UGONDU WA ATUMWA 9

Go Soul Jɛshɛrɛjɛ-ahaŋsa tu baa Kwụbɛ Agwangwama

(Ugo 22:6-16; 26:12-18)

1Ama go Soul uranjɛ eseshi-iyi Agwangwama tuholono keeni tɛshɛla, bee zhe no ofwo Bunongbo bụ 'wụtụ. 2Baa lụpɛ bụ maa e 'nyeteni atwa shimwono shɛ tụ'ụlwatagwụ nu Damaskos atakada, maa yaa shɛ baa kwụbɛ bụtụ be elele na shɛ bụtụ bu uhwaŋna Krast,#9:2 bụtụ bu uhwaŋna Krast: Tɛjɛshɛrɛga tu ufwugwo ti hiɛŋ, atwa uhwaŋna. Ecilo ibɛ i shɛ atwa elele a na leni maa a 'wa uhwaŋna Jisus Krast. te etwenyi te eyikwo, maa umpo aŋ, maa sugo aŋ nu Jɛrusalɛm.

3Tu go Soul zhɛ tahaŋnụ ta ata, bee zhe uuwa boo gwumwonu nu Damaskos, eshigiri uhioko-uhwaŋna banɛ na azuba, waa ta woo rungwutwon bu. 4Bee leyi na cɛnjɛ, baa hwụjɛ ta rụhwụŋ ru ko ri hiɛŋ bụ, O-Soul! O-Soul! Iwembe po abu ma n shɛkaa?

5Go Soul heŋteni iheŋtene, bɛɛ hiɛŋ, Agwangwama, gaaba nuu?

Rụhwụŋ ra ata ri jishijɛ bụ, rɛɛ hiɛŋ, Gamba ge Jisus ata aba shɛka.

I shɛ shɛ iyi ya amɛ-olom maa na twatwagwụ ivwunɛ bu ni iyi nɛ eri ma bu sapaga o. 6Ama ishijɛ maa teni nụ ụshɛpwụ ga, nazhɛ ɛɛ zhɛ mo bu mbiso iyi nɛ i shɛ tilɛɛ maa njɛ.

7Ama atwa na baa zhagajɛ na aba shikekeni, e eri shi a dumana iwɛ o, ta a hwụjɛ rụhwụŋ ra ata, aba kaa kwụbɛ shɛ bụtụ be elele o. 8Go Soul ishijɛ, aka na ti bee ushije eshe, bụ kwụbɛ shɛ iyi elele o. Aa untanganɛ bụ u'ala ee zeriji bu nu Damaskos. 9Baa namɛ apata ijitɛ itɛtu, bụ kwụbɛ shɛ uhwaŋna, bɛ yɛ shɛ iyimɛyɛ, bu swe shi meni o.

10Bụtụ Krast bu ko namba nu Damaskos ata, ɛɛ hiɛŋ ga Ananias. Ubwa Agwangwama mbishi no ozobu, bɛɛ hiɛŋ, Ananias.

Bɛɛ hiɛŋ bụ, Oo, Agwangwama Gamba na.

11Agwangwama hiɛŋ bụ, Ishijɛ zhe nu umwono ata Judas namɛ nu Uhwaŋna ata ɛɛ hiɛŋ, Tundarɛshɛngwa, iwɛ maa heŋteni iwɛ bụtụ ata bu Tasus, ɛɛ hiɛŋ go Soul. Bweye ba nda adua. 12Baa kwụbɛ bụtụ ata ɛɛ hiɛŋ ga Ananias no ozobu, ti bee teni bee peteni bu i'ɛlɛ maa kwụbanana uhwaŋna.

13Ama ga Ananias jishijɛ bụ, bɛɛ hiɛŋ, Agwangwama, N hwugwa iwɛ bụtụ ata nu unu wa atwa ofwugwo, iwɛ iyi iwɛ nɛ baa nda atwa bụ tijilo a na namɛ nu Jɛrusalɛm. 14Ubwa lɛshijɛ ụhwada ne ehiu onongbo, maa bu no umpo atwa elele na ma bụ zhɛba, tu Damaskos ga du.

