UGONDU WA ATUMWA 17

Na Amɛ Tɛsɛlonika

1Aka na tu go Poul na Sailas keshici Amifipolis keeni Apolonia, aa zhajɛ Tɛsɛlonika, ofwo na umwono tu'ụlwatagwụ we Eju namɛ. 2Go Poul teni apata gana na tu baa shana ba nda, baa dumanjɛ n-ndumwa na aba, ni Ijitɛ-ụhinjanụ itɛtu,#17:2 ni Ijitɛ-ụhinjanụ itɛtu: Kwo kaa alade atatụ. iwɛ Utakada Iwɛ ya Agwatana. 3Bee mbiseni aŋ, bee eshicigeni aŋ, maa ga Krast hiokwo ụbaụta, nazhɛ baa hiwa no tu'wo. Go Poul hiɛŋ aŋ, Ge Jisus ata Ama hi anangana iwɛ ubwa, ubwa shɛ ga Krast. 4Shɛmɛ sha atwa oko na ashashɛ aba shi leni, ibɛ po oo togwu no Poul keeni Sailas. Egrik ofwugwo ụ'wụtụ a na a zhɛba Agwatana namɛ du na ashashɛ aba, keeni eyikwo oko na ashashɛ eyikwo na hwuri umbe na ashashɛ aba, a zasa cwɛŋ o.

5Ama isɛbwɛngwɛ shɛ Eju. Ee suji etwenyi oko tusashɛ, a na shɛ ogworozwo, aa suyanɛ ufwugwo wa atwa ata maa a ụlwatagwụ, aa njɛ maa go rundu ru nama nụ ụshɛpwụ ata. Ee zhe ni ihwɛ Jason, aa jala maa ɛ bwɛjɛ atwa ata#17:5 maa ɛ bwɛjɛ atwa ata: Kwo kaa maa ɛ bwɛjɛ unyama ata, kwo kaa urubwo wa atwa ata oto Poul. oto Poul. 6Ama aka na ta a kwụbɛ shɛ oto Poul, ee mbembiri Jason keeni atɛtanɛ-rishe oko ee zhe no ofwo ehiu ụshɛpwụ ata. Aa uganɛ, ɛɛ hiɛŋ, Atwa ga a na bitereji iyi geri elele, a zhajɛ epe du, 7ga Jason leshiji aŋ ni ihwɛ ibwɛ. Hwɛɛ aba a nda iyi nɛ namɛ swooŋ ni iyi nɛ ge Sisa iti tɛtaganɛ-unu ibɛ. Ɛɛ hiɛŋ maa agwuma anya oko namba na ɛɛ hiɛŋ, ge Jisus. 8Aka na tu ufwugwo wa atwa ata keeni ehiu aba hwụjɛ iwɛ ɛtɛ, yee herikeni aŋ shihwulu. 9Nazhɛ ee leshiji Jason keeni atwa vwɛ i'ɛlɛ, ee genji aŋ maa e hwuri.

Na Amɛ Bɛria

10Aka na tụ ụrụmɛ shɛ, gunu ata atɛtanɛ-rishe, tumwanɛ Poul keeni Sailas maa ge zhe Bɛria. Aka na te e ci apata, ee teni nu umwono tu'ụlwatagwụ we Eju. 11Atwa ata Bɛria 'yajɛ shihaŋsa shi biye, ee hwuri atwa Tɛsɛlonika. Iwɛnɛ po e leshiji iwɛ ɛtɛ na ahaŋsa oko, oo hikokono Utakada Iwɛ ya Agwatana iyi-heri iyi-heri maa a kwụbɛ ga okwo iwɛ ɛtɛ go Poul mbishi aŋ i shɛ ga iwɛ-tɛkana. 12Ibɛ po atwa ofwugwo na ashashɛ aba tɛtanɛ-rishe, eyikwo na 'yajɛ ụjɛrụma keeni etwenyi aba a na tɛtanɛ-rishe, a zasa cwɛŋ o.

