UGONDU WA ATUMWA 10

Ga Pita no Konilius

1Bụtụ bu ko namba ni Sɛsɛria, ɛɛ hiɛŋ go Konilius, bɛ shɛ uhiu wa asaza dipi-yebi, na namɛ nu udungbe na ɛɛ hiɛŋ udungbe Italia. 2Bɛ shɛ bụtụ bɛ tɛcara, na ba sụma Agwatana inyɛsɛ, ta atwa ihwɛ ibwɛ hwɛɛ. Ba pana atwa apwaŋ tebiye, baa tabwa Agwatana ɛgbɛɛ. 3Jitoo ko baa kwụbɛ butumwa ba Agwatana ba azuba no ozobu na aka ogogo atatụ tu uwaŋna yinganɛ duwa,#10:3 na aka ogogo atatụ tu uwaŋna yinganɛ duwa: Nekeshi na aka ata baa nda adua, kwụba ti'eshicigono tu 3:1. tu baa zhajɛ pu bwa, bɛɛ hiɛŋ bụ, O-Konilius!

4Go Konilius ngbaracɛ bụ zenjizenji, inyɛsɛ kaa shɛ bụ, bɛɛ hiɛŋ, Agwangwama, Imbe nɛɛ?

Butumwa ata ba azuba jishijɛ bụ, bɛɛ hiɛŋ, Adua bu keeni apwaŋ bu a na aba pana okofwo munji no ofwo Agwatana, ibɛ po bee bi teyinje. 5Tumwana atwa oko hwuwayɛ go maa e zhe Jopa maa a suyanɛ Saimon ata ɛɛ hiɛŋ du ga Pita. 6Bɛ jɛjɛ ba ni ihwɛ Saimon bụsụkwụcɛ-bi-i'wɛbɛ, na ihwɛ ibwɛ namɛ nu ụpalanụ itekwu.

7Aka na ta butumwa ata ba azuba na dumanjɛ iwɛ nu bwa hwuri, go Konilius suyanɛ miaụŋ-mu-ugondu ubwa mi yebi keeni busaza bɛ tɛcara bu ko na ashashɛ atwa na a ndana bu iyi aka elele. 8Aka na ti bee swegeni aŋ iwɛ ɛtɛ hwɛɛ, baa tumwanɛ aŋ maa ge zhe Jopa.

9Aka na ti iyi heri tɛ ɛ zhɛ tahaŋnụ ta aba, oo gwumwonu nụ ụshɛpwụ ata. Ga Pita tuba ge munji nu ukogo#10:9 munji nu ukogo: Atwa cɛnjɛ ta ata a ta la okogo aba ndalụụ gana ikete kwo kaa ashɛkpa, nazhɛ a ndana uŋ ya shigenegbe no tupohondo maa o no mungo uŋ. uko na shɛ gana ikete, maa nda adua, gana tu uwaŋna tishikoko. 10Imunɛ kaa gwụmɛ bụ, baa jala maa ya iyimɛyɛ, o to bwo kaa tɛga na aka ata. Baa kwụbɛ iyi ike gana ozobu. 11Ee kepishinji azuba, ee zucinje iyi ike nɛ shɛ gana tugwuno ti ilinɛn na cɛnjɛ, aa untanganɛ akakalụ tuba eneshi. 12Isundɛ ehilo ye elele nɛ 'yajɛ ivwunɛ ineshi, keeni iyi nɛ yo hombilo keeni shanụnụ shi zweni na tuba hwɛɛ. 13Nazhɛ rụhwụŋ ru ko ri hiɛŋ bụ, A-Pita, ishijɛ ụ kwụnɛ iŋ maa yɛ.

14Ama ga Pita jishijɛ, bɛɛ hiɛŋ, Agwangwama, shɛ gana ata kwukwuŋ. N ta yɛ shɛ la kwukwuŋ iyi elele nɛ eti jirimi tiya,#10:14 eti jirimi tiya: Ga Pita ba duma epe iwɛ emeseyi isundɛ nɛ Undwa Moses leneni shi Eju tiya. kwo kaa iyi nɛ zasa shɛshɛshɛ o.

15Ama rụhwụŋ ra ata ri hiɛŋ bụ sasana na aka yebi, Iyi elele nɛ Agwatana nduwa shɛshɛshɛ, tɛ hiɛŋ ya maa i ta shɛ iyi nɛ zasa shɛshɛshɛ o. 16Ijɛ ɛtɛ njɛ kpalụ tatụ, nazhɛ ee gwuricinji iŋ na azuba.

