LUK 20

E Heŋteni Jisus iwɛ Ụhwada Ubwa

(Mat 21:23-27; Mak 11:27-33)

1Jitoo ko ti ge Jisus bo mbisogono atwa iyi nu Umwono wa Agwatana, baa ananga kaa du Anabarɛ Ebiye, ibɛ ehiu onongbo, ne embesegeni Undwa, zhajɛ pu bwa, ɛɛ hiɛŋ bụ, 2Iti mbishi ụhwada na aba ndangana ijɛ kpaaŋ, okwo gaaba kwuŋ ubu peni ụhwada gaa?

3Ge Jisus jishijɛ aŋ, bɛɛ hiɛŋ, N zhɛ mo hi hoŋtono tugwo du iheŋtene ike maa hi n tɛrɛ. 4Cee kwuŋ ubaptizim ata ga Jon njɛ la atwa banɛɛ? Na azuba suu waa banɛ, okwo no olugwo atwa waa banɛ?

5Aa njɛ ushaura abaaba, ɛɛ hiɛŋ, Yaa shɛ ɛti hiɛŋ hwayɛ, Na azuba waa banɛ, bi zhɛ bɛ hiɛŋ, Iwembe po ahiɛ tɛtanɛ shɛ iwɛ ubwa rishee? 6Yaa shɛ kaa ɛti hiɛŋ hwayɛ, No olugwo atwa waa banɛ, atwa ga zhɛ ma tu tagana atayɛ kpaaŋ aba. Iwɛnɛ ta a tɛtanɛ-rishe maa ga Jon shɛ bigesere.#Mat 14:5

7Nazhɛ ɛɛ jishijɛ bụ, ɛɛ hiɛŋ, Ti mepi shi olugwo na waa banɛ o.

8Ge Jisus hiɛŋ aŋ, Asha N zha shɛ mo hi mbiso du ụhwada na Ama ndangana ijɛ kpaaŋ o.

N-ndumwa Tumanganjɛ iwɛ Ahwɛŋ-itimɛ

(Mat 21:33-46; Mak 12:1-12)

9Ge Jisus kwuni aŋ n-ndumwa mu ko tumanganganɛ, bɛɛ hiɛŋ, Bụtụ bu ko jwe itimɛ ya afwafwa, bee peni ahwɛŋ-itimɛ oko igbɛtɛtɛ, baa sanɛ na cɛnjɛ ti nya bee ilegeji.#Ayiz 5:1-7; Mat 25:14 10Aka na ta aka tụ'walụ ci, baa tumwanɛ yɛu-ugondu ubwa ike pa ahwɛŋ-itimɛ ɛtɛ, maa a panɛ bụ tụ'walụ ta afwafwa tu na tɛ shɛ urobwo ubwa ni itimɛ ɛtɛ. Ama ahwɛŋ-itimɛ ɛtɛ jibi bu, ee jicinji bu ni i'ɛlɛ yo ohondo. 11Baa tumwanɛ yɛu-ugondu inyɛ sasana, ee dibeneni bu, aa njɛ bụ ụpụrụsa, ee jicinji bu du ni i'ɛlɛ yo ohondo. 12Baa tumwanɛ inɛ itatụ, bu na ata ubwa aa gwụcanjɛ, ee keri bu no tupohondo.

13Nazhɛ agwuma-itimɛ ɛtɛ ya afwafwa hiɛŋ, Imbe Ngɛɛ zhɛ ma nda aaŋ? N zhɛ ma tumwana yɛu mi nɛ Omo lubo. Nekeshi aka na aa kwụbɛ bụ, ɛ zhɛ a muna bu ụjɛrụma. 14Aka na ta ahwɛŋ-itimɛ ɛtɛ kwụbɛ ti yɛu ɛtɛ ye ci, aa mama hiaŋnụ, Bu na ga ubwa ree shɛ bɛyɛ-bo-ogwu. Hwure tụ kwụnɛ bu ma, maa tu suji ma ogwu ata. 15Ibɛ po ee keri bu ni ipɛlu itimɛ ɛtɛ ya afwafwa, aa kwụnɛ bụ.

Imbe ehi heŋshi maa agwuma-itimɛ ɛtɛ ya afwafwa zhɛ ba nda atwa ataa? 16Bi zhɛ ba zha maa kwụna ahwɛŋ-itimɛ ɛtɛ, nazhɛ bɛɛ zhɛ ba shapa itimɛ ɛtɛ ya afwafwa bo utogono anya atwa.

