LUK 23

E Zeriji Jisus na Agba Pɛilat

(Mat 27:1,2,11-14; Mak 15:1-5; Jon 18:28-38)

1Nazhɛ ɛɛ ishijɛ kpaaŋ aba, ee zeriji Jisus pu Pɛilat. 2Ee kwuni bu ụshɛrɛya tupatangana, ɛɛ hiɛŋ, Tu to bụtụ ga ugbe tu baa inzhanga udenji tu, baa lakana aŋ maa a cɛpɛ Sisa ukwuribi ụdalụ. Bɛɛ hiɛŋ maa ubwa ni ikɛnyi ibwɛ i shɛ ga Krast agwuma! 3Ga Pɛilat heŋteni Jisus, bɛɛ hiɛŋ, Gabụ suu bɛ shɛ Agwuma Eju?

Ge Jisus jishijɛ bụ, bɛɛ hiɛŋ, Gabụ du bu dumwa ya.

4Ga Pɛilat hiɛŋ ehiu onongbo keeni atwa ata ofwugwo, N kwụbɛtanɛ shɛ bụtụ ga tụwụma o.#Luk 23:14,22,41; Mat 27:24; Jon 19:4,6; Ugo 13:28

5Ama a uganɛ ɛɛ hiɛŋ, Bo vwundotongo atwa ni imbisegeni ibwɛ no ofwo elele nu Judia,#23:5 no ofwo elele nu Judia: Kwụba ti'eshicogono tu 7:17. bee kwune iŋ na cɛnjɛ tu Galili uuwa i ci epe.

E Zeriji Jisus na Agba Hɛrod

6Aka na ti ga Pɛilat hwụjɛ iwɛ gɛ, bee heŋteni aŋ, bɛɛ hiɛŋ, Bugalili suu bụtụ ga shɛ? 7Aka na ti ga Pɛilat mepi maa ge Jisus banɛ na cɛnjɛ tu na gɛ Hɛrod 'yajɛ ụhwada tuba, baa tumwanɛ bụ pi Hɛrod na namɛ du nu Jɛrusalɛm na aka ata.

8Aka na ti gɛ Hɛrod kwụbɛ Jisus, baa njɛ unyasa duwa, iwɛnɛ tu baa ga na hwuga unabarɛ ubwa cala, baa ga jala kaa du maa kwụba bụ, baa ngbaracɛ uhwaŋna maa du kwụba ụrụhwajɛ uko na ge Jisus zhɛ ba nda. 9Ga Pɛilat heŋtengeni Jisus iheŋtene ifwugwo. Ama ge Jisus jishijɛ shɛ bu o.#Ayiz 53:7; Mak 15:4,5 10Ehiu onongbo ne embisegeni Undwa shikekeni apata, aa patangana Jisus ụshɛrɛya ikɛnyi ikɛnyi. 11Nazhɛ gɛ Hɛrod na asaza ubwa ngbaracɛ du Jisus cwɛŋ, aa nda bụ asada; ee urigeni bu utogwo uko na pilanụ tebiye, nazhɛ bee gwuricinji bu pu Pɛilat.#Mak 15:17-19; Jon 19:2,3 12Ibɛ po ata Hɛrod na Pɛilat a shɛ ya tiyejilo jita ata, shibwonu a ga lacɛmɛ shɛ la na binya o.

