UGONDU WA ATUMWA 11

Ga Pita bo Mbiso Tụ'ụlwa-tụ-ụhiɛŋshɛ-Agwangwama Ulapiya Tahaŋnụ tu Bwa

1Atumwa, na atɛtanɛ-rishe a na namɛ nu Judia hwɛɛ hwụjɛ maa atwa na shɛ shɛ Eju loshigwo du n-ndumwa ma Agwatana. 2Aka na tu ga Pita munji bee zhe Jɛrusalɛm, ibɛ atwa na shɛ Eju sukakanɛ bụ nu n-ndumwa. 3Ɛɛ hiɛŋ bụ, Gabụ bi teneni atwa na shɛ shɛ Eju a na jeji shi teleyi, abɛ yɛ iyimɛyɛ na aba.

4Ama ga Pita kwuni aŋ n-ndumwa ma ata tuswegeni shiriri, bɛɛ hiɛŋ, 5Tu Ngaa namɛ nu Jopa, Ama nda adua, ahaŋsa mi zhe taa dụlụ, Ngaa kwụbɛ iyi ike nɛ shɛ gana tugwuno ti ilinɛn tụ 'wụtụ no ozobu, tu taa banɛ na azuba te e zwe, aa untanganɛ akakalụ tuba eneshi, tee zwe uuwa te n ci. 6Tu Ngaa ngbarakacɛ iŋ, Ngee kwuni tuhaŋsa, nazhɛ Ngaa kwụbɛ iyimabiga ihwɛ ivwunɛ ineshi, ni isundɛ ehilo, ni iyi nɛ yo hombilo keeni shanụnụ shɛ na sha hila. 7Ngaa hwụjɛ ta rụhwụŋ ru ko ri n hiɛŋ, A-Pita, ishijɛ ụ kwụnɛ iŋ, maa yɛ.

8Ama N jishijɛ Ngɛɛ hiɛŋ, Agwangwama, shɛ gana ata kwukwuŋ. I ta zasa iyi elele nɛ udenji tu jirimi tiya kwo kaa iyi nɛ zasa shɛshɛshɛ i twonuo unu mu kwukwuŋ.

9Ama rụhwụŋ ra ata ru dumananɛ iwɛ na azuba na aka yebi, rɛɛ jishijɛ, rɛɛ hiɛŋ, Iyi elele nɛ Agwangwama nduwa shɛshɛshɛ, ta rɛta iŋ ya maa i ta shɛ iyi nɛ ebi jirimi o. 10Ama ijɛ ɛtɛ njɛ kpalụ tatụ, nazhɛ oo mbo iŋ ee gwuricinji na azuba.

11Gunu ata etwenyi oko atatụ a na aa tumwanɛ utumwa a na banɛ ni Sɛsɛria zhajɛ ee shikekeni no odubo umwono ata Ngaa namɛ.#11:11 Ngaa namɛ: Tɛjɛshɛrɛga tu ko ti hiɛŋ, Atu namɛ. 12Ibɛ po Mpiala mu m mbishi maa ga ma zhagaga na aba, kede ma nda oruwo. Miaụŋ-mo-bino na amɛ Krast mi cihiŋ mi beni du nu Jopa mee n she, eti teni ni ihwɛ bụtụ ata. 13Bee tu swegeni gana na tu baa kwụbɛ butumwa-ba-azuba nu umwono ubwa, ti bee shikeni, bɛɛ hiɛŋ bụ, Tumwana atwa maa e zhe Jopa, maa a suyanɛ Saimon ata ɛɛ hiɛŋ ga Pita. 14Ubwa zhɛ mo bu mbiso n-ndumwa mu na mi zhɛ mo bu bicingo, ta atwa ihwɛ bu hwɛɛ.

15Aka na ti Ngee kwuni n-ndumwa tụdụma, Mpiala mi Tijilo mu zwe no ofwo aba gana na ti bee zwe la no ofwo tu nu umozhigo. 16Ibɛ po Ngee teyinje n-ndumwa ma ata Agwangwama jɛmɛ la, bɛɛ hiɛŋ, Ga Jon njɛ atwa ubaptizim ne meni, ama ɛ zhɛ ma hi nda ubaptizim na Mpiala mi Tijilo.#Ugo 1:5 17Yaa shɛ Agwatana peni aŋ upwaŋ ata uko uko na bee ti peni la du na aka na atɛ tɛtanɛ Agwangwama Jisus Krast rishe, asha gaaba Ngaa shɛ maa ma kapana Agwatana uhwaŋnaa?

