LUK 22

A Njɛ Ushaura Maa A 'Imɛ Jisus Ni i'inswɛ

(Mat 26:1-5; Mak 14:1,2; Jon 11:45-53)

1Aka na ti isene iyimɛyɛ uzawa Ifucingɛ, nɛ ɛɛ hiɛŋ, Iyimɛyɛ Tɛkashɛka gwumwonu.#Ụban 12:1-27 2Nazhɛ ehiu onongbo ne embisegeni Undwa ajalakaka gana na ɛɛ zhɛ a nda maa a kwụnɛ Jisus, aba kaa a nda inyɛsɛ ya atwa.

Ga Judas Leni maa Sanga Jisus ne Tidere

(Mat 26:14-16; Mak 14:10,11)

3Na aka ata ge Setan teni na amɛ Judas na shɛ bụtụ bu ko na ashashɛ eseshi-iyi umpwa-na-ba-eyebi. 4Bee hwuri baa njɛ ushaura ne ehiu onongbo keeni edegeri gana na shɛ maa sangana bu aŋ ne tidere. 5Ibɛ po aa nda unyasa, aa twa-unu maa ɛ zhɛ a pana bụ ukwuribi. 6Baa jalakaka ya ohwolu na maa shapa bu pana aŋ, na aka na atwa ofwugwo zasaba.

Ge Jisus Mama Imanganga maa A Yɛ Iyimɛyɛ Tɛkashɛka

(Mat 26:17-25; Mak 14:12-21; Jon 13:21-30)

7Tụ ụjita iyimɛyɛ uzawa Ifucingɛ ci, aa kwụnɛ agwụdụ Isene Tɛkashɛka.#Ụban 12:18-20; Undwa 16:5-8 8Ge Jisus#22:8 Ge Jisus: Kwo kaa, baa. tumwanɛ Pita na Jon utumwa, bɛɛ hiɛŋ aŋ, Zhaga imanganga ma Iyimɛyɛ Tɛkashɛka maa tɛ yɛ ma.#Luk 19:29

9Ɛɛ hiɛŋ bụ, Ce ubu kwụlanɛ maa ta imanga iiŋ?

10Bɛɛ hiɛŋ aŋ, Hioko ma, aka na ohio tono nu ụshɛpwụ ga, hi zhɛ hia twa ne butubwenyi bu ko na 'waŋnɛ ihiulwe meni. 'Wa bu ma ni ihwɛ nɛ bee teni. 11Hoŋtono ma agwuma-ihwɛ ɛtɛ maa, Bimbisegeni hiɛŋ, Ce umwono wa agaiŋ na Ngɛɛ zhɛ ma ya iyimɛyɛ Tɛkashɛka ne eseshi-iyi mi namɛɛ? 12Nazhɛ bụtụ ata zhɛ mo hi mbisono umwono wa azuba ụ'wụtụ, na iyi ya ajɛjɛ tulonowoŋ. Apata ɛhi zhɛ hia imanga iŋ.

13Ee zhe, aa kwụbɛ ga gana na ti bee ge mbishi aŋ. Aa imanjɛ iyimɛyɛ ɛtɛ Tɛkashɛka.

Iyimɛyɛ Ụrụmɛ nɛ Agwangwama Peni Eseshi-iyi Ubwa

(Mat 26:26-30; Mak 14:22-26; Jon 11:23-25)

14Aka na ta aka ata ci, ge Jisus jɛjɛ na atumwa ubwa. 15Bɛɛ hiɛŋ aŋ, I n kwụlanɛ tebiye tebiye maa ma ya Iyimɛyɛ gɛ Tɛkashɛka ne hiŋ nazhɛ Ma nda ụbaụta. 16Mo hi mbiso maa, N zha shɛ ma ya iŋ ya ne hiŋ sasana#22:16 ne hiŋ sasana: Tɛjɛshɛrɛga tu ko ti hiɛŋ, kwukwuŋ. uuwa i ci aka na iyi elele zhɛ ya ulwa na Cɛnjɛ-ta-tugwama ta Agwatana o.