13Ama aka na te Eju oko a na banɛ ni Tɛsɛlonika mepi maa go Poul ba ananga ba apata n-ndumwa ma Agwatana ni Bɛria du, aa zhajɛ apata du ee vwunji atwa ofwugwo shɛmɛ, ee herikeni aŋ shihwulu. 14Gunu ata miaụŋ-mo-bino ma ata na amɛ Krast mi hiɛŋ Poul ga zha tutu ụpalanụ itekwu. Ama ga Sailas no Timoti tuba ta jɛjɛ apata waa. 15Ama atwa na she Poul, shepi bu tutu Atɛns, nazhɛ go Poul tumwanɛ aŋ, maa ga ga Sailas no Timoti zhajɛ pu bwa kakayɛ, nazhɛ atwa ata hwuri ujiyo.

Na Amɛ Atɛns

16Aka na tu go Poul ba nda ashɛlatụ ata Sailas no Timoti na Atɛns, ibɛ amɛ ubwa hashɛganụ tebiye, iwɛnɛ tu baa kwụbɛ tụ ụshɛpwụ ata ụ shɛ ntatanuwaŋ mu baba. 17Ibɛ po baa dumanjɛ n-ndumwa ne Eju nu umwono tụ'ụlwatagwụ, keeni atwa na shɛ shɛ Eju a na a zhɛba Agwatana no ofwo udukwo, na atwa na a kashaka apata baa kwụba iyi-heri elele. 18Ama atwa oko na namɛ nu urubwo wa atwa oko a na ɛɛ hiɛŋ, Epikuria#17:18 Epikuria: Aba shɛ la atwa na 'wa imbisegeni bụtụ bu ko na ɛɛ hiɛŋ ge Epikurus, na mbisegeni atwa maa iyi nɛ i shɛ ucece uraiŋ tiya kpororo i shɛ unyasa ti'yaga. keeni atwa na ɛɛ hiɛŋ, Sitoik#17:18 Sitoik: Aba shɛ atwa na 'wa imbisegeni bụtụ bu ko na ɛɛ hiɛŋ, ge Zeno, na mbisegeni atwa maa go o no soso tumama ima, maa ge bimbisegeni-ba-shɛmɛ sha aba no mbisono aŋ uhwaŋna. a na o soso ti'inta, kwuni ashamanjɛ tɛnda no Poul.

Atwa oko hiɛŋ, Imbe kwuŋ bụtụ ga ba duma n-ndumwa mu tugbodu zhɛ bɛ hiɛɛŋ?

Anya atwa hiɛŋ, I shɛ maa iwɛ tuwa ta agaiŋ baa ananga. Ecilo no po aa duma iwɛ gɛ, i shɛ iwɛnɛ tu go Poul ba ananga Anabarɛ Ebiye iwɛ Jisus keeni iwɛ tihiɛ.#17:18 iwɛ tihiɛ: Yaa shɛ no ofwo Egrik, tihiɛ ti eri ta sha izeci tuwa ta aba to o.

19Ibɛ po ɛɛ bwɛ Poul, ee shepi bu no ofwo na Ajɛmɛ-ushaura ụshɛpwụ ata a ụlwatagwụ, a na ɛɛ hiɛŋ Ariopagos,#17:19 Ariopagos: Ariopagos ga i shɛ izeci ya ajɛmɛ-ushaura a na 'yajɛ urubwo wa aba gana umwono-ụshɛrɛya. Abayiburu oko hiɛŋ, ishɛmɛ mass. ɛɛ hiɛŋ bụ, Iti eshicigeni imbisegeni gɛ bu ifwo aba duma iwɛ ibɛ. 20Iyi nɛ aba duma i shɛ iyi ifwo na shɛcɛbɛ shi tu. Ibɛ po ata jala maa ta mapa ecilo ibɛ gom. 21Atwa elele na shɛ atwa Atɛns, ta agaiŋ na namɛ apata, okwo aka elele na te e beni ohwolu, a njɛ shɛ iyi elele o, semi n-ndumwa mi ijɛ ifwo oo mbiso atwa keeni tɛshɛlaga.

