Lókasɛ 2
2
Gobébíene gá Yésusu
(Mot 1.18-25)
1Naá gɛcamɛna moánɛ gíiní, ufuŋe ogɔ́nɔ́ Sɛsáalɛ Ógusu go fáa bogaaga bá go bana batɔ biimée báaba naá cí. 2Ombanɔ yá busío yɔ́ɔyɔ yó mba báŋaáa gɛcamɛna gɛ́ɛgɛ Kilínusu a mbaá lɔmɔ́ ŋgɔ́mɔnɔ ba Silíi. 3Mɔtɔ uŋkimée a mba lɛ́ ɛ ɛ́da bábana onyɔ moánɛ naá tɛ́sɔnɔ yɛhɛ́ ya mbíényée. 4Yósɛbɛ tɔ́nɔ go fadɛgɛna naá tɛ́sɔnɔ ya Násalɛdɛ naá Gelilée, go go ɛ́da naá tɛ́sɔnɔ yá Bɛ́tɛlɛhɛ́mɛ naá Yudée, anáa ufuŋe Défidi a mbaá bébíéné, goakɛ́ a mba lɛ́ mɔ́ɔ moatɛ́ naá cume ya Défidi. 5A mbɛ ɛ́dá goŋaá bá mo bana hɔ́ɔ olɔŋɔ na Malɛ́a gɛɔŋɛnɔ gɛ́hɛ́; a mba lɛ́ na ibume.
6Gɛcamɛna gɛ́ɛgɛ bá mbaá lɔmɔ́ naá Bɛ́tɛlɛhɛ́mɛ, buisí bɛ́hɛ́ bá go bíene go háa. 7Gɛ́hɛ́ go bíene moɔnɔ́ onɔ́mɔtɔ́ bɛhɛ́ ba busío. A báá mo lɛŋáa na bigísi bá bɛla, go mo bídiginye naá gɛnyáányɛ́ná gá bidúgé, goakɛ́ undukí yó do mbáa lɛ hɔ́ɔ go busío bábɔ́ naá nnyaŋá ya biinyí.
Ɛ́ŋgɛlɛsɛ o ó oyáná bebeŋíbéŋí bidúgé gɛnɔ́gɔ́ gá cɔ́mɔ
8Naá hoóma hémmue eé hémmue, bebeŋíbéŋí bidúgé bá mba lɛ́ hɔ́ɔ, bá beŋebeŋe bidúgé bábɔ́ naá bodɛ́agadɛ́ na budúgú. 9Ɛ́ŋgɛlɛsɛ ummue ba Daadáa go bó basɛna, gise gá nigúmi gá Daadáa go ɛ́da go bó bonya. Gáábɔ́ go bɛa bofoá makɔ́nɔ́. 10Ɛ́ŋgɛlɛsɛ go bó oyana a amɔ́: «No do bɛáa bofoá, goakɛ́ ŋgaá nyó úléné na gɛnɔ́gɔ́ gá cɔ́mɔ gɛ́ɛgɛ gɛ́ gaá ná fáá boɛ́nɔ buimée gɛcɛcá gá bɛyaŋa. 11Na budúgú bá ínoni bɔ́ɔbɔ, naá tɛ́sɔnɔ ya Défidi, Usódí bɛnyɔ́ a báa bébíene, a lɔ́mɔ́ Mesíi, Daadáa. 12Gibélincígínyí gɛ́ɛgɛ no gaá ná mo lɛncá go gɛ́ gɛ́gɛ́ɛ: no gaá gídé moɔnɔ́ odɔmbɔ́ lɛŋálɛŋá, bídígínyéelú naá gɛnyáányɛ́ná gá bidúgé.» 13Hɔ́ɔ na hɔ́ɔ, gitúu gá bɛɛ́ŋgɛlɛsɛ bá mmoɛná go bénebiginye na ɛ́ŋgɛlɛsɛ mɔ́ɔnyɔ, gáábɔ́ go ɛ́da go búlugenye Asaŋa bá amɔ́:
14«Nigúmi nɛ́ bɛ́ɛmba na Asaŋa páábɔ́ naá mmoɛná,
naá cí buumbénú bó bɛ́ɛmba go batɔ báaba a maamanamɔ́#2.14 Gokikilidie naá ŋgɔ́ŋɛ́ síncodío sá cóá cóá gó lɔ́mɔ́ buumbénú naá cí, bogɔ́sɔ na batɔ..»