18Aka na ta a hwụjɛ iwɛ ɛtɛ, aa 'imɛ ilɛmɛ, nazhɛ ee peni Agwatana ụjɛrụma, ɛɛ hiɛŋ, Asha Agwatana peni du atwa na shɛ shɛ Eju ohwolu maa a jɛshɛrɛjɛ-shihaŋsa maa e teni nu uraiŋ.

Tụ'ụlwa-tụ-ụhiɛŋshɛ-Agwangwama ta Antiok

19Na aka ata ibɛ du atɛtanɛ-rishe a na garatagwụ na aka tɛshɛka ta ata tụ kwụnɛ la Stivin zhe tutu ee ci Fonikia, nu Saipros keeni Antiok, ama e mbishi shi bụtụ be elele iwɛ ɛtɛ o, semi Eju kiri oo mbiso.#Ugo 8:1-4 20Ama atwa oko namba na ashashɛ aba, a na shɛ etwenyi Sareni, aka na te e zhe Antiok, ee enengeni du Egrik#11:20 ee enengeni du Egrik: Tɛjɛshɛrɛga tu ko ti hiɛŋ, anya edenji. anya edenji ga, aba shɛ edenji elele na shɛ shɛ Eju. Anabarɛ Ebiye Agwangwama Jisus. 21Ukpahiŋ wa Agwangwama kaa namɛ na aba, atwa ofwugwo ụ'wụtụ tɛtanɛ-rishe, ee zhe no ofwo Agwangwama. 22Unabarɛ iwɛ aba teni tụ'ụlwa-tụ-ụhiɛŋshɛ-Agwangwama tu na tu namɛ nu Jɛrusalɛm na acɛbɛ. Ibɛ po aa tumwanɛ Banabas maa zha tutu Antiok.

23Aka na tu ga Banabas ci apata, baa kwụbɛ tulubo-ti-biye ta Agwatana. Baa njɛ unyasa, nazhɛ bee keeni aŋ ikɛnyi hwɛɛ aba maa ga a sụlụpanɛ iwɛ ya Agwangwama na shɛmɛ sha aba hwɛɛ. 24Ga Banabas shɛ bụtụ bi biye, Mpiala mi Tijilo mi shini na amɛ ubwa keeni rishe-tɛtɛtana. Nazhɛ atwa ofwugwo keeni tizha no ofwo Agwangwama.

25Nazhɛ ga Banabas zhe Tasus maa jalakacɛ Soul. 26Aka na ti bɛɛ cɛ bu ugbe, bɛɛ zɛrijɛ bu na Antiok. Aa namɛ apata uywa mudu, aa ụlwatagwụ na Tụ'ụlwa-tụ-ụhiɛŋshɛ-Agwangwama, ee mbisegeni atwa iyi. Na Antiok ata, oo po eseshi-iyi izeci maa, Atwa Krast hiiŋ.

27Na aka ata egesere oko banɛ nu Jɛrusalɛm ɛɛ zhɛ Antiok. 28Nazhɛ bụtụ bu ko na amɛ aba na ɛɛ hiɛŋ, ga Agabụs, bɛɛ ishijɛ bee shikeni, baa jɛmɛ tigesere tedure nu ukpahiŋ Mpiala, bɛɛ hiɛŋ, imunɛ-tiya i'wɛtwɛ zhɛ ya layɛ nu unyizo hwɛ hwɛɛ. (Iwɛ ɛtɛ ga njɛ na aka na tu ga Kilaudius shɛ uhiu cɛnjɛ ta ata).#Ugo 21:10 29Ibɛ po eseshi-iyi heŋshi maa bụtụ bụtụ ga nda gana na ti i'ɛlɛ ibwɛ ci iwɛ utakashɛ ata maa e mbiyeni miaụŋ-mo-bino na amɛ Krast mu na mu namɛ nu Judia. 30Aa njɛ iŋ ga, ee utegeni Banabas keeni Soul timbiyono ta ata, maa a 'waŋna tụ ee peni n-nyarɛ mụ Tụ'ụlwa-tụ-ụhiɛŋshɛ-AGWANGWAMA.

Currently Selected:

UGONDU WA ATUMWA 11: RBT

Highlight

Copy