UGONDU WA ATUMWA 15

Atumwa nu N-nyarɛ Ụlwatagwụ nu Jɛrusalɛm

1Atwa oko beni nu Judia ee zhe Antiok, ee mbisegeni atɛtanɛ-rishe ata, ɛɛ hiɛŋ, Yaa shɛ ehi jeji shi teleyi, asha hi eri shi hio bino.#Liv 12:3 2Aka na go Poul na Banabas njɛ ashamanjɛ keeni ushaura ụ'wụtụ na aba iwɛ n-ndumwa ma ata. Ibɛ po atɛtanɛ-rishe teri Poul na Banabas, keeni atɛtanɛ-rishe oko na ashashɛ aba, maa e zhe Jɛrusalɛm, e hweyigeni n-ndumwa ma ata no olugwo atumwa keeni n-nyarɛ. 3Ibɛ po tụ'ụlwa-tụ-ụhiɛŋshɛ-Agwangwama ti mbiyeni aŋ iwɛ tahaŋnụ ta aba. Ee duri Fonikia keeni Samaria, ee swegeni aŋ tɛjɛshɛrɛga tu na atwa na shɛ shɛ Eju jɛshɛrɛjɛ ee zhe pa Agwatana. Inɛ ɛtɛ peni atɛtanɛ-rishe ata unyasa duwa. 4Aka na te e ci Jɛrusalɛm, tụ'ụlwa-tụ-ụhiɛŋshɛ-Agwangwama, keeni atumwa keeni n-nyarɛ to aŋ amuraba, nazhɛ ee swegeni aŋ iyi elele nɛ Agwatana njɛ tedure na aba.

5Ama atɛtanɛ-rishe oko a na namɛ nụ ụzalụ wa Afarisi, ishijɛ, ee shikeni, ɛɛ hiɛŋ, I shɛ tilɛɛ maa e jeji aŋ teleyi, maa a tɛtaganɛ aŋ unu maa a untangana Undwa Moses.

6Ibɛ po atumwa nu n-nyarɛ ụlwatagwụ maa e heŋshi iwɛ n-ndumwa ma ata. 7Aka na ta a njɛ ashamanjɛ muba duwa, nazhɛ ga Pita ishijɛ, bɛɛ hiɛŋ aŋ, Ahiɛba miaụŋ-mo-bino mi na amɛ Krast, hi mepi maa Agwatana n teri cala na ashashɛ hŋ maa ma anangana atwa na shɛ shɛ Eju Anabarɛ Ebiye, maa a tɛtana-rishe.#Ugo 10:1-43 8Nazhɛ Agwatana na mepi amɛ butugwumwa le aŋ tiseyida tedure na Mpiala mi Tijilo mu na bee peni aŋ gana na ti bee ti peni la du.#Ugo 10:44; 2:4 9Bɛ tɛ njɛ shɛ swoswoswo na aba o, ama bɛ njɛ shɛmɛ sha aba shɛshɛshɛ tedure ne rishe-tɛtɛtana. 10Hwuwayɛ go, iwembe po ahia manga Agwatana, ahia jala maa hi peteni atɛtanɛ-rishe i'wɛŋnɛ nɛ eshi tu eri shi a 'waŋna hwɛɛ ta tuba ni ikɛnyi tuu? 11Ama ti tɛtanɛ-rishe maa e ti bicinji tedure no tulubo-ti-biye ta Agwangwama Jisus gana aba du.

