JON 21

Ge Jisus Meme Mbiseni Eseshi-iyi Ubwa Sasana

1Na aba inɛ gɛ, ge Jisus meme mbiseni eseshi-iyi ubwa sasana caakwụ, nụ ụpalanụ Itekwu Taibirias.#21:1 Itekwu Taibirias: Ibɛ shɛ Itekwu Galili. Gana bee meme mbiseni aŋ na. 2Tu ga Saimon Pita, no Tomas ata ɛɛ hiɛŋ Ɛdɛngwurɛbɛ, na Nataniɛl na banɛ ni Kena na namɛ nu Galili, na miaụŋ mi Zɛbɛdi mi yebi#21:2 na miaụŋ mi Zɛbɛdi mi yebi: Tɛjɛshɛrɛga tu ko ti jɛmɛ du gana ata. Ama tɛjɛshɛrɛga tu ko ti hiɛŋ, miaụŋ-mo-bino, ge Jemis keeni Jon. keeni eseshi-iyi anya eyebi, aa namɛ no ofwo oko. 3Ga Saimon Pita hiɛŋ aŋ, N zhɛ mɛ imɛ ijɛnɛ. Ɛɛ hiɛŋ bụ, Ti zhɛ ta zha du na bụ. Ee beni ga ee hwuri gunu ata, ama a 'imɛ shɛ iyi elele jita ata o.#Luk 5:5 4Aka na ti iyi heri nu uvwungwa, ge Jisus shikeni nụ ụpalanụ itekwu ɛtɛ. Ama eseshi-iyi tuba mepi shi maa ge Jisus ta o.

5Ge Jisus heŋteni aŋ, bɛɛ hiɛŋ, Eyejilo mi, hi imwa suu iyi elele? Ɛɛ jishijɛ bụ, ɛɛ hiɛŋ, Awo.

6Bɛɛ hiɛŋ aŋ, 'Waŋ ma igwune hiŋ geri bu u'ala ubiye ụhaŋtụ, nazhɛ ɛhi zhɛ hia ima ijɛnɛ. Nazhɛ aa 'wɛŋ iŋ ga, e eri shi ɛ vwɛ iŋ ya o, iwɛnɛ ta a 'imɛ ijɛnɛ nɛ gembi ofwugwo.#Luk 5:6

7Nazhɛ biseshi-bi-iyi ata ge Jisus lubi, hiɛŋ Pita, Agwangwama ta. Aka na tu ga Pita hwụjɛ maa Agwangwama ta, bee meme urigeni idɛsici ibwɛ, iwɛnɛ tu baa ga namɛ mohondo, nazhɛ bee meme keri ni itekwu ɛtɛ. 8Ama eseshi-iyi avwɛ zhajɛ nụ ụhaŋtụ, aa mbacɛ igwune ɛtɛ ijɛnɛ shini, iwɛnɛ ta a dụlụmɛ shɛ ya nu uhaŋsa, i namɛ gana ivwunɛ kpakwụ-ni-dipi-yebi. 9Aka na te e munje nu uhaŋsa, aa kwụbɛ tu ulwa shanɛ, ijɛnɛ patanganɛ nu bwa keeni ibrɛd.

10Ge Jisus hiɛŋ aŋ, Suje ma ijɛnɛ ɛtɛ ike ahiɛ 'imɛ hwuwayɛ go.

11Ga Saimon Pita munji nụ ụhaŋtụ ata, baa mbacɛ igwune ɛtɛ aa 'imɛ ijɛnɛ i'wɛtwɛ dipi-tɛtu-ni-bɛ-itɛtu, i shini igwune ɛtɛ, bee tileni iŋ na cɛnjɛ. Ama okwo ti ijɛnɛ ɛtɛ gembi ufwugwo gana ata, igwune ɛtɛ kaa dwatwagwụ sụ o.

12Ge Jisus hiɛŋ aŋ, Zhajɛ ma hiɛ yɛ iyimɛyɛ. I zasa kaa bụtụ be elele na ashashɛ eseshi-iyi ata 'yajɛ eshe-hwoo maa hoŋtono bu maa, Gaaba kwuŋ abɛ shɛɛ? Iwɛnɛ to o mwopwo ya maa Agwangwama ta. 13Ge Jisus zhajɛ bee shepi ibrɛd ɛtɛ bee peni aŋ, bee peni aŋ du ijɛnɛ gana ata sasana. 14Inɛ gɛ ibɛ shɛ aka ụtatụ ti ge Jisus meme mbiseni eseshi-iyi ubwa caakwụ na aba na ti bɛɛ hiɛ no tu'wo.