17Gana na ti iwɛ ɛtɛ ya zuga Pita, baa haŋsa iwɛ ecilo ijɛ ɛtɛ baa kwụbɛ no ozobu, na aka ata ibɛ etwenyi ebe go Konilius tumwanɛ utumwa shikekeni no odubo, o hoŋtono iwɛ ihwɛ Saimon. 18Aa suyanɛ ụhiɛŋshɛ, ee heŋteni okwo ga Saimon ata ɛɛ hiɛŋ ga Pita namba epe.

19Aka na ti ga Pita ta haŋsa iwɛ ecilo ozobu ata baa kwụbɛ, nazhɛ Mpiala mi hiɛŋ bụ, Etwenyi oko eyebi#10:19 Etwenyi…eyebi: Tɛjɛshɛrɛga tu ko ti hiɛŋ, Etwenyi…atatụ. Mo tu ko kaa tɛ jɛmɛ shɛ ufwugwo wa atwa ata o. ye ma bu jalakaka. 20Ishijɛ maa zwi maa zhagaga na aba, ta nda ahaŋsa eyeyebi o, Gamba n tumwanɛ aŋ utumwa ata. 21Ga Pita zwe bee zhe no ofwo atwa ata, bɛɛ hiɛŋ aŋ, Gamba ga ahia jalakaka na. Imbe shɛ ecilo tahaŋnụ ti hiiŋ?

22Ɛɛ jishijɛ bụ, ɛɛ hiɛŋ, Go Konilius, ata shɛ uhiu wa asaza dipi-yebi, na shɛ bụtụ bi tiririri, na ba sụma Agwatana inyɛsɛ, ubwa na Eju elele a la tiseyida. Butumwa-ba-azuba bi tijilo eshicigeni bu maa ga a bu suyanɛ ni ihwɛ ibwɛ, maa u hwuga iwɛ nɛ ɛbi zhɛ ba duma.

23Ga Pita hiɛŋ aŋ ge teni ni ihwɛ ɛtɛ maa o woto nụ ụrụmɛ ata. Aka na ti iyi heri, bɛɛ ishijɛ baa zhagajɛ na aba. Miaụŋ-mo-bino na amɛ Krast mu ko mi beni du nu Jopa mee she bu. 24Aka na ti iyi heri sasana, ee teni Sɛsɛria, tobwolo go Konilius suywanua atwa ubwa keeni eyejilo ubwa tugom aa 'yakawa aŋ. 25Aka na ti ga Pita bo tono ihwɛ ɛtɛ, go Konilius teji bu uhwaŋna, bee leyi nɛ ɛvwɛvwɛjɛ ubwa bee kwuzeni bu. 26Ama ga Pita ishicinjɛ bụ, bɛɛ hiɛŋ bụ, Ishijɛ shikono, bụtụ kaa du Ngaa shɛɛ. 27Gana na tu ga Pita ta dumanga n-ndumwa nu bwa, ee teni ni ihwɛ ɛtɛ, ga Pita kwụbɛ ta atwa ofwugwo ụlwatagwụ. 28Ga Pita hiɛŋ aŋ, Hi mepi du ni ikɛnyi hiŋ, maa Undwa tu leni shi maa Biju togwu na atwa na shɛ shɛ Eju kwo kaa maa zha bu uhikwonuo. Ama Agwatana m mbiseni maa kede mɛ hiɛŋ bụtụ be elele maa bụtụ na hashɛganụ kwo kaa bụtụ na zasa shɛshɛshɛ o. 29Aka na abu tumwanɛ atwa maa ga a n suyanɛ, N zhajɛ, N njɛ shɛ ashamanjɛ o. Mo hi hoŋtono hwuwayɛ go maa, Imbe shɛ ecilo no po ahiɛ n suyanɛɛ?

30Go Konilius jishijɛ bụ, bɛɛ hiɛŋ, Jita neshi na hwayɛ, Ama nda adua#10:30 Ama nda adua: Tɛjɛshɛrɛga tu ko ti hiɛŋ, Ama nda ezumi keeni adua. nu umwono mu geri bo ogogo atatụ tu uwaŋna yinganɛ duwa. Ngaa kwụbɛ butubwenyi bu ko na urigeni i'wɛŋnɛ icɛnjɛ, ti bee shikeni nu umbe mu. 31Bɛɛ hiɛŋ, O-Konilius, Agwatana hwụjɛ adua bụ, bee teyinje kaa du apwaŋ na aba pana okofwo. 32Iwɛ ecilo ata tumwana atwa maa e zhe Jopa, maa a bu suyananɛ Saimon ata ɛɛ hiɛŋ, ga Pita. Bu namba ni ihwɛ Saimon bụsụkwụcɛ-bi-i'wɛbɛ, ata namɛ nụ ụpalanụ itekwu. 33Ibɛ po Ngaa tumwanɛ atumwa pụ bụ. Tizhajɛ tu ga abu zhajɛ tɛ zhɛmɛ. Hwuwayɛ go atuba na tu ulwa epe hwɛɛ tu na agba Agwatana, maa ta hwuga iyi elele nɛ Agwangwama ubu peni-unu ibɛ maa jɛmɛ.