17Aka na ti ge Jisus shepi ukwopi, baa njɛ ugwoje na Agwatana, bɛɛ hiɛŋ aŋ, M ma ma, swa uŋ ma hwɛɛ hiŋ.#1 Kor 10:16 18Mo hi mbiso maa, te kwuni na aka ga, N zha shɛ ma swa ya meni mụ tụ'walụ ta afwafwa uuwa i ci aka na Cɛnjɛ-ta-tugwama ta Agwatana ti zhɛ ta zhajɛ o.#1 Kor 11:23-26

19Bee shepi ibrɛd, aka na tu baa njɛ ugwoje na Agwatana, boo dwonu iŋ, bee peni aŋ, bɛɛ hiɛŋ aŋ, Inɛ gɛ shɛ tu'waba ti mi [tu na Nga ma pana iwe hiŋ, na nda ma inɛ gɛ iwɛ titeyinje ti mi.#22:19b-20 tu na Nga ma pana: Tɛjɛshɛrɛga tu ko tu zasa n-ndumwa mụ ụpadụ uyebi u buwala bu 19 tutu i ci ya buwala bu 20. 20Gobwonu du bee shepi ukwopi na aba na te e hwuwi iyimɛyɛ ɛtɛ ụrụmɛ tiya, bɛɛ hiɛŋ aŋ, Ukwopi ga shɛ unu ufwo tutwa ne mehieŋ mi mi, mu na Ama 'waŋ iwe hiŋ.] #Jɛrɛ 31:31-34

21Ama hioko ma, bụtụ na zhɛ ma n shapa maa pana atwa, namba ne mi nu uteburu ga.#Shɛzu 41:9; Jon 13:21-30 22Yɛu bụtụ zhɛ ya zhaga kaa gana na te e shiri iwɛ ubwa gom, ama bụtụ ata na ba sanga bu ne tidere zhɛ ba nda hwuŋ adangboo!

23Ee kwuni tumomo hoŋtongonu iwɛ bụtụ na zhɛ ba nda ijɛ na ashashɛ aba.

Ushaura iwɛ Bụtụ na Hwuri Binya

24Ibɛ ashamanjɛ ishijɛ na ashashɛ eseshi-iyi Jisus iwɛ bụtụ na hwuri binya tusara na ashashɛ aba.#Mak 9:34; Luk 9:46

25Ibɛ po ge Jisus hiɛŋ aŋ, Shɛgwuma sha atwa na shɛ shɛ Eju shɛ mama nda shɛgwangwama sha aba, atwa na 'yajɛ ụhwada wa aba mama suyana maa atwa na a nda iyi ibiye. 26Ama shɛ gana ata yaa shɛ na ashashɛ hiŋ o. Ama ga bụtụ na hwuri atwa vwɛ na ashashɛ hiŋ, i shɛ maa ubwa shɛ yɛu ya atwa vwɛ, bụtụ na kaa shɛ uhiu hiŋ, ga sha maa ubwa ba ndana atwa vwɛ iyi.#Mat 23:11; Mak 9:35 27Gaaba hwuri binya nu ụjɛrụmaa? Bụtụ na jɛjɛ ba ya iyimɛyɛ suu okwo bụtụ na ba ndana bu iyi? Shɛ bụtụ na jɛjɛ ba ya iyimɛyɛ suu? Ama N namɛ na ashashɛ hiŋ gana-bụ tụ na ba ndana atwa iyi.#Jon 13:12-15 28Ama ahiɛba hiɛ shɛ atwa na namɛ ne mi na aka tumanga te elele tu na tu ma manga.#Luk 4:1-14; Ehib 2:18; 4:15 29N zhɛ mo hi shilono Cɛnjɛ-ta-tugwama gana na Bishi mi n shileni, 30iwɛ maa hiɛ yɛ, hi swe nu uteburu mu na Cɛnjɛ-ta-tugwama ti mi. Ahiɛba kaa hi zhɛ hia gɛgaga hwuŋ nu n-ndwụtwụ maa hiɛ jɛmɛ ụshɛrɛya wa alamụ Isrɛl umpwa-na-ba-eyebi.#Mat 19:28; N-ndu 3:21; 20:4