Ga Pɛilat Utegeni Aŋ Jisus maa E Tegeni bu Nrɛ nu Ụ'wụ'wụ-ubatanɛ

(Mat 27:15-26; Mak 15:6-15; Jon 18:39—19:16)

13Ga Pɛilat suyanɛ ehiu onongbo, ne ehwurembe keeni atwamwa. 14Bɛɛ hiɛŋ aŋ, Hi zɛrijɛ bụtụ ga pi mi, ɛhi hiɛŋ maa ba inzhanga atwa. Kwụba ma gana na tu Ngaa jɛmɛ ụshɛrɛya ubwa ne eshe hiŋ, N kwụbɛtanɛ shɛ bụ tụwụma ti iyi nɛ ehi peteni bu ụshɛrɛya ibɛ o.#Luk 23:4,22,41 15Okwo gɛ Hɛrod, bụ kwụbɛ shɛ du o, ibɛ po bee gwuricinje bu pu tu. Kwụba ma, bɛ njɛ shɛ iyi nɛ lanɛ tu'wo. 16Ama N zhɛ mo dubo bu, maa Ma ganga bụ.#Luk 23:22 17[I shɛ kaa tilɛɛ maa ga Pɛilat bacɛnganɛ aŋ bụtụ bu ko bu umwono-tishi na aka Isene Tɛkashɛka.]#23:17 I shɛ kaa tilɛɛ, ni Isene Tɛkashɛka: Tɛjɛshɛrɛga tu ufwugwo ti shiyeni shi buwala ga bu 17.

18Ama a uganɛ hwɛɛ aba, ɛɛ hiɛŋ, Kwụna bụtụ ga. Ama itɛ bacɛnganɛ Barabas. 19E shiyeni kaa Barabas ata nu umwono-tishi iwɛnɛ tu baa bɛrɛ ujasa na kwụnɛ atwa nu ụshɛpwụ ata.

20Ga Pɛilat dumananɛ iwɛ, iwɛnɛ ti yaa kwụlanɛ bụ maa ganga Jisus. 21Ama a uranjɛ n'ungwa, ɛɛ hiɛŋ, Tagana bụ nrɛ nụ ụ'wụ'wụ-ubatanɛ! Tagana bụ nrɛ nụ ụ'wụ'wụ-ubatanɛ!

22Ga Pɛilat hiaŋnanɛ aŋ na aka tatụ, Iwembe poo, iyi iwɛ imbe kwuŋ baa njɛɛ? N kwụbɛ shɛ iyi nɛ baa njɛ waŋnɛ tu'wo. Ama N zhɛ mo dubo bu nazhɛ maa ganga bụ.#Luk 23:16

23Ama ee keeni tụdụma na rụhwụŋ rụ 'wụtụ, maa ge tegeni bu nrɛ. Ibɛ po rụhwụŋ ra aba keeni ma rụ rụ ehiu onongbo rụ lasụ Pɛilat. 24Nazhɛ ga Pɛilat leni maa nda gana na ɛɛ hiɛŋ bụ. 25Bee becingeni aŋ bụtụ na aa lụpɛ bụ, ubwa shɛ bụtụ ebe ee ge shiyeni nu umwono-tishi iwɛnɛ tu baa bɛrɛ ujasa na kwụnɛ atwa. Ama bi shepi Jisus bee peni aŋ maa a njɛ bụ gana na kwụlanɛ aŋ.

E Tegeni Jisus Nrɛ nụ Ụ'wụ'wụ-ubatanɛ

(Mat 27:32-44; Mak 15:21-32; Jon 19:17-27)

26Gana na te e zeriji Jisus, ɛɛ zhɛ nu uhwaŋna, aa 'imɛ Saimon bụtụ bu Saren, tu baa banɛ ne ehilo, ee peteni bu ubatanɛ ata maa 'waŋna uŋ u 'wa Jisus ne ekwunyi. 27Atwa ofwugwo ụ'wụtụ te eyikwo ofwugwo a na 'wa Jisus, a pa shɛgba sha aba iyi, ee zweneni bu u'wo gboo! 28Ti ge Jisus mbiyanɛ aŋ, bɛɛ hiɛŋ aŋ, A-miaụŋ-mo-o mu Jɛrusalɛm, ta ma twana ma u'wo, ama na mama twana ma u'wo keeni u'wo miaụŋ mi hiŋ. 29Iwɛnɛ ta aka oko zhɛ o to hwuŋ, tɛ ɛ zhɛ ɛɛ hiɛŋ, O'ulo keeni eyikwo na 'waŋnɛ shɛ miaụŋ mu na mo subo kwukwuŋ gwoje. 30Na aka ata ɛ zhɛ o kwuno nshama keeni tingbekwu tihiɛŋ, Utu layɛtanɛ maa hi tu urigeni.#Hos 10:8; N-ndu 6:16 31Yaa shɛ aa nda ijɛ nụ ụ'wụ'wụ ulom, asha imbe tuba zhɛ yo jitono ụ'wụ'wụ uhwoo?

