UGONDU WA ATUMWA 12

Gɛ Hɛrod ba Shɛka tụ'ụlwa-tụ-ụhiɛŋshɛ-Agwangwama

1I shɛ gana maa na aka ata ibɛ Agwuma gɛ Hɛrod#12:1 Agwuma gɛ Hɛrod: Gɛ Hɛrod ga, ubwa shɛ bijalụ Hɛrod ata ụ'wụtụ. kwuni tụ'ụlwa-tụ-ụhiɛŋshɛ-Agwangwama tɛshɛka, baa 'imɛ atwa oko na ashashɛ aba. 2Baa kwụnɛ Jemis yɛu-bino Jon nu utokwobi. 3Aka na tu baa kwụbɛ maa ijɛ ɛtɛ baa njɛ kwụlanɛ Eju, baa 'imɛ du Pita, na aka Isene Iyimɛyɛ uzawa Ifucingɛ. 4Aka na tu baa 'imɛ bụ, bee shiyeni bu nu umwono-tishi, bee utegeni bu udungbe wa asaza oko eneshi maa a na ngbaraka bụ. Ba jala maa bwɛjɛ bu atwa na zhɛ a duma ụshɛrɛya ubwa nu ukpogwu, na aba na ti Isene Tɛkashɛka hwuwowu.#Ụban 12:1-27

5Ibɛ po ee kepi Pita nu umwono ata tishi. Ama tụ'ụlwa-tụ-ụhiɛŋshɛ-Agwangwama tɛ njɛ adua u tugom pa Agwatana iwɛ ubwa.

Butumwa-ba-Azuba Kepishingeni Pita Odubo Umwono-tishi

6Aka na ti gɛ Hɛrod ba imanga maa bwɛ Pita, asaza eyebi to bu shigbo shi yebi. Oo to odubo ata umwono-tishi, asaza ata shikekeni aa ngbaraka odubo ata. 7Ama butumwa ba Agwangwama ba azuba zhajɛ bee shikeni apata, ibɛ po uhioko-uhwaŋna wa ta nu umwono ata. Nazhɛ butumwa ata po Pita iyi, bɛɛ zhingicinjɛ bụ, bɛɛ hiɛŋ bụ, Ishijɛ kakayɛ. Nazhɛ shigbo sha ata oo go to bu ni i'ɛlɛ shi bwacɛgwa ni i'ɛlɛ ibwɛ.

8Nazhɛ butumwa ata hiɛŋ bụ, Urugono tugwuno tụ bụ, hwuŋtono abida bụ. Ga Pita njɛ ga gana ata. Butumwa ata hiɛŋ bụ, Hwuŋtono utogwo bu, maa n 'wa. 9Ga Pita 'wa bụ ga, ee beni. Ama ga Pita te mepi shi maa iwɛ-tɛkana butumwa ata ba ndana bu o, ama bi heŋshi maa ozobu baa kwụba. 10Aka na te e keshici bi'iywa bi hiiŋ keeni bi'iywa bi yebi, ee zhe ee ci odubo ata 'yajɛ ukpa ụshɛmbɛrɛ, a na aa bana aa zha ya nu ukpogwu, ee meme kepishinji ni ikɛnyi aba bwaaŋ. Ee beni ee duri uhwaŋna uko, gunu ata butumwa ata genji ya Pita.

11Ama aka na ti ga Pita meme pushiteni no tupohondo, bɛɛ hiɛŋ, Hwuwayɛ go nazhɛ Ngee mepi ya maa Agwangwama tumwanɛ butumwa bwa ba azuba bee n leshiji ni i'ɛlɛ Hɛrod, Ngee benengeni iyi elele nɛ Eju ga ngbaracɛ uhwaŋna ibɛ maa i zhɛ mo n jitono.

12Aka na ti ga Pita heŋshi iwɛ ɛtɛ, bee zhe ni ihwɛ Meri bino Jon na ɛɛ hiɛŋ du ga Mak, apata atwa ofwugwo ụlwatagwụ aa nda adua. 13Tu ga Pita po ukpa iyi, ibɛ po yɛu-ugondu ike yo o nɛ ɛɛ hiɛŋ go Roda zhajɛ maa kapɛshɛnga odubo ata. 14Aka na tu baa hwụjɛ maa rụhwụŋ ru Pita nu, bi kepishinji shi ya odubo ata o, iwɛnɛ tu baa nda unyasa, bee gezhiji, bee teni na amɛ, bee mbishe atwa vwɛ maa, ga Pita nu shikeni ma no odubo.

