Meŋiigíe 7
7
Dogálɔ dá Ítiene go go bɔ́bɔgɔbɔgɔ
1Gɔ́ɔ ogɔ́nɔ́ɔ ba bedúmbí bɛbáágá naá Asaŋa u úhunemú Ítiene a amɔ́: «Bɔ́ɔbɔ bó oyamɔ́ go busío báhɔ bó lɛ́ mammana o?» 2Ítiene go gundie a amɔ́: «Bolimóní na biisée bámɛ, mbódólígínyóomú nɔnɔ. Asaŋa ba nigúmi a mba lɛ́ ɛ́nɛ́gɛ́náalú isée kɔ́nɔ́ bɛcɔ́ Ábalaháma hɔ́ɔlɔ́ a gá lɛ́ naá Mɛsɔpɔtamɛ́ɛ, a gá lɛ́ a dɛ ɛ́dá lukumene naá Hálaŋa, 3a báá mo oyáná a amɔ́: “Úlúkíe naá gɛdɔŋɔ gáhɔ na naá ncíbo yahɔ ya batɔ, go ɛ́da naá gɛdɔŋɔ gɛ́ɛgɛ nná go dúfiemú.” 4Kɔ́ɔ Ábalaháma u úlukiemú naá gɛdɔŋɔ gá Keledée, go ɛ́da lukumene naá Hálaŋa. Kanɛ́ naá nnyimé ya isée go gúe, Asaŋa go mo úlie naá gɛdɔŋɔ gá Hálaŋa, go úle nɛhɛ́ naá gɛdɔŋɔ gɛ́ɛgɛ no lɔ́mɔ́ kɔ́ɔ godɔ́ɔdɔ. 5Asaŋa a dɛ mbáa lɛ mo fáalú akɛ́ hoóma há hémmue há go ɔ́bɛnɔnɔ nɛhɛ́ naá gɛdɔŋɔ gɛ́ɛgɛ, akɛ́ ipuúpumbú há cí. Kanɛ́ Asaŋa a mba mo dánɛ́ná gɛdɔŋɔ, ɛnana yɛhɛ́ ɛ ŋgɔɔ́ ɔ́bɛ́nɔ́nɔ́ɔ tɔ́nɔ na gɛ́ naá nnyimé yɛhɛ́ ya nigúe. Hɔ́ɔlɔ́ kanɛ́ naá gɛcamɛna gɛ́ɛgɔ, Ábalaháma a dɛ mbáa lɛ na moɔnɔ́. 6Náana gɔ́ɔ Asaŋa a mbaá mo oyáná a amɔ́: “Ɛnana yahɔ ɛ ŋgɔ ɔyɔ́ɔ naá gɛdɔŋɔ gá bɔsɔ́gɔ́ɔ, yɛ ɛ́ya bɛɔlɛ́ hɔ́ɔ, ɛ lumenene na meséésényée hɔ́ɔ nnyómá mantɛdɛ ménni. 7Kanɛ́ ka ŋga séésényée gɛdɔŋɔ gɛ́ɛgɛ bá ŋgaá bɛ́ɛ́mbá bɛɔlɛ́ hɔ́ɔ. Naá nnyimé, bá ŋgu úlúkíe hɔ́ɔlɔ́, bá nco gunde naá hoóma háaha, bɛ́ ɛ́da go mbúlugenye hɔ́ɔ#7.7 Go big. 2 a húme 7: go big. 2-3Mabayɛga 12.1 go gig. 4Mabayɛga 11.31; 12.4 go gig. 5Mabayɛga 12.7; 13.15; 15.18; 17.8 go big. 6-7: Mabayɛga 15.13-14; Gihúmie 3.12..” 8Kanɛ́ Asaŋa go ŋa gɛlada bugúle na Ábalaháma gɛ́ɛgɛ buencí bó lɔ́mɔ́ gieninye. Nɔ́ɔ gɔ́ɔ Ábalaháma a mbaá ancá ohaŋa bɛhɛ́ Ɛ́saga medúgú mánnámanyɛ́ naá nnyimé yɛhɛ́ ya nobébíényée. Ɛ́saga a mba ancá ohaŋa bɛhɛ́ Yɔ́kɔbɔ. Yɔ́kɔbɔ a báá ancá bahaŋa bɛ́hɛ́ bɔ́ɔ́dɔ́ na báandɛ́ báaba bá lɔ́mɔ́ biisée kɔ́nɔ́ bá biisée bɛ́cɔ́.
