JON 19

1Nazhɛ ga Pɛilat shepi Jisus bee lwepi bu nu udugwu. 2Asaza pieci esepi adanya, aa njɛ udara, ee peteni Jisus nu uhiuhiu, ee urigeni bu utogwo uduhwa ushenje. 3Aa zhajɛ pu bwa, ɛɛ hiɛŋ bụ, Zaaci! Tumaka Agwuma Eju! Nazhɛ oo po bu uwaŋpɛ nu upada.

4Ga Pɛilat beni sasana no tupohondo, bɛɛ hiɛŋ aŋ, Hioko ma, N zɛrijɛ bụtụ ga no ofwo hiŋ iwɛ maa hi mepi maa N kwụbɛtanɛ shɛ bụ tụwụma o. 5Ge Jisus beni no tupohondo, tu baa ta patanɛ udara ata we esepi adanya, ti bee te urigeni du utogwo ata uduhwa ushenje.

Ga Pɛilat hiɛŋ aŋ sasana, Hioko ma bụtụ ga!

6Aka na te ehiu onongbo, ne edegeri kwụbɛ Jisus, aa uganɛ, ɛɛ hiɛŋ, Tagana bụ nrɛ nụ ụ'wụ'wụ-ubatanɛ! Tagana bụ nrɛ nụ ụ'wụ'wụ-ubatanɛ!

Ga Pɛilat hiɛŋ aŋ, Shapa bu ma hi tegeni nrɛ nụ ụ'wụ'wụ-ubatanɛ ni ikɛnyi hiŋ. Ɛɛ hiɛŋ Gamba, N kwụbɛtanɛ shɛ bụ tụwụma o.

7Eju jishijɛ Pɛilat, ɛɛ hiɛŋ, Ti 'yajɛ Undwa, ama gana na tu Undwa ata tu shɛ, asha bɛ shɛ aa kwụna, iwɛnɛ tu baa mama njɛ Yɛu ya Agwatana.

8Aka na tu ga Pɛilat hwụjɛ iwɛ ɛtɛ, ibɛ po inyɛsɛ keeni bu tisha duwa. 9Bee teni sasana nu umwamwa, bee heŋteni Jisus, bɛɛ hiɛŋ, Cee kwuŋ abu banɛɛ?

Ama ge Jisus jishijɛ shɛ bụ o.

10Iwɛbɛ po ga Pɛilat hiɛŋ bụ, Bu n jɛshɛjɛ shɛ suu? Bi mepi shi suu maa N 'yajɛ ụhwada maa Ma bu ganga, Ngaa 'yajɛ du kaa ụhwada maa Ma bu ta nu ubatanɛ?

11Ge Jisus jishijɛ bụ, bɛɛ hiɛŋ, Yaa shɛ Agwatana ge bi peni shi taa na azuba, bi ge eri shi ba 'yaga ụhwada maa n njɛ iyi elele o. Ama bụtụ na n shapɛ ubu peni, ubwa iwɛwɛ ibwɛ wụmanjɛ.

12Te kwuni na aka ata, ga Pɛilat ba jala maa ganga Jisus.

Ama Eju uganɛ, ɛɛ hiɛŋ, Yaa shɛ ebi genji bụtụ ga, asha bi zha shɛ ba sha ya biyejilo Sisa o. Bụtụ be elele na mama njɛ agwuma, asha bụtụ ata be munje Sisa.

13Aka na ti ga Pɛilat hwụjɛ iwɛ ɛtɛ, bɛɛ zɛrijɛ Jisus no tupohondo, baa jɛjɛ ni idwɛtwɛ ụshɛrɛya, no ofwo ata aa njɛ idwɛtwɛ na atayɛ, a na ɛɛ hiɛŋ nu unu Rihibru, Gabata. 14Jita ata kaa shɛ ụjita tumama imanga ti Isene Tɛkashɛka nɛ vwɛ beyi, uwaŋna kaa gwumwonu tishikoko. Ga Pɛilat hiɛŋ Eju, Hioko ma Agwuma hiŋ!

15Ama a uganɛ, ɛɛ hiɛŋ, Shapa bụ! Shapa bụ! Tagana bụ nrɛ nụ ụ'wụ'wụ-ubatanɛ!

Ga Pɛilat heŋteni aŋ, bɛɛ hiɛŋ, Agwuma hiŋ hŋ Ama tagana nrɛ nụ ụ'wụ'wụ-ubatanɛ?

