UGONDU WA ATUMWA 16

Go Timoti Zhe Tahaŋnụ no Poul keeni Sailas

1Go Poul zhe tahaŋnụ tu bwa bee ci Dɛbi keeni Lusitra. Butɛtanɛ-be-rishe bu ko namba apata, ɛɛ hiɛŋ, go Timoti. Bino bwa du shɛ butɛtanɛ-be-rishe na shɛ Biju, ama bishi bwa tuba shɛ Bigrik. 2Atɛtanɛ-rishe elele na namɛ nu Lusitra keeni Ikonium a la Timoti tiseyida. 3Ama gana na tu go Poul ba jala maa go Timoti zhe tahaŋnụ nu bwa, ibɛ po bee jeji bu teleyi iwɛ Eju na namɛ nu u'una ata. Atwa elele na namɛ no ofwo ata e mepi maa bishi Timoti shɛ Bigrik.#16:3 ibɛ po bee jeji bu teleyi…Atwa elele na namɛ no ofwo ata mepi maa bishi Timoti shɛ Bigrik: Egrik jeji shi teleyi o, Eju kaa zha shɛ o lono maa go Timoti njɛ ugondu wa Agwatana na aba iwɛnɛ ti bee jeji shi teleyi o. 4Gana na to o tonongo ụshɛpwụ ụshɛpwụ, aa pana atɛtanɛ-rishe unu-tɛtɛtagana na atumwa keeni n-nyarɛ mu na mu namɛ nu Jɛrusalɛm shiri maa ga a untangana uŋ. 5Ibɛ po tụ'ụlwatagwụ-tụ-ụhiɛŋshɛ-Agwangwama ti keeni ikɛnyi ti'yaga ne rishe-tɛtɛtana, ufwugwo wa aba kaa du wa kaana ugombo iyi-heri iyi-heri.

Go Poul Kwụbɛ Ozobu nu Ụshɛpwụ Ata Ɛɛ Hiɛŋ Troas

6Go Poul na atwa na namɛ nu bwa duri u'una Firigia keeni Galatia, iwɛnɛ tu Mpiala mi Tijilo mu lakanɛ aŋ maa a njɛ i'enenji nu ukpeleshi cɛnjɛ ti Esia. 7Aka na te e ci tugwungwu tu ukpeleshi cɛnjɛ tu Musia, ee menji maa e teni cɛnjɛ ti Bitunia, ama Mpiala mi Jisus mi leneni shi aŋ o. 8Ibɛ po ee keshici Musia ee zhe Troas. 9Apata go Poul kwụbɛ ozobu oko nụ ụjita, te butubwenyi bu ko bu Masɛdonia shikeni, baa lụpɛ bụ, bɛɛ hiɛŋ, Kɛshɛ nu Masɛdonia, maa iti mbiyeni. 10Aka na tu go Poul kwụbɛ ozobu ata, gunu ata atu mama 'imɛ, ata jala maa ta zha Masɛdonia, iwɛnɛ te eti heŋshi maa Agwatana utu suyanɛ gom maa ta anangana aŋ Anabarɛ Ebiye.