15Aŋa bɛɛ́ŋgɛlɛsɛ bá mbaá bó úlúkínyée go go gunde naá mmoɛná, bebeŋíbéŋí bidúgé go bágálɛdɛna bá amɔ́: «Ŋgáa dɛ no ɛ́da kanɛ́ naá Bɛ́tɛlɛhɛ́mɛ, dɛ ɛ́da go ɛ́na bɔ́ɔbɔ bó á ná bolá hɔ́ɔ, bɔ́ɔbɔ Daadáa a có linciemú.» 16Gáábɔ́ go dómba go bágáyɛga go go ɛ́da hɔ́ɔ, bá báá huenyée Malɛ́a na Yósɛbɛ, na moɔnɔ́ odɔmbɔ́ bídígínyéelú naá gɛnyáányɛ́ná gá bidúgé. 17Aŋa bá mbaá mo ɛ́ná, gáábɔ́ go ɛ́da go oya boóma bɔ́ɔbɔ ɛ́ŋgɛlɛsɛ a mbaá bó oyáná go busío bá moɔnɔ́ odɔmbɔ́ mɔ́ɔnyɔ. 18Biimée báaba bá mbaá lɔmɔ́ bá bódólonyo bebeŋíbéŋí bidúgé, bá mba lɛ́ bá békúke buimée bɔ́ɔbɔ bá mbaá lɔmɔ́ bá bó oyanɛna. 19Kanɛ́ Malɛ́a mɔ́ɔ a mba lɛ́ a bɛ́dɛgana buimée bɔ́ɔbɔ naá odɛ́má yɛ́hɛ́, a gunde a bógoodo. 20Gɔ́ɔ bebeŋíbéŋí bidúgé bá gundemú anáa bá mbɛɛ́ ɛ́dá go úle bɛ́ ɛ́da bá gúmenye Asaŋa, bá mo búlugenye go buimée bɔ́ɔbɔ bá mbɔɔ́ ɔ́bɔ́ bá báá gundé bá bɛ́ɛ́ ɛ́ná gɔgɔ́ aŋa ɛ́ŋgɛlɛsɛ a mbaá bó oyáná.
21Naá nnyimé ya medúgú mánnámanyɛ́, aŋa gɛcamɛna gá go anca moádɔmbɔ́ gɛ́ mbaá há, bá báa lɛ gó mo loga ufíno Yésusu, ufíno yɔ́ɔyɔ ɛ́ŋgɛlɛsɛ a mbaá dɔ́ŋɛ́nɔ́ otóotoɛ yá goŋaá nnyeedíi a súge ibume nɛ́hɛ́#2.21 Go ɛ́na tɔ́nɔ naa Léfi 12.3; Lók 1.31..
Bebíéní bá Yésusu bɛ́ ɛ́da mo loodio naá Daadáa
22Gɔ́ɔ gɛcamɛna gá go ŋa giséégé gá gɛsogona gɛ́ háamɔ́ gɔgɔ́ aŋa gicele gá Mɔ́sɛsɛ gɛ́ oyamɔ́#2.22 Léfi 12.3,6.. Bebíéní bá moádɔmbɔ́ go ɛ́da nɛhɛ́ naá tɛ́sɔnɔ ya Yolósalɛmɛ go go mo loodio naá Daadáa. 23Aŋa bó lɔ́mɔ́ ɔ́ŋɔ́ɔlú naá gicele gá Daadáa goŋaá, bá ŋga yáŋóná moɔnɔ́ onɔ́mɔtɔ́ uŋkimée ba busío#2.23 Gihúmie 13.2,12. go buelí bá Daadáa. 24Bá mba lɛ́ tɔ́nɔ ba go fáa gɛbáágá gá binúké bɛ́andɛ́ ɛ́na lí baaná bá mmɛŋá báandɛ́ aŋa gicele gímmue eé gímmue gɛ́ oyamɔ́#2.24 Léfi 12.8..
