JON 18

A 'Imɛ Jisus

(Mat 26:47-56; Mak 14:43-50; Luk 22:47-53)

1Aka na ti ge Jisus hwuwi adua ga tɛnda, bee beni ne eseshi-iyi ubwa aa zhagajɛ ee keshi isese ike nɛ ɛɛ hiɛŋ izeci ibɛ Kɛdron, meni mi ibɛ ma hwaŋ na aka bu ugbofworo, itimɛ du kaa namɛ apata. Ge Jisus teni ni itimɛ ɛtɛ ne eseshi-iyi ubwa. 2Ga Judas na zhɛ ba sangana bu atwa ne tidere mepi du apata, iwɛnɛ ti ge Jisus ba shana baa ụlwatagwụ apata ne eseshi-iyi ubwa aka elele. 3Aka na tu ga Judas suje asaza keeni edegeri umwono tu'ulwa, a na ehiu onongbo keeni Afarisi panɛ bụ, nazhɛ baa zhajɛ apata na shimwa shu ulwa, ta asụtụla keeni i'wɛŋnɛ-ujasa.

4Ti ge Jisus mepi iyi elele nɛ ɛɛ zhɛ a nda bụ, bee beni bee heŋteni aŋ, bɛɛ hiɛŋ, Gaaba ahia jalakakaa?

5Ɛɛ jishijɛ bụ, ɛɛ hiɛŋ, Ge Jisus, bụtụ bu Nazarɛt.

Ge Jisus hiɛŋ aŋ, Gamba na.

Ga Judas na ba sangana bu atwa ne tidere shikeni du na aba. 6Aka na ti ge Jisus hiɛŋ aŋ, Gamba na, ee gwuri mabaaba aa 'waŋ na cɛnjɛ.

7Nazhɛ ge Jisus heŋteni aŋ sasana, bɛɛ hiɛŋ, N hiɛŋ, Gaaba kwuŋ ahia jalakakaa? Ɛɛ jishijɛ bụ, ɛɛ hiɛŋ, Ge Jisus, bụtụ bu Nazarɛt.

8Ge Jisus jishijɛ aŋ, bɛɛ hiɛŋ, N hi mbiswo kaa maa, Gamba na. Yaa shɛ Gamba ahia jala, asha ganga ma atwa ga maa e hwuri. 9Bɛ jɛmɛ iwɛ gɛ, iwɛ maa iwɛ ɛtɛ baa ga dumwa i sɛ, ibɛ shɛ iwɛ ɛtɛ bɛɛ gɛ hiɛŋ, I zasa bụtụ be elele na Ngaa inzhɛnjɛ na ashashɛ atwa na ebu m peni o.

10Nazhɛ ga Saimon Pita na ga 'waŋnɛ utokwobi, hwucice uŋ, boo po yɛu-ugondu ye ehiu onongbo, bee vweri ucɛbɛ ubwa u'ala ubiye. Ɛ hiɛŋ izeci yɛu-ugondu ɛtɛ, ga Malɛkos.

11Nazhɛ ge Jisus hiɛŋ Pita, Gwuricingo utokwobi bu nu ufwutwa ubwa! Bi jeri shi suu maa ma swa ukwopi na Bishi mi m peni?#18:11 ukwopi na Bishi mi m peni: Aka na tu ubayiburu wa duma iwɛ ukwopi, asha pa'ụtụ wa duma iwɛ ụbaụta uko na jiteni bụtụ. #Mat 26:39; Mak 14:36; Luk 22:42

E Zeriji Jisus no Ofwo Anas

(Mat 26:57-58; Mak 14:53-54; Luk 22:54)

12Nazhɛ asaza, ne ehiu asaza medenji edegeri Eju 'imɛ Jisus, ee umpi bu. 13Ee zeriji Jisus no ofwo Anas tugwo hiiŋ, iwɛnɛ tu baa shɛ binua Kayafas, na shɛ Bunongbo bụ 'wụtụ nu uywa ata. 14Ga Kayafas ga, ubwa shɛ bụtụ na peni Eju ahaŋsa maa, i shɛ titeni ti hiŋ maa ga bụtụ bu ko 'wi iwɛ atwa kpaaŋ.#Jon 11:49,50

Ga Pita Teri Ashamanjɛ maa ubwa Mepi Shi Jisus o

(Mat 26:69-70; Mak 14:66-68; Luk 22:55-57)

15Ga Saimon Pita ne biseshi-bi-iyi bi nya bu ko 'wa Jisus ne ekwunyi. Bunongbo bụ 'wụtụ kaa mepi biseshi-bi-iyi ata tebiye, bee teni nu umwamwa Bunongbo ata bụ 'wụtụ ne Jisus. 16Ama ga Pita ge te shikeni no odubo no tupohondo. Nazhɛ biseshi-bi-iyi ata bi yebi banɛ, baa jɛmɛ iwɛ na bungbaracɛ ata bo odubo, nazhɛ bee tecinji ya Pita na amɛ umwamwa ata.

