JON 20

U'uye ụ Shɛ Bohondo

(Mat 28:1-8; Mak 16:1-8; Luk 24:1-12)

1Ge Meri biyikwo bu Magdala zhe nu u'uye nu uvwungwa dididi, tobwolo iyi te suji shi kpataa o, baa kwụbɛ maa utayɛ ushigwowo nu u'uye ata. 2Ibɛ po bee gezhiji bee zhe pu Saimon Pita keeni biseshi-bi-iyi ata ge Jisus lubi, bɛɛ hiɛŋ aŋ, A vwuwa Agwangwama nu u'uye, ti mepi shi kaa ofwo na ee shiri bu o.

3Ibɛ po ga Pita ishijɛ abana ne biseshi-bi-iyi ata, ee zhe nu u'uye ata. 4E gezhiji hwɛɛ aba ebeyebi, ama biseshi-bi-iyi ata bi yebi hwuleni tuba Pita, baa jɛrɛ bụ u'uye tuto hiiŋ. 5Bee hiri, baa kwụbɛ to tugwuno ta ata ti ilinɛn ti tileni, ama bi teni shi tuba na amɛ ubwa o. 6Ga Saimon Pita zhajɛ du bee ci, bee teni tuba nu u'uye, baa kwụbɛ du to tugwuno ta ata ti ilinɛn ti tileni, 7ti ikerenu ɛtɛ ee ge peri la unu ubwa, i tileni shi tuba urubwo uko no tugwuno ta ata ti ilinɛn o, ama i kwungwuri yee tileni swooŋ. 8Nazhɛ biseshi-bi-iyi ata ge ci u'uye hiiŋ teni ya du na amɛ ubwa, nazhɛ baa kwụbɛ, baa tɛtanɛ ya du rishe. 9Iwɛnɛ te e ge te eshiciji shi Iwɛ ya Agwatana ata na jɛmɛ maa i shɛ tilɛɛ maa bi zhɛ bɛ hiɛ no tu'wo. 10Nazhɛ eseshi-iyi ata beni apata ee gwuri nu nhwaŋ ma aba.#20:10 eseshi-iyi ata gwuri nu nhwaŋ maa aba: Tɛjɛshɛrɛga tu ko ti hiɛŋ, ebeyebi ata gwuri no ofwo eseshi-iyi avwɛ.

Ge Meri Magdala Kwụbɛ Jisus

(Mat 28:9,10; Mak 16:9-11)

11Ama ge Meri ata shikeni no tupohondo tu u'uye baa twa-u'wo. Tu baa cwɛ-u'wo ata, bee hiri maa kwụba amɛ u'uye, 12baa kwụbɛ atumwa-azuba eyebi, a na uregeni i'wɛŋnɛ icɛnjɛ, ta a gɛgajɛ no ofwo ata ee ge shiri la ru'wo ri Jisus. Bu ko jɛjɛ geri bu uhiuhiu, bu na bi yebi jɛjɛ geri bɛ ɛvwɛvwɛjɛ Jisus. 13Ibɛ atumwa ata heŋteni Meri, ɛɛ hiɛŋ, E-biyikwo ga, imbe ubu njɛ aba twa-u'woo?

Ge Meri jishijɛ aŋ, bɛɛ hiɛŋ, Iwɛnɛ to o shopwo Agwangwama mi, Ngee mepi shi kaa ofwo na ee shiri bu.

14Aka na tu baa jɛmɛ iwɛ ɛtɛ, baa mbiyanɛ aba ubwa, baa kwụbɛ ti ge Jisus shikeni, ama bi mepi shi tuba maa ge Jisus ta.

15Ge Jisus heŋteni bu, bɛɛ hiɛŋ, E-biyikwo ga, imbe kwuŋ ubu njɛ aba twa-u'woo? Gaaba kwuŋ aba jalakakaa?

Ge Meri ge heŋshi maa okwo bungbaracɛ bi itimɛ ɛtɛ tɛ, bɛɛ hiɛŋ Jisus, Yaa shɛ gabụ bi shepi bu epe, asha m mbishi ofwo na ebi shiri bu, maa Ma shapa bụ.

16Ge Jisus suyanɛ bụ, bɛɛ hiɛŋ, E-Meri!

Ge Meri mbiyanɛ aba ubwa, bɛɛ hiɛŋ Jisus, Raboni! (Nɛ egini ibɛ shɛ, Bimbisegeni).

17Ge Jisus hiɛŋ bụ, To mo tumongono, iwɛnɛ ti Ngee te munji shi no ofwo Bishi mi. Ama zhaga no ofwo miaụŋ-mo-bino mi, mbiso aŋ maa, N zhɛ mo mungo no ofwo Bishi mi na shɛ du Bishi hiŋ, no ofwo Agwatana mi na shɛ du Agwatana hiŋ.

