UGONDU WA ATUMWA 13

Mpiala mi Tijilo mu Tumwanɛ Banabas no Soul Utumwa

1Egesere keeni embesegeni namba la na tụ'ụlwa-tụ-ụhiɛŋshɛ-Agwangwama ta Antiok, aba shɛ ga Banabas, ne Simion na ɛɛ hiɛŋ, ga Naijɛ, no Lukios na shɛ bụtụ bu Saireni, na Manen, na namɛ la ni ihwɛ ya Agwuma Hɛrod#13:1 Agwuma Hɛrod: Ubwa shɛ gɛ Hɛrod Antipas, ubwa du shɛ yɛu Hɛrod ata ụ'wụtụ, ubwa du kaa untanganɛ cɛnjɛ tu Galili. ata shɛ uhiu cɛnjɛ ta ata, keeni Soul. 2Aka na ta a zhɛba Agwangwama, aa nda ezumi,#13:2 aa nda ezumi: Ibɛ i shɛ iyi tɛnda na amɛ ohondo uzawa iyimɛyɛ tiya. Ezumi ga eri a sha Rugwenyi, unu tukapa i shɛ gana Rugara. Atwa Agwatana a nda iŋ kpalụ gembi ufwugwo maa e mbiseni gana na oo lubo Agwatana keeni gana na ti iyi nɛ aa nda na aka ata shanɛ aŋ iyi tandụ keeni aka na ta bụtụ 'weni atwa maa e mbiseni amɛ-tụhaŋtụ aba. maa bu no mbiyono aŋ ugondu. Mpiala mi Tijilo mi hiɛŋ, Shilo ma Banabas keeni Soul swooŋ iwɛ ugondu na Ngaa suyanɛ aŋ iwɛ ubwa.

3Aka na ta a njɛ ezumi, aa njɛ adua, ee petengeni aŋ i'ɛlɛ ya aba, ee genji aŋ maa e hwuri.

Na Cɛnjɛ tu Saipros

4Aka na tu Mpiala mi Tijilo mu tumwanɛ aŋ utumwa, ee zhe ee ci Sɛlusia, ee beni apata, ee teni ụhaŋtụ ee zhe Saipros. 5Aka na te e ci Salamis, ee enenji n-ndumwa ma Agwatana no shimwono shɛ tụ'ụlwatagwụ she Eju. Aa 'waŋnɛ Jon.#13:5 aa 'waŋnɛ Jon: Ga Jon ga ubwa du ɛɛ hiɛŋ ga Jon Mak. Kwụba 12:12,25.

6Aka na te e duri cɛnjɛ ta ata uuwa ee ci Pafos, aa kwụbɛ Biju bu ko na ba nda tishino, na shɛ bigesere bu tukata, ɛɛ hiɛŋ izeci ibwɛ, ga Ba-Jisus. 7Bu namɛ nu ugwomina ata ɛɛ hiɛŋ gɛ Sɛgius Polus, na be eshicigo iyi. Ugwomina ata ubwa suyanɛ Banabas no Soul maa hwuga Iwɛ ya Agwatana. 8Ama ge Elimas, bụtụ ata bi tishino, (egini izeci ɛtɛ i shɛ sukakana aŋ) baa jala maa sheyingo ahaŋsa ugwomina ata maa kede tɛtana-rishe o.

9Ama go Soul, na ɛɛ hiɛŋ du go Poul, gana na tu Mpiala mi Tijilo mi shini amɛ ubwa, baa ngbaracɛ bụ zenjizenji. 10Bɛɛ hiɛŋ bụ, Oo gabụ yɛu Ibiri, nɛ i'inswɛ keeni amiaụŋ kpaaŋ shini na amɛ bụ, gabụ busukakanɛ bi iyi tiririri ye elele, bi zha shɛ suu ba ganga ihwɛŋnɛ ya Agwangwama i tiririri tukapa! 11Hioko, Agwangwama zhɛ ma bu pa u'ala ubwa hwuwayɛ go, bi zhɛ bo lubono, bi zha shɛ ba kwụba uwaŋna uuwa i ci aka oko.

Gunu ata uzhikwozhikwo keeni ulubwo ubi bu, nazhɛ baa jala bụtụ na maa untangana bụ u'ala. 12Aka na tu ugwomina ata kwụbɛ iyi nɛ teni, baa tɛtanɛ-rishe, iwɛnɛ ti imbisegeni ya Agwangwama dama bụ.