12Nazhɛ ufwugwo wa atwa elele na namɛ na tu'ulwa ta ata namɛ shiru, aa shɛlaganɛ Banabas keeni Poul te e swegeni aŋ gana na ta Agwatana njɛ arụhwajɛ keeni iyi tudama na ashashɛ atwa na shɛ shɛ Eju tedure na aba. 13Aka na te e hwuwi n-ndumwa ma aba tụdụma hwɛɛ, nazhɛ ge Jemis jishijɛ aŋ, bɛɛ hiɛŋ, A-miaụŋ-mo-bino mi na amɛ Krast, shɛlaga ma n-ndumwa mi mi. 14Ge Simion#15:14 Ge Simion: Uhwaŋna unya aa 'nyata ta Saimon ta. Tɛjɛshɛrɛga tu ko du ti hiɛŋ, ga Saimon Pita. utu swogwonuo gana na Agwatana mbiseni atwa na shɛ shɛ Eju tulubo tu bwa ti biye hiiŋ, maa bwa atwa na ashashɛ aba maa a shɛ atwa ubwa. 15N-ndumwa me egesere mi leni ni iwɛ gɛ, gana na te e 'nyeci, ɛɛ hiɛŋ:

16Agwangwama jɛmɛ iwɛ gɛ, bɛɛ hiɛŋ,

Na aba inɛ gɛ, N zhɛ me gwure maa Ma ma sasana udulo Devid na hwuŋzwo la;

N zhɛ Ma ma sasana obukoto ata ubwa,

N zhɛ Mo shikicingo uŋ sasana, #Emos 9:11,12

17iwɛ maa atwa na vwanganɛ zhajɛ pi mi Gamba Agwangwama,

keeni atwa elele na shɛ shɛ Eju a na Ama suyana maa a zhajɛ pi mi.

18Gamba Agwangwama ma nda maa atwa mepi iwɛ gɛ te kwuni na aka cala cala.

19Iwɛ ecilo ata, iyi nɛ Ngaa kwụbɛ na, kede tu zuga ma ya atwa na shɛ shɛ Eju a na jishirijɛ zhe pa Agwatana o. 20Ama ti 'nyeteni aŋ ma maa, kede a na ya iyi elele nɛ oo to ụrụpɛ nu ntatanuwaŋ nɛ hashɛganụ o, keeni tuwɛle, keeni iyi nɛ aa kwụnɛ uzawa undala o,#15:20 uzawa undala o: Ibɛ shɛ iyi nɛ aa kwụnɛ uzawa igwuzhi tɛshɛla. Nekeshi a kwunɛ iŋ na tɛpɛpɛtangana kwo kaa iyi tụpa hwɛɛŋ, nazhɛ yee 'wi. Undwa Moses leneni shi Eju maa a yɛ iyi gɛnɛ ɛtɛ o. keeni mehieŋ o.#Ụban 34:15-17; Liv 18:6-23; 17:10-16 21Okwo te kwuni taa na aka cala cala, uuwa i ci aka ga, go Moses 'yajɛ atwa na a ananga iwɛ ubwa nụ ụshɛpwụ ụshɛpwụ, aa rɛta kaa atakada ubwa no shimwono shɛ Tụ'ụlwatagwụ nu Ụjita-ụhinjanụ we elele.

Utakada na Aa Tumwananɛ Atwa na Shɛ Shɛ Eju

22Nazhɛ yaa kwụlanɛ atumwa, nu n-nyarɛ keeni tụ'ụlwa-tụ-ụhiɛŋshɛ-Agwangwama hwɛɛ, maa e teri atwa oko na amɛ aba maa a tumwanɛ aŋ, maa a zhagaga no Poul keeni Banabas, maa e zhe Antiok. Ibɛ po ee teri Judas na ɛɛ hiɛŋ du ga Basabas, keeni Sailas, a na shɛ atwa a'wụtụ na ashashɛ atɛtanɛ-rishe ata. 23Utakada ata ee 'nyeteni aŋ, u hiɛŋ,

Utakada ga banɛ no olugwo atɛtanɛ-rishe, na atumwa keeni n-nyarɛ.

Maa u zhe no ofwo hiŋ ahiɛba atwa na shɛ shɛ Eju a na namɛ na Antiok, ni Siria, keeni Silikia.

Okwu ma yoo.

24Tụ hwụjɛ maa atwo oko banɛ na amɛ tu, aa zhajɛ aa ma hi zuga, oo zhingoto shihaŋsa shi hiŋ, shɛ atuba kaa ti peni aŋ unu maa a njɛ gana ata o.

