Suro 11

Popahawena Peturu i jumaa i Yerusale

1Ope-ope surona Pue Yesu hai halalu hampepepoinalainda au ntanina au ara i Yudea mohadi kaaranda tauna au barahe to Yahudi au modoko worimohe Ngkorana Pue Ala. 2Ido hai i kalaona Peturu i Yerusale, ia rasalai bahangkia to Yahudi au mepoinalai i Yesu, 3rauli, “Moapari hai mesuako i souna tauna au kedai moula ada agamanta, hai maande woriko hihimbela hai ihira?”

4Ido hai natuntuahe Peturu ope-ope au mewali mepongka hangko i nguru-nguruna, nauli, 5“Tangangku mekakae i wanua Yope, unga peana moita hambua pampetudungia. I lalu pampetudungia iti, kuita ara au nodo bana mapeka, rabararangi iba hunona, hai bana iti raulu hangko i langi toa i lindoku. 6Kukamata ihina, kuita ngkaia pakana binata au mobiti iba, binata au maila, binata au mendele, hai ara wori tadasi. 7Bara mahae hangko indo, kuhadi hambua wotu au manguli: ‘Peturu, meangkamoko, nusambalemohe bona nuande.’ 8Kuhanai: ‘Bara Pue! Bara mani hambela kuande binata au rapalia ba au kedai moula ada agamangki.’ 9Kuhadi mbuli wotu iti mouliangaana: ‘Apa au nauli Pue Ala maroa, inee nuuli kedai.’ 10Iti mewali talu belana, pane teore hulemi ope-ope iti lao i langi. 11I tempo iti wori, arahe talu tobalilo au hawe i sou au kipaidai, agaiana barahe to Yahudi. Au talu iti, ratuduhe hangko i wanua Kaisarea lao i wanua Yope mohaokina. 12I tempo iti, Inao Malelaha mouliangaana: ‘Peturu, ineeko mampopontani tauna; peulamide irihira.’ Mewali, lao mpuumona hihimbela hai ihira. Hai ara wori sabingku inde, lawi halalunta hampepepoinalai au inihe ide mamporangaina lao i Kaisarea. Kahawengki i souna Kornelius, mesuamongkai i lalu. 13Kornelius mopahawe irikami apa au naita, iami hadua malaeka au hawe i souna au mouliangaa: ‘Nutudumohe bahangkia tauna lao i Yope mohaoki hai mokakio mai hadua tobalilo au rahanga Simo au rauli wori Peturu. 14Ia au ina mopahaweako bambari au moanti katuwo maroa irio hai i ope-ope tauna au ara i lalu soumu.’ ”

15Napaliliu Peturu lolitana, nauli, “Mewali, pepongkaku mopaturohe, mendaulumi Inao Malelaha mokuasaihe, nodo au mewali irikita to Yahudi nguru-nguruna i pendauluna Inao Malelaha. 16Roo indo, kukatuinaomi lolitana Pue au manguli: ‘Yohane meriu hai owai, agaiana ikamu ina rariukau hai Inao Malelaha.’ 17Mewali, halalu, nauri barahe to Yahudi, agaiana naweimohe Pue Ala Inao Malelaha, nodo au Naweike anti pepoinalainta i Pue Yesu Kerisitu. Ane nodo, hemana pae ide iko, pane peisana moewa tunggaiana Pue Ala?”

18Karahadina lolitana, barapohe mosalai Peturu. Hai motoiamohe Pue Ala, rauli, “Ide-ide tongawami irikami, Pue Ala modoko worihe tauna au barahe to Yahudi, hai Naweihe katepaka menoso hangko i dosanda duunda molambi katuwo maroa au bara mokahopoa.”

To Sarani i Antiokia

19Mewali, mepongka hangko i karapapatena Setepanu, topepoinalai i Yesu au ara i Yerusale rapopeahi-ahi liliuhe, hai bosahe au melangka lao i boea ntanina. Arahe au hawe i tampo Fenisia, ara worihe au hawe i lewuto Siprus hai i wanua Antiokia. I ope-ope boea au rapolumaongi, mopahawehe Ngkorana Pue Ala i hangka to Yahudinda pea. 20Ara wori hangko irihira au hangko i lewuto Siprus hai wanua Kirene laohe i wanua Antiokia mobambari Ngkora Marasa kana i Pue Yesu i tauna au barahe to Yahudi. 21Kuasana Pue ara hihimbela hai ihira, alana bosa to Antiokia mepoinalai hai meula i Pue Yesu.

22Apa au mewali i Antiokia rahadi wori topepoinalai i Yerusale. Ido hai motuduhe Baranaba lao i Antiokia. 23-24Baranaba iti, tauna au maroa laluna. Ia nakuasai Inao Malelaha hai maroho pepoinalaina. Kahawena Baranaba i Antiokia, matana mpuu laluna, lawi naita kamahilena pewatina Pue Ala irihira au mepoinalai i Yesu. Mewali, Baranaba mopakaroho lalunda, hai nauliangaahe bona mampeulai liliuhe Pue Yesu hangko i lalunda. Ido hai bosa wori to Antiokia mepoinalai i Pue Yesu.

25Roo indo, laomi Baranaba i wanua Tarsus mohaoki Saulu. 26Kanalambina, naporangami lao i Antiokia hai maidahe inditi hampare kamahaena. Teruhuhe inditi hihimbela hai tauna au mepoinalai i Yesu, hai mopaturohe tauna bosa. Inditimi nguru-nguruna, tauna au mepoinalai i Yesu rauli to Sarani.

27I tempo iti, ara worihe bahangkia nabi i Yerusale au lao i wanua Antiokia. 28Hadua hangko i olonda nabi iti rahanga Agabus. Anti kuasa au nahumba hangko i Inao Malelaha, meangkami Agabus mopahawe kaina arana rimi mahile i humalele Kadatua Roma. (Rimi iti tou-tou mpuu mewali i tempo poparentana Datu Mahile Klaudius i Roma.) 29Karahadina to Sarani i Antiokia bambari iti, hintuwumohe motulungi halalu hampepepoinalainda i tampo Yudea. Ido hai mokiramohe doinda moula pesauruanda hadua-hadua. 30Kateguluna doi iti, motudumohe Baranaba hai Saulu au rapoinalaia moanti doi iti lao i penatua i Yerusale.

Currently Selected:

Suro 11: NPY

Highlight

Copy