N-ndumwa mu na ga Pita Jɛmɛ

34Ga Pita kwuni n-ndumwa mu bwa, bɛɛ hiɛŋ, Iwɛ-tɛkana ahaŋsa mi leni maa Agwatana zenji shi atwa o.#Undwa 10:17 35Ama bụtụ be elele na ba sụma Agwatana inyɛsɛ, na kaa ba nda iyi tiririri, okwo baa shɛ udenji we elele, ubwa Agwatana zhɛ a la. 36Utumwa ganana Agwatana tumwananɛ atwa Isrɛl, maa e enengeni aŋ Anabarɛ Ebiye amɛ-olom a na dure Jisus Krast, na shɛ Agwangwama iyi elele. 37Hi mepi n-ndumwa ma ata mu kwuni nu Galili, mi zhe tutu Judia kpaaŋ, na aba na tu ga Jon enenji iwɛ ubaptizim. 38Muba mɛ shɛ n-ndumwa mi Jisus bụtụ ata bu Nazarɛt, na Agwatana dudugeni Mpiala mi Tijilo keeni ukpahiŋ, bee rinji no ofwo elele, baa nɛnga kaa atwa elele na ukpahiŋ Ibiri wa pana ụbaụta, iwɛnɛ ta Agwatana namɛ nu bwa. 39Atuba kaa tɛ shɛ eseyida iyi elele nɛ baa njɛ na cɛnjɛ te Eju keeni Jɛrusalɛm. Ubwa gatata oo to la nu ubatanɛ, aa kwụnɛ. 40Ama Agwatana hicinjɛ bụ nụ ụjita ụtatụ, baa njɛ maa a kwụbɛ bụ caakwụ. 41Ama shɛ ne eshe atwa hwɛɛ o, semi ne eshe tu na Agwatana twolwo cebe. Atuba tɛ shɛ eseyida iwɛ ɛtɛ, atuba na tɛ yɛ la, tu swe du nu bwa na aba na ti bɛɛ hiɛ no tu'wo. 42Ubwa kaa iti peni-unu maa ta anangana atwa Anabarɛ Ebiye, maa ta la du tiseyida maa ubwa shɛ bụtụ ata Agwatana teri maa sha bɛjɛmɛ-bụ-ụshɛrɛya ba atwa na a hwungwa keeni atwa na 'wi. 43Ubwa egesere elele le tiseyida maa bụtụ be elele na tɛtanɛ izeci ibwɛ rishe, ɛ zhɛ a gangana bụ iwɛwɛ ibwɛ.

Atwa na shɛ shɛ Eju Leshiji Mpiala mi Tijilo

44Aka na tu ga Pita ta duma iwɛ ɛtɛ, Mpiala mi Tijilo mu zwe no ofwo bụtụ be elele na hwụjɛ iwɛ ɛtɛ. 45Ibɛ po yaa dama Eju na banɛ nu Jopa a na zhagajɛ na Pita, iwɛnɛ ta Agwatana dudugeni atwa na shɛ shɛ Eju upwaŋ Mpiala mi Tijilo du. 46Iwɛnɛ po a hwụjɛ ta a pana Agwatana ụjɛrụma duwa tedure na rɛjɛmɛ ri nya ru tuswoswoswo.#10:46 rɛjɛmɛ ri nya ru tuswoswoswo: Kwụba ti'eshicigono tu 2:4. Nazhɛ ga Pita hiɛŋ, 47I 'yajɛ suu bụtụ be elele na eri ba lakana atwa ga leshiji Mpiala mi Tijilo gana tu maa kede a njɛ aŋ ubaptizim ne meni? 48Ibɛ po ga Pita peni-unu maa ga njɛ aŋ ubaptizim ni izeci Jisus Krast. Nazhɛ aa lụpɛ Pita maa nama na aba i ci ijitɛ imbɛnɛ.

Currently Selected:

UGONDU WA ATUMWA 10: RBT

Highlight

Copy