15Ɛɛ hiɛŋ bụ, Ba sụma-ụmpɛ. Ama bụ uranjɛ maa, Iwɛ-tɛkana Ama duma. Ibɛ po ɛɛ hiɛŋ, Asha butumwa bwa nu#12:15 butumwa bwa nu: Tɛjɛshɛrɛga tu ko ti hiɛŋ, butumwa bwa ba azuba nu. caakwụ.

16Ama ga Pita uranjɛ ukpa iyi tụpa. Aka na te e kepishinji odubo, aa kwụbɛ bụ, yaa dama aŋ. 17Ama ga Pita njɛ aŋ u'ala kwupekwupe, maa a nama shiru. Nazhɛ bee swegeni aŋ gana na ta Agwangwama bwɛ bụ nu umwono ata tishi. Bɛɛ hiɛŋ, Mbiso ma Jemis#12:17 Mbiso ma Jemis: Ge Jemis ga, ubwa shɛ buhogwu ba Agwangwama Jisus. keeni miaụŋ-mo-bino na amɛ Krast iwɛ gɛ. Nazhɛ bee beni apata bee zhe nyapadụ.

18Gunu na ti iyi heri, rundu ru na rɛ shɛnjɛ na ashashɛ asaza ru zasa cwɛŋ o, iwɛ ofwo na ga Pita hwuri. 19Aka na ti gɛ Hɛrod peni-unu maa ge dwelekeci Pita, ama gana na te e te shi bu ugbe, nazhɛ baa jɛmɛ ụshɛrɛya wa a'iywa ata umwono-tishi, bee peni-unu maa ga kwụnɛ aŋ.

Nazhɛ gɛ Hɛrod beni nu Judia, bee zhe Sɛsɛria, baa namɛ tugwo apata aka fwalaa.

Tu'wo ti Hɛrod

20Gɛ Hɛrod ba nda isɛbwɛ duwa duwa na atwa Taya keeni atwa Saidụn. Ama a zhajɛ pa agwuma Hɛrod na ahaŋsa oko, aa 'imɛ Belastus na shɛ uhiu wa angbaracɛ umwono na agwuma o woto tiyejilo, maa mbiyono aŋ agwuma tutabwa maa amɛ-olom nama na ashashɛ aba, iwɛnɛ ti yaa shɛ na cɛnjɛ ta agwuma Hɛrod iyimɛyɛ ya aba ya banɛ.

21Gɛ Hɛrod mɛmɛ imɛ ni i'wɛŋnɛ tugwama, baa jɛjɛ ni idwɛtwɛ ibwɛ nụ ụjita na ee jwe, baa jɛmɛ n-ndumwa na atwa ata.

22Ibɛ po atwa ata uganɛ, ɛɛ hiɛŋ, Shɛ rụhwụŋ ra bụtụ na o, ama rụhwụŋ ra Agwatana!

23Ibɛ po butumwa-ba-azuba po Hɛrod iyi gunu ata, iwɛnɛ ti bee peni shi Agwatana ụjɛrụma. Ɛjɛhwɛ yɛ bụ, bee 'wi.

24Ama Iwɛ ya Agwangwama ya waŋna, yaa kaana ugombo.

25Aka na tu ga Banabas no Soul hwuwe iyi nɛ ee ge zhe tinjɛ nu Jɛrusalɛm, ee jiye ni ihwɛ ya aba,#12:25 tinjɛ nu Jɛrusalɛm, ee jiye ni ihwɛ ya aba: Tɛjɛshɛrɛga tu ko ti hiɛŋ, ee gwuri nu Jɛrusalɛm; mo tu ko ti hiɛŋ na Antiok. ee shepi Jon na ɛɛ hiɛŋ du ga Mak baa zhagajɛ na aba.

Currently Selected:

UGONDU WA ATUMWA 12: RBT

Highlight

Copy