Suro 12
12
To Sarani rapopeahi-ahi hulehe
1I tempo iti, Datu Herode Agripa mepongka mampopeahi-ahi bahangkia tauna au mepoinalai i Pue Yesu. 2Pandirina ia motudu tauna mopapate Yakobu wutuna Yohane hai piho. 3Apa au nababehi iti rapokana to Yahudi. Ido hai Herode motudumohe tauna mohaka Peturu. Iti mewali i alo mahilenda to Yahudi au rauli Posusa Roti Au Bara Raragii hai rauli wori Posusa Pasa. 4Mohaka mpuumohe Peturu, hai ratarunggu. Iba tobuna surodado rapohawaa mekampai, hantobu-hantobu ibahe. Tunggaiana Herode bona kara-karana Peturu rapohuda-hudaa i lindonda tauna bosa ane liumi Posusa Pasa. 5Tangana Peturu i lalu tarunggu, topepoinalai i Pue Yesu mampekakaea liliuhe Peturu.
Peturu rakabaha hangko i tarunggu
6I wengi hangko damani naanti Herode i lindona tauna bosa, Peturu maturu rapaitangai rodua surodado. Taiena rataka hai rante. Ara wori surodado ntanina au mokampai baba tarunggu. 7Unga pea tarunggu iti mabaa, lawi ara hadua malaekana Pue meangka i holanda. Malaeka iti morua Peturu, nauli, “Pearo holiga!” Liliu rante au rapopotaka taiena Peturu unga pea mabotu. 8Nauli mbuli malaeka iti i Peturu, “Boke pekomu, hai mekandupako!” Napeulai mpuumi Peturu hawana, hai roo indo, nauli mbuli malaeka, “Ala komomu hai meulako iriko.” 9Meula mpuumi Peturu i malaeka iti. Agaiana bara mani manoto i Peturu ba tou mpuu apa au mewali iti ba pangipina pea. 10Mewali, molumaomohe moliu surodado au mokampai baba au nguru-nguruna hai baba karombuana, pane hawemohe i babaka besi i rara lao i wanua. Babaka besi iti tebungkahi sadudua. Liliu mesuwumohe hangko i babaka iti moula rara au kokoi. Bara mahae unga pea malaeka iti matanta.
11Hangko indo, naisami Peturu kadanato mangipi, hai nauli, “Tou mpuu wei! Pue motudumi malaekaNa maina mokabaha hangko i kuasana Herode hai hangko i ope-ope au ratunggai to Yahudi iriko.” 12Roo indo, laomi Peturu i souna Maria, inana Yohane au rauli wori Markus. I sou iti, bosahe tauna teruhu mekakae. 13Natidongkomi Peturu babaka i sou iti. Laomi Rode, hadua towawine au mobago inditi, ina mobungkahia. 14Kamohadina wotuna Peturu, matanami. Anti kamatanana, barari mobungkahi babaka, agaiana melangkari mesua i lalu sou, hai nauli, “Peturu wei dolou i babaka!”
15Tauna iti rauliangaa, “Ba magilako pae!” Agaiana naperoho pea lolitana manguli kaPeturuna au ara i babaka. Ido hai raperoho wori rauliangaa, “Malaeka au mokampairi diti.”
16Mewali, tangana Rode lao i lalu sou, Peturu motidongko liliu babaka. Roo indo, rabungkahia mpuumi baba, hai moitamohe Peturu, mewali tingkara mpuuhe. 17Hangko inditi, Peturu moangka taiena mopakandiihe, hai natuntuamohe noumba kanapopesuwuna Pue hangko i lalu tarunggu. Napahopomi Peturu lolitana hai naperapi, nauli, “Apa au mewali iti, nipahawe wori i Yakobu hai i halalunta hampepepoinalai au ntanina.” Roo indo, meangkami Peturu lao i paidaa ntanina.
18Kahalona madondo, mewalimi hambua posisala i olonda surodado topekampai. Wulihe kana i apa au mewali i Peturu. 19Herode mohaoki Peturu, agaiana bara nalambi. Ido hai Herode motudu tauna bona surodadonahe au mokampai Peturu raparesa hai rapapatehe. Roo indo, Herode padu hangko i tampo Yudea lao maida i wanua Kaisarea.
Herode mate
20Hambela tempo rumpumi Herode i to Tirus hai to Sidon. Mogombomohe to Tirus hai i to Sidon iti, hai laohe hihimbela i Herode. Nguru-nguruna moore-orehe Blastus, topobago i souna Herode, bona ntanda irihira. Blastus mamporangaihe lao i datu Herode bona modamehe. Iti rababehi lawi to Tirus hai to Sidon molambihe paandenda hangko i tampo au naparenta Herode. 21Mewali, i alo au tepakanotomi, Herode mopake badu kadatuana hai mohuda i pohudaa kadatua, hai mololita i tauna bosa. 22Tauna au mohadi lolitana, monganga-ngangahe, rauli, “Anitu dolou mololita, barapi tauna.” 23Anti pampemahilena, Herode bara mobila hai bara mau motoia Pue Ala. Ido hai unga pea nahuku malaekana Pue pane kekaindoro alana mate.
24I tempo iti, tetambaimi tauna au mohadi Ngkorana Pue, hai tetambai worimi kabosanda au mepoinalai i Yesu.
25Roomi bagonda Baranaba hai Saulu i Yerusale, mesulemohe lao i Antiokia, hai Yohane au rauli wori Markus raanti hihimbela hai ihira.
Currently Selected:
Suro 12: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
