LUK 21

Ukwuribi na Bululo Zweni ni Ikpɛtɛ Ukwuribi

(Mak 12:41-44)

1Ti ge Jisus shepi eshe ubwa, baa kwụbɛ ta azhɛgba o zwono apwaŋ aba ni ikpɛtɛ ɛtɛ ukwuribi. 2Baa kwụbɛ to bululo bu ko na shɛ bukofwo zweni anɛnɛ eyebi ni ibɛ. 3Nazhɛ bɛɛ hiɛŋ, Iwɛ-tɛkana Omo hi mbiso maa, bululo ga na kaa shɛ bukofwo, bu zweni ukwuribi uhwuri aŋ kpaaŋ. 4Iwɛnɛ po kpaaŋ aba talajɛ iyi nɛ hwuleji aŋ, aa njɛ apalajɛma iwɛ apwaŋ Agwatana, ama inɛ biyikwo ga shɛ iyi nɛ 'nyananɛ bụ, bee zweni, ibɛ kaa shɛ iyi elele nɛ baa ga 'yajɛ.

Ge Jisus Hiɛŋ Ɛ Zhɛ a Nda Umwono wa Agwatana Ufwu

(Mat 24:1,2; Mak 13:1,2)

5Ibɛ atwa oko a dumanga iwɛ Umwono wa Agwatana na aa ndanjɛ tisemberi na atayɛ na pilanu, keeni iyi nɛ aa pana Agwatana. Ge Jisus hiɛŋ aŋ, 6Ijɛ ahiɛ ngbaracɛ bana hwɛɛ, aka zhɛ o to ta a zha shɛ a ganga utayɛ we elele maa u patana ni ihiŋhiŋ unya na aa zha shɛ o hwuŋzo epe.

Ụbaụta Keeni Tɛshɛka

(Mat 24:3-14; Mak 13:3-13)

7Ee heŋteni Jisus, ɛɛ hiɛŋ, E-Bimbisegeni, aka na kwuŋ ijɛ kpaaŋ zhɛ ya ndaa? Imbe kwuŋ zhɛ ya sha tusakana ta aka na ti ijɛ kpaaŋ zhɛ ya ndanganaa? #Luk 17:20; Ugo 1:6

