MATIU 16

Atwa a Jala Eseyida

(Mak 8:11-13; Luk 12:54-56)

1Afarisi keeni Asadusi oko zhajɛ pi Jisus, iwɛ maa e menji bu, aa lụpɛ bụ, maa ndana aŋ ụrụhwajɛ na banɛ na azuba.#Mat 12:38; Luk 11:16

2Ge Jisus jishijɛ aŋ,#16:2 Ge Jisus jishijɛ aŋ: Tɛjɛshɛrɛga tu ko tụ ngwụshɛ tu zasa ya tuhwaŋzhɛnga ta buwala ga bi 2 tutu hwuwi buwala bu 3. bɛɛ hiɛŋ, Aka na ụrụmɛ shɛ, hiɛ hiɛŋ, Uwaŋna zhɛmɛ hwayɛ ga, iwɛnɛ tụla ti shenjemi gana ulwa. 3Nu uvwungwa, hiɛ hiɛŋ, Mpiala mi zhɛ ma 'yaga hwayɛ ga ikɛnyi, iwɛnɛ to ofwo namɛ dumoo. Hi mepi iyi nɛ maa hiɛ jɛmɛ, ta ahia ngbaraka tụla, ama hi eshiciji shi iwɛ eseyida aka ga o. 4Atwa aka ga ụwɛ, a jala ụrụhwajɛ a zha shɛ kaa a ndana aŋ ụrụhwajɛ we elele o, semi ụrụhwajɛ iyi nɛ jiteni la Jona. Bee beni apata, bee genji aŋ.#Mat 12:39; Luk 11:29; Jona 1:17

Ifucingɛ ya Afarisi Keeni Inɛ ya Asadusi

(Mak 8:14-21)

5Aka na te eseshi-iyi Jisus keshi hileniye, isɛbwɛ 'wi aŋ maa a 'waŋna ibrɛd. 6Ge Jisus hiɛŋ aŋ, Na nda ma pece, no shiyono ma eshe iwɛ Ifucingɛ ya Afarisi keeni inɛ ya Asadusi.#Luk 12:1

7Ibɛ po eseshi-iyi ubwa a dumanga abaaba, ɛɛ hiɛŋ, Tu 'waŋnɛ shɛ ibrɛd o.

8Ti ge Jisus mepi iyi nɛ aa dumanga, bɛɛ hiɛŋ aŋ, Ahiɛba atwa ga rishe-tɛtɛtana ru twa sụ, iwɛmbe po ahia dumanga ahiɛba hiɛba, maa hi zasa ibrɛdi? #Mat 6:30; 8:26; 14:31 9Hi te eshiciji shi waa hŋ? Hi teyinji shi ya suu iwɛ ibrɛd ɛtɛ itɛ atwa igbɛɛ-iyebi-na-akpakwụ-a-ta yɛ, shɛrɛgada shɛ mbaa tuvwa ti bɛ ti shini te ehi suji iiŋ? #Mat 14:17-21 10Ibrɛd ɛtɛ icenje, atwa igbɛɛ-iyebi yɛ, n-ngwumi mu mba tuvwa ti bɛ ti shini te ehi suji iiŋ? #Mat 15:34-38 11Gana na ya ehi eshiciji shi maa shɛ iwɛ ibrɛd Ngɛɛ hi hiɛŋ, Na nda ma pecee? Ama na nda ma pece iwɛ Ifucingɛ ya Afarisi keeni inɛ ya Asadusi.

12Nazhɛ ee eshiciji ya maa shɛ iwɛ Ifucingɛ ibrɛd bee ge mbishi aŋ, maa ga a na nda pece o, ama iwɛ imbisegeni nɛ Afarisi keeni Asadusi o mbisogono atwa.

Ga Pita Le Tiseyida maa Ge Jisus Ubwa Shɛ ga Krast

(Mak 8:27-30; Luk 9:18-21)

13Aka na ti ge Jisus zhajɛ, na cɛnjɛ ti Sɛsɛria Filipai, bee heŋteni eseshi-iyi ubwa, bɛɛ hiɛŋ, Gaaba kwuŋ atwa hiɛŋ maa Yɛu Bụtụ shɛɛ?

14Ɛɛ jishijɛ bụ, ɛɛ hiɛŋ, Atwa oko hiɛŋ, Ga Jon Bɛnjɛ-bu-ubaptizim, anya atwa hiɛŋ, Ge Elaija, atwa oko hiɛŋ, Gɛ Jɛrɛmia, kwo kaa bụtụ bu ko na ashashɛ egesere.#Mat 14:1,2; Mak 6:14,15; Luk 9:7,8

15Ge Jisus heŋteni aŋ, bɛɛ hiɛŋ, Ahiɛba tubaa, gaaba kwuŋ ɛhi hiɛŋ N shɛɛ?