25Hɔ́ɔlɔ́ naá Yolósalɛmɛ, mɔtɔ ummue a mba lɛ́ hɔ́ɔ ufíno yɛ́hɛ́ Símiyono. Mɔtɔ moánɛ a mba lɛ́ gɛtɛ́nɛ́ɛ gá mɔtɔ, a hálamanana Asaŋa; a mba lɛ́ a gɛ́gana mɔ́ɔnyɔ a mbaá lɛ ba go sódio Ɛ́sɛlahɛ́ɛlɛ, Gimmúmpúu gá Giliíli a mba lɛ́ nɛhɛ́. 26Gimmúmpúu gá Giliíli moánɛ gɛ́ mba mo dóógínyóo goŋaá, a dɛ ná gúe kanɛ goŋaá ɛ ɛ́ ɛ́ná Kilítusu mɔ́ɔnyɔ Daadáa a dómamɔ́. 27Símiyono go ɛ́da naá Nnyaŋá ya Asaŋa aŋa Giliíli a mbaá lɔmɔ́ a mo indenye. Aŋa bebíéní bá moádɔmbɔ́ Yésusu bá mbuú úlé go go nco hóogio bɔ́ɔbɔ gicele gɛ́ mbaá lɔmɔ́ gɛ́ oya go busío bɛ́hɛ́, 28Símiyono go gɔ́lɔ moádɔmbɔ́, go ɛ́da go béhiigi Asaŋa a amɔ́:
29«Daadáa, godɔ́ɔdɔ, tánɔ yahɔ ya ɛ́ ɛ́nánɛ́náa,
o ná lɛ́ ba go dɛ́ɛna uyogóní bahɔ a gúe naá buumbénú,
30goakɛ́, ŋgaá bɛ́ɛ́nɛ́ná na yɔmɔ́ oŋgíso yá moatɛ́
Usódí ba go nco go úle naá maamɔ́ɔ,
31mɔ́ɔnyɔ o mbaá gedíe go busío bá mɛɛ́nɔ miimée.
32A lɛ́ gise gɛ́ɛgɛ gɛ́ ŋgaá go lincíe go bɛdɔŋɔ bá cí,
a ŋga bɛ́ɛ́mbá nigúmi ná Ɛ́sɛlahɛ́ɛlɛ boɛ́nɔ báhɔ#2.32 O bana, go eninye na Iseyíi 42.6; 49.6; 52.10..»
33Isée na nnyeedíi ba moádɔmbɔ́ bá mba lɛ́ bá békúke bɔ́ɔbɔ bá mbaá lɛ bá gálagala go busío bɛ́hɛ́. 34Símiyono go bó fona, go oyana Malɛ́a, nnyeedíi ba Yésusu a amɔ́: «Go busío bá moádɔmbɔ́ mɔ́ɔnyɔ, gɛca gá batɔ naá Ɛ́sɛlahɛ́ɛlɛ gɛ́ nó obana ɛ́na lí gɛ́ fadɛgana; a ná bɛ́ɛmba gieninye gá Asaŋa gɛ́ɛgɛ batɔ bá ŋgaá lɔbɔ́ bá dɛ húmé ukelú. 35Nɔ́ɔnɔ gɔ́ɔ a ŋgaá ágá naá gise mbééníŋínyí sá gɛca gá batɔ sɛ́ɛsɛ sɛ́ lɔ́mɔ́ ɔsɛ́gɔ́ɔlú naá ɛdɛ́má yabɔ́. Kanɛ́ naá báhɔ boayá, makánya má ŋga go poló odɛ́má aŋa kalafɔ.»
36Okɔ́dɔ ummue tɔ́nɔ a mba lɛ́ hɔ́ɔ, mbúsí ya Asaŋa, ufíno yɛ́hɛ́ Ána; ombóla ba Fánoɛlɛ, naá nigúli ná Asɛ́ɛlɛ. A mbaá ŋá a ná lɛ́ gilunú gá kɔɔkɛ. A mbɔ ɔyɔ́ɔ nnyómá ɛ́táanɔ na ɛ́handɛ́ na onɔ́mɛ mɔ́ɔnyɔ a mbaá giŋéné nɛhɛ́. 37Naá nnyimé hɔ́ɔlɔ́ gɛ́hɛ́ go síene gisí, a báá líhée nnyómá otíno énni na ínni#2.37 gɛ́hɛ́ go síene gisí… otíno énni na ínni : gokikilidie gúncoó gó lɔ́mɔ́a báá dúmbíe nnyómá otíno énni na ínni sá busío.. Gɛɔyɔ gɛ́hɛ́ giimée gɛ́ mbaá lɛ naá Nnyaŋá ya Asaŋa, a yɔgɔnɛnɔ Asaŋa aŋa siisíi aŋa budúgú: a bécelene manyáanya, a bósógolonyo. 38Gɛ́hɛ́ go bola naá gɛcamɛna gímmue eé gímmue, go ɛ́da go béhiigi Asaŋa. A gálagala go busío bá moádɔmbɔ́ go biimée báaba bá mbaá lɔmɔ́ bá gɛ́gana goŋaá Asaŋa a dúgune Yolósalɛmɛ.