32Ee zeriji atwa awɛ eyebi maa a kwụnɛ aŋ ne Jisus.#Ayiz 53:12 33Aka na te e ci ofwo ata ɛɛ hiɛŋ izeci aba, Ukokolo uhiuhiu, apata ee tegeni Jisus nrɛ nụ ụ'wụ'wụ-ubatanɛ, na atwa ata awɛ eyebi, bu ko namɛ nu u'ala ubiye ubwa, bu na bi yebi namɛ nu u'ala ugwulwo ubwa. 34Ge Jisus hiɛŋ, Ada, gangana aŋ, iwɛnɛ te e mepi shi iyi nɛ aa nda.#23:34 Ge Jisus hiɛŋ, Ada, gangana aŋ iwɛnɛ te e mepi shi iyi nɛ aa nda: Tɛjɛsharaga tu ko ti cala tu zasa n-ndumwa ma ata o.

Nazhɛ oo dwotwogonu i'wɛŋnɛ ibwɛ ni icɛcɛ tu'waŋ.#Shɛzu 22:18; Ugo 7:60 35Atwamwa shikekeni apata aa ngbaracɛ bụ. Ehiu o sumono bu du, ɛɛ hiɛŋ, Bi bicinji anya atwa, asha go momo bicingo, ti yaa shɛ ubwa shɛ ga Krast ata na Agwatana teri.#Shɛzu 22:7,8

36Asaza a nda bu du asada, aa zhajɛ pu bwa, ee peni bu meni mụ tụ'walụ ta afwafwa mu na mi sembi, ɛɛ hiɛŋ, #Shɛzu 69:21; Mak 15:23 37Yaa shɛ gabụ bɛ shɛ Agwuma Eju, asha meme bicinji.

38E 'nyeci ti'nyeci tu ko, ee peteni na azuba uhiuhiu ubwa, ɛɛ hiɛŋ,#23:38 E 'nyeci ti'nyeci tu ko ee peteni na azuba uhiuhiu ubwa, ɛɛ hiɛŋ: Tɛjɛshɛrɛga tu ko ti cala ti shiyeni maa, ti'nyeci ta ata tɛ shɛ ne Rigrik, na Rilatin keeni Rihibru. BỤTỤ GA UBWA SH Ɛ AGWUMA EJU.

39Nazhɛ bụtụ bu ko na ashashɛ atwa ata awɛ a na swacɛ apata nu bwa dumanganɛ bu du n-ndumwa mụ wɛ, bɛɛ hiɛŋ bụ, Shɛ gabụ suu bɛ shɛ ga Krast ata, meme bicinji, maa iti bicinji du.

40Ama uyebi ubwa jishijɛ bụ, bee tezhigeni bu, bɛɛ hiɛŋ, Bɛ njɛ shɛ suu inyɛsɛ ya Agwatana, gana na te e bi peni n-ndumwa-tụwụma mu ko mu ko nu bwa? 41Iyi nɛ teni cɛŋ ni iyi nɛ atɛ njɛ, ibɛ gɛnɛnɛ aa tu tụpana itɛpwɛ ibɛ, ama bụtụ ga njɛ shɛ iyi iwɛ kwukwuŋ o.#Luk 23:4,14,22

42Bɛɛ hiɛŋ Jisus, N teyinje aka na ebi ci#23:42 aka na ebi ci: Tɛjɛshɛrɛga tu ko ti hiɛŋ, aka na ebi teni. Cɛnjɛ-ta-tugwama tụ bụ.