Ge Jisus Hiɛŋ, ga Pita Zhɛ ba Tala Ashamanjɛ maa bi Mepi Shi Bu o

(Mat 26:31-35; Mak 14:27-31; Jon 13:36-38)

31Ge Jisus hiɛŋ, A-Saimon, A-Saimon! Ge Setan lụpɛ tebiye maa ma hi hikita gana na aa hikita ohiu.#Job 1:6-12; Emos 9:9 32Ama M bu ndanɛ adua iwɛ maa kede rishe rụ bụ tɛtɛtana ri leyi o. Ama aka na ɛbi jishirijɛ hwuŋ sasana pi mi, shikicingo miaụŋ-mo-bino bu.#Jon 17:15

33Ga Pita hiɛŋ bụ, Agwangwama, M mama 'imɛ kaa maa ma zhagaga na bu, okwo nu umwono-tishi, kwo kaa no tu'wo.

34Agwangwama jishijɛ bụ, bɛɛ hiɛŋ, A-Pita, N zhɛ mo bu mbiso maa, bi zhɛ ba tala ashamanjɛ mi kpalụ tatụ nụ ụjita go maa bu m mepi shi nazhɛ alụma uganɛ.

Arɛta, nu Ulapa Keeni Utokwobi

35Ge Jisus hiɛŋ eseshi-iyi ubwa, Aka na Ngaa hi tumwanɛ la utumwa, Ngɛɛ hiɛŋ ta 'waŋna ma arɛta ukwuribi o, tu ulapa, ta abida, i 'yajɛ suu iyi elele nɛ ihi 'nyananɛ la? #Mat 10:9,10; Mak 6:8,9; Luk 9:3; 10:4

Ɛɛ jishijɛ bụ, ɛɛ hiɛŋ, Awo, i zasa iyi elele iti 'nyananɛ o.

36Ge Jisus hiɛŋ aŋ, Ama hwuwayɛ go, bụtụ na 'yajɛ ya arɛta ukwuribi, okwo ulapa, ga shapa, bụtụ na kaa zasa, ga sanga utogwo ubwa maa sa utokwobi. 37Mo hi mbiso maa, i shɛ tilɛɛ maa gɛ iyi nɛ oo 'nywotwo iwe mi i sɛ, inɛ hiɛŋ, A rɛcɛ bụ na atwa na bweji undwa. Tisɛ iyi elele nɛ oo 'nywotwo iwe mi kaa te ci ba.#Ayiz 53:12

38Eseshi-iyi ubwa jishijɛ bụ, ɛɛ hiɛŋ, Agwangwama, hioko, otokwobi eyebi na.

Bɛɛ jishijɛ aŋ, bɛɛ hiɛŋ, Ana ata gwumwa.

Ge Jisus Njɛ Adua

(Mat 26:36-46; Mak 14:32-42)

39Ti ge Jisus beni nu ụshɛpwụ ata, bee zhe ni Ishɛmɛ Buta, gana na tu baa shana baa nda, eseshi-iyi ubwa 'wa bụ.#Mat 26:30; Mak 14:26 40Aka na ti ge Jisus ci apata, bɛɛ hiɛŋ aŋ, Na nda ma adua, maa kede hi teni na tumanga o.

