Lókasɛ 3
3
Sáŋa Begiyuminye na bosɔ́mɔ bɛ́hɛ́ bá mbúsí ya Asaŋa
(Mot 3.1-6; Mél 1.1-6)
1Naá nnyómá ya buinyo ya bufuŋe bogɔ́nɔ́ bá Sɛsáalɛ Tɛbɛ́ɛlɛ#3.1 Sɛsáalɛ Tɛbɛ́ɛlɛ mɔ́ɔ a gɔ́lɔmɔ́ undukí yá bufuŋe bogɔ́nɔ́ bá Olóma, a báá núgíe Sɛsáalɛ Ógusu., Pɔ́nsɛ Pɛlátɛ mɔ́ɔ ŋgɔ́mɔnɔ ba Yudée, Elóode, ufuŋe yá Gelilée, ondimóní Fílibi, ufuŋe yá bigísi bá cí bɛ́ɛbɛ bɛ́ lɔ́mɔ́ Itulée na Telekoníte, Lɛsánɛasɛ, ufuŋe yá Ébilene, 2Háanɛ nɛhɛ́ na Káyɛfɛ, bagɔ́nɔ́ɔ bá bedúmbí bɛbáágá naá Asaŋa. Kɔ́ɔ Asaŋa a gálagalamɔ́ Sáŋa, ohaŋa ba Sakalɛ́a naá giolóo gá bodɛ́agadɛ́. 3Sáŋa go biene pɛ́, a báá bégéŋgélídíe gigísi gá cí giimée gá Yɔlɔdɛ́ŋɛ, o oyanɛna batɔ goŋaá bá núgie gɛɔyɔ gábɔ́, bá béyuminye, Asaŋa a héehinye bɛlɔgɔ bábɔ́. 4Aŋa bó lɔ́mɔ́ ɔ́ŋɔ́ɔlú naá kálata ya mbúsí ya Asaŋa Iseyíi goŋaá: «Ukelú yá mɔtɔ yó dónogogana naá giolóo gá bodɛ́agadɛ́ yó amɔ́: “Gedégédíe nɔnɔ pɛ́ ya Daadáa, bónónáa nɔnɔ ŋŋɛndɛ́ná sɛ́hɛ́”.»
5Gídée nɔnɔ dufendu duimée,
no sile ɛgɔndɔ iŋkimée na bɛɛnɛ biimée,
bónónáa nɔnɔ mbónóŋgolío iŋkimée sá bɛbala,
no yɛ́ya bɛgáda bá pɛ́;
6gɔ́ɔ mɔtɔ uŋkimée a ŋgɛɛ́ ɛ́ná aŋa Asaŋa a có sódonyomú.
Gɛlɔsɛnɔ go go núgie gɛɔyɔ
(Mot 3.7-10)
7Gitúu gá batɔ gɛ́ mba lɛ́ gɛ́ úlenine Sáŋa goŋaá a bó yuminye. Mɔ́ɔ a lɛ go ɛ́da go bo gálagala a amɔ́: «Bɛɛnyɔ́ɔ pɛ́nɛ sɛ́ɛsɛ, ánɛ́ɛ a ná nyó fáá nciŋí ya go pamba go mpímí ya Asaŋa yɛ́ɛyɛ yɛ úlenemú o? 8Dúfényée kanɛ́ nɔnɔ na meŋiigíe má bese, bó loodio goŋaá no á núgíe gɛɔyɔ gɛ́nyɔ́. Kanɛ́, no do ɛ́dá go bágálɛnagalɛna naá odɛ́má no amɔ́: “Ábalaháma a lɛ́ isée kɔ́nɔ́ɔ bɛcɔ́#3.8 O bana, go eninye na Sáŋa 8.33,37,39..” Ɛɛ́ɛŋ, ŋgaá nyó oyáná caá, Asaŋa a lɛ́ ba go gɔ́lɔ adánɛ́ yáaya, yá ɛ́ya baaná bá Ábalaháma. 9Moánɛ, iléŋú hɛ́ ná lɛ́ mekúígíi go go sómba ɛŋaŋá ya mɛɛ́tɛ; boɛ́tɛ buimée bɔ́ɔbɔ bó lɔ́mɔ́ bó do úmée bɛnɔ́gɔ́ bá bɛsamɔ́ bá bó sómba, bá bó nɔɔ naá íyuke.»
