Suro 13

Baranaba hai Saulu rapilei mobambari Ngkora Marasa

1I olonda to Sarani i Antiokia, arahe bahangkia nabi hai guru mopahawe Ngkorana Pue, hanganda: Baranaba, Simeo au rakakio Tomaeta, Lukius hangko i Kirene, Menahem (au rapatuwo sambela hai Datu Herode Antipas i temponda mani kokoi), hai Saulu. 2Hambela tempo, tanganda menomba i Pue hai mopuasa, Inao Malelaha mouliangaahe, “Kupileihe Baranaba hai Saulu mewali topobagoNgku. Nipopeangka maroahe bona laohe mampopolumao bago au Kupahaleangiahe.” 3Mewali, karoonda mopuasa hai mekakae, raonami taienda i Baranaba hai Saulu. Roo indo, rapopelingkamohe lao mobambari Ngkora Marasa.

Baranaba hai Saulu i Siprus

4Anti peninina Inao Malelaha, Baranaba hai Saulu laomohe i wanua Seleukia i wiwi ntahi. Hangko inditi, mesawimohe i kapala tahi lao i lewuto Siprus. 5Kahawenda i boea Salamis, mopahawemohe Ngkorana Pue Ala i sou penombaanda to Yahudi. Yohane au rakakio wori Markus modureihe i lalu bagonda iti.

6-8Suro iti molumaohihe ope-ope boea i humalele lewuto iti duunda hawe i boea Pafos. Inditi mampohidupaahe hadua to Yahudi, hangana Baryesus. I lalu basa Yunani hangana Elimas. Elimas iti, hadua topobalimata au mouli kaiana nabina Pue Ala. Ia rangana Sergius Paulu, gubernur i lewuto iti. Gubernur iti hadua tauna au mapande ntepuu. Mewali, kahawenda Baranaba hai Saulu, liliu nakakiohe gubernur iti, lawi napeinao mohadi Ngkorana Pue Ala. Agaiana Elimas moewa Baranaba hai Saulu hai mosapuaka paturonda bona dati iti au napoinalai Gubernur. 9Agaiana Saulu au rahanga wori Paulu, nakuasai Inao Malelaha, pane mototoki topobalimata iti, 10hai nauliangaa, “Ee! Topodongko mpuuko. Oiomi iwalina ope-ope au manoto. Poantimu nodo Datu Tokadake! Moapari hai mobaliki liliuko paturona Pue Ala au manoto? 11Idomi hai ina nahukuko Pue! Mepongka ide-ide ina biloko, mewali barako ina peisa moita alo bahangkia kamahaena!”

Petotokina Elimas unga pea terero nodo ara rambu au maeta motabungi matana, alana morera-rera pearai mohaoki tauna au monini. 12Naitami Gubernur apa au mewali iti, tingkara mpuu, lawi tongawami kuasana paturona Pue Ala, hai ia mepoinalai i Pue Yesu.

Paulu hai Baranaba i Antiokia i tampo Pisidia

13Hangko i Pafos, Paulu hai rangana mesawimohe i kapala tahi lao i wanua Perga i Propinsi Pampilia. Inditimi, Yohane au rakakio wori Markus mopalehihe rangana hai mesule i Yerusale. 14Hangko i Perga, mopaliliuhe polumaonda hawe i wanua Antiokia i tampo Pisidia. I alo Penombaanda to Yahudi, laomohe mohuda i sou penombaa. 15To Yahudi au teruhu inditi mobasahe hangko i Sura Aturana Musa hai hangko i Suranda Nabi. Roo indo, tadulako sou penombaa motudu bahangkia tauna lao mekune i Baranaba hai Paulu, rauli, “Halalu, ane ara lolitami au nipeinao nipaturoangkai, peisatokau mololita.”

