MATIU 15

Iyi nɛ N-nyarɛ mi Mbisegeni La Atwa Cala

(Mak 7:1-3)

1Nazhɛ Afarisi keeni embisegeni Undwa a na banɛ nu Jɛrusalɛm zhajɛ pi Jisus, ee heŋteni bu, ɛɛ hiɛŋ, 2Iwɛmbe po eseshi-iyi bu 'wa sụ ụpapụ iyi uvwovwu n-nyarɛɛ? Iwɛnɛ po o sukwutwo su i'ɛlɛ ya aba na aka na ɛɛ zhɛ a ya iyimɛyɛ o.

3Ama ge Jisus jishijɛ aŋ, bɛɛ hiɛŋ, Iwɛmbe po du tuba ahia bwada unu-tupana wa Agwatana iwɛ iyi uvwovwu hiiŋ? 4Agwatana peni atwa unu, bɛɛ hiɛŋ, Pana bishi bu keeni bino bu ụjɛrụma, waa hiaaŋnanɛ, Bụtụ na ba dumangana bishi bwa okwo bino bwa, iyi iwɛ, ga kwụnɛ bụ tilɛɛ.#Ụban 20:12; 21:17; Liv 20:9; Undwa 5:16 5Ama hi hiɛŋ tuba, Bụtụ be elele na bɛ hiɛŋ bishi bwa kwo kaa bino bwa, maa M pwonuo Agwatana upwaŋ iyi nɛ abu ga shɛ ba ya ule ibɛ no olugwo mi, 6asha bụtụ ata zha shɛ ba pana ya bishi kwo kaa bino#15:6 bishi kwo kaa bino: Tɛjɛshɛrɛga tu ko tu zasa bino bwa ụjɛrụma o. Gabata ahia hashagana unu-tupana#15:6 unu-tupana: Kwo kaa undwa, Tɛjɛshɛrɛga tu ko ti hiɛŋ, n-ndumwa. wa Agwatana iwɛ iyi uvwovwu hiŋ. 7Ahiɛba na hia nda iyi tɛnda-te-eshe, ga Ayizaya dumwa la tigesere tu na ti teni cɛŋ ne hiŋ, aka na ti bɛɛ hiɛŋ,

8Atwa ga ma muna ụjɛrụma nu unu kwakwa,

ama shɛmɛ sha aba shɛ dụlụmɛ ne mi.#Ayiz 29:13

9Tɛgadaga aa ma n zhɛba,

o mbisogono atwa unu na atwa peni aŋ, gana maa unu-tupana mu ta.#Ayiz 29:13

Iyi nɛ ya Hashɛgana Atwa

(Mak 7:14-23)

10Ge Jisus suyanɛ atwa ata ufwugwo pu bwa, bɛɛ hiɛŋ aŋ, Shɛlaga ma maa hi eshiciji. 11Shɛ iyi nɛ yo tono nu unu, ya hashɛgana bụtụ o, semi iyi nɛ ya banɛ nu unu, ibɛ kiri ya hashɛgana bụtụ.#Ugo 10:14,15; Rom 14:14; 1 Timo 4:3

12Nazhɛ eseshi-iyi ubwa zhajɛ pu bwa, ɛɛ hiɛŋ bụ, Bi mepi hiŋ maa iwɛ gɛ abɛ jɛmɛ gwumanɛ Afarisi?

13Ge Jisus jishijɛ aŋ, bɛɛ hiɛŋ, Tibila te elele Bishi mi na namɛ na azuba bɛrɛ shɛ, ɛ zhɛ o mushingo tu tilɛɛ.#Ayiz 60:21; Jon 15:2 14Ganga aŋ ma. A shɛ a'yagajɛ a na shɛ sholubo, a na a 'yagaga sasana sholubo. Yaa shɛ olubo a 'yagaga olubo, kpaaŋ aba zhɛ a 'waŋ nu ukporo.#Mat 23:16,24; Luk 6:39; Rom 2:19

15Ga Pita hiɛŋ bụ, Iti eshicigeni ecilo n-ndumwa ma ata abụ manganjɛ iwɛ iyi nɛ ya hashɛgana bụtụ.

16Ge Jisus hiɛŋ aŋ, Asha hi te eshiciji shi waa du suu? 17Hi eshiciji shi suu maa iyi elele nɛ yo tono nu unu, yo hwulo nu ugbokwo, nazhɛ o inzo iŋ nu ubizo? 18Ama iyi nɛ ya banɛ na amɛ, ye pushe nu unu, ibɛ ya hashɛgana bụtụ.#Mat 12:34 19Na amɛ bụtụ ahaŋsa awɛ tuhaŋsa a banɛ, ta bụtụ tụkwụna, tɛ tuwɛle tɛnda, ta tụlagwụ tụ wɛ ti yɛu-ye-eyi ni yɛu-yo-o, ti izunde, te tiseyida tu tukata, ta bụtụ tugbozhigo.#1 Kor 6:9,10; Gala 5:19-21 20Inɛ ɛtɛ ibɛ ya hashɛgana bụtụ, ama iyi tiya uzawa i'ɛlɛ tusukwutwo heshigeni shi bụtụ o.