Ge Lidia Jɛshɛrɛjɛ-ahaŋsa ni Filipai

11Te eti beni nu Troas, eti teni ụhaŋtụ eti hwuri shiriri nu Samotraki, iyi heri eti ci Nɛapolis. 12Eti beni apata, eti ci Filipai, na shɛ ụshɛpwụ uhiiŋ na bụtụ bo to nu ukpeleshi cɛnjɛ tu Masɛdonia.#16:12 ụshpɛwụ uhiiŋ…nu ukpeleshi cɛnjɛ tu Masɛdonia: Tɛjɛshɛrɛga tu ko ti hiɛŋ, ụshɛpwụ na ụ shɛ uhiu…nu ukpeleshi cɛnjɛ tu Masɛdonia. Orom aba jɛjɛ apata. Atu namɛ nụ ụshwɛpụ ata gana ijitɛ imbɛnɛ. 13Eti beni na amɛ ụshɛpwụ nụ Ụjita-ụhinjanụ, eti zhe nụ ụpalanụ Urefu, no ofwo na eti heŋshi maa ti zhɛ ta kwụba ofwo adua tɛnda. Atɛ jɛjɛ apata, atɛ jɛmɛ n-ndumwa ne eyikwo oko na sotulonu apata. 14Ama biyikwo bu ko na ɛɛ hiɛŋ, ge Lidia, na bo shiyono ushi, na banɛ nu Taiyataira, na ba zhɛba Agwatana. Tu baa shɛlajɛ n-ndumwa mu tu, Ibɛ po Agwangwama kepishinji ahaŋsa ubwa, maa pana abashɛ iwɛ nɛ go Poul ba duma tebiye. 15Aka na ta a njɛ bu ubaptizim keeni atwa ihwɛ ibwɛ. Baa tụ lụpɛ, bɛɛ hiɛŋ, Yaa shɛ ehi m menji maa N tɛtanɛ Agwangwama rishe, asha teni ma hiɛ gɛga ni ihwɛ mi. Baa tu uranjɛ.

Nu Umwono-tishi ni Filipai

16Aka na eti zhe no ofwo na aa nda adua, atu twa ni yɛu ike yo o, nɛ shɛ bujama, na mpiala mụ wɛ mu na ma pana bụ tigesere tụdụma mu namɛ na amɛ ubwa. Be sugeni shɛgwangwama shɛ bwa ule ụ'wụtụ ne tigesere tu na baa nda. 17Yɛu ɛtɛ 'wa Poul ta atuba, baa ugaga, bɛɛ hiɛŋ, Atwa ga shɛ miaụŋ-mu-ugondu ma Agwatana, na Hwuri Kpaaŋ a na ma hi anangana iwɛ uhwaŋna na maa hi bini. 18Bu uranjɛ ijɛ ijitɛ ifwugwo. Ama amɛ Poul hashɛganụ, baa mbiyanɛ bụ, bɛɛ hiɛŋ mpiala ma ata, M bu peni-unu ni izeci Jisus Krast, banɛ na amɛ ubwa. Maa banɛ ga na amɛ ubwa gunu ata.

19Ama aka na ta shɛgwangwama shi yɛu ɛtɛ shɛ kwụbɛ maa ule na aa ga ya nu ugondu ata hwuwonowuŋ aŋ. Ibɛ po aa 'imɛ Poul na Sailas, ee mbeci aŋ no ofwo shɛgwuma shu udukwo ata. 20Aka na te e suji aŋ no ofwo atwa shihwolu, ɛɛ hiɛŋ, Eju ga a hashɛgana ụshɛpwụ ga tu duwa. 21A ananga masha mi iyi nɛ undwa tu leni shi, okwo maa ta untangana kwo kaa maa tu na nda atuba na tɛ shɛ Orom.

22Ama ufwugwo wa atwa ata ishijɛ aa sukakanɛ aŋ, atwa shihwolu dwetweji i'wɛŋnɛ nɛ go Poul keeni Sailas uregeni, ee peni atwa aba unu maa ge jibi aŋ no odugwu. 23Aka na te e jibi aŋ tebiye, nazhɛ ee suji aŋ aa 'wɛŋ nu umwono-tishi. Aa tɛtaganɛ bi'iywa bu umwono-tishi unu maa ga ngbaraka aŋ tebiye. 24Aka na ta bụtụ ata leni unu ata aa tɛtaganɛ bụ, ibɛ po bee zweni aŋ nu umwono-tishi na namɛ taa na amɛ, boo to ivwunɛ ya aba i'wɛ'wɛ dimi.