16Ga Saimon Pita jishijɛ, bɛɛ hiɛŋ, Gabụ bɛ shɛ ga Krast, Yɛu ya Agwatana uumwa.#Jon 1:49; 6:68,69; 11:27

17Ge Jisus jishijɛ, bɛɛ hiɛŋ, A-Saimon, yɛu Jona, bu gwoje, iwɛnɛ ti yaa shɛ shɛ butugwumwa ibi kepishingeni ijɛ, semi Bishi mi na namɛ na azuba.#Jon 1:40-42; 21:15-17 18Kwo kaa maa mɛ bi hiɛŋ ta Pita, na azuba utayɛ ga, Ngɛɛ zhɛ ma ma tu'ulwa ta atwa na Ngaa suyanɛ. Okwo akpa e'uye kaa zha shɛ a ala tụ tụlasụ o. 19Gabụ Ngɛɛ zhɛ ma pana a'inla-nsahwa mɛ Cɛnjɛ-ta-tugwama ta azuba. Iyi elele nɛ ebi umpi nu unyizo ga, ɛ zhɛ o umpo iŋ du na azuba, iyi elele nɛ kaa ebu tufwurinji nu unyizo ga, ɛ zhɛ o tufwurungo iŋ du na azuba.#Ayiz 22:22; Mat 18:18; Jon 20:23

20Nazhɛ ge Jisus tɛtaganɛ eseshi-iyi ubwa unu tebiye, maa kede e mbishi bụtụ be elele maa ubwa shɛ ga Krast ata o.#Mat 8:4; Mak 3:12; 5:43; 7:36; 9:9

Ge Jisus Jɛmɛ iwɛ Ụbaụta Ubwa Keeni iwɛ Tu'wo tu Bwa

(Mak 8:31—9:1; Luk 9:22-27)

21Te kwuni na aka ata, ge Jisus kwuni eseshi-iyi ubwa timbiso, bɛɛ hiɛŋ, I shɛ tilɛɛ maa bi zhɛ ba zha Jɛrusalɛm, maa nda ụbaụta duwa ni i'ɛlɛ n-nyarɛ keeni ehiu onongbo keeni embisegeni Undwa, maa ɛ zhɛ a kwụna bụ, ama ɛ zhɛ ɛ hicinjɛ bụ nụ ụjita ụtatụ.#Mat 17:22,23; 20:17-19; 26:2; Luk 17:25

22Ga Pita mbo bu geri bu ko, bee tezhigeni bu, bɛɛ hiɛŋ, Agwangwama, kede i shɛ gana ata o, a zha shɛ ma bụ nda gana ata o!

23Nazhɛ ge Jisus jishirijɛ, bɛɛ hiɛŋ Pita, Gabụ ge Setan, ishɛga zhaga na aba mi. Bu ma n nda ukwurishi, bi heŋshi shi tuhaŋsa ta Agwatana o, semi tuhaŋsa ta atwa.#Mat 4:10

24Nazhɛ ge Jisus hiɛŋ eseshi-iyi ubwa, Bụtụ be elele na ba jala maa ma n 'wa, asha ga bu na mama laka, ama ga shapa ụ'wụ'wụ-ubatanɛ ubwa maa ma n 'wa.#Mat 10:38; Luk 14:27 25Bụtụ be elele na bo bicingo uraiŋ ubwa, asha ti'inzhɛnga baa inzhɛnga uŋ nazhɛ, ama bụtụ be elele na ba inzhɛnga uraiŋ ubwa iwɛ mi, asha nazhɛ bɛɛ zhɛ ba 'yaga uŋ.#Mat 10:39; Luk 17:33; Jon 12:25 26Imbe kwuŋ zhɛ ya sha ule na bụtụ zhɛ ba ya, ti yaa shɛ baa 'yajɛ unyizo ga kpaaŋ, maa ohwulu ubwa tuba njɛ ufwuu? Okwo imbe bụtụ zhɛ ba pana maa i shɛ tisheyingotu to ohwulu ubwaa? 27Iwɛnɛ po Yɛu Bụtụ ye ci nụ ụjɛrụma Bishi bwa keeni atumwa ubwa azuba, nazhɛ bɛɛ zhɛ ba tụpa bụtụ bụtụ gana na tu baa njɛ la ugondu.#Shɛzu 62:12; Mat 25:31; Rom 2:6; 1 Jon 2:28; N-ndu 22:12 28Iwɛ-tɛkana Omo hi mbiso maa, atwa oko shikekeni ba epe, anaa na tu'wo ti zha shɛ to tumongono nazhɛ a kwụbɛ ti Yɛu Bụtụ ye ci na Cɛnjɛ-ta-tugwama tu bwa.

Currently Selected:

MATIU 16: RBT

Highlight

Copy