MATIU 14
14
Tu'wo tu Jon Bɛnjɛ-bu-ubaptizim
(Mak 6:14-29; Luk 9:7-9)
1Aka na ti gɛ Hɛrod na shɛ uhiu cɛnjɛ ta ata hwụjɛ unabarɛ Jisus. 2Bɛɛ hiɛŋ miaụŋ-mu-ugondu ubwa, Ga Jon Bɛnjɛ-bu-ubaptizim hiɛ no tu'wo, iwɛbɛ po ugondu ga ụrụhwajɛ ukpahiŋ wa nda tedure nu bwa.
3Gɛ Hɛrod 'imɛ la Jon bee kepi bu nu umwono-tishi, iwɛ Hɛrodias biyikwo bi yɛu-bino bwa ge Filip,#14:3 Yɛu-bino…Ge Filip: Tɛjɛshɛrɛga tu ko tu zasa Filip o. #Liv 18:16; 20:21; Luk 3:19,20 4iwɛnɛ ti ga Jon hiɛŋ bụ, Undwa leni shi maa zeni bu o. 5Gɛ Hɛrod ba jala maa kwụna Jon, ama ba nda inyɛsɛ ya atwa ofwugwo, iwɛnɛ ta atwa kpaaŋ rɛcɛ maa ga Jon shɛ bigesere.
6Aka na tu ụjita titeyinje ta tumata ti Hɛrod ci, Ibɛ yɛu-yo-o Hɛrodias hiɛbɛ tɛhiɛba na ashashɛ aba, tɛhiɛba ta ata kaa tu kwụlanɛ Hɛrod tebiye. 7Ibɛ po gɛ Hɛrod shileni yɛu ɛtɛ unu harɛ boo to-tuwa, maa bi zhɛ ba pana bụ, iyi elele nɛ baa lụpɛ bụ. 8Ibɛ po bino bi yɛu ɛtɛ, mbishi iŋ, iyi nɛ yaa shɛ ya lụpa agwuma. Ibɛ po yɛu ɛtɛ hiɛŋ agwuma, N shiyeneni uhiuhiu Jon Bɛnjɛ-bu-ubaptizim nɛ ɛkpɛtɛ hwuwayɛ hwuwayɛ go.
9Ama amɛ agwuma hashɛganụ, ama bi peni waa kaa atwa ubwa unu maa ge peni bu uŋ iwɛnɛ boo go towo-tuwa, ne eshe atwa na gɛgajɛ a ya iyi nu bwa. 10Baa tumwanɛ butumwa nu umwono-tishi maa ge mwe uhiuhiu Jon. 11Ee zhe ga ee mwe uŋ, ee shiyeni uŋ nɛ ɛkpɛtɛ, ee peni yɛu ɛtɛ yo o, bee shepi uŋ, bee peni bino bwa. 12Nazhɛ eseshi-iyi Jon zhajɛ ee shepi ru'wo ru bwa, ee ni ru. Nazhɛ ee zhe ee mbishe Jisus.
Ge Jisus Peni Atwa igbɛɛ-iyebi-na-akpakwụ-a-ta Iyimɛyɛ
(Mak 6:30-44; Luk 9:10-17; Jon 6:1-14)
13Aka na ti ge Jisus hwụjɛ iwɛ ɛtɛ, bee beni apata, bee teni nụ ụhaŋtụ bwooko, bee zhe no ofwo na bụtụ zasaba. Aka na ta atwa ofwugwo hwụjɛ iŋ, ee beni nụ ụshɛpwụ ụshɛpwụ aa 'wa bụ ni ivwunɛ. 14Aka na tu baa banɛ nụ ụhaŋtụ ata, baa kwụbɛ ufwugwo ata ụ'wụtụ, ibɛ po inyɛmɛnyɛmɛ ya aba shɛ bụ, baa nɛnjɛ atwa aba a na a gwumanga.
15Aka na tụ ụrụmɛ shɛ, eseshi-iyi Jisus zhajɛ pu bwa, ɛɛ hiɛŋ bụ, Epe shɛ ụshɛka, aka kaa koshikwo. Hiɛŋ atwa ga maa ge zhe na ashɛpwụ maa o so iyimɛyɛ maa a yɛ.
16Ge Jisus hiɛŋ aŋ, I shɛ shɛ tilɛɛ maa e beni e zhe na ashɛpwụ o. Pana aŋ ma iyimɛyɛ maa a yɛ.
17Ama ɛ hiɛŋ bụ, Ibrɛd itɛ gba kaa ati 'yajɛ epe keeni ijɛnɛ iyebi kiri.