25Aka na atu ulwa, otu momo lononu na ahaŋsa oko maa ta hi tumwananɛ atwa ga ee teri, maa a zhagajɛ na atwa tu tulubo, ga Banabas no Poul,

26Aba shɛ atwa na njereci araiŋ aba iwɛ izeci ya Agwangwama Jisus Krast.

27Ibɛ po atu tumwanɛ Judas keeni Sailas, aba ni ikɛnyi aba zhɛ mo hi mbiso du iwɛ gɛ ike ike nu unu wa aba.

28I kwụlanɛ Mpiala mi Tijilo ta atuba du hwɛɛ, maa kede ta hi kaana i'wɛŋnɛ inyɛ tupatana namɛ swooŋ ni inɛɛ nɛ i shɛ tilɛɛ o.

29Worungo ma iyi nɛ oo to ụrụpɛ nu ntatanuwaŋ tiya,

Keeni mehieŋ, keeni iyi nɛ aa kwụnɛ uzawa undala, keeni tuwɛle.

Yaa shɛ ohio worungo ijɛ, asha i zhɛ ma hiɛ zhɛmana.

Tugwo ma oo.

30Aka na te e genji atumwa ata, ee hwuri ee ci Antiok. Aka na to o sotulonu atɛtanɛ-rishe ata hwɛɛ, ee peni aŋ utakada ata. 31Aka na ta a rɛcɛ uŋ, aa njɛ unyasa iwɛnɛ tu waa ingatanjɛ aŋ. 32Gana na tu ga Judas keeni Sailas a shɛ egesere ni ikɛnyi aba du, ibɛ po ee keeni atɛtanɛ-rishe ata ikɛnyi, aa hiɛcɛnjɛ aŋ u'waba nu n-ndumwa mu ofwugwo. 33Gana na ta a jɛjɛ apata te ilegeji kwurɛ, nazhɛ atɛtanɛ-rishe ata genji aŋ maa e ji na amɛ-olom no ofwo atwa na ga tumwanɛ aŋ utumwa. 34[Ama i kwụlanɛ Sailas maa kaana tunama apata].#15:34 Ama i kwụlanɛ Sailas maa kaana tunama apata: N-ndumwa ma ata mu zasaba na Abayiburu ofwugwo.

35Ama go Poul na Banabas jɛjɛ na Antiok, medenji anya atwa ofwugwo du, oo mbisogono aŋ iyi, aa anangana aŋ du Anabarɛ Ebiye Agwangwama.

Ashamanjɛ Layanɛ Oto Poul na Banabas, Oo Bogwu

36Ti yaa namɛ aka fwalaa, go Poul hiɛŋ Banabas, Hwure ti hikekeni miaụŋ-mo-bino tu na amɛ Krast na ashɛpwụ elele na eti enenji la n-ndumwa ma Agwangwama. 37I kwụlanɛ kaa Banabas maa ge zeriji Jon na ɛɛ hiɛŋ du ga Mak maa zha na aba. 38Ama go Poul heŋshi shi maa i zhɛmɛ maa e shepi bu maa zha du na aba o, iwɛnɛ tu boo gongwo aŋ la nu Pamfilia bee te shi tuhwulo tu ugondu tɛnda na aba.#Ugo 13:13 39Ibɛ po yaa shanɛ aŋ ashamanjɛ a'wụtụ, oo bogwu. Ga Banabas shepi Mak, ee teni ụhaŋtụ ee zhe Saipros. 40Ama go Poul tuba teri Sailas. Nazhɛ miaụŋ-mo-bino ma ata na amɛ Krast mu suji aŋ ee utegeni tulubo-ti-biye ta Agwangwama, nazhɛ ee beni apata ee hwuri. 41Ee duri Siria keeni Silikia, ee keeni tụ'ụlwatagwụ-tụ-ụhiɛŋshɛ-Agwangwama ikɛnyi.

Currently Selected:

UGONDU WA ATUMWA 15: RBT

Highlight

Copy