, bɛɛ hiɛŋ aŋ, Iwembe po ahia dumanga n-ndumwa ahiɛba hiɛba, maa hi zasa iyimɛyɛɛ? Asha hi ta kwụbɛ shɛ waa hŋ? Hi te eshiciji shi waa hŋ? Shɛmɛ shi hiŋ shɛ ta shɛshɛpanɛ waa hŋ? #Ayiz 6:9,10; Mak 6:52 18Asha hiɛ 'yajɛ eshe, hiɛ kwụbɛ shɛ suu uhwaŋna? Hiɛ 'yajɛ acɛbɛ, hiɛ hwụjɛ shɛ suu iwɛ? Asha hi teyinji shi ya ree? #Jɛrɛ 5:21; Izik 12:2; Mak 4:12 19Aka na Ngoo dwonu mbrad ma ata Ngee peni atwa igbɛɛ-iyebi-na-akpakwụ-a-ta, shɛrɛgada shɛ mbaa mbrad mu na mụ vwɛ mu na ehi suji shinii? Ɛɛ jishijɛ bụ, ɛɛ hiɛŋ, Shɛrɛgada umpwa-na-shɛba-shi-yebi.

20Aka na tu Ngoo dwonu mbrad mi cenje, Ngee peni atwa igbɛɛ-iyebi, n-ngwumi mu mba mbrad mu na mụ vwɛ te ehi suji mi shinii? Ɛɛ jishijɛ bụ, ɛɛ hiɛŋ, N-ngwumi mi cenje.#Mak 8:1-10

21Nazhɛ ge Jisus heŋteni aŋ, bɛɛ hiɛŋ, Asha hi te eshiciji waa hŋ?

Ge Jisus Nɛnjɛ Olubo Oko ni Bɛtɛsaida

22Aka na te e ci Bɛtɛseida, atwa oko zɛrijɛ olubo oko no ofwo Jisus maa tumongono bu. 23Ge Jisus untanganɛ olubo ata u'ala, bee becinji bu nụ ụshɛpwụ ata. Aka na ti bee zweni olubo ata mecemi ne eshe, bee peteni bu i'ɛlɛ ibwɛ, bee heŋteni bu, bɛɛ hiɛŋ, Bụ kwụbɛ uhwaŋna hŋ? #Mak 7:33

24Olubo ata mbiyanganɛ ofwo, bɛɛ hiɛŋ, Iiŋ, ma kwụba atwa, ama a shɛ maa i'wɛ'wɛ to o rungo.

25Nazhɛ ge Jisus peteneni bu i'ɛlɛ ibwɛ ne eshe, nazhɛ olubo ata ngbaracɛ ofwo zenji zenji. Baa zhɛmananɛ, bee hieci iyi taa dụlụ tebiye. 26Ge Jisus hiɛŋ bụ, Zhaga jiyo, ama to mbiso bụtụ be elele nụ ụshɛpwụ ga o.

Ga Pita Le Tiseida maa Ge Jisus Ubwa Shɛ ga Krast ata

(Mat 16:13-20; Luk 9:18-21)

27Ti ge Jisus beni apata ne eseshi-iyi ubwa, ee tenenji ashɛpwụ na namanjɛ na cɛnjɛ ti Sɛsɛria Filipai. Bee unseni eseshi iyi ubwa tɛ ɛ zhɛ nu uhwaŋna, bɛɛ hiɛŋ aŋ, Gaaba kwuŋ atwamwa hiɛŋ N shɛɛ?

28Eseshi-iyi ubwa jishijɛ bụ, ɛɛ hiɛŋ, Atwa oko hiɛŋ ga Jon ubaptizim, atwa oko hiɛŋ, ge Elaija, anya atwa oko hiɛŋ, bụtụ bu ko na ashashɛ egesere.#Mak 6:14,15; Luk 9:7,8

29Ge Jisus unseni aŋ ya, bɛɛ hiɛŋ, Ahiɛba tuba, gaaba kwuŋ ɛhi hiɛŋ N shɛɛ?

Ga Pita jishijɛ bụ, bɛɛ hiɛŋ, Gabụ bɛ shɛ ga Krast.#Jon 6:68,69

30Ge Jisus tɛtaganɛ aŋ unu duwa, bɛɛ hiɛŋ, To mbiso ma bụtụ be elele iwe mi o.#Mak 9:9

Ge Jisus Jɛmɛ iwɛ Ụbaụta Ubwa Keeni iwɛ Tu'wo tu Bwa

(Mat 16:21-28; Luk 9:22-27)

31Nazhɛ ge Jisus kwuni eseshi-iyi ubwa timbisogono, bɛɛ hiɛŋ, I shɛ tilɛɛ maa Yɛu Bụtụ zhɛ yo hioko ụbaụta ofwugwo. N-nyarɛ, ne ehiu onongbo, keeni embisegeni Undwa zhɛ a manga bụ, ɛɛ zhɛ a laka bụ gana uzhobu. Ɛ zhɛ a kwụna bụ, ama na aba ijitɛ itɛtu, bi zhɛ bɛ hiɛ. 32Ge Jisus eshicigeni aŋ iwɛ gɛ caakwụ. Ibɛ po ga Pita mbo bu bee kwuni bu tutazhɛgana. 33Ama ge Jisus jishirijɛ baa ngbaracɛ eseshi-iyi ubwa, bee tezhigeni Pita, bɛɛ hiɛŋ bụ, Gabụ ge Setan, hwulo geri ba aba mi, iwɛnɛ te ebi heŋshi shi ahaŋsa Agwatana, semi ahaŋsa atwa.

34Nazhɛ ge Jisus suyanɛ atwa ofwugwo te eseshi-iyi ubwa no ofwo ubwa, bɛɛ hiɛŋ aŋ, Yaa shɛ bụtụ be elele ba jala maa ma 'wa, asha ga bu na laka tuhaŋsa ti ikɛnyi ibwɛ, ama ga shapa ụ'wụ'wụ-ubatanɛ ubwa maa ma n 'wa.#Mat 10:38; Luk 14:27 35Bụtụ be elele na ba jala maa bicingo uraiŋ ubwa, nazhɛ bɛɛ zhɛ ba inzhɛnga uŋ, ama bụtụ be elele na ba inzhɛnga uraiŋ ubwa iwe mi keeni iwɛ Anabarɛ Ebiye, nazhɛ bɛɛ zhɛ bo bicingo uŋ.#Mat 10:39; Luk 17:33; Jon 12:25 36Imbe kwuŋ zhɛ ya sha ule na bụtụ zhɛ ba ya ti yaa shɛ bee leshiji iyi unyizo ga hwɛɛ, maa uraiŋ ubwa tuba njɛ ufwuu? 37Kwo kaa imbe bụtụ zhɛ ba pana maa i shɛ tisheyingotu tu uraiŋ ubwaa? 38Bụtụ be elele na ba nda ezuye mi, ti iwɛ n-ndumwa mi mi nu uwaŋnɛ ga wa awɛle keeni uwaŋnɛ ga iwɛwɛ, Yɛu Bụtụ zhɛ ya nda hwuŋ du ezuye bụtụ ata aka na ti bee ci nụ ụjɛrụma Bishi bwa na atumwa ubwa tijilo azuba.#Mat 10:33; Luk 12:9

Currently Selected:

MAK 8: RBT

Highlight

Copy