Aka na ta atwa ata hwụjɛ iwɛ ɛtɛ, ɛɛ hiɛŋ, Kede i shɛ gana ata o!

Ama ti ge Jisus ngbaracɛ aŋ, bee heŋteni aŋ, bɛɛ hiɛŋ, Imbe shɛ ecilo iyi nɛ ee 'nyeci ni Iwɛ ya Agwatana, ɛɛ hiɛŋ:

17Utayɛ na omo-tuma menji aa lacɛ gana uzhobu,

ubwa kaa zhɛ wa kwunanga tuma#20:17 zhɛ wa kwunanga tuma: Kwo kaa utayɛ usugwulumi. ta ataa? #Shɛzu 118:22; Ugo 4:11; 1 Pita 2:7

18Bụtụ be elele na leyiteni utayɛ ata, u zhɛ wa bwarataga bụ rukwu rukwu, ama yaa shɛ kaa ubwa layɛtanɛ bụtụ be elele, u zhɛ wa naka bu gana upwupwutu.#Ayiz 8:14,15; Dan 2:34,35

Ushaura iwɛ Ukwuribi Ụdalụ

(Mat 22:15-22; Mak 12:13-17)

19Nazhɛ embisegeni Undwa keeni ehiu onongbo jelekeci Jisus na aka ata maa a 'imɛ bụ, ama a njɛ inyɛsɛ ya atwa. Iwɛnɛ te e mepi maa aba baa manganganɛ n-ndumwa ma ata.#Luk 19:47 20Ibɛ po ee zweni bu igbɛtɛtɛ, aa tumwanɛ eyeleji aba, a na mama nda gana maa a shɛ atwa tiririri, iwɛ maa a 'imɛ Jisus nu n-ndumwa mu na baa duma, maa e shepi bu e peni ukpahiŋ ụhwada ugwomina. 21Nazhɛ eyeleji ata zhajɛ, ɛɛ hiɛŋ Jisus, E-Bimbisegeni, ti mepi maa iwɛ nɛ aba duma keeni iyi nɛ obo mbisogono atwa namɛ ririri, bɛ njɛ shɛ iwɛ bu na atwa tuzanga o, na tɛkana kaa obo mbisogono atwa uhwaŋna wa Agwatana.#Jon 3:2 22Ee heŋteni bu, ɛɛ hiɛŋ, Undwa leni suu maa tu na tụpa Sisa ukwuribi ụdalụ, okwo u leni shi?

23Ama ge Jisus mepi i'inswɛ ya aba, bɛɛ hiɛŋ aŋ, 24M mbiseni ma de urinya uko ma kwụba. Gaaba 'yajɛ ụsụbwa ga keeni ti'nyeci tu ga tu swanɛ epee? Ɛɛ jishijɛ bụ, ɛɛ hiɛŋ, Ga Sisa.

25Nazhɛ ge Jisus hiɛŋ aŋ, Asha inɛɛ nɛ i shɛ inɛ Sisa, pana ma Sisa, inɛɛ nɛ kaa i shɛ inɛ ya Agwatana, pana ma Agwatana.#Luk 23:2; Rom 13:7

26Ikɛnyi ya aba ci shi ya maa a 'imɛ bụ nu n-ndumwa mu bwa ne eshe atwa ata o. Ajɛshɛgwa na bee peni aŋ dama aŋ, aa namɛ ya shiru.

Ushaura iwɛ Tihiɛ

(Mat 22:23-33; Mak 12:18-27)