Na Antiok

13Go Poul na atwa na namɛ nu bwa teni ụhaŋtụ nu Pafos, ee zhe Pɛga na namɛ na amɛ Pamfilia. Ama ga Jon genji aŋ bee gwuri nu Jɛrusalɛm. 14Ama te e beni nu Pɛga, ee duri Antiok na namɛ na amɛ Pisidia, ee teni nu umwono tụ'ụlwatagwụ nụ Ụjita-ụhinjanụ, aa jɛjɛ. 15Aka na te e hwuwi Utakada Undwa Moses keeni una we egesere#13:15 utakada Undwa Moses keeni una we egesere: Atakada Undwa Moses, aba shɛ atakada a ta a na Agwatana 'nyeteni la Moses Andwa ubwa maa pana atwa Isrɛl. A na egesere, aba shɛ atakada na egesere dumanjɛ n-ndumwa mu na Agwatana dumanjɛ n-ndumwa na atwa ubwa Isrɛl tedure ne egesere ubwa. Aba du shɛ Unu Ụngwụshɛ Tutwa. tɛrɛta hwɛɛ, nazhɛ ehiu umwono tụ'ụlwatagwụ tumwanɛ utumwa no ofwo aba, ɛɛ hiɛŋ, A-miaụŋ-mo-bino tu na amɛ Krast, yaa shɛ ahiɛ 'yajɛ n-ndumwa mu na mi zhɛ ma kaana atwa ga ikɛnyi, asha duma ma.

16Nazhɛ go Poul ishijɛ, baa njɛ aŋ u'ala kwupekwupe, bɛɛ hiɛŋ:

Ahiɛba atwa Isrɛl keeni atwa na shɛ shɛ Eju a na a zhɛba Agwatana, hwulaga ma. 17Agwatana atwa ga Isrɛl, teri ogwunukwoshi tu, bee gembicinji aŋ duwa na aka na ta a namɛ la na cɛnjɛ ti Ijipti, nazhɛ bɛɛ bɛcinjɛ aŋ na cɛnjɛ ta ata tedure nu ukpahiŋ ubwa ụ'wụtụ.#Ụban 1:7; 12:51 18Baa 'waŋnɛ aŋ#13:18 baa 'waŋnɛ aŋ: Tɛjɛshɛrɛga tu ko ti hiɛŋ, baa 'imɛ aŋ u'ala, kwo kaa baa namɛ na aba. nụ ụshɛka gana ta shiywa buhanda.#Tɛrɛ 14:34; Undwa 1:31 19Aka na ti bee iricinji edenji ecenje na cɛnjɛ ti Kenan, bee suji cɛnjɛ ta aba bee peni atwa ubwa maa a 'yaga.#Undwa 7:1; Josh 14:1 20Aa namɛ uuwa i ci shiywa akpakwụ-eyebi-nu-dupu (450).

Na aba inɛ ɛtɛ nazhɛ bee jelekeni aŋ ajɛmɛ-ụshɛrɛya, uuwa i ci aka Samuɛl na shɛ bigesere.#Ajɛmɛ 2:16; 1 Sam 3:20 21Nazhɛ aa lụpɛ Agwatana maa pana aŋ agwuma, bee peni aŋ Soul yɛu Kish, na shɛ ụlamụ Bɛnjamin, baa yɛ tugwama uuwa i ci shiywa buhanda.#1 Sam 8:5; 10:21 22Aka na ta Agwatana peshinji bu, nazhɛ bee peni Devid maa sha agwuma aba. Bee le bu tiseyida, bɛɛ hiɛŋ, N towo Devid yɛu Jɛsi na shɛ bụtụ na n kwụlanɛ, na kaa zhɛ ba nda ukwulana mu hwɛɛ ugbe.#1 Sam 13:14; 16:12; Shɛzu 89:20

23Nu umwamwa ata Devid, apata Agwatana bɛcinjɛ Bibicinji ata shɛ ge Jisus, bee peni atwa Isrɛl, gana na ti bee shiri la unu. 24Ga Jon onogwonuo la atwa Isrɛl hwɛɛ iwɛ ubaptizim wa ahaŋsa-tɛjɛshɛrɛga, nazhɛ ge Jisus zhajɛ.#Mak 1:4; Luk 3:3 25Aka na tu ga Jon ba kwunanga la ugondu ubwa, bɛɛ hiɛŋ, Gaaba ehi heŋshi maa N shɛɛ? Shɛ Gamba n shɛ bụtụ ata o. Ama hioko ma, bụtụ bu ko be ci ba ne ekwunyi mi, na Ngaa lanɛ shɛ maa mo tufwurungo okwo ihwehwe ya abida ubwa.#Mat 3:11; Mak 1:7; Luk 3:16; Jon 1:20,27