15Ama Agwangwama jishijɛ bụ, bɛɛ hiɛŋ, Zhaga ya, iwɛnɛ po bụtụ ata ubwa shɛ iyi-uhwugwa nɛ Ngee teri maa 'waŋna izeci mi maa zha no ofwo atwa na shɛ shɛ Eju keeni shɛgwuma, ta miaụŋ mi Isrɛl hwɛɛ. 16Gamba ni ikɛnyi mi N zhɛ mo mbisono bu iyi ifwugwo nɛ i shɛ tilɛɛ maa hioko ụbaụta iwɛ izeci mi.

17Ga Ananias sanɛ ga, bee teni nu umwono ata, bee peteni bu i'ɛlɛ, bɛɛ hiɛŋ bụ, Ɛ-yɛu-bino mi, go Soul, Agwangwama Jisus na ubu bananɛ nu uhwaŋna, te bi ge ci, ubwa n tumwanɛ no ofwo bu, iwɛ maa hiekeneni uhwaŋna, maa Mpiala mi Tijilo du mi shini na amɛ bụ. 18Gunu ata iyi ike nɛ i shɛ gana ashasha banɛ ne eshe ubwa yaa layɛ, nazhɛ bee hiekeneni uhwaŋna. Bɛɛ ishijɛ, aa njɛ bụ ubaptizim. 19Nazhɛ baa yɛ ya iyimɛyɛ, baa 'yajɛ ya ikɛnyi.

Go Soul Enenji Anabarɛ Ebiye nu Damaskos

Go Soul jɛjɛ na atɛtanɛ-rishe a na namɛ nu Damaskos ijitɛ imbɛnɛ. 20Gunu ata bee zhe nu umwono tụ'ụlwatagwụ bee enenji maa ge Jisus ubwa shɛ Yɛu ya Agwatana.

21Ibɛ po yaa dama atwa elele na hwụjɛ iwɛ ubwa, ɛɛ hiɛŋ, Shɛ bụtụ ganana suu ba kwụna atwa na a zhɛba Jisus nu Jɛrusalɛm? Shɛ iwɛ ibɛ suu baa zhajɛ epe, iwɛ maa ima aŋ, maa umpo aŋ maa sugo aŋ no ofwo ehiu onongbo.

22Ama ukpahiŋ Soul wa kaana ugombo ni iwɛ Jisus, bee sukwuteji shihaŋsa she Eju a na namɛ nu Damaskos, iwɛnɛ ti bee mbishi aŋ caakwụ maa ge Jisus ubwa shɛ ga Krast.

23Aka na ti yee ilegeji fwalaa, Eju kwuni ushaura tɛnda gana na maa a kwụnɛ Soul.#2 Kor 11:32,33 24Ama go Soul mepi kaa iyi nɛ ɛɛ zhɛ a nda bụ. Iwɛnɛ aa 'yaka odubo ụshɛpwụ ata tụ ụjita tu uwaŋna, iwɛ maa a kwụnɛ bụ. 25Ama atwa na 'wa bụ shepi bu jitoo ko nụ ụjita, ee shiyeni bu ni igwumi, ee duricinji bu na agbahwụ ụdatụ ee zucinje bu na cɛnjɛ.

Go Soul nu Jɛrusalɛm

26Aka na tu go Soul ci Jɛrusalɛm, bee menji maa momo togwu ne eseshi-iyi, ama a njɛ inyɛsɛ ibwɛ hwɛɛ aba, iwɛnɛ ta a tɛtanɛ shɛ rishe maa bɛ shɛ biseshi-bi-iyi. 27Ama ga Banabas zeriji bu no ofwo atumwa, bee swegeni aŋ gana na tu go Soul kwụbɛ Agwangwama nu uhwaŋna, maa Agwangwama du kaa jɛmɛ n-ndumwa nu bwa, keeni gana na boo onongwo iwɛ ya Agwangwama ne eshe-hwoo nu Damaskos. 28Nazhɛ baa namɛ ya na aba nu Jɛrusalɛm, baa bana baa ananga iwɛ ya Agwangwama ne eshe-hwoo. 29Baa dumanjɛ n-ndumwa ne Eju a na a duma Rigrik, baa nda ashamanjɛ na aba, ama a jala tuba maa a kwụnɛ bụ. 30Aka na ta miaụŋ-mo-bino na amɛ Krast mu to iwɛ ɛtɛ ugbe, ee shepi bu ni Sɛsɛria, ee jicinji bu nu Tasus.