22Aka na tu go Poul ishijɛ bee shikeni na agba Ajɛmɛ-ushaura, bɛɛ hiɛŋ, Ahiɛba atwa Atɛns, N kwụbɛ maa hia ndana bụtụ na ahia zhɛba iyi tebiye. 23N kwụbɛ iyi nɛ ahia zhɛba ta Ama kashɛka, Ngaa kwụbɛ du ti'nyeci tu ko tu na ee 'nyeci nu utukwu-ụrụpɛ ata ɛɛ hiɛŋ, NO OFWO AGWATANA NA ETI MEPI SHI. Ijɛ ɛtɛ ehi mepi shi, ahia zhɛba kaa, ibɛ gɛnɛnɛ Ama hi anangana iwɛ ibɛ. 24Agwatana na njɛ unyizo, keeni iyi elele nɛ zweni nu bwa, ubwa shɛ Agwangwama azuba hwɛɛ tu unyizo. Bɛ jɛjɛ shɛ nu nsumo mu na oo mo ni i'ɛlɛ o.#1 Shɛgwu 8:27; Ayiz 42:5; Ugo 7:48 25Okwo ukekeshi wa nda bụ, i'ɛlɛ ya atwa ndanɛ shɛ bụ iyi o. Ubwa ni ikɛnyi ibwɛ ba pana atwa elele uraiŋ, ti ihwungwɛ keeni iyi elele kpaaŋ. 26Bee shepi bụtụ bu ko baa njɛ udenji we elele kpaaŋ, maa a nama nu unyizo hwɛɛ, gana na ti bee shiri aka na bee teri iwɛ aba, keeni ofwo na maa a nama. 27Agwatana njɛ inɛ ɛtɛ, iwɛ maa e jelekeci bu, nekeshi a ta bu ugbe, maa e timengeni bu, okwo tu baa dụlụmɛ shɛ na bụtụ be elele na ashashɛ tu. 28Iwɛnɛ po na amɛ ubwa ata ya uraiŋ, oto rungo, atu namɛ, gana na ta atwa oko na ashashɛ e'nyeci shɛzunga shi hiŋ hiɛŋ,

Atuba ni ikɛnyi tu tɛ shɛ ụlamụ ubwa.

29Iwɛ ecilo ata, gana na ta atɛ shɛ ụlamụ wa Agwatana, asha tɛ shɛ shɛ tu ma haŋsa maa Agwatana shɛ gana itɛtɛnuwɛŋ ya azhɛnarɛya, na azụrụfa kwo kaa inɛ utayɛ, inɛɛ nɛ bụtụ heŋshi baa njɛ ni i'ɛlɛ o. 30Iwɛbɛ po Agwatana peni shi ya abashɛ iwɛ iyi nɛ atwa nduwa la no tugbodu. Ama hwuwayɛ bi peni atwa elele unu no ofwo elele maa ga a jɛshɛrɛjɛ-shihaŋsa. 31Iwɛnɛ tu boo twolwo ụjita na bɛɛ zhɛ ba duma hwuŋ ụshɛrɛya unyizo kpaaŋ ne tishiriri. Boo twolwo kaa du bụtụ na zhɛ ba duma ụshɛrɛya ata. Iwɛ ecilo ata bee mbiseni atwa elele caakwụ na aka na ti bɛɛ hicinjɛ bụtụ ata no tu'wo.

32Ama aka na ta a hwụjɛ tu go Poul jɛmɛ iwɛ tihiɛ ta atwa na 'wi, nazhɛ atwa oko a nda bu asada, ama atwa oko hiɛŋ, Ti tɛ zhɛ ta hwuga iwɛ gɛ sasana no ofwo bu. 33Ibɛ po go Poul beni no olugwo ata Ajɛmɛ-ushaura. 34Ama atwa oko 'wa Poul, aa tɛtanɛ-rishe. Atwa na namɛ na ashashɛ aba na: ge Dionisios, na shɛ bụtụ bu ko na ashashɛ Ajɛmɛ-ushaura, namba na amɛ aba, keeni biyikwo na ɛɛ hiɛŋ, ga Damaris, keeni anya atwa ofwugwo.

Currently Selected:

UGONDU WA ATUMWA 17: RBT

Highlight

Copy