18Ibɛ po biyikwo ata bu Magdala ge Meri, zhe bee mbishi eseshi-iyi avwɛ unabarɛ ata, bɛɛ hiɛŋ, N kwubɛ Agwangwama, bee mbishi aŋ du iyi nɛ baa dumanjɛ nu bwa.

Eseshi-iyi Kwụbɛ Jisus

(Mat 28:16-20; Mak 16:14-18; Luk 24:36-49)

19Aka na tụ ụrụmɛ shɛ jita ata bu ulade, eseshi-iyi kepenji shidubo sho ofwo ata oo sotulonu, iwɛnɛ ta a nda inyɛsɛ ye Eju. Ge Jisus zhajɛ bee shikeni na ashashɛ aba, bɛɛ hiɛŋ aŋ, Ga amɛ-olom nama ne hiŋ. 20Aka na tu baa jɛmɛ iwɛ ɛtɛ, bee mbiseni aŋ i'ɛlɛ ibwɛ na bụ'aŋbụ bwa. Nazhɛ eseshi-iyi ubwa njɛ unyasa, iwɛnɛ ta a kwụbɛ maa Agwangwama ta. 21Ge Jisus hiɛŋ aŋ sasana, Ga amɛ-olom nama ne hŋ. Gana na te Bishi n tumwanɛ, gana ata du Ama hi tumwana. 22Aka na tu baa jɛmɛ iwɛ ɛtɛ, bee hwulupeni aŋ, bɛɛ hiɛŋ aŋ, Lashɛga ma Mpiala mi Tijilo. 23Bụtụ be elele na ehi gengeni iwɛwɛ ibwɛ, asha e gengeni bu ga, ama bụtụ be elele na ehi gengeni shi, asha e te gengeni shi bu du o.#Mat 16:19; 18:18

Ge Jisus Tezhigeni Tomas

24Go Tomas na shɛ bụtụ bu ko na ashashɛ eseshi-iyi umpwa-na-ba-eyebi, na ɛɛ hiɛŋ, Ɛdɛngwurɛbɛ, bu ga zasaba na atwa avwɛ na aka na ti ge Jisus ga zhajɛ o. 25Ibɛ po eseshi-iyi avwɛ hiɛŋ bụ, Tu kwụbwa Agwangwama.

Go Tomas hiɛŋ aŋ, Yaa shɛ Ngaa ta kwụbɛ shɛ andala nrɛ ni i'ɛlɛ ibwɛ, maa Mo shiyono du buvwa mi na andala ata nrɛ, maa Mo shiyono du ukwutu u'ala mu na bụ'aŋbụ bwa, asha N ta zha shɛ ma tɛtana-rishe o.

26Ti yaa namananɛ ijitɛ itindɛtu, eseshi-iyi ubwa sotulonu sasana nu umwono, go Tomas kaa du namba ya jita ata, ee kepi odubo. Ge Jisus teni bee shikeni na ashashɛ aba, bɛɛ hiɛŋ aŋ, Ga amɛ-olom nama ne hiŋ. 27Nazhɛ bɛɛ hiɛŋ Tomas, Shiyono buvwa bu epe, hioko i'ɛlɛ mi, zhajɛ nu u'ala bu maa shiyeni uŋ na bụ'aŋbụ mi. Ta laka rishe-tɛtɛtana o, ama na tɛtana-rishe.

28Go Tomas jishijɛ bụ, bɛɛ hiɛŋ, Agwangwama mi, na Agwatana mi.

29Ge Jisus jishijɛ bụ, bɛɛ hiɛŋ, Iwɛnɛ abu n kwụbɛ suu abu tɛtanɛ ya rishe? Ama atwa na ta ma n kwụbɛ shɛ, a na kaa tɛtanɛ-rishe, aba gwoje.

Ecilo no Po ga Jon 'Nyeci Utakada ga

30I ta 'yajɛ arụhwajɛ anya ofwugwo a na ge Jisus ndanjɛ ne eshe eseshi-iyi ubwa, anaa na ee 'nyeci shi nu utakada ga. 31Ama e 'nyeci a na ga iwɛ maa hiɛ tɛtana-rishe maa ge Jisus ubwa shɛ ga Krast, Yɛu ya Agwatana, iwɛ maa aka na ahiɛ tɛtanɛ-rishe, maa hi 'yaga uraiŋ tedure ni izeci ibwɛ.

Currently Selected:

JON 20: RBT

Highlight

Copy