41Nazhɛ bee meme deshigeni i ci ụdụlụ na bụtụ eri ba kala utayɛ, nazhɛ bee kwuzhi baa njɛ adua, bɛɛ hiɛŋ, 42Ada, yaa shɛ yaa bu kwụlanɛ, asha shapa ukwopi ga ụbaụta no olugwo mi. Ama shɛ nu ukwulana mu o, ama ga shɛ nu ukwulana bu.#Mak 10:38; Jon 18:11 43Nazhɛ butumwa banɛ na azuba bee keeni bu ikɛnyi. 44Tu baa namɛ na amɛ-tụhaŋtụ ata a'wụtụ, bee keeni adua tɛnda tebiye. Ibɛ po ibwɛzu ibwɛ nɛ baa bwaza ya layaga na cɛnjɛ gana akpụsụlụ mehieŋ.#22:44 Nazhɛ butumwa, akpụsụlụ mehieŋ: Tɛjɛshɛrɛga tu ko ti cala tu zasa buwala bu 43 keeni bu na bu 44.

45Aka na ti bɛɛ ishijɛ na adua ata, baa zhajɛ no ofwo eseshi-iyi ubwa, bee jiteni aŋ to o woto malabụ ma amɛ-tụhaŋtụ. 46Bɛɛ hiɛŋ aŋ, Iwembe po ohio woto malabụụ? Ishijɛ ma hiɛ njɛ adua, iwɛ maa kede hi teni na tumanga o.

A 'Imɛ Jisus

(Mat 26:47-56; Mak 14:43-50; Jon 18:3-11)

47Ti ge Jisus ta duma iwɛ etɛ, baa kwụbɛ ta atwa ofwugwo zhagajɛ na bụtụ ata ɛɛ hiɛŋ go Judas, na shɛ bụtụ bu ko na ashashɛ eseshi-iyi ubwa umpwa-na-ba-eyebi, bee hwure umbe na aba. Boo gwumwonu ne Jisus maa ruwanɛ bụ.

48Ama ge Jisus heŋteni bu, bɛɛ hiɛŋ, A-Judas, na turuwanɛ suu ɛbi zhɛ ba sanga Yɛu Bụtụ ne tidere?

49Aka na ta atwa na rungwutwonu Jisus kwụbɛ iyi nɛ ye ci, ɛɛ hiɛŋ, Agwangwama, ta pa aŋ suu utokwobi? 50Ibɛ po bụtụ aba bu ko po yɛu-ugondu Bunongbo bụ 'wụtụ utokwobi, bee vweri ụcɛbɛ ubwa u'ala ubiye.

51Ama ge Jisus jishijɛ aŋ, bɛɛ hiɛŋ, Inɛ ɛtɛ gwumwa ya! Nazhɛ bee timengeni ụcɛbɛ ata ubwa, baa nɛnjɛ uuŋ.

52Ge Jisus hiɛŋ ehiu onongbo, ne ehiu edegeri Umwono wa Agwatana keeni n-nyarɛ a na bananjɛ maa a 'imɛ bụ, Hi bananjɛ no otokwobi, ne shekwute maa hi n 'imɛ gana bɛshɛrɛ suu? 53Aka na Ama nama la ne hiŋ nu Umwono wa Agwatana iyi-heri iyi-heri, hi n timengeni shi o. Ama aka hiŋ na ya keeni ụhwada tishi.#22:53 Keeni ụhwada tishi: Inɛ gɛ ya duma iwɛ ugondu ụwɛ na ge Setan ba nda. #Luk 19:47; 21:37

Ga Pita Teri Ashamanjɛ maa bi Mepi Shi Jisus o

(Mat 26:57,58,69-75; Mak 14:53,54,66-72; Jon 18:12-18,25-27)

54Nazhɛ aa 'imɛ Jisus, ee zeriji bu ni ihwɛ Bunongbo bụ 'wụtụ. Ama ga Pita 'wa bu ne ekwunyi na hanga na dụlụmɛ nu bwa. 55Aka na ta a shanɛ ulwa na ashashɛ umwamwa ata, aa gɛgajɛ hwɛɛ aba, ga Pita jɛjɛ du na ashashɛ aba. 56Ibɛ po yɛu towo ugondu ike kwụbɛ Pita tu baa jɛjɛ nu uhioko-hwaŋna ulwa ata, baa ngbaracɛ bu zenjizenji, bɛɛ hiɛŋ, Bụtụ ga namɛ du nu bwa.