26A-miaụŋ-mo-bino mi, mu na mɛ shɛ ajalalo Abraham, keeni atwa na shɛ shɛ Eju a na a sụma Agwatana inyɛsɛ, atuba aa tumwananɛ ubino ga. 27Atwa Jɛrusalɛm, te ehiu aba, e mepi shi Jisus ata o, kwo kaa n-ndumwa me egesere ma ata aa rɛta nụ Ụjita-ụhinjanụ we elele o, ama a njɛ kaa maa gɛ iwɛ ɛtɛ aa rɛta i sɛ, na aka na te e peni bu n-ndumwa-tụwụma. 28Okwo ta a kwụbɛ shɛ ecilo na teni cɛŋ maa a kwụnɛ bụ, ama a lụpɛ waa Pɛilat maa ga kwụna bụ.#Mat 27:22,23; Mak 15:13,14; Luk 23:21-23; Jon 19:15 29Aka na ta a ụrɛcɛnjɛ iyi elele nɛ ee 'nyeci la iwɛ ubwa, nazhɛ ee kezhicinje bu nụ ụ'wụ'wụ ata ubatanɛ, ee ni bu nu u'uye.#Mat 27:57-61; Mak 15:42-47; Luk 23:50-56; Jon 19:38-42 30Ama Agwatana kaa hicinjɛ bụ no tu'wo. 31Ijitɛ ifwugwo baa bananɛ atwa na banɛ la nu Galili a na a zhagaga nu bwa a zha la Jɛrusalɛm.#Ugo 1:3

32Atuba ta hi anangana Anabarɛ Ebiye, unu na Agwatana shileni la ogwunukwoshi tu. 33Agwatana kaa utu ụrɛcɛnganɛ unu ata bee shiri la, atuba na tɛ shɛ ajalalo aba, aka na ti bɛɛ hicinjɛ Jisus. Gana na ti yee 'nyeci na Shɛzunga shi yebi shɛ na aa zunganganɛ Agwangwama, yɛɛ hiɛŋ,

Gabụ bɛ shɛ Yɛu mi, hwayɛ ga Ngee bi meci.#13:33 hwayɛ ga Ngee bi meci: Tɛjɛshɛrɛga tu ko ti hiɛŋ, hwayɛ ga Ngaa shɛ Bishi bu. #Shɛzu 2:7 34Iwɛnɛ ti bɛɛ hicinjɛ bụ no tu'wo, maa kede fwoso kwukwuŋ, ibɛ po baa jɛmɛ iwɛ gɛ, bɛɛ hiɛŋ,

N zhɛ ma hi pana uwebiye ɛtɛ Ngee shileni la Devid

unu tijilo keeni una tɛcara.#Ayiz 55:3

35Iwɛbɛ po yaa dumananɛ na Shɛzunga sha Agwangwama shi nya, yɛɛ hiɛŋ,

Bi zha shɛ bo lono maa bụtụ bụ bi tijilo

fwoshi kwukwuŋ.#Shɛzu 16:10

36Aka na ti ge Devid ndanɛ la ukwulana wa Agwatana iyi, bee leyi malabụ, ee ni bu no ofwo eshi ubwa, bee fwoshi. 37Ama bụtụ ata na Agwatana hicinjɛ fwoshi shi o. 38A-miaụŋ-mo-bino mi, mapa ma maa ni izeci bụtụ ata, ee hi gengeni iwɛwɛ hiŋ. 39Ni izeci bụtụ ata ibɛ n-ndumwa mi iyi elele mɛ zhɛmɛ atwa elele na tɛtanɛ bụ rishe, inɛɛ nɛ Undwa Moses ge eri shi wa pana aŋ la n-ndumwa-zhɛ. 40Ibɛ po na nda ma pece iwɛ maa kede iyi nɛ egesere jɛmɛ la kezhe no ohiuhiu hŋ o.#13:40 kezhe no ohiuhiu hŋ o: Tɛjɛshɛrɛga tu ko tu zasa no ohiuhiu hiŋ o, ama ti hiɛŋ, maa kede iyi nɛ egessere jɛmɛ zhajɛ o, kwo kaa i njɛ o.