39Aŋa bebíéní bá Yésusu bá mbaá hóógío buimée bɔ́ɔbɔ gicele gá Daadáa gɛ́ úhenemú, gáábɔ́ go gunde naá Gelilée, naá tɛ́sɔnɔ yabɔ́ ya Násalɛdɛ. 40Moádɔmbɔ́ a mba lɛ́ a goma, a bégíndenye. A mba lɛ́ na nciŋí dácɛ, Asaŋa tɔ́nɔ nnyimé yɛhɛ́.
Nɛgoma ná Yésusu
41Nnyómá iŋkimée, bebíéní bá Yésusu bá mba lɛ́ bɛ́ ɛ́dana naá Yolósalɛmɛ go gibíné gá Pásɛ́ka ya Beyúdene. 42Aŋa a mbaá hémé nnyómá sɛ́ɔ́dɔ́ na ɛ́handɛ́, bebíéní bá báa lɛ gó ɛ́da nɛhɛ́ naá Yolósalɛmɛ aŋa caŋa yabɔ́ ɛ mbaá lɔmɔ́#2.42 Gihúmie 12.1-27; Bicele 16.1-8.. 43Naá gibíné go mana, bɔ́ɔ bá báá gúlúgé, moádɔmbɔ́ Yésusu go síene naá Yolósalɛmɛ, bebíéní bɛ́hɛ́ bá dɛ íyímé. 44Bá mba lɛ́ bá béeniŋenye goŋaá a gaá bɛ́ɛ́mbá olɔŋɔ na bɔsɔ́gɔ́ɔ bábɔ́. Gáábɔ́ go ɛnda buisí buimée buimée, kanɛ́ gáábɔ́ go bayɛga go mo fúmbe naá batɔ bábɔ́ na naá miíyíméníné mábɔ́. 45Aŋa ba mbaá lɔ́mɔ́ bá dɛ mo ɛ́ná, gáábɔ́ go nco gunde naá Yolósalɛmɛ, bú úle bá mo fúmbe. 46Naá nnyimé ya medúgú mádadɔ́, kɔ́ɔ bá ncomɔ́ mo gíde naá Nnyaŋá ya Asaŋa, ndukíi naá kadɛ́gadɛ́ɛ ya muloodio mogɔ́nɔ́, a bó bódólonyo, a bó nɔɔnɔnɔ ŋgúhune. 47Biimée báaba bá mbaá lɛ bá mo bódólonyo bá mba lɛ́ bá békúke nciŋí ya kundíemú sɛ́hɛ́. 48Aŋa bebíéní bá mbaá mo ɛ́ná, giekéné ga gɛ́ go bó gɔ́lɔ; nnyeedíi go mo úhune a amɔ́: «Moɔnɔ́ bámɛ, ɛkádɛ gɛ́gɛ́ɛ go á ná có ŋaáa náana o? Ɛ́ná goŋaá namɛ na tɛ́ɔ dɛ go fúmbe na bofoá.» 49Gɛ́hɛ́ go bó gundie a amɔ́: «No púmbe goakɛ́ o? No do íyíménée goŋaá cɛmɛganana go yɔgɔnɔ masɔ́mɔ má Baaba#2.49 goŋaá cɛmɛganana go yɔgɔnɔ masɔ́mɔ má Baaba : gokikilidie gúncoó gó lɔ́mɔ́ goŋaá cɛmɛganana go bɛ́ɛmba naá nnyaŋá ya Baaba. o?» 50Kanɛ́ bá dɛ mbá bóso go ɔ́bɔ boóma bɔ́ɔbɔ a mbaá bó oyáná naá cí.#2.50 O bana, go eninye na 1 Sémuele 2.26; Ncaba 3.4. 51A báa lɛ gó gunde na bebíéní bɛ́hɛ́ naá Násalɛdɛ na ŋgɔ́bɛnɔ iŋkimée. Nnyeedíi a mba lɛ́ a bɛ́dɛgana moóma mɔ́ɔmɔ muimée naá mɔ́ odɛ́má. 52Yésusu a mba lɛ́ a goma naá nnyɔ́dɔ na naá nciŋí, Asaŋa nnyimé yɛhɛ́ na batɔ tɔ́nɔ.
Currently Selected:
Lókasɛ 2: YAS
Highlight
Share
Copy
Want to have your highlights saved across all your devices? Sign up or sign in