Meŋiigíe má go dúfie goŋaá mɔtɔ a á núgie gɛɔyɔ
10Kɔ́ɔ gitúu gɛ́ úhunemú Sáŋa gɛ́ amɔ́: «Dɛ háananamɔ́ go ŋa nɛ́ɛnɛ o?» 11Gɛ́hɛ́ go bó gundie a amɔ́: «Mɔ́ɔnyɔ a bɛananamɔ́ bɛla bɛ́andɛ́, ŋgáa a fáa mɔ́ɔnyɔ a lɔ́mɔ́ a dɛ bɛanánáa gímmue. Mɔ́ɔnyɔ a lɔ́mɔ́ na boóma bá go nyáa, a ŋa caŋa táŋɛ́ mmue nɔ́ɔ.» 12Bogólí tásɛ tɔ́nɔ bá búú úlíné Sáŋa goŋaá a bó yuminye, bá báá gó mo úhune bá amɔ́: «Iloodio, dɛ háananamɔ́ go ŋa nɛɛ́nɛ o?» 13A báá bó gundíe a amɔ́: «No do ɛ́dá go suugenye batɔ goŋaá bá soanana bó dómba bɔ́ɔbɔ gicele gɛ́ úhenemú.» 14Bisimbi bɛ́ báá mo úhúné tɔ́nɔ bɛ́ amɔ́: «Bɛɛcɔ́ɔ dɛ háananamɔ́ go ŋa nɛɛ́nɛ o?» A báá bó gundíe a amɔ́: «No do bɔgɔ́ boóma bá mɔtɔ, ɛ́na lí, no do gaŋɛ́náa mɔtɔ na gɛsɛnɛ gá kanɛ kɔ́ɔ. Ɔ́bɔ́nɔ́ɔ nɔnɔ kanɛ́ bese na bɛsoɛná bɛ́nyɔ́.»
Godóogio gá mɔ́ɔnyɔ u úlenemú
(Mot 3.11-12; Mél 1.7-8)
15Aŋa boɛ́nɔ bó mbaá lɛ naá gogɛ́gana gá muúle má Mesíi, batɔ biimée bá búúhene naá ɛdɛ́má yabɔ́ goŋaá ɛ́daga Sáŋa a gaá ná bɛ́ɛ́mbá Mesíi. 16Gɛ́hɛ́ go gɔ́lɔ dogálɔ go bó oyana a amɔ́: «Yɔmɔ́ɔ nnyó yumeninye na miimpo, kanɛ́ mɔtɔ mɔ́ɔnyɔ a lɔ́mɔ́ na bogaaga a tómbana u úlene, cɛ háánánáa naá odɛ́nɛ́ yá go fulune nuelí ná nnaadɛna sɛ́hɛ́. Mɔ́ɔ, a ná nyó yumeninyemú naá Gimmúmpúu gá Giliíli na íyuke. 17A lɛ́ na gifúne ŋkeŋé#3.17 gifúne ŋkeŋé : go ɛ́na naá Mot 3.12 na gibélincígínyé gɛ́ɛgɛ hɔ́ɔ. go ombɔ́gɔ go go úlenye bifúnú. A bɛ́dɛgana camɔ́ naá gɛɔ́lɔ gɛ́hɛ́, a lókononyo bifúnú naá íyuke há kanɛ go fúenene.» 18Náana gɔ́ɔ Sáŋa a mbaá lɛ a fáanana boɛ́nɔ gɛca gá ɛsɔ́mɔ gíncodío gɔnɔ́ go go bó dúmeninye Gɛnɔ́gɔ́ gá Cɔ́mɔ.
Gosúgudinye gá buelí bá Sáŋa Begiyuminye
(Mot 14.3-4; Mél 6.17-18)
19Kanɛ́ Sáŋa a mba goomɛ́ná ufuŋe Elóode, goakɛ́, a mba giŋé Ɛlɔdɛ́adɛ, ogánɛ́ ondimóní, gɔnɔ́ na moóma mobɛ́ muimée mɔ́ɔmɔ a mbaá ŋanánáa. 20Elóode go gɔnɔ ŋa gɛbɛ́ gá boóma gíncodío: a báá ágá Sáŋa naá ncíbo ya gɛaŋɔ́.
