Meŋiigíe 6
6
Giiyide gá batɔ bátáanɔ na báandɛ́ bá go óhigonyo Baapótɛlɛ
1Naá gɛcamɛna moánɛ, aŋa boolímínyí bá mbaá lɔmɔ́ bɛ́ ɛ́dana naá busío bá bégídenine, Beyúdene báaba bá mbaá lɔmɔ́ bá gálagala nogɛlɛ́gɛ go ɛ́da go bó baŋɛnana go Beyúdene báaba bá mbaá lɔmɔ́ bá gálagala nohébelée: bó oya bá amɔ́ bisí bá bakɔ́dɔ bábɔ́ bɛ́ mba lɛ́ sesídíelú naá oŋgaabɔ yá manyáanya miisí miimée. 2Gɔ́ɔ Bɛɔdɔ́ɔ na bɛ́andɛ́ bá baapótɛlɛ bɛ́ bándɛgɛnamɔ́ olɔŋɔ yá boolímínyí uŋkimée, go bó oyana bá amɔ́: «Bó do báá ba go bɛ́ɛmba tɛ́nɛ́ɛ goŋaá dɛ dɛ́ɛna gooya gá nogálɔ ná Asaŋa go oŋgaabɔ yá manyáanya. 3Gɔ́ɔ kanɛ́ bolimóní, iyíde nɔnɔ naá olɔŋɔ yɛ́nyɔ́ batɔ bátáanɔ na báandɛ́ bá bɛnɔ́gɔ́ bá caŋa, báaba bá lɔ́mɔ́ dácɛ na Gimmúmpúu gá Giliíli gɔnɔ́ na nciŋí, dɛ bó díliminye go buelí bɔ́ɔbɔ. 4Bɛɛcɔ́ɔ dɛ síene goana go mbósógólí na gooya gá nogálɔ ná Asaŋa.» 5Giimbó gá boolímínyí giimée go oliminyo gooyɛda gɔ́ɔgɔ. Kɔ́ɔ bí iyidemú Ítiene, mɔtɔ mɔ́ɔnyɔ a mbaá lɔmɔ́ dácɛ na gioliminyo gɔnɔ́ na gimmúmpúu gá giliíli, na Fílibi, Polokɔ́lɛ, Nɛ́kanɔ́lɛ, Tímono, Palámɛnasɛ na Nɛkolásɛ, mɔtɔ ba Óntiosi mɔ́ɔnyɔ a mbaá békikílídíe a bíi íŋéné naá gioliminyo gá Beyúdene. 6Kɔ́ɔ bá ncomɔ́ bó dúfie naá baapótɛlɛ, bɔ́ɔbɔ go bósógolonyo bá báa bó dálá ɛmbɔ́gɔ.
7Nogálɔ ná Asaŋa nó mba lɛ́ nó ɛ́dana naá busío, nó saanana hoóma hiimée. Ombanɔ yá boolímínyí yó bégídenine makɔ́nɔ́ naá Yolósalɛmɛ, bedúmbí bɛbáágá naá Asaŋa gɛca bá bóo olímínyóo Yésusu.
Gigumbene gá Ítiene
8Ítiene, dácɛ na bogaaga bá gɛfona gá Asaŋa, a mba lɛ́ a ŋanana muune na bɛantáanta bá bieninye bá gobékúke naá kadɛ́gadɛ́ɛ ya gɛdɔŋɔ. 9Kanɛ́ biimbó bá batɔ bɛ́andɛ́ go mo bɛ́ɛ́ya: giimbó gá batɔ bá nnyaŋá ya mbósógólí bá yɛ dɔ́ŋɔnɔ bá amɔ́ nnyaŋá ya mbósógólí ya «Bɛɔlɛ́ bá Filíilú»; bá lɔ́mɔ́ Beyúdene báaba naá Siléene na báaba naá Alɛsandɛlɛ́ɛ, na giimbó gá Beyúdene báaba naá Silisíi, na báaba naá gigísi gá cí gá Esíi. Gáábɔ́ go ɛ́da go mpálɔ́ na Ítiene. 10Kanɛ́ bá dɛ mbáa lɛ ba go mo hóda, goakɛ́ a mba lɛ́ a gálagala na nciŋí yɛ́ɛyɛ Gimmúmpúu gá Giliíli a mbaá lɔmɔ́ a mo fáanana. 11Kɔ́ɔ kanɛ́ bɔ́ ɔ́ndɔmɔ́ batɔ goŋaá bó oyɛda bá amɔ́: «Dɛ mba mo ɔ́bɔ́ a gálagala Mɔ́sɛsɛ na Asaŋa go dobɛ́#6.11 O bana, go eninye na bɔ́ɔbɔ naá Mot 26.59-61; Mél 14.55-58..» 12Nɔ́ɔnɔ, gáábɔ́ go lónco gɛdɔŋɔ, na bafɛanɔ́ɔ na muloodio má gicele. Kɔ́ɔ bá bɔ́yɔdɛgɛnɔmɔ́ Ítiene bá báá mo yɔkɛ́nɔ́, go ɛ́da nɛhɛ́ naá Nɛgála Nɛgɔ́nɔ́. 13Bá mbɛ ɛ́dá hɔ́ɔ gɔnɔ́ na batɔ báaba bá mbaá lɔmɔ́ bá mo básómbanɛna bá amɔ́: «Mɔtɔ mɔ́ɔnyɔ a dɛ suugényé go gálagala dobɛ́ go gimmúmpúu gá Nnyaŋá ya Asaŋa na gicele gá Mɔ́sɛsɛ. 14Dɛ lɛ́ mo ɔ́bɔ́ɔlú o oya a amɔ́ Yésusu ba Násalɛdɛ mɔ́ɔnyɔ a ná gada gimmúmpúu gá Nnyaŋá ya Asaŋa gɛ́ɛgɛ a gunde a góŋona caŋa sɛ́ɛsɛ Mɔ́sɛsɛ a mbaá có síéné.» 15Batɔ biimée báaba bá mbaá lɔmɔ́ ndukíi naá Nɛgála Nɛgɔ́nɔ́ bá mba ágɛ́ná Ítiene oŋgíso, go ɛ́na busío bɛ́hɛ́ aŋa bá ɛ́ŋgɛlɛsɛ.
Currently Selected:
Meŋiigíe 6: YAS
Highlight
Share
Copy
Want to have your highlights saved across all your devices? Sign up or sign in