27Asadusi oko a na hiɛŋ maa tihiɛ ta atwa na 'wi tu zasaba o, zhajɛ pi Jisus, ee unseni bu, ɛɛ hiɛŋ, #Ugo 4:1,2; 23:8 28E-Bimbisegeni, go Moses iti 'nyeteni, bɛɛ hiɛŋ, Yaa shɛ yɛu-bino bụtụ 'wi, baa ga 'yajɛ kaa biyikwo, bee meci shi yɛu nu bwa, gɛ yɛu-bino bwa zeni#20:28 gɛ yɛu-bino bwa zeni: Tɛjɛshɛrɛga tu ko ti hiɛŋ, ga bụtụ ata zeni. biyikwo ata tizhaada maa matanga yɛu-bino ɛtɛ bwa yɛu.#Undwa 25:5,6 29Miaụŋ ma bụtụ bu ko mu namba mi cenje. Bu na bi hiiŋ zeni biyikwo, bee 'wi zawa yɛu. 30Nazhɛ bu na bi yebi zeni biyikwo ata, bee 'weeneni zawa yɛu. 31Bu na bu tatụ zeni bu. Gana go atwa ata ecenje zeni bu, ee 'wi zawa miaụŋ. 32Nu umɛwɛɛ ibɛ, biyikwo ata du 'wi. 33Biyikwo aba tuba bɛɛ zhɛ ba sha hwuŋ nụ ụjita tihiɛɛ? Iwɛnɛ po hwɛɛ aba ebe cenje kaa zono bu.

34Ge Jisus jishijɛ aŋ, bɛɛ hiɛŋ, Atwa unyizo ga a zana, aa pana tụmbụla. 35Ama atwa na lanɛ maa ɛ hiɛ hwuŋ maa a nama nu unyizo ye we ci, a zha shɛ a zana, okwo tụmbụla, a zha shɛ a pana o. 36A zha shɛ kaa o 'woonono, ama ɛ zhɛ a sha gana atumwa-azuba, a shɛ miaụŋ ma Agwatana, iwɛnɛ tɛ ɛ hiɛ no tu'wo. 37Go Moses ni ikɛnyi ibwɛ mbiseni caakwụ ni iwɛ ukokoto ata, maa Agwatana ɛ hicinjɛ atwa na 'wi, aka na tu baa suyanɛ Agwangwama na shɛ Agwatana Abraham, na Agwatana Azik keeni Agwatana Jekob.#Ụban 3:6 38Bɛ shɛ shɛ Agwatana atwa na 'wi o, ama bɛ shɛ Agwatana atwa na a ya uraiŋ. Iwɛnɛ ta atwa elele shanɛ bu buumwa.

39Nazhɛ embisegeni Undwa oko jishijɛ Jisus, ɛɛ hiɛŋ bụ, E-Bimbisegeni, iyi nɛ abɛ jɛmɛ teni cɛŋ.#Mak 12:28 40Iwɛnɛ ta a zasa ya eshe-hwoo maa e heŋteni bu iheŋtene inyɛ elele.

Ge Jisus Heŋteni Aŋ iwɛ Krast

(Mat 22:41-46; Mak 12:35-37)

41Nazhɛ ge Jisus hiɛŋ aŋ, Nanaa tuba atwa oko hiɛŋ maa ga Krast shɛ Yɛu Devidii? 42Ge Devid ni ikɛnyi ibwɛ jɛmɛ kaa nu Utakada Shɛzunga shɛ bwa, bɛɛ hiɛŋ,

43Agwangwama hiɛŋ Agwangwama mi,

Gɛga nu u'ala ubiye mu

uuwa i ci aka na Ngaa njɛ atwa i'ime bu iyi

yɛ ɛvwɛvwɛjɛ mi tupatangana.#Shɛzu 110:1

44Yaa shɛ ge Devid hiɛŋ bụ, Agwangwama, asha gana na ya baa ta shɛ yɛu ibwɛɛ?

Ge Jisus Tɛtaganɛ Aŋ Unu iwɛ Embisegeni Undwa

(Mat 13:1-36; Mak 12:38-40)

45Na tuhwulaga tu na atwa ata kpaaŋ hwulajɛ iwɛ Jisus, bɛɛ hiɛŋ eseshi-iyi ubwa, 46Na nda ma pece ne embisegeni Undwa a na a jala maa o no rungo no otogwo tuwururu, a na kaa o lubo a'walụ no ofwo udukwo, keeni ajɛjɛ ụjɛrụma no shimwono shɛ Tụ'ụlwatagwụ, keeni ofwo ebiye ni iyimɛyɛ tiya. 47Aba kaa o sugo i'wɛŋnɛ yo olulo a ya, aa nda adua ụnjɛswa tɛnda-te-eshe. Ɛ zhɛ a pana aŋ n-ndumwa-tụwụma mu na mu wụmanjɛ duwa.

Currently Selected:

LUK 20: RBT

Highlight

Copy