Ge Jisus bo Utogono Pita Ugondu

15Aka na te e hwuwi iyimɛyɛ ɛtɛ tiya hwɛɛ, ge Jisus hiɛŋ Saimon Pita, A-Saimon, yɛu Jon, bu mo n lubo hŋ uhwuri ijɛ atwa vwɛ a nda?#21:15 ijɛ atwa vwɛ a nda: Kwo kaa uhwuri ijɛ tileni epe kpaaŋ.

Ga Saimon Pita jishijɛ bụ, bɛɛ hiɛŋ, Iiŋ, Agwangwama, bi mepi du maa Mo bu lubo.

Ge Jisus hiɛŋ bụ, Asha na pana miaụŋ-ma-agwụdụ mi iyimɛyɛ.

16Ge Jisus hiɛŋ bụ sasana na aka yebi, A-Saimon, yɛu Jon, bu mo n lubo gom hŋ?

Ga Pita jishijɛ bụ, bɛɛ hiɛŋ, Iiŋ, Agwangwama, bi mepi du maa Mo bu lubo.

Ge Jisus hiɛŋ bụ, Asha na ngbaraka agwụdụ mi.

17Ge Jisus heŋteneni Pita na aka tatụ, bɛɛ hiɛŋ, A-Saimon, yɛu Jon, bu mo n lubo hŋ?

Ibɛ po amɛ Pita hashɛganụ ya, iwɛnɛ ti ge Jisus heŋteni bu kpalụ tatụ maa, bu mo n lubo hŋ. Ga Pita hiɛŋ Jisus, Agwangwama, gabụ bi mepi iyi elele, bi mepi du kaa maa Mo bu lubo.

Ge Jisus hiɛŋ bụ, Asha na pana agwụdụ mi iyimɛyɛ. 18Iwɛ-tɛkana Omo bu mbiso, aka na ta abu ta shɛ usemberi, gabụ bo urugono tugwuno tụ bụ ni ikɛnyi bu, ofwo elele na ubu kwụlanɛ ba zha apata. Ama aka na abɛ injɛ hwuŋ, bi zhɛ ba mba i'ɛlɛ bu maa binya bụtụ ubu urigeni tugwuno, maa ma bu shapa du no ofwo na ga bu kwụlanɛ shɛ. 19Ge Jisus jɛmɛ iwɛ gɛ iwɛ maa mbisono aŋ maa tu'wo tu na ga Pita zhɛ bo 'wo hwuŋ ti zhɛ ta pana Agwatana ụjɛrụma. Aka na ti ge Jisus jɛmɛ iwɛ ɛtɛ, bɛɛ hiɛŋ Pita, N 'wa.

Ge Jisus ne Biseshi-bi-iyi Binya na Boo Lubo

20Tu ga Pita mbiyanɛ ekwunyi, baa kwụbɛ biseshi-bi-iyi ata ge Jisus bo lubo, bu gata jɛjɛ la to dongonu Jisus na aka iyimɛyɛ ụrụmɛ, bu gata du heŋteni la Jisus maa, Agwangwama, Gaaba kwuŋ zhɛ ma bu sangana atwa ne tideree? Tu baa 'wa aŋ.#Jon 13:25 21Aka na ti ga Pita kwụbɛ bụ, bɛɛ hiɛŋ Jisus, Agwangwama, bụtụ ga tubaa?

22Ge Jisus jishijɛ bụ, bɛɛ hiɛŋ, Yaa shɛ Ama jala maa ba nama uuwa i ci aka na Ngɛɛ zhɛ me gwure, imbe shɛ inɛɛ bụụ? Gabụ Ngɛɛ hiɛŋ, N 'wa.

23Ibɛ po n-ndumwa ma ata mo rungo ya na ashashɛ miaụŋ-mo-bino ata maa biseshi-bi-iyi ata zha shɛ bo 'wo. Ge Jisus kaa ga jɛmɛ shɛ maa bi zha shɛ bo 'wo, ama bi hiɛŋ, Yaa shɛ Ama jala maa ba nama uuwa i ci aka na Ngɛɛ zhɛ me gwure, imbe shɛ inɛɛ bụụ?

24Bụtụ ata ubwa shɛ biseshi-bi-iyi na ba la tiseyida ti iwɛ gɛ, ubwa ganana du kaa 'nyeci iŋ nu utakada ga. Ti mepi kaa maa tiseyida tu na bee le tɛ shɛ tiseyida ti tɛkana.

Ukwunanga

25I ta 'yajɛ iyi inyɛ nɛ ge Jisus ndanjɛ nɛ gembi ufwugwo. Yaa shɛ maa e 'nyeci iŋ hwɛɛ, N heŋshi maa okwo unyizo ga hwɛ hwɛɛ eri shi wa 'yaga ohwolu na eri wa lashɛga atakada na ga shɛ maa e 'nyeci o.

Currently Selected:

JON 21: RBT

Highlight

Copy