16Meangkami Paulu hai moangka taiena, mopakandiihe, nauli, “Halalungku to Yahudi, hai ikamu wori au barakau to Yahudi au menombakau i Pue Ala: nipehadingi lolitangku mopatuntu lolitakana toiorunta hangkoia. 17Pue Ala, au tapenombai, mopileimohe toiorunta hangkoia, hai Napopemulehe alanda bosa ntepuuhe i tampo Masiri. Hangko inditi, Napopaitaahe kuasaNa au mahile i kaNatadulakoinda mesuwu hangko i tampo Masiri. 18Roo indo, i lalu iba pulona parena kamahaena, Pue Ala sabara moita pesapuakanda i polumaonda i pada wungi. 19Pue Ala mogeromi pitu kadatua i tampo Kanaa, hai tamponda Nakira-kiraahe to Yahudi bona rapososora. 20Ope-ope iti mewali i lalu iba atuna lima pulona parena kamahaena.

Roo indo, Pue Ala moangka bahangkia topebotusi duuna hawe i nabi Semueli. 21I tempo iti, to Yahudi merapihe i Pue Ala bona Naweihe datu. Mewali, Nawei mpuuhe hadua datu, Saulu hangana, anana Kis pemuleana Benami. Saulu iti mewali datunda to Yahudi i lalu iba pulona parena kamahaena. 22Agaiana kahopoana, ia Napopendaulu Pue Ala hangko i pohudaa kadatuana, hai moangka Daudi mewali datunda to Yahudi. Idemi lolitana Pue Ala kana i Daudi: ‘Daudi anana Isai iami tauna au mopakatana laluNgku hai au mobabehi apa peundeaKu.’ 23Hangko i pemuleana Daudi, Pue Ala moangkaake hadua Datu nodo au Nadandi hangkoia. Datu iti iami Yesu, Datu Topehorema. 24Hangko damani Yesu mampepongka bagoNa, Yohane Toperiu mopahawe i ope-ope to Yahudi bona menosohe hangko i dosanda hai rariuhe. 25Ina hopomi bagona, Yohane mouliangaahe tauna bosa: ‘Moula pelambiami, iko hemana? Ide iko bara wongkoia Datu au nipepegia. Ane hopomi bagongku, ina hawemi hadua au mogalori mokakahi pekapu kandupaNa, barana hintoto.’ ”

26“Halalungku pemuleana Burahima, hai ikamu wori au barakau to Yahudi au menombakau i Pue Ala: irikita rapahawe bambari au mopakanoto rara bona peisake tekabaha hangko i huku dosanta. 27Lawi ampu wanua Yerusale hai tadulakonda, barahe moisa kahemana Yesu iti. Barahe moisa lempona lolitanda nabi-nabi au rabasa i alo-alo Penombaa. Ido hai mohuku matehe Yesu. Agaiana apa au rababehi iti mewali bona tepabukei apa au rauli nabi-nabi hangkoia. 28Nauri bara rahumba salaNa au hintoto rahukua mate, agaiana raperapi liliu i Pilatu bona rapapate. 29Karoona ope-ope au teuki hangkoia rababehi, rataurami wataNa hangko i kau popakuaNa hai ratawu. 30Agaiana Napatuwo hulemi Pue Ala. 31Roo indo, i lalu bahangkia alona, Yesu mopatongawa wataNa i tauna au meula Iria mepongka i Galilea hawe-hawe i Yerusale. Ihira itimi au mewali sabiNa i ope-ope to Yahudi hai au mopahawehe kaYesuna mpuu Datu Topehompo.”

32-33Napaliliu Paulu lolitana i to Yahudi i sou penombaa iti, nauliangaahe, “Mewali halalu, ikamimi au mopahaweakau Ngkora Marasa ide. Apa au Nadandi Pue Ala hangkoia i toiorunta, Napopewalimi irikita pemuleanda. Pue Ala mopatuwo hule Yesu hangko i kapate nodo au teuki i lalu Petoia au kadua:

‘Oiomi AnaNgku.