9«Biisée kɔ́nɔ́ɔ bɔ́ɔbɔ go ága Yósɛbɛ hɛagá bá báá mo dúé go boɔlɛ́ naá Egíbítene. Kanɛ́ Asaŋa a mba lɛ́ nɛhɛ́. 10Gɛ́hɛ́ go mo sódio naá bɛdɔmbɔ bɛ́hɛ́ bɛ́ɛbɔ biimée. A mba mo foná a báa mo fáá nciŋí naá busío bá Falaɔ́ŋɔ, ufuŋe yá Egíbítene. Falaɔ́ŋɔ go díliminye Yósɛbɛ ogɔ́nɔ́ɔ ba Egíbítene na ncíbo yɛhɛ́ iŋkimée. 11Kɔ́ɔ kanɛ́ ncaná yɛ íŋenemú naá gɛdɔŋɔ gá Egíbítene giimée na naá gɛdɔŋɔ gá Kanáana giimée. Gɛɔ́bɛgɔ gɛ́ mba lɛ́ makɔ́nɔ́, biisée kɔ́nɔ́ɔ bɛ́cɔ́ kanɛ boóma bá go nyáa. 12Aŋa Yɔ́kɔbɔ a mbɔɔ́ ɔ́bɔ́ goŋaá manyáanya má lɛ́ naá Egíbítene, gɛ́hɛ́ go dóma biisée kɔ́nɔ́ɔ bɛ́cɔ́ hɔ́ɔ go oŋɛndɔ yá busío; 13kanɛ́ aŋa bá mbaá gɔnɔ́ go ɛ́da hɔ́ɔ go oŋɛndɔ yá gáandɛ́ɛ, Yósɛbɛ go bélincie go bolimóní bɛ́hɛ́, Falaɔ́ŋɔ go íyime kanɛ́ gɛdɔŋɔ gá Yósɛbɛ gá mbíényée. 14Gɔ́ɔ Yósɛbɛ a dómamɔ́ bá bɛ́ɛ́ ɛ́dá gɔ́lɔ isée na ncíbo yɛhɛ́ ya batɔ iŋkimée, ɛdóɛ otíno ádadɔ́ na buinyo. 15Yɔ́kɔbɔ go ɛ́da naá Egíbítene, a báá gúé hɔ́ɔ na biisée kɔ́nɔ́ɔ bɛ́cɔ́ tɔ́nɔ. 16Bá mbɛ ɛ́dá na bɛlɔ́ŋɔ́ bábɔ́ naá Síceme, bá báá bɛ́ miée naá gɛbɛ́lá gɛ́ɛgɛ Ábalaháma a mbɔɔ́ ɔ́ndɔ́ go muinyí naá bahaŋa bá Émolo, isée ba Síceme.
17«Aŋa gɛcamɛna gɛ́ mbuú úlé gɛ́ báyɛkana gá Asaŋa go hóogio tánɔ yɛ́ɛyɛ a mbaá bálɛáa a báá fáá Ábalaháma, gɛdɔŋɔ gɛ́cɔ́ gá gɛ́ go dege makɔ́nɔ́ naá Egíbítene. 18Gɔ́ɔ gɛpáa gá ufuŋe gɛ́ɛgɛ gɛ́ mbaá lɛ gɛ́ dɛ íyímé Yósɛbɛ gɛ́ ɛ́damɔ́ go bɛanana Egíbítene. 19Ufuŋe yɔ́ɔyɔ go bele gɛdɔŋɔ gɛ́cɔ́, yó báá séésényée biisée kɔ́nɔ́ɔ bɛ́cɔ́, bá bó gaŋa goŋaá bú umbenene baaná badɔmbɔ́ banɔ́mɔtɔ́ bábɔ́, bɔ́ɔbɔ bá gúenene#7.19 Go big. 17 a húme 19: go big. 17-18Gihúmie 1.7-8 go gig. 19: Gihúmie 1.10-11,22.. 20Naá gɛcamɛna gɛ́ɛgɔ gɔ́ɔ Mɔ́sɛsɛ a mbaá bébíéné. A mba lɛ́ gɛnɔ́gɔ́ gá moɔnɔ́ naá busío bá Asaŋa. Bá mba mo dúgée ɛfɛ́ ɛdadɔ́ naá ncíbo ya isée gadɛ́ɛ#7.20 Go ɛ́na Gihúmie 2.2.. 21Aŋa bá mbaá mo umbé, ombóla ba Falaɔ́ŋɔ go mo báda, a báá mo umpúgíe aŋa moɔnɔ́ bɛhɛ́ ba moatɛ́#7.21 Go ɛ́na naá Gihúmie 2.3-10.. 22Náana gɔ́ɔ Mɔ́sɛsɛ a mbaá lɔmɔ́ bɛáalú goíyime gá boóma buimée bɔ́ɔbɔ baaná bá Egíbítene bá mbaá lɔmɔ́ bí íyimene; a báá bɛ́ɛ́mbá gɛgaaga gá mɔtɔ naá dogálɔ dɛ́hɛ́ na naá meŋiigíe mɛ́hɛ́.