25Ama ti yee ci geri bụ ụjita tudwonu, go Poul na Sailas a nda adua, aa zungangana Agwatana azunga, ajama anya shɛlaganɛ aŋ. 26Eshigiri cɛnjɛ tu kwuni tizhingotu duwa duwa, ukoshilo umwono ata tishi kwuni bulama tɛnda, akpa kapashangwụ hwɛɛ, ashɛnjɛ na oo go to bụtụ bụtụ tufwurungwo. 27Aka na ta bi'iywa ata zhinjɛ malabụ, baa kwụbɛ ta akpa umwono ata tishi kapashangwụ, bee hwucice utokwobi ubwa maa mama kwụna. Iwɛnɛ ti bee heŋshi maa ajama benengeni oo hwulwo. 28Ama go Poul uganɛ duwa bɛɛ hiɛŋ bụ, Ta mama kwụna o, atuba na tu ta namɛ epe hwɛɛ tu.

29Ibɛ po bi'iywa ata lụpɛ ụsụtụla, bee teni nu umwono gburu, bee leyi ni ivwunɛ Poul keeni Sailas, inyɛsɛ shɛ bụ, baa zhɛgɛda. 30Aka na ti bɛɛ vwɛ oto Poul na Sailas no tupohondo, bɛɛ hiɛŋ aŋ, N-nyarɛ mi mi, imbe i shɛ tilɛɛ maa Ma nda maa Mo binoo?

31Oto Poul jishijɛ bụ, ɛɛ hiɛŋ, Tɛtana Agwangwama Jisus rishe nazhɛ ɛbi zhɛ bo bino, tu gabụ ta atwa ihwɛ bụ. 32Nazhɛ ee enengeni bu n-ndumwa ma Agwangwama keeni atwa elele na namɛ ni ihwɛ ibwɛ. 33Nazhɛ bee suji aŋ gunu ata nụ ụjita, bee zwegeni andala ata ee ge jibi aŋ no odugwu meni. Nazhɛ aa njɛ bụ ubaptizim, ta atwa ihwɛ ibwɛ gunu ata. 34Bee suji aŋ ni ihwɛ ibwɛ, ɛɛ bwɛjɛ aŋ iyimɛyɛ. Baa njɛ unyasa tebiye ta atwa ihwɛ ibwɛ hwɛɛ, iwɛnɛ tu baa tɛtanɛ Agwatana rishe.

35Ama aka na ti iyi heri, ibɛ atwa ata shihwolu tumwanɛ edegeri, ɛɛ hiɛŋ aŋ, 'Waŋ ma atwa ata maa e hwuri.

36Ta bi'iywa ata mbishi Poul iwɛ ɛtɛ, bɛɛ hiɛŋ bụ, Atwa shihwolu tumwanɛ maa ga a hiɛ 'wɛŋ maa hi hwuri. Asha banɛ ma hwuwayɛ go maa hi hwuri ya na amɛ-olom.

37Go Poul jishijɛ bụ, bɛɛ hiɛŋ, E ge ti jibi ne eshe atwa atuba na tɛ shɛ Orom uzawa n-ndumwa-tụwụma! Ee ti kepi nu umwono-tishi. Aa jala ya maa a tu 'wɛŋ hwuwayɛ go tusweci tuswecii! Awo, inɛ ɛtɛ zasa eshe o, ama ga a zhajɛ maa ɛ ti bwɛ ni ikɛnyi aba. 38Aka na te ehiu edegeri mbishi atwa ata shihwolu iwɛ ɛtɛ. Inyɛsɛ shɛ aŋ, iwɛnɛ ta a hwụjɛ maa Orom aa shɛ. 39Iwɛbɛ po aa zhajɛ, aa tabwa aŋ, aka na tɛ ɛ bwɛ aŋ nu umwono ata tishi, aa lụpɛ aŋ maa ge beni nụ ụshɛpwụ wa aba. 40Aka na tu go Poul na Sailas banɛ nu umwono ata tishi, ee zhe ee teni ni ihwɛ Lidia. Aka na ta a kwụbɛ atɛtanɛ-rishe apata, ee keeni aŋ ikɛnyi. Nazhɛ ee hwuri.

Currently Selected:

UGONDU WA ATUMWA 16: RBT

Highlight

Copy