Alo ide KupoanamoKo.’#Pta. 2:7

34Yesu iti napatuwo hulemi Pue Ala, hai batena barapi mate ba mewali magoro i lalu talumba. Itimi lempona lolita au teuki i lalu Sura Malelaha:

‘Ope-ope dandi au malelaha

au Kudandi i Datu Daudi hangkoia,

batena Kupopewali irikamu.’#Yes. 55:3

35Ara wori lolitana Daudi kana i Yesu, au teuki node:

TaunaMu au malelaha

bara Nupogiangaa moita kapate.#Pta. 16:10

36I karoona Daudi mobabehi apa au Natudua Pue Ala, matemi Daudi, watana ratawu i hola talumbanda toiorunda hai magoromi. 37Agaiana Yesu au Napatuwo hulemi Pue Ala, bara mewali magoro i lalu talumba. 38Bona niisa halalu-halalu: anti kaYesunami, ido hai rapahaweakau bambari au manguli dosami peisa raampungi. 39Barake peisa tekabaha hangko i dosanta hai rapakanoto i peitana Pue Ala hangko i pampeulainta Aturana Musa. Agaiana ope-ope tauna au mepoinalai i Yesu, ina tekabahahe hangko i hinangka dosanda hai batena nadokohe Pue Ala, Naimba nodo tauna au manoto.

40Agaiana mainga-ingakau bona dati mewali irikamu nodo au rapahawe nabi-nabi hangkoia node:

41‘Ikamu au mengkora-ngkora, ina tingkarakau moita babehiaNgku,

agaiana kahopoana ina rahuku matekau.

Lawi mobagoNa i tempo ide mobabehi tanda au makuasa mpuu,

agaiana nauri ara au mopakanoto ope-ope iti,

bara mpuu nipoinalai!’ ”#Hbk. 1:5

42I temponda Paulu hai Baranaba ina padu, tauna au i sou penombaa merapimohe bona Paulu hai Baranaba mai mbulihe i alo Penomba au ina mai bona mopakanotoa hulehe paturonda iti. 43Roo indo, padumohe hangko i sou penombaa, hai bosa to Yahudi meula i Paulu hai Baranaba. Ara worihe au bara to Yahudi, agaiana au moagama Yahudihe, meulahe irihira. Paulu hai Baranaba mopaturohe bona maroho liliu pepoinalainda i Pue Ala au moweihe katuwo maroa hangko i kabulana laluNa.

44Mewali, haminggu hangko indo, i Alo Pengkarooangaa, ina opehe ampu boea teruhu, lawi rapeinao mampehadingi Ngkorana Pue Ala au rapahawe Paulu hai Baranaba. 45Roo indo, mahinamohe to Yahudi moita kabosana tauna au mampehadingi lolitana Paulu. Ido hai rapapakoi hai rasapuaka ope-ope lolitana. 46Agaiana Paulu hai Baranaba pebaihe mouliangaa to Yahudi iti, “Katouana, Ngkorana Pue Ala nguru-nguruna hangangaa rapahawe hampai irikamu to Yahudi, agaiana bara nidoko. Ikamu haduduami au mopakanoto kadami hintoto molambi katuwo maroa au bara mokahopoa. Ido hai ina kipalehimokau lao i tauna au barahe to Yahudi! 47Lawi nodemi hawana Pue Ala irikami:

‘Kupileimoko mewali pewangka

au mopamabaa lalunda tauna au barahe to Yahudi,

bona oio moanti katehorema

i tauna i humalele dunia.’ ”#Yes. 49:6; 42:6

48Karahadina tauna au barahe to Yahudi lolitana iti, matana mpuumohe hai motoiahe Ngkorana Pue. Hai hema pea au Napileimi Pue Ala molambi katuwo maroa au bara mokahopoa, hai mepoinalaimohe i Pue Yesu.

49Mewali, lolitana Pue tehawukami i humalele tampo iti. 50Agaiana to Yahudi mohuwekihe lalunda totosae au raadai i wanua iti hai towawine au pebuku i wanua iti au mepoinalaihe i Pue Ala, pane mampopeahi-ahihe Baranaba hai Paulu duuna rapopesuwu hangko i wanua Antiokia. 51Mewali, Paulu hai Baranaba motarontamohe awu au ara i bitinda, tanda kadanapi ihira au mohuru ane Pue Ala mohukuhe ampu boea iti. Hai roo indo, laomohe i wanua Ikonium. 52Topepoinalai i Pue Yesu i Antiokia, nakuasaimohe Inao Malelaha hai matana mpuu lalunda.

Currently Selected:

Suro 13: NPY

Highlight

Copy