Giyuminye gá Yésusu
(Mot 3.13-17; Mél 1.9-11)
21Naá nnyimé ya boɛ́nɔ buimée go béyuminye, Yésusu tɔ́nɔ a báá béyumínyée. Naá gɛcamɛna gɛ́ɛgɛ a mbaá lɛ a bósógolonyo, mmoɛná go bébuune. 22Gimmúmpúu gá Giliíli go mo siisene, gɛ́ núunenine naá nnyɔ́dɔ aŋa yɛ́ɛyɛ ya mmɛŋá, ukelú go ɛ́da go úle naá mmoɛná yó amɔ́: «O lɛ́ Moɔnɔ́ bamɛ ba odɛ́má, bɛyaŋa bámɛ biimée bɛ́ lɔ́mɔ́ naá maamɔ́ɔ#3.22 Go eninye na Ɛsagɔ 2.7; Iseyíi 42.1..»
Ifíno ya batɔ bá ncíbo ya Yésusu
(Mot 1.1-16)
23Yésusu a mba lɛ́ a bɛanana boóma bá nnyómá nitíno na sɛ́ɔ́dɔ́ gɔ́ɔgɔ a mbaá bayɛga buelí bɛ́hɛ́. A mba lɛ́, go gobéeniŋenye gá batɔ, ohaŋa ba Yósɛbɛ,
ohaŋa bá Héli, 24ohaŋa ba Mátatɛ,
ohaŋa ba Léfi, ohaŋa ba Melekíi,
ohaŋa ba Yánayɛ, ohaŋa ba Yósɛbɛ,
25ohaŋa ba Matatɛ́asɛ, ohaŋa ba Ámoso,
ohaŋa ba Néhume, ohaŋa ba Heselíi,
ohaŋa ba Nágayɛ, 26ohaŋa ba Maatɛ,
ohaŋa ba Matatɛ́asɛ, ohaŋa ba Sɛ́mɛnɛ,
ohaŋa ba Yósɛkɛ, ohaŋa ba Yóda,
27ohaŋa ba Yoánana, ohaŋa ba Olɛ́sa,
ohaŋa ba Solababɛ́ɛlɛ, ohaŋa ba Selétiele,
ohaŋa ba Nelíi, 28ohaŋa ba Melekíi,
ohaŋa Edíi, ohaŋa ba Kósama,
ohaŋa ba Ɛlɛmadáma, ohaŋa Ɛ́lɛ,
29ohaŋa ba Yésusu, ohaŋa ba Elieséele,
ohaŋa ba Yólime, ohaŋa ba Mátatɛ,
ohaŋa ba Léfi, 30ohaŋa ba Símiyono,
ohaŋa ba Yóda, ohaŋa ba Yósɛbɛ,
ohaŋa ba Yónama, ohaŋa ba Elíekime,
31ohaŋa ba Mɛlɛ́a, ohaŋa ba Mɛna,
ohaŋa ba Mátata, ohaŋa ba Natáma,
ohaŋa ba Défidi, 32ohaŋa ba Yesée,
ohaŋa ba Yóbɛdɛ, ohaŋa ba Búuse,
ohaŋa ba Sáála, ohaŋa ba Nasɔ́ɔnɛ,
33ohaŋa ba Amɛnadába, ohaŋa ba Adɛmɛ́ɛnɛ,
ohaŋa ba Eléni, ohaŋa ba Ɛ́sɛlɔmɔ,
ohaŋa ba Fálɛsɛ, ohaŋa ba Yóda,
34ohaŋa ba Yɔ́kɔbɔ, ohaŋa ba Ɛ́saga,
ohaŋa ba Ábalaháma, ohaŋa ba Tála,
ohaŋa ba Nákɔlɔ, 35ohaŋa ba Séluku,
ohaŋa ba Olagóo, ohaŋa ba Fálɛkɛ,
ohaŋa ba Ɛbɛ́ɛlɛ, ohaŋa ba Sala,
36ohaŋa ba Kayɛnáma, ohaŋa ba Alafásadɛ,
ohaŋa ba Seme, ohaŋa ba Nóe,
ohaŋa ba Lamɛ́kɛ, 37ohaŋa ba Matósala,
ohaŋa ba Ɛ́nɔgɔ, ohaŋa ba Yálɛtɛ,
ohaŋa ba Malɛ́lɛ́ɛlɛ, ohaŋa ba Kayɛnáma,
38ohaŋa ba Enóse, ohaŋa ba Sɛ́tɛ,
ohaŋa ba Ádama, ohaŋa ba Asaŋa.
Currently Selected:
Lókasɛ 3: YAS
Highlight
Share
Copy
Want to have your highlights saved across all your devices? Sign up or sign in