8Bɛɛ jishijɛ aŋ, bɛɛ hiɛŋ, No shiyono ma eshe, maa kede bụtụ be elele ihi inzhɛnjɛ o. Atwa ofwugwo zhɛ a zhajɛ ni izeci mi, ɛɛ zhɛ ɛ hiɛŋ, Gamba n shɛ bụtụ ata. Ɛɛ zhɛ ɛ hiɛŋ sasana, Aka gwumwonu ya. Ta 'wa aŋ ma o.#Luk 17:23; Mak 13:21; 1 Jon 2:18 9Ama aka na ta ahia hwuga unabarɛ keeni rundu ra ajasa, kede inyɛsɛ ihiɛ shɛ o. I shɛ tilɛɛ maa ijɛ kpaaŋ i shɛ ya ndangana tugwo hiiŋ, ama shɛ ukwunanga ibɛ tɛ gunu ata o. 10Nazhɛ bɛɛ hiɛŋ aŋ, Udenji uko zhɛ wɛ hwɛyijɛ wa sukakana udenji unya; tugwama tu ko ti zhɛ tɛ hwɛyijɛ ta sukakana tugwama ti nya; #2 Shɛrụ 15:6; Ayiz 19:2 11cɛnjɛ ti zhɛ to zhingotu duwa duwa no ofwo ofwo, ụngwụ ụwɛ keeni imunɛ-tiya zhɛ ya bala, ti iyi inyɛsɛ keeni eseyida a'wụtụ na zhɛ a banɛ na azuba. 12Ama ɛ zhɛ ma hi ima, ɛɛ zhɛ ma hiɛ shɛka, ɛɛ zhɛ mo hi sugo no shimwono shɛ Tụ'ụlwatagwụ, ɛɛ zhɛ mo hi zwono nu umwono-tishi; ɛɛ zhɛ mo hi sugo maa hi shikono na agba shɛgwuma keeni egwomina iwɛ izeci mi, nazhɛ ijɛ kpaaŋ i njɛ.#Jon 16:2 13Ukwunanga ibɛ zhɛ ma hi shana ohwolu na maa hi n le tiseyida.#Fili 1:12 14Ama shiyono iŋ ma na shihaŋsa shi hiŋ, maa kede hi na imanga ajɛshɛgwa na ɛhi zhɛ hia pana hwuŋ tobwolo aka ata te ci shi o.#Luk 12:11,12 15Gamba ni ikɛnyi mi N zhɛ ma hi pana hwuŋ ukpahiŋ keeni ti'inta tu na atwa i'ime hiŋ zha shɛ a ala maa a sukakanɛ tụ, kwo kaa maa a njɛ ashamanjɛ ne hiŋ. 16Ama okwo atwa na ihi meci, ta miaụŋ-mo-bino hiŋ, ta atwa hiŋ, te eyejilo hiŋ, ɛ zhɛ mo hi sugo a pana atwa maa a kwụnɛ atwa oko na ashashɛ hiŋ.#Luk 12:52,53 17Atwa elele zhɛ mo hi imo iwɛ izeci mi.#Mat 10:22; Jon 5:18-25 18Ama tuba okwo tihiŋzhe tu uhiuhiu hiŋ#21:18 tihiŋzhe tu uhiuhiu hiŋ: Tɛjɛshɛrɛga tu ko ti hiɛŋ, kede ihi to, kwo kaa kede amɛ hiŋ hashɛganụ o. kwo bu ko zhashɛ ba nda ufwu o.#1 Sam 14:45; Mat 10:30; Ugo 27:34 19Hi zhɛ hio bicingo araiŋ hiŋ tedure ni isɛbwɛ hiŋ ti'ima.

Ge Jisus Hiɛŋ Ɛ Zhɛ a Nda Jɛrusalɛm Ufwu

(Mat 24:15-21; Mak 13:14-19)

20Aka na ahiɛ kwụbɛ hwuŋ ta asaza rungwutwonu Jɛrusalɛm, nazhɛ ɛhi zhɛ hia mapa maa ufwu ubwa tɛnda gwumwonu. 21Ga atwa na namɛ nu Judia gezheji na aka ata maa e zhe nu nshama; ga atwa na zweni nu ụshɛpwụ beni; kede atwa na namɛ ne shihilo gwure maa e teni ya na amɛ ụshɛpwụ o. 22Iwɛnɛ ta aka ata zhɛ a sha aka tụtụpana tụlụkpashɛ, iwɛ maa iyi elele nɛ oo 'nywotwo la i sɛ.#Hos 9:7 23Eyikwo na 'yajɛ shifubo, na anaa na 'wananjɛ miaụŋ mu na mu to subo, zhɛ a nda hwuŋ adangboo! Tiriri tụ 'wụtụ keeni ulwapɛ tụpana zhɛ wa namana hwuŋ atwa na namɛ na cɛnjɛ tu ga.#Luk 23:29 24Ɛ zhɛ a kwụna atwa aba oko no otokwobi, atwa ujasa zhɛ o sugo atwa oko a pana edenji elele, atwa na shɛ shɛ Eju kaa zhɛ a fwundaka Jɛrusalɛm, uuwa i ci aka na aka aba ulwa.#Ayiz 63:18; Dan 8:13; N-ndu 11:2

Tizhajɛ ti Yɛu Bụtụ

(Mat 24:29-31; Mak 13:24-27)