Rishe-tɛtɛtana re Biyikwo

(Mak 7:24-30)

21Ti ge Jisus beni apata, baa sanɛ na cɛnjɛ tu Taya keeni Saidụn. 22Nazhɛ biyikwo bi Kenan bu ko na banɛ na cɛnjɛ ta ata, ugananɛ bụ, bɛɛ hiɛŋ bụ, Agwangwama, gabụ Yɛu Devid, Hioko inyɛmɛnyɛmɛ mi. Butumwa-bi-ibiri na namɛ na amɛ yɛu mi yo o, ba pana bụ ụbaụta duwa.

23Ama ge Jisus jɛshɛjɛ shɛ bụ n-ndumwa okwo mu ko. Ibɛ po eseshi-iyi ubwa zhajɛ, ɛɛ hiɛŋ bụ, Hiɛŋ biyikwo ga go hwulo, iwɛnɛ tu baa tu 'wa nu n'ungwa.

24Ge Jisus jishijɛ aŋ, bɛɛ hiɛŋ, No ofwo atwa na shɛ gana agwụdụ Isrɛl, a na 'inɛ kiri aa n tumwanɛ.#Mat 10:6

25Nazhɛ biyikwo ata zhajɛ bee leyi bee kwuzhi ni ivwunɛ ibwɛ, bɛɛ hiɛŋ bụ, Agwangwama, aya, m mbiyeni kaa! #Mat 8:2; 18:26; 20:20; Jon 9:38

26Ge Jisus hiɛŋ bụ, I zhɛshɛ maa e shepi iyimɛyɛ miaụŋ e keleni oywoywo shiwawa o.

27Ama biyikwo ata hiɛŋ bụ, Okwo oywoywo shiwawa kaa du a ya owunzu iyimɛyɛ nɛ ya 'waŋtatangwụ tuta tu uteburu wa agwangwama abaa.

28Nazhɛ ge Jisus jishijɛ bụ, bɛe hiɛŋ, E-biyikwo ga, rishe-tɛtɛtana rụ bụ ri gembi duwa! Ga i bụ namana gana na aba jala. Ibɛ po yɛu ibwɛ zhɛmananɛ te kwuni na auwa ata.#Mat 9:22,28,29; Mak 10:52; Luk 7:50; 17:19

Ge Jisus Nɛnjɛ Atwa Ofwugwo

29Ti ge Jisus beni apata, bee zhe nụ ụpalanụ itekwu Galili, bee munji ni ishɛmɛ ike baa jɛjɛ. 30Nazhɛ atwa ofwugwo ụ'wụtụ zhajɛ pu bwa, ta atwa na ivwunɛ ya aba 'wegeni, to okwuturu, to sholubo, to n-ngwuronu, keeni anya atwa ufwugwo, ee tileni aŋ nu ukaka ubwa, baa nɛnjɛ aŋ kaa kpaaŋ. 31Yaa dama atwa ata kpaaŋ, aka na ta a kwụbɛ to n-ngwuronu ma dumanga n-ndumwa, okwuturu zhɛmananɛ, ta atwa na ivwunɛ ya aba ge 'wegeni a zha tahaŋnụ, sholubo sha kwụba uhwaŋna. Ee peni Agwatana Isrɛl ụjɛrụma.

Ge Jisus Peni Atwa Igbɛɛ-i-yebi Iyimɛyɛ

(Mak 8:1-10)

32Ge Jisus suyanɛ eseshi-iyi ubwa, bɛɛ hiɛŋ aŋ, Inyɛmɛnyɛmɛ ya atwa ga i n shɛ, taa jitaala aa namɛ pi mi, a zasa kaa iyi elele aa yɛ o. N jeri shi kaa maa ma ganga aŋ, maa e ji uzawa iyimɛyɛ tiya o, shibwonu ugiriri zhɛ wa kala aŋ hwayɛ nu uhwaŋna.

33Eseshi-iyi ubwa heŋteni bu, ɛɛ hiɛŋ, Ce bwa ɛti zhɛ te gwushije iyimɛyɛ nɛ zhɛ yo shigogo ufwugwo ga ụ'wụtụ nụ ụshɛka gaa?

34Ge Jisus heŋteni aŋ, bɛɛ hiɛŋ, Ibrɛd imbɛ ahi 'yajɛɛ? Ɛɛ jishijɛ bụ, ɛɛ hiɛŋ, icenje, keeni ijɛnɛ maa imbɛnɛ.

35Ge Jisus peni atwa ata unu, maa ga a gɛgaga na cɛnjɛ. 36Bee suji ibrɛd ɛtɛ icenje keeni ijɛnɛ ɛtɛ, baa njɛ ugwoje, nazhɛ bee hwuŋzerenji iŋ, bee peni eseshi-iyi ubwa, nazhɛ eseshi-iyi ubwa shepi iŋ, ee hweŋshi ufwugwo wa atwa ata hwɛɛ. 37Aa yɛ iŋ hwɛɛ aba, ee shigeji. Ee suji tuvwa to owunzu ibrɛd ɛtɛ, ee shini n-ngwumi mi cenje. 38Etwenyi na yɛ iyimɛyɛ ɛtɛ namɛ atwa igbɛɛ-iyebi, a 'imɛ shɛ kaa eyikwo na miaụŋ o.

39Aka na ge Jisus hiɛŋ atwa ata, Tugwo ma oo, bee teni nụ ụhaŋtụ, bee zhe na cɛnjɛ tu Magadan.#15:39 Magadan: I zasa atwa na mepi ofwo na Magadan ga namɛ hwuwayɛ kpororo.

Currently Selected:

MATIU 15: RBT

Highlight

Copy