18Ge Jisus hiɛŋ aŋ, Suje iŋ ma epe pi mi. 19Bee peni atwa ofwugwo ata unu maa ga a gɛgaga na ambɛ. Aka na bee suji ibrɛd ɛtɛ itɛ keeni ijɛnɛ ɛtɛ iyebi, bee shepi eshe na azuba, baa tabwa Agwatana maa pana iŋ uwebiye. Aka na bee hwuŋzerenji iŋ, bee peni eseshi-iyi ubwa, eseshi-iyi ubwa shepi iŋ ee peni atwa ata.#Mak 14:22; Luk 24:30 20Nazhɛ atwa ata kpaaŋ yɛ iŋ, ee shigeji. Ee suji owunzu ibrɛd ɛtɛ vwɛ, keeni ijɛnɛ ɛtɛ, i shini shɛrɛgada umpwa-na-shɛba-shi-yebi. 21Atwa na yɛ ibrɛd ɛtɛ, a shɛ gana etwenyi igbɛɛ-iyebi-na-akpakwụ-a-ta, a 'imɛ shɛ kaa eyikwo na miaụŋ o.
Ge Jisus Zhe Tahaŋnụ na Azuba Meni
(Mak 6:45-52; Jon 6:15-21)
22Gunu ata ge Jisus tɛtajɛ eseshi-iyi ubwa maa ge e teni nu ụhaŋtụ, maa a 'yagana bụ umbe, maa e keshi hileniye itekwu. Bɛɛ hiɛŋ atwa ofwugwo ata, Hwulo ma ya. 23Aka na ti ge Jisus hiɛŋ atwa ata, Tugwo ma oo, nazhɛ bee munji ni ishɛmɛ bwooko maa nda adua. Aka na tụ ụrụmɛ shɛ, baa namɛ apata bwooko gba. 24ụhaŋtụ kaa namwawaŋ na ashashɛ itekwu cebe na aka ata, adanga kaa o zhingoto ụhaŋtụ, iwɛnɛ ta a twa nu uvwugo.
25Aka na ta aasavwungwa a'wụtụ ci, ge Jisus patanɛ na azuba meni, baa zha tahaŋnụ, bɛɛ zhɛ geri ata eseshi-iyi ubwa namɛ. 26Aka na te eseshi-iyi ubwa kwụbɛ bụ, tu baa zha tahaŋnụ na azuba meni, ibɛ po inyɛsɛ shɛ aŋ, aa uganɛ, ɛɛ hiɛŋ, ụbaratụ ye ma! #Luk 24:37
27Gunu ata, ge Jisus dumanɛ iwɛ na aba, bɛɛ hiɛŋ aŋ, Ga amɛ hiŋ lemi, Gamba, ta nda ma inyɛsɛ o.#Ụban 3:14
28Ga Pita jishijɛ bụ, bɛɛ hiɛŋ, Agwangwama, Yaa shɛ gabụ ta, asha m peni-unu, maa ma zhajɛ du tahaŋnụ na azuba meni maa Ma zhajɛ pụ bụ.
29Ge Jisus hiɛŋ bụ, Zhajɛ! Ga Pita kezhe ga nu ụhaŋtụ, bee kwuni tahaŋnụ tizha na azuba meni ma ata, maa zha no ofwo Jisus. 30Ama aka na tu baa kwụbɛ tu uvwugo#14:30 uvwugo: Kwo kaa mpiala. Tɛjɛshɛrɛga tu ko ti hiɛŋ, uvwugo kwo kaa mpiala mu na mi 'yajɛ ikɛnyi. wa nda, ibɛ po inyɛsɛ shɛ bụ, bee kwuni ti'ilo, baa uganɛ, bɛɛ hiɛŋ, Agwangwama, n le o!
31Gunu ata ge Jisus nderishinji u'ala ubwa, bɛɛ imɛ bụ, bɛɛ hiɛŋ bụ, Bu 'yajɛ rishe-tɛtɛtana cwɛŋ, iwɛmbe po abɛ njɛ oruwoo? #Mat 6:30; 8:26; 16:8
32Aka na te e teni nụ ụhaŋtụ, uvwugo hwuwowu. 33Ibɛ po atwa na zweni nụ ụhaŋtụ ata zhɛbɛ bụ, ɛɛ hiɛŋ, Iwɛ-tɛkana, gabụ ga bɛ shɛ Yɛu ya Agwatana gom!
Ge Jisua Nɛnjɛ Agwụmashɛ na Cɛnjɛ ti Gɛnɛsarɛt
(Mak 6:53-56)
34Aka na te e keshi itekwu ɛtɛ, ee ci cɛnjɛ ti Gɛnɛsarɛt. 35Atwa na namɛ apata eshicinji bu, ibɛ po aa tumwanganɛ atwamwa na cɛnjɛ ta ata kpaaŋ, maa ge sugeni bu agwụmashɛ elele kpaaŋ. 36Nazhɛ atwa ata lụpɛ bụ maa e timengeni okwo izhɛmi tugwuno tu bwa kwakwa. Atwa elele na kaa timengeni bu, a zhɛmananɛ.
Currently Selected:
MATIU 14: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008