25Iyi tudama zhɛ ya nama nu uwaŋna, tu upiana keeni mkpasu. Edenji na namɛ na cɛnjɛ tu unyizo ga zhɛ a nda ụbaụta keeni tiriri, a zha shɛ a mapa uhwaŋna na shɛ maa o to iwɛ rundu ri itekwu keeni adanga ibɛ.#Ayiz 13:10; Izik 32:7; Joɛl 2:31; N-ndu 6:12,13 26Ugiriri zhɛ wa kala atwa iwɛ inyɛsɛ nɛ shɛ aŋ, iwɛnɛ ta a haŋsa iwɛ iyi elele nɛ ye ci nu unyizo ga, iwɛnɛ tu ukpahiŋ na namɛ na azuba zhɛ wo zhingotu. 27Nazhɛ ɛɛ zhɛ a kwụba Yɛu Bụtụ ti bee ci nu udomu nu ukpahiŋ keeni ụjɛrụma ụ'wụtụ.#Dan 7:13; N-ndu 1:7 28Ama aka na ti ijɛ kpaaŋ kwuni tɛndangana, ngbaraka ma azuba, shikicingo ma ohiuhiu hiŋ, iwɛnɛ to tibicingo ti hiŋ tu na ɛɛ zhɛ mo hi bicingo tu gwumwonu.

N-ndumwa Tumanganjɛ iwɛ Ụ'wụ'wụ Uwowo

(Mat 24:32-35; Mak 13:28-31)

29Ge Jisus manganganɛ aŋ n-ndumwa, bɛɛ hiɛ, Hioko ma ụ'wụ'wụ uwowo keeni i'wɛ'wɛ elele kpaaŋ. 30Aka na ti yee kwuni ambɛ ofwo tusaba, hi zhɛ hia mapa maa ushwo gwumwonu okwo ee te hi mbishi shi.

31Gobwonu du yɛɛ zhɛ ya sha hwuŋ, aka na ta ahia kwụbaga ti ijɛ kpaaŋ ya ndangana, asha mapa ma maa Cɛnjɛ-ta-tugwama ta Agwatana tu gwumwonu.

32Iwɛ-tɛkana Omo hi mbiso maa, atwamwa#21:32 atwamwa: Tɛjɛshɛrɛga tu ko ti hiɛŋ, uwaŋnɛ ga, kwo kaa atwa uwaŋnɛ ga. zha shɛ o hwuwowu tu'wo hwɛɛ ti ijɛ kpaaŋ zhɛ ya ndangana o. 33Azuba keeni unyizo zhɛ a kashɛka, ama iwe mi zha shɛ ya kashɛka o.#Luk 16:17

No Shiyono Ma Eshe

34Na nda ma pece iwɛ ohiuhiu hiŋ, iwɛ maa kede iyi tiya, ni iyi tuswa keeni oruwo iyi unyizo ga hwuleji shɛmɛ shi hiŋ o, shibwonu aka ata zhɛ mo hi jitono hwuŋ eshigiri gana ugwuru. 35Gana ata yɛɛ zhɛ ya namana atwa elele no ofwo elele nu unyizo ga kpaaŋ na aka ata. 36No shiyono ma eshe, na nda ma adua ɛgbɛ ɛgbɛ maa hi 'yaga ikɛnyi maa hi benengeni ijɛ zhɛ ya ndangana bana kpaaŋ, iwɛ maa hi shikono na agba Yɛu Bụtụ.#Mak 13:33

37Ge Jisus bo mbisogono atwa iyi nu Umwono wa Agwatana iyi-heri iyi-heri, ama ba bana baa nama ni ishɛmɛ nɛ ɛɛ hiɛŋ, Ishɛmɛ Buta nụ ụrụmɛ elele.#Luk 19:47; Mak 11:19 38Ama atwa kpaaŋ a zha pu bwa nu Umwono wa Agwatana nu uvwungwa dididi we elele maa a hwulaga iwɛ ubwa iyi-heri.

Currently Selected:

LUK 21: RBT

Highlight

Copy