17Nazhɛ yɛu ɛtɛ towo nɛ ya ngbaraka odubo ata, heŋteni Pita, bɛɛ hiɛŋ, Bɛ shɛ shɛ suu du bụtụ bu ko na ashashɛ eseshi-iyi ụ bụtụ ga?

Ga Pita jishijɛ bụ, bɛɛ hiɛŋ, Awo, shɛ Gamba o.

18Miaụŋ-mu-ugondu keeni edegeri shanɛ ulwa ee shikekeni apata aa hwatụ uŋ, iwɛnɛ tu mpiala mu namɛ na aka ata. Ga Pita shikeni du baa hwatụ uŋ na aba.

Bunongbo bụ 'Wụtụ Unseni Jisus iwɛ Eseshi-iyi Ubwa

(Mat 26:59-66; Mak 14:55-64; Luk 22:66-71)

19Nazhɛ Bunongbo bụ 'wụtụ unseni Jisus iwɛ eseshi-iyi ubwa keeni iwɛ iyi nɛ ge Jisus bo mbisogono atwa.

20Ge Jisus jishijɛ bụ, bɛɛ hiɛŋ, M mbiswo la atwa unyizo iwɛ kpataa. M mbisegeni la atwa iyi no shimwono shɛ tụ'ụlwatagwụ keeni Umwono wa Agwatana ɛgbɛ ɛgbɛ, no ofwo na kaa Eju a ụlwatagwụ hwɛɛ aba, N jɛmɛ shɛ la kaa iyi elele ne tusweci o. 21Iwembe po obu to mo unsonoo? Unsono ya atwa ata a na hwụjɛ la iwɛ nɛ Ngee mbishi aŋ. E mepi iyi nɛ Ngaa jɛmɛ la.

22Aka na ti ge Jisus jɛmɛ iwɛ ɛtɛ, bụtụ bu ko na amɛ edegeri a na shikekeni apata po Jisus uwaŋpɛ nu upada, bɛɛ hiɛŋ Jisus, Gana go suu ɛɛ jishijɛ hwuŋ Bunongbo bụ 'wụtụ?

23Ge Jisus jishijɛ bụ, bɛɛ hiɛŋ, Yaa shɛ Ngaa jɛmɛ n-ndumwa mụ wɛ, asha duma n-ndumwa ma ata mụ wɛ Ngaa jɛmɛ, yaa shɛ kaa n-ndumwa mi biye Ngaa jɛmɛ, asha iwembe po obu m po uwaŋpɛɛ? 24Ga Anas shepi Jisus no ofwo Kayafas na shɛ Bunongbo bụ 'wụtụ, tobwolo e te umpi bu.

Ga Pita Teri Ashamanjɛ Sasana maa bu Mepi Shi Jisus o

(Mat 26:71-75; Mak 14:69-72; Luk 22:58-62)

25Ga Saimon Pita te shikeni baa ta hwatụ ulwa ata. Ee heŋteni bu, ɛɛ hiɛŋ, Shɛ bụtụ bu ko na ashashɛ eseshi-iyi bụtụ ga suu abɛ shɛ?

Ga Pita teleneni ashamanjɛ, bɛɛ hiɛŋ, Awo, shɛ Gamba o.

26Ibɛ yɛu-ugondu Bunongbo bụ 'wụtụ ike nɛ shɛ udenji ụ bụtụ ata ga Pita ge vweri ucɛbɛ hiɛŋ bụ, N nga bụ kwụbɛ shɛ suu nu bwa ni itimɛ ɛtɛ?

27Ga Pita teleneni ashamanjɛ, gunu ata alụma uganɛ.