31Ibɛ po tụ'ụlwa-tụ-ụhiɛŋshɛ-Agwangwama tu Judia, nu Galili, keeni Samaria ti 'yajɛ amɛ-olom. To o momo monu, ta a sụma Agwangwama inyɛsɛ. Mpiala mi Tijilo ma ingatanga tụ, ibɛ po ufwugwo wa aba wa kaana ugombo.

Ga Pita Zhe Lida keeni Jopa

32Gana na tu ga Pita bo rungo no ofwo elele, bee zhe no ofwo atwa tijilo Agwatana a na namɛ ni Lida. 33Baa kwụbɛ bụtụ bu ko apata na ɛɛ hiɛŋ, ge Enias, na ba gwuma, bu weci na adugwa ubwa shiywa shɛ tụndatụ, iwɛnɛ ta tu'waba tu bwa tu 'wogeni. 34Ga Pita hiɛŋ bụ, Enias, ge Jisus Krast ma bu nɛnga. Ishijɛ maa kwungwuri adugwa bụ. Bɛɛ ishijɛ ga gunu ata. 35Aka na ta atwa elele na namɛ ni Lida keeni Sharon kwụbɛ bụ, aa jɛshɛrɛjɛ-shihaŋsa, aa tɛtanɛ Agwangwama rishe.

36Butɛtanɛ-be-rishe bu ko namɛ nu Jopa, ɛɛ hiɛŋ, ga Tabita,#9:36 Tabita: Ta Tabita na Ru'aramaik, no Dokas ne Rigrik, Egini ibɛ hwɛɛ i shɛ ugwɛɛgwɛ. Ugwɛɛgwɛ i shɛ usunda we ehilo na namɛ gana biywoywo, kwo kaa ushibwo. Bi 'yebi usumwa tugozhigo tebiye. (egini ibɛ shɛ Dokas. Ta Dokas kaa ne Rigrik i shɛ, ugwɛɛgwɛ). Biyikwo ata meme peni hwɛ hwɛɛ nu ugondu ubiye tɛnda, na apwaŋ tupananga atwa. 37Na aka ata bee leyi nụ ụngwụ, bee 'wi. Aka na ta a dụrɛ bụ meni mu tugwumashɛ, ee wecicinji bu nu umwono wa azuba. 38Gana na ti Lida gwumwongonu nu Jopa, aka na te eseshi-iyi hwụjɛ maa ga Pita namba apata, aa tumwanɛ etwenyi eyebi no ofwo ubwa, maa a lụpɛ bụ maa kede njɛ ti'insu ti bɛɛ zhɛ bo to ofwo aba o.

39Ga Pita ishijɛ ga baa zhagajɛ na aba. Aka na ti bee ci apata, ee zeriji bu nu umwono ata wa azuba. Olulo dongonu Pita aa twa-u'wo hwɛɛ aba, ee mbiseni Pita n-nduka keeni otogwo na ga Dokas ba shana baa nda na aka na tu baa ta namɛ na aba.

40Ama ga Pita bɛcinjɛ aŋ hwɛɛ aba no tupohondo, nazhɛ bee kwuzhi baa njɛ adua, nazhɛ baa mbiyanɛ ru'wo ra ata. Bɛɛ hiɛŋ bụ, A-Tabita, ishijɛ. Ga Tabita ushije eshe ubwa, baa kwụbɛ Pita, bɛɛ ishijɛ baa jɛjɛ. 41Ga Pita peni bu u'ala, bɛɛ ishicinjɛ bụ, nazhɛ baa suyanɛ atwa tijilo Agwatana keeni olulo, bee shepi bu bee peni aŋ, gana na ti bɛɛ hiɛ. 42Atwa elele na namɛ nu Jopa mepi iwɛ ɛtɛ, ibɛ po atwa ofwugwo tɛtanɛ Agwangwama rishe. 43Ama ga Pita jɛjɛ nu Jopa ijitɛ ifwugwo ni ihwɛ Saimon bụsụkwụcɛ-bi-i'wɛbɛ.

Currently Selected:

UGONDU WA ATUMWA 9: RBT

Highlight

Copy