57Ama ga Pita teri ashamanjɛ, bɛɛ hiɛŋ, E-biyikwo ga, m mepi shi bu o.

58Ti yaa namɛ fwalaa, binya bụtụ kwụbɛ bụ, bɛɛ hiɛŋ bụ, Bɛ shɛ du bụtụ bu ko na ashashɛ aba.

Ama ga Pita hiɛŋ bụ, A-bụtụ ga, shɛ Gamba o.

59Ti yaa namananɛ aka fwalaa, binya bụtụ jɛmɛ ya ta 'yajɛ ikɛnyi, bɛɛ hiɛŋ, Iwɛ-tɛkana, bụtụ ga namɛ du ne Jisus, iwɛnɛ po bụtụ bu Galili baa shɛ gom.

60Ama ga Pita jishijɛ bụ, bɛɛ hiɛŋ, A-bụtụ ga, M mepi shi iwɛ gɛ aba duma o!

Gunu ata tu baa ta duma iwɛ ɛtɛ, alụma uganɛ. 61Nazhɛ Agwangwama mbiyanɛ Pita, baa ngbaracɛ bụ. Nazhɛ ga Pita teyinje iwɛ ɛtɛ Agwangwama mbishi bu la, bɛɛ hiɛŋ, Bi zhɛ ba tala ashamanjɛ kpalụ tatụ nụ ụjita go maa bu m mepi shi o, nazhɛ alụma uganɛ. 62Ga Pita beni no tupohondo, bee tileni nu u'wo gboo.

Asaza Njɛ Jisus Asada

(Mat 26:67,68; Mak 14:65)

63Atwa na untanganɛ Jisus a nda bu asada, oo dubo bu. 64Ee uteji bu eshe, ɛɛ hiɛŋ, Utu dumanganɛ tigesere, gaaba ubu po iyii? 65Aa jɛmɛ tugbozhigo tu bwa tu ofwugwo ti nya.

E Zeriji Jisus no Ofwo Ajɛmɛ-ụshɛrɛya

(Mat 26:59-66; Mak 14:55-64; Jon 18:19-24)

66Nazhɛ n-nyarɛ ma atwa ata, te ehiu onongbo, te embisegeni Undwa ụlwatagwụ, ee zeriji Jisus no ofwo ajɛmɛ-ụshɛrɛya, gunu ga ti iyi kwuni tusuje, ɛɛ hiɛŋ Jisus, 67Yaa shɛ gabụ bɛ shɛ ga Krast, iti mbishi.

Ama ge Jisus jishijɛ aŋ, bɛɛ hiɛŋ, Okwo Ngee hi mbishi hwayɛ, hi zha shɛ hia tɛtana-rishe o. 68Ngee hi heŋteni hwayɛ kaa iheŋtene ike, hi zha shɛ hi mɛ n tɛrɛ, hi zha shɛ kaa hi ma n ganga. 69Ama te kwuni na aka ga, Yɛu Bụtụ zhɛ ya gɛga nu u'ala ubiye ukpahiŋ wa Agwatana.#Shɛzu 110:1

70Nazhɛ kpaaŋ aba heŋteni bu, ɛɛ hiɛŋ, Asha gabụ suu bwonu bɛ shɛ ya Yɛu ya Agwatana?

Bɛɛ jishijɛ aŋ, bɛɛ hiɛŋ, hi teni cɛŋ, tɛ hi hiɛŋ Gamba n shɛ bụ.#Mat 27:11; Luk 23:3

71Nazhɛ ɛɛ hiɛŋ, Ukekeshi eseyida to tu to waa hŋ hwuwayɛ go? Tu hwugwa kaa ni ikɛnyi tu tu baa dumwa nu unu ubwa ni ikɛnyi ibwɛ.

Currently Selected:

LUK 22: RBT

Highlight

Copy