43Ge Jisus jishijɛ bụ, bɛɛ hiɛŋ, Iwɛ-tɛkana Omo bu mbiso maa, te kwuni nu hwayɛ ga, bi zhɛ ba nama ne mi nu Paradais.#2 Kor 12:3; N-ndu 2:7

Tu'wo ti Jisus

(Mat 27:45-56; Mak 15:33-41; Jon 19:28-30)

44Ti yee ci gana uwaŋna tishikoko, nazhɛ tishi tu layɛ nu unyizo kpaaŋ, uuwa i ci aka na tu uwaŋna yinganɛ. 45Uwaŋna te shi ya o, ibɛgɛlɛ tugwuno nɛ ee kepi odubo amɛ Umwono wa Agwatana bagwụ na ashashɛ.#Ụban 26:31-33; Ehib 9:8

46Ge Jisus uganɛ duuwa, bɛɛ hiɛŋ, Ada, M bi peni ihwungwɛ mi. Aka na tu baa jɛmɛ iwɛ ɛtɛ, baa dwa ihwungwɛ.#Shɛzu 31:5

47Aka na tu uhiu wa asaza dipi-yebi kwụbɛ ijɛ kpaaŋ, baa shɛtanɛ Agwatana, bɛɛ hiɛŋ, Iwɛ-tɛkana, bụtụ ga ubwa ga shɛ bụtụ bi tiririri.

48Aka na ta atwa elele na ụlwatagwụ no ofwo igbɛtɛtɛ ɛtɛ kwụbɛ iyi elele nɛ teni, ee gwuri nu nhwaŋ ma aba, aa pa shɛgba sha aba iyi. 49Ama atwa elele na ge mepi bu, te eyikwo na banɛ nu Galili a na ga zhagaga nu bwa, shikekeni taa dụlụ, aa ngbarakacɛ ijɛ ɛtɛ kpaaŋ.#Luk 8:1-3; 23:55,56; 24:10

E Ni Ru'wo ri Jisus

(Mat 27:57-61; Mak 15:42-47; Jon 19:38-42)

50Bụtụ bu ko na ɛɛ hiɛŋ izeci ibwɛ go Josɛf na banɛ Arimatia, na shɛ ụshɛpwụ we Eju. Bu namɛ na ajɛmɛ-ushaura, bɛ shɛ bụtụ bi biye keeni bụtụ bi tiririri. 51Bi leni shi ni iyi nɛ ee heŋshi kwo kaa ni iyi nɛ aa njɛ o. Bɛ shɛ bụtụ na du ba nda ashɛlatụ Cɛnjɛ-ta-tugwama ta Agwatana. 52Bee zhe pu Pɛilat, baa lụpɛ bụ ru'wo ri Jisus. 53Bee kezhicinje ru, bee pipi ru no tugwuno ti ilinɛn, bee ni ru nu u'uye na ee ge te ni shi bụtụ kwukwuŋ, unaa na bee ge hini nu utayɛ uko ụ'wụtụ. 54Jita ata shɛ ụjita tumama imanga tu Ụjita-ụhinjanụ na vwɛ beyi.

55Eyikwo na banɛ la nu bwa nu Galili a na 'wa bụ, kwụbɛ u'uye ata gana na ee ni ru'wo ru bwa. 56Nazhɛ ee gwure, aa imanjɛ iyi nɛ 'yajɛ ụhiụŋ ubiye keeni umuru. Oo to ụhinjanụ nụ Ụjita-ụhinjanụ gana na tu unu-tupana ibɛ namɛ.#Ụban 12:16; 20:10; Undwa 5:14; Mak 16:1

Currently Selected:

LUK 23: RBT

Highlight

Copy