23«Aŋa a mbaá bɛáa nnyómá otíno áhandɛ́, Mɔ́sɛsɛ go bégedie goŋaá ɛ ɛ́da yɔlɔ bolimóní bɛ́hɛ́, baaná bá Ɛ́sɛlahɛ́ɛlɛ. 24Kɔ́ɔ a gídemú moɔnɔ́ ba Egíbítene a séesenye moɔnɔ́ ba behébelée, go gunde kanɛ́ nnyimé ya sɔ́gɔ́ɔ mɔ́ɔnyɔ bá mbaá lɔmɔ́ bá mo séesenye, a bóó óná moɔnɔ́ ba Egíbítene. 25A mba lɛ́ a béeniŋenye a amɔ́ bolimóní, baaná bá Ɛ́sɛlahɛ́ɛlɛ, bá gɔɔ́ ɔ́bɔ́ goŋaá Asaŋa a gaá ná bó sódío gɛ́hɛ́, kanɛ́ bá dɛ mbá bóso go ɔ́bɔ nɔ́ɔnɔ. 26Gó á bélíe, Mɔ́sɛsɛ go gíde baaná bá Ɛ́sɛlahɛ́ɛlɛ báandɛ́ bá noanana, gɛ́hɛ́ go lɛ́galɛga go bó dádona, bá bɛ́ɛmba naá pɔ́ɔ́. Gɔ́ɔ ɛ ɛ́damɔ́ go bó gálagala a amɔ́: “Begúle bámɛ, no lɛ́ bulimóní, goakɛ́ no noananamɔ́ o?” 27Kanɛ́ mɔ́ɔnyɔ a mbaá lɔmɔ́ a mánɛgana sɔ́gɔ́ɔ go baga Mɔ́sɛsɛ a amɔ́: “Ánɛ́ɛ a lɔ́mɔ́ go dílímínyéelú ufuŋe na usúmbí bɛsɛnɛ naá kadɛ́gadɛ́ɛ yɛcɔ́ o? 28O lɛ́galɛga go ŋgóna tɔ́nɔ aŋa go á nó óná moɔnɔ́ ba Egíbítene iyó lí?” 29Aŋa Mɔ́sɛsɛ a mbɔɔ́ ɔ́bɔ́ dogálɔ dɔ́ɔdɔ, gɛ́hɛ́ go dómba go ságɛna, a bɛ́ɛ́ ɛ́dá lukumene naá gɛdɔŋɔ gá Madɛ́anɛ; hɔ́ɔ a báa bíéné baaná banɔ́mɔtɔ́ báandɛ́#7.29 Go big. 23 a húme 29: Gihúmie 2.11-15,21-22; 18.3-4..
30«Naá nnyimé ya nnyómá otíno áhandɛ́, ɛ́ŋgɛlɛsɛ go ɛ́nɛgɛna Mɔ́sɛsɛ naá giolóo gá bodɛ́agadɛ́, mekúígíi na ogɔndɔ yá Sineyíi, naá gɛlɛ́mbɛ gá íyuke gá tudú yɛ́ɛyɛ ɛ mbaá lɔmɔ́ ɛ lola. 31Mɔ́sɛsɛ a báá békúkée aŋa a mbɛɛ́ ɛ́ná giínigie moánɛ. Kanɛ́ aŋa a mbaá lɔmɔ́ a báyɛkana go go gedie go ɛ́na mekúígíi, gɛ́hɛ́ go ɔ́bɔ ukelú yá Daadáa yó amɔ́: 32“Ndɔ́mɔ́ Asaŋa ba biisée báhɔ, Asaŋa ba Ábalaháma, ba Ɛ́saga, ba Yɔ́kɔbɔ.” Mɔ́sɛsɛ go ɛ́da go dagadana na bofoá, kanɛ kélemene ya go gɔnɔ núunide. 33Kanɛ́ Daadáa go mo oyana a amɔ́: “Búúlíemú basɛ́lɛ́pasɛ báhɔ, goakɛ́ hoóma háaha o lɔ́mɔ́ tɛ́nɛ́ɛ hɔ́ɔ há lɛ́ cí ya gicele. 34Ɛɛ́ɛŋ, ŋgaá bɛ́ɛ́nɛ́ná gɛɔ́bɛgɔ gá boɛ́nɔ bámɛ naá Egíbítene, mbɔ́ɔ́ ɔ́bɔ́ mbií sábɔ́, gɔ́ɔ, ciisemú goŋaá mbó sódio. Ɛ́dá godɔ́ɔdɔ yɛ́ɛyɛ, ko dóma naá Egíbítene#7.34 Gihúmie 3.1-10..”