Ama ehiu onongbo jishijɛ bụ, ɛɛ hiɛŋ, Tu zasa agwuma anya elele namɛ swooŋ na Sisa o.

16Nazhɛ ga Pɛilat shepi Jisus bee peni aŋ maa o to bu nu ubatanɛ.

O To Jisus nu Ubatanɛ.

(Mat 27:32-44; Mak 15:21-32; Luk 23:26-43)

17Bee shepi ụ'wụ'wụ-ubatanɛ ubwa, bee beni bee zhe no ofwo na ɛɛ hiɛŋ, Ukokolo uhiuhiu, a na ɛɛ hiɛŋ nu unu Rihibru, Golgota. 18Apata ee tegeni Jisus nrɛ nụ ụ'wụ'wụ-ubatanɛ, medenji atwa oko eyebi. Bu ko namɛ geri bu u'ala ubiye ubwa, bu na bi yebi namɛ geri bu u'ala ugwulwo ubwa, ge Jisus tuba shiyeni na ashashɛ aba.

19Ga Pɛilat 'nyeci ti'nyeci tu ko bee peteni tu nụ ụ'wụ'wụ ata ubatanɛ. Ti'nyeci ta ata ti hiɛŋ, GE JISUS, BỤTỤ BU NAZARƐT, AGWUMA EJU. 20Eju ofwugwo rɛcɛ ti'nyeci ta ata, iwɛnɛ to ofwo ata oo to Jisus nu ubatanɛ gwumwongonu nụ ụshɛpwụ ata ụ'wụtụ. E 'nyeci ti'nyeci ta ata, ne Rihibru, na Rilatin keeni Rigrik.

21Ibɛ po ehiu onongbo Eju hiɛŋ Pɛilat, Ta 'nyata maa Agwuma Eju o, ama 'nyata maa, ubwa hiɛŋ bɛ shɛ Agwuma Eju.

22Ga Pɛilat jishijɛ aŋ, bɛɛ hiɛŋ, N 'nywotwo iyi nɛ Ngee 'nyeci.

23Aka na ta asaza to Jisus nu ubatanɛ ata, ee suji i'wɛŋnɛ ibwɛ i tu'urugono, oo dwotwogonu iŋ orubwo eneshi, iwɛ maa busaza be elele suji ma tu bwa, medenji idikɛ ibwɛ du. Ama idikɛ ɛtɛ zasa tutogono, a nɛ iŋ mudu, te kwune na azuba ibɛ tutu uvwi ibɛ.

24Iwɛbɛ po aa mama hiaŋnụ, Kede ti beji iŋ ma o, ama tu 'wɛŋ ma icɛcɛ iwɛ ibɛ, maa ti mepi ma bụtụ na zhɛ ba ya iŋ. Inɛ ɛtɛ teni iwɛ maa Iwɛ ya Agwatana nɛ oo 'nywotwo la i sɛ, iwɛ ɛtɛ hiɛŋ,

O dwotwogonu i'wɛŋnɛ mi i tu'urugono abaaba,

aa 'wɛŋ icɛcɛ iwɛ idikɛ mi. Iyi nɛ asaza njɛ ta.#Shɛzu 22:18

25Atwa na shikekeni to dongonu ụ'wụ'wụ ata ubatanɛ Jisus, a shɛ ge Meri bino bwa, ne Meri buhongwu bino bwa, na shɛ biyikwo Klopas keeni Meri biyikwo bu Magdala. 26Aka na ti ge Jisus kwụbɛ bino bwa, keeni biseshi-bi-iyi ata bee ge lubi, te e shikekeni apata. Ge Jisus hiɛŋ bino bwa, Omu, kwụba yɛu bu.

27Nazhɛ bɛɛ hiɛŋ biseshi-bi-iyi ata, Kwụba bino bu. Te kwuni na aka ata, biseshi-bi-iyi ata shepi Meri ni ihwɛ ibwɛ.

Tu'wo ti Jisus

(Mat 27:45-56; Mak 15:33-41; Luk 23:44-49)

28Na aba na ti ge Jisus mepi maa iyi elele hwuwowo cebe, iwɛ maa gɛ iwɛ nɛ oo 'nywotwo la i sɛ, bɛɛ hiɛŋ, I'uyɛ n gwụmɛ.#Shɛzu 69:21; 22:15

29Ikele ike ga namba apata ee shidinji meni mụ tụ'walụ ta afwafwa mu ko mi sembi. Ee shepi ụhwụŋkwụ ee shiyeni ne meni me ebe mụ tụ'walụ ta afwafwa mi sembi, ee shepi mu ee hwuŋteni nu usanga uko usopi, ee kwutenji mu nu unu Jisus. 30Aka na ti ge Jisus hunganɛ meni ma ata mụ tụ'walụ ta afwafwa mi sembi, bɛɛ hiɛŋ, Iwɛ hwuwowu ya. Nazhɛ bee zhire uhiuhiu, baa dwa ihwungwɛ.