Ge Jisus na Pɛilat

(Mat 27:1,2,11-14; Mak 15:1-5; Luk 23:1-5)

28Eju zeriji Jisus ee beni na agba Kayafas, ee zhe nu umwamwa ugwomina nu uvwungwa dididi. Ama Eju tuba teni shi nu umwamwa ata o, iwɛ maa kede e meme heshigeni o, iwɛnɛ ta a jala maa a yɛ Iyimɛyɛ Tɛkashɛka. 29Ibɛ po ga Pɛilat beni no tupohondo, bee heŋteni aŋ, bɛɛ hiɛŋ, Imbe ɛhi hiɛŋ maa bụtụ ga njɛɛ?

30Ɛɛ jishijɛ bụ, ɛɛ hiɛŋ, Yaa shɛ baa ga njɛ shɛ iyi iwɛ, ti ga zha shɛ ta bu shapɛrɛganɛ bu o.

31Ga Pɛilat hiɛŋ aŋ, Shapa bu ma hiɛ jɛmɛ ụshɛrɛya ubwa nu gana na tu undwa hiŋ jɛmɛ.

Eju jishijɛ bụ, ɛɛ hiɛŋ, E ti leneni shi kaa maa ta kwụna bụtụ be elele. 32Inɛ gɛ teni iwɛ maa iwɛ ɛtɛ ge Jisus dumwa la i sɛ, na aka na tu baa jɛmɛ iwɛ ɛtɛ, iwɛ maa mbisono tu'wo tu gana na bɛɛ zhɛ bo 'wo.#Jon 3:14; 12:32

33Ga Pɛilat teni sasana nu umwamwa, baa suyanɛ Jisus, bee heŋteni bu, bɛɛ hiɛŋ, Gabụ suu bɛ shɛ Agwuma Eju?

34Ge Jisus jishijɛ bụ, bɛɛ hiɛŋ, Gabụ suu bu mama dumanjɛ iwɛ gɛ ni ikɛnyi bu, okwo anya atwa ubu mbishi iwe mi?

35Ga Pɛilat jishijɛ bụ, bɛɛ hiɛŋ, Biju suu Ngaa shɛ? Udenji bu, keeni ehiu onongbo, aba kaa ubu shapɛ pi mi. Imbe abɛ njɛɛ?

36Ge Jisus jishijɛ bụ, bɛɛ hiɛŋ, Cɛnjɛ-ta-tugwama ti mi tɛ shɛ shɛ ma tu tu unyizo ga o. Shibwonu Cɛnjɛ-ta-tugwama ti mi tu ga shɛ ma tu tu unyizo ga, miaụŋ-mu-ugondu mu mi gɛ zhɛ ma twa ifelu maa kede e n shepi e peni Eju o.

37Ibɛ po ga Pɛilat heŋteni bu, bɛɛ hiɛŋ, Asha bu ta shɛ suu bwonu Agwuma?

Ge Jisus jishijɛ bụ, bɛɛ hiɛŋ, Gabụ bi hiɛŋ maa N shɛ agwuma. Iwɛ ecilo ga Ngee teni nu unyizo maa e m meci, iwɛ maa ma la iwɛ-tɛkana tiseyida. Bụtụ be elele na shɛ bụtụ bu tɛkana, bi zhɛ ba hwuga rụhwụŋ ri mi.

38Ga Pɛilat heŋteni bu, bɛɛ hiɛŋ, Imbe kwuŋ shɛ iwɛ-tɛkana ataa?

Kede I Shɛ Bụtụ Ga o, Ama ga Shɛ ga Barabas

(Mat 27:15-31; Mak 15:6-20; Luk 23:13-25)

Aka na tu ga Pɛilat jɛmɛ iwɛ ɛtɛ, bee beni sasana bee zhegeni Eju, bɛɛ hiɛŋ aŋ, N kwụbɛtanɛ shɛ bụ kaa tụwụma. 39Ama i shɛ iyi uvwovwu hiŋ maa Ma hi bacɛnganɛ bụtụ bu ko na aka Isene Tɛkashɛka. Hia jala suu maa ga shɛ Agwuma Eju Ngaa hiɛ bacɛnganɛ?

40Aa uganɛ sasana kpaaŋ aba, ɛɛ hiɛŋ, Kede i shɛ bụtụ ga o, ama ga shɛ ga Barabas. Ga Barabas ata kaa shɛ bɛshɛrɛ.

Currently Selected:

JON 18: RBT

Highlight

Copy