35«Mɔ́sɛsɛ mɔ́ɔnyɔ baaná bá Ɛ́sɛlahɛ́ɛlɛ bá mbaá mo inyé bá amɔ́: “Ánɛ́ɛ a lɔ́mɔ́ go dílímínyéelú ufuŋe na usúmbí bɛsɛnɛ o?” Mɔ́ɔ Asaŋa a bó dómɛnamɔ́ aŋa ufuŋe, aŋa usódí na gióhiginyo gá ɛ́ŋgɛlɛsɛ mɔ́ɔnyɔ a mbaá mo ɛ́nɛ́gɛ́ná naá tudú. 36Mɔ́ɔ a mbaá húmíe baaná bá Ɛ́sɛlahɛ́ɛlɛ naá Egíbítene na goŋanana gá muune na bɛantáanta bá bieninye bá gobékúke naá gɛdɔŋɔ gá Egíbítene, naá máŋɛ́ má goɛ́la na naá giolóo gá bodɛ́agadɛ́, nnyómá otíno áhandɛ́#7.36 Go big. 35 a húme 36: go gig. 35: Gihúmie 2.14 go gig. 36: Gihúmie 7.3; 14.21; Ɛmbanɔ 14.33.. 37Mɔ́sɛsɛ mɔ́ɔnyɔ gɔnɔ́ mɔ́ɔ a mboó oyáná baaná bá Ɛ́sɛlahɛ́ɛlɛ a amɔ́: “Asaŋa a ŋga nyó dómɛ́ná mbúsí aŋa yɔmɔ́ɔ mɔ́ɔnyɔ a ŋgaá bɛ́ɛ́mbá ba boɛ́nɔ bɛ́nyɔ́#7.37 Go ɛ́na naá Bicele 18.15,18..” 38A lɔ́mɔ́ mɔ́ɔ a mbaá lɔmɔ́ na boɛ́nɔ bá Ɛ́sɛlahɛ́ɛlɛ gɔ́ɔgɔ bó mbaá lɔmɔ́ bábándɛ́gɛ́náalú naá giolóo gá bodɛ́agadɛ́: a mba lɛ́ na biisée kɔ́nɔ́ɔ bɛ́cɔ́ na ɛ́ŋgɛlɛsɛ mɔ́ɔnyɔ a mbaá gálágáláa nɛhɛ́ naá ogɔndɔ ya Sineyíi, a báá gɔ́lɔ́ dogálɔ dá gɛɔyɔ go go có dó dúmbinye#7.38 Go ɛ́na Gihúmie 19.1—20.17; Bicele 5.1-33.. 39Kanɛ́ biisée bɛ́cɔ́ go inye go mo ɔ́bɛnɔ. Bá báá mo básáŋóná, bá báá lɛ́gálɛ́gáa go gunde naá Egíbítene, 40go oyana Álɔŋɔ bá amɔ́: “Có gedínyéemú baasaŋa báaba bá gaá ná có gɔ́gɔ́ɔ naá busío naá oŋɛndɔ yɛ́cɔ́; goakɛ́ dɛ dɛ íyíménée bɔ́ɔbɔ bó lɔ́mɔ́ bolɛ́náalú Mɔ́sɛsɛ mɔ́ɔnyɔ a lɔ́mɔ́ có húmíelú naá gɛdɔŋɔ gá Egíbítene.” 41Gɔ́ɔ bá dúnemú moɔnɔ́ ba gúlúge, bá bíí íŋéné hɛɔcɔ hɛ́ɛhɔ gɛbáágá, bá báá békelényée go boóma bɔ́ɔbɔ bɔ́ɔ moatɛ́ moatɛ bá mbaá gedíe#7.41 Go big. 39 a húme 41: go gig. 39Ɛmbanɔ 14.3 go gig. 40 Gihúmie 32.1 go gig. 41. Gihúmie 32.2-6.. 42Gɔ́ɔ Asaŋa a mbaá bó fíídíe nnyimé, a báá bó dɛ́ɛ́ná goŋaá bɛ́ ɛ́da go búlugenye muotóti má mmoɛná, aŋa bó lɔ́mɔ́ ɔ́ŋɔ́ɔlú naá kálata ya mbúsí ya Asaŋa goŋaá:
“Boɛ́nɔ bá Ɛ́sɛlahɛ́ɛlɛ,
Yɔmɔ́ɔ mɔ́ɔ no mbaá páánánáa nnyama na bɛbáágá bíncodío nnyómá otíno áhandɛ́ naá giolóo gá bodɛ́agadɛ́ lí?