41Hioko ma, ahiɛba atwa umama kwụba!

Ga ihi dama;

N zhɛ ma nda ugondu uko na aka hiŋ,

ugondu na ahi zha shɛ hia tɛtana-rishe,

okwo bụtụ ihi swegeni uŋ.#Haba 1:5

42Aka na ata Banabas no Poul beni apata, nazhɛ atwa umwono ata ụ Tụ'ụlwatagwụ keeni atwa vwɛ lụpɛ aŋ maa ge gwuleneni nụ Ụjita-ụhinjanụ ye we ci maa e mbiseneni aŋ iwɛ ɛtɛ. 43Aka na ta atwamwa beni nu umwono ata Tụ'ụlwatagwụ, ibɛ Eju keeni atwa na shɛ shɛ Eju tikpeke 'wa Poul na Banabas. Nazhɛ oto Poul jɛmɛ n-ndumwa na aba, ee keeni aŋ ikɛnyi maa ga untangana tulubo-ti-biye ta Agwatana dimi.

44Aka na tu Ụjita-ụhinjanụ na 'wa una ata ci, i vwɛ cwɛŋ maa i shɛ atwa ụshɛpwụ ata ụlwatagwụ hwɛɛ aba, maa a hwụjɛ n-ndumwa ma Agwatana. 45Aka na te Eju kwụbɛ ufwugwo wa atwa ata, ibɛ po isɛbwɛngwɛ shini shɛmɛ sha aba, aa njɛ ashamanjɛ ni iwɛ nɛ go Poul jɛmɛ, aa twagajɛ bụ.

46Nazhɛ go Poul na Banabas jɛmɛ iwɛ ne eshe-hwoo, ɛɛ hiɛŋ, I ga shɛ tilɛɛ maa ta hi anangana tugwo iwɛ gɛ hiiŋ. Ama gana na te ehi jeri shi iŋ, ahi mama dumwangwanua ụshɛrɛya maa hiɛ lanɛ shɛ maa hi 'yaga uraiŋ ata unyizo-nom o. Hwuwayɛ go, ti zhɛ to hwulo ya no ofwo atwa na shɛ shɛ Eju. 47Gana ata du Agwangwama iti peni-unu, bɛɛ hiɛŋ,

M bi shikicinji maa shɛ uhioko-uhwaŋna wa atwa na shɛ shɛ Eju,

iwɛ maa shepirigeni atwa unyizo ubino no ofwo elele na ee teje.#Ayiz 42:6; 49:6

48Ama aka na ta atwa na shɛ shɛ Eju hwụjɛ iwɛ ɛtɛ, aa njɛ unyasa, aa shɛtana n-ndumwa ma Agwangwama#13:48 n-ndumwa ma Agwangwama: Tɛjɛshɛrɛga tu ko ti hiɛŋ, n-ndumwa ma Agwatana. mu na ee enengeni aŋ, ibɛ po atwa na ee teri iwɛ uraiŋ ata unyizo-nom tɛtanɛ-rishe.

49Nazhɛ n-ndumwa ma Agwangwama mu mburusonu ya na cɛnjɛ ta ata hwɛɛ. 50Ama Eju vwunji shihaŋsa she eyikwo tɛcara a na 'yajɛ ụjɛrụma, keeni atwa a'wụtụ ụshɛpwụ ata, maa a shɛka oto Poul na Banabas, ee becinji oto Poul na Banabas na cɛnjɛ ta ata tutu tugwungwu tu tuba. 51Ama oto Poul bibizeni aŋ upwupwutu shivwɛvwɛjɛ sha aba,#13:51 bibizeni aŋ upwupwutu shivwɛvwɛjɛ sha aba: Inɛ gɛ i shɛ tu'wa tu unu na Agwangwama Jisus peni la atumwa ubwa. Yaa shaananɛ ka du useyida u tulaka tu na atwa ata lacɛ Anabarɛ Ebiye Jisus. nazhɛ ee hwuri Ikonium.#Mat 10:14; Mak 6:11; Luk 9:5; 10:11 52Unyasa keeni Mpiala mi Tijilo shini shɛmɛ she eseshi-iyi ata.

Currently Selected:

UGONDU WA ATUMWA 13: RBT

Highlight

Copy