Busaza bu Ko Sepi bu Isɛnu na Bụ'aŋbụ

31Gana na tụ ụjita ata ụ shɛ ụjita uzuma, na aa mama imanga iwɛ Ụjita-ụhinjanụ ụ'wụtụ u tuswooŋ na kaa vwɛ beyi, ibɛ po Eju lụpɛ Pɛilat maa bwarataga ivwunɛ ya aba, maa tuba e kezhicinje aŋ. Iwɛnɛ te e jeri shi maa n'wo ma ata mu swataga ni i'wɛ'wɛ ɛtɛ ya abatanɛ tutu Ụjita-ụhinjanụ. 32Ibɛ po asaza ata zhajɛ, ee bwereteji ivwunɛ bụtụ bi hiiŋ, medenji inɛ bụtụ bi yebi a na oo to nu ubatanɛ ne Jisus. 33Aka na te e ci Jisus, aa kwụbɛ maa bu uwo cebe, e bwereteji shi ya ivwunɛ ibwɛ o. 34Ama busaza bu ko na amɛ aba sepi Jisus isɛnu na bụ'aŋbụ, gunu ata mehieŋ ne meni mu banɛ. 35Bụtụ na kwụbɛ iŋ, bi le tiseyida, tiseyida tu bwa kaa tɛ shɛ tiseyida ti tɛkana, bee mepi kaa du maa ba duma iwɛ-tɛkana, iwɛ maa du hiɛ tɛtana-rishe.#19:35 maa du hiɛ: Tɛjɛshɛrɛga tu ko ti hiɛŋ, maa du hiɛ tɛtana-rishe uranga rishe-tɛtɛtana. 36Ijɛ kpaaŋ teni iwɛ maa Iwɛ ya Agwatana nɛ hiɛŋ, U'umpwo ubwa okwo uko zha shɛ wa bwadụ o, i sɛ.#Ụban 12:46; Tɛrɛ 9:12; Shɛzu 34:20 37Iwɛ ya Agwatana inyɛ hiɛŋ sasana, Ɛ zhɛ a ngbaraka bụtụ ata ee sepeji iyi.#Zɛka 12:10; N-ndu 1:7

E Ni Ru'wo ri Jisus

(Mat 27:57-61; Mak 15:42-47; Luk 23:50-56)

38Na aba inɛ gɛ, nazhɛ go Josɛf Arimatia na shɛ du biseshi-bi-iyi Jisus ne tusweci, iwɛnɛ tu baa nda inyɛsɛ ye Eju, zhajɛ baa lụpɛ Pɛilat ru'wo ri Jisus. Ibɛ po ga Pɛilat peni bu ohwolu, nazhɛ bee zhe bee shepi ru'wo ru bwa. 39Ge Nikodimos na zhajɛ la pi Jisus hiiŋ nụ ụjita, zhagajɛ no Josɛf, baa 'waŋnɛ manɛbɛ mu umuru mu na oo togotogwu na alos, mu na bimenji bu uzhinono ba muba bi ci gana dupu-nu-woshi-ni-bɛ-itɛ (75).#Jon 3:1,2 40Ee shepi ru'wo ri Jisus ee pipi ru no tugwuno ti ilinɛn, medenji manɛbɛ ma ata mi 'yajɛ ụhiụŋ ubiye, gana na ta masha me Eju ma nda ru'wo ra aba nazhɛ e ni ru. 41No ofwo ata itimɛ namɛ, apata ee tegeni Jisus nrɛ nụ ụ'wụ'wụ-ubatanɛ, u'uye uko ufwo du namba apata unaa na ee ge te ni shi bụtụ be elele nu bwa kwukwuŋ. 42Nu bwa ee ni Jisus, iwɛnɛ tụ Ụjita-ụhinjanụ vwɛ beyi, keeni iwɛnɛ tu u'uye ata du kaa gwumwongonu.

Currently Selected:

JON 19: RBT

Highlight

Copy