43Kanɛ́ no mba lɛ́ no bádóɛgana gincumu gá asaŋa Mɔ́lɔgɔ
na hiotóti há asaŋa bɛnyɔ́ Ɛlɛ́fanɛ,
moɔcɔ no mbaá lɔmɔ́ gedíelú go go mó búlugenye;
go busío moánɛ bɔ́ nná nyó dúemú halaháláa gó dómba gɔ́ɔgɔ naá Bábɛlɔnɛ.”
44«Naá giolóo gá bodɛ́agadɛ́, biisée kɔ́nɔ́ɔ bɛ́cɔ́ bá mba lɛ́ na gincumu gá gɛlada bugúle. Gɛ́ mba lɛ́ gedíelú gɔgɔ́ aŋa Asaŋa a mbaá lɔmɔ́ oyánáalú Mɔ́sɛsɛ go mbɔ́dɔ yɛ́ɛyɛ a mbaá mo dúfíe a báa mo yidínyée goŋaá a gɛ́ gedie go mbɔ́dɔ yɛ́ɛyɛ a mbɛɛ́ ɛ́ná. 45Gincumu gɛ́ɛgɔ gá gɛ́ go báaka naá ɛmbɔ́gɔ ya biisée kɔ́nɔ́ɔ bɛ́cɔ́ bá nnyimé, bá báá dómbá na gɛ́ gɛcamɛna gɛ́ɛgɛ bá mbɛɛ́ ɛ́dá gɔ́lɔ gɛdɔŋɔ gá mɛɛ́nɔ máama Asaŋa a mbaá gúnée naá busío bábɔ́, Yosué mɔ́ɔ a mbaá lɔmɔ́ a bó indenye; gɔ́ɔ gɛ́ mbaá gɛ́gáa hɔ́ɔ gó bɛ́ɛ́ ɛ́dá bola naá gɛcamɛna gá Défidi#7.45 Gihúmie 25.9,40; Yosué 3.14-17.. 46Défidi go ɛ́na besé naá Asaŋa, a báá mo ɔŋɛ́nɔ́ bogaaga bá go fóagɛna Asaŋa ba Yɔ́kɔbɔ gimmúmpúu gá kɛ́gɛ́ná#7.46 Go ɛ́na 2 Sémuele 7.1-16; 1 Bɛcamɛna 17.1-14.. 47Akɛ́ nɔ́ɔnɔ, Salomɔ́ŋɔ mɔ́ɔ a mbaá mo fóágɛ́ná nnyaŋá#7.47 Go ɛ́na 1 Mefuŋe 6.1-38; 2 Bɛcamɛna 3.1-17.. 48Kanɛ́ Asaŋa ba Páábɔ́ naá Mmoɛná a dɛ bɛ́dɛ́mánáa naá nnyaŋá sɛ́ɛsɛ batɔ bá fóagamɔ́; gɔgɔ́ aŋa gooya gá mbúsí ya Asaŋa gó lɔ́mɔ́ gó amɔ́:
49“Mmoɛná ɛ lɔ́mɔ́ oŋgɛ́yɔ́ yámɛ,
Cí gɛdálɛ́ná bɛgɔ́ndɔ́ bámɛ;
Kasɛ́á Bonnyaŋá no lɔ́mɔ́ ba go póagɛna,
Daadáa o oyamɔ́,
gɔnɔ́ hoóma hámɛ há go dúugide há ná bɛ́ɛmbamɔ́ áhanɛ́ɛ o?
50Ábɔ caá yɔmɔ́ɔ ndɔ́mɔ́ ŋaáalú moóma mɔ́ɔmɔ muimée#7.50 Iseyíi 66.1-2.?”
51«Bɛɛnyɔ́ɔ batɔ báaba no lalamɔ́ ɛdóɛ, na ɛdɛ́má na edúu yáaya yá lɔ́mɔ́ cábáalú naá ɛdɔ́ŋɛ́nɔ ya Asaŋa; no ɛ́dana naá busío no lalana Gimmúmpúu gá Giliíli. Aŋa biisée kɔ́nɔ́ɔ bɛ́nyɔ́ aŋa bɛɛnyɔ́ɔ moatɛ́. 52Ohanɛ́ ba mbúsí sá Asaŋa biisée kɔ́nɔ́ɔ bɛ́nyɔ́ bá mbaá lɔmɔ́ bá dɛ séésényée o? Bá mbo ónáa báaba bá mbaá lɔmɔ́ bá dóogonyo goúle gá mɔ́ɔnyɔ a lɔ́mɔ́ mokáa Usi, mɔ́ɔ moánɛ godɔ́ɔdɔ no lɔ́mɔ́ dúelú no bóo óná#7.52 O bana, go eninye na Iseyíi 63.10; 2 Bɛcamɛna 36.16; Mot 23.31.. 53Bɛɛnyɔ́ɔ báaba no mbaá gɔ́lɔ́ gicele gá Asaŋa gá bɛɛ́ŋgɛlɛsɛ no báa lɔbɔ́ kanɛ go gɛ́ beŋe.»
Goóna gá Ítiene na adánɛ́
54Naá dogálɔ dá Ítiene dɔ́ɔdɔ, batɔ bá Nɛgála Nɛgɔ́nɔ́ go dɛ́aŋa ɛdɛ́má, bá bɛ́ɛ́ ɛ́dá go mo bandana bigélédé na mpímí. 55Kanɛ́, mɔ́ɔ, dácɛ na Gimmúmpúu gá Giliíli, go ɛ́da go núune mmoɛná; gɛ́hɛ́ go ɛ́na nigúmi ná Asaŋa na Yésusu tɛ́nɛ́ɛ naá ombɔ́gɔ onɔ́mɛ yá Asaŋa. 56Kɔ́ɔ o oyɛdamɔ́ a amɔ́: «Bódólígínyóomú nɔnɔ: mmoɛná yíiní nnúunemú giŋgólíi, Moɔnɔ́ ba Mɔtɔ tɛ́nɛ́ɛ naá ombɔ́gɔ onɔ́mɛ yá Asaŋa.» 57Gɔ́ɔ bá búlugiemú ikelú naá mmoɛná na gɛánca, bá báá bégídé edúu. Gɔ́ɔ bá mo kúluguginemú gɛcamɛna táŋɛ́ gímmue, 58go mo yɔkɛnɔ bá bɛ́ɛ́ ɛ́dá bá mo tútulenye, go mo húmie naá tɛ́sɔnɔ, go ɛ́da go mo dóɛdana adánɛ́ go go mo óna. Batɔ báaba bá mbaá lɔmɔ́ na bosɔ́mɔ moánɛ go búúlenye bɛla bábɔ́ bá mmoɛná bá báá ncó bɛ́ dɛ́anana naá bɛgɔ́ndɔ́ bá mɔtɔ ummue ufíno yɛ́hɛ́ Sóole go go beŋebeŋe. 59Gɛcamɛna gɛ́ɛgɛ bá mbaá lɔmɔ́ bá mo dóɛdana adánɛ́, Ítiene go ɛ́da go bósógolonyo a amɔ́: «Daadáa Yésusu, gɛ́ndɛ́gɛ́na giliíli gámɛ.» 60Kɔ́ɔ a kuncemú enúu go cí go áncɛda na bogaaga a amɔ́: «Daadáa, o do bó banɛ́ná gɛlɔgɔ gɛ́ɛgɛ#7.60 O bana, go eninye na Lók 23.34..» Aŋa a mbaá gálɛ́dá dogálɔ dɔ́ɔdɔ, gɛ́hɛ́ go obɛnɛna.
Currently Selected:
Meŋiigíe 7: YAS
Highlight
Share
Copy
Want to have your highlights saved across all your devices? Sign up or sign in
