Meŋiigíe 8
8
Giimbó gá boolímínyí gá busío go dóana go bɛa noséésényée
1Sóole tɔ́nɔ a mba lɛ́ naá olɔŋɔ yá batɔ báaba bá mbaá lɔmɔ́ hɛmáalú go óna Ítiene.
Buisí moánɛ bɔ́ɔbɔ, gɛantá gá noséésényée go obɛna boolímínyí báaba naá Yolósalɛmɛ. Biimée púmú gáábɔ́ go sálamanda bá báá gundénée naá bɛdɔŋɔ bá Yudée na bá Samalɛ́ɛ, goana baapótɛlɛ bákáa bá mbaá síéné. 2Gɔ́ɔ besi bá batɔ bá miemú Ítiene, bá báá mo baŋáa makɔ́nɔ́. 3Kanɛ́ Sóole, mɔ́ɔ, go íŋenine boolímínyí; ɛ ɛ́da ɛ ɛnda go nnyaŋá go nnyaŋá, a gumbenene banɔ́mɔtɔ́ na bakɔ́dɔ a bó ágana naá ncíbo ya gɛaŋɔ́. 4Biiménénée báaba bá mbaá lɔmɔ́ sálámándáalú go ɛ́da hoóma hiimée bɛ́ ɛ́da bó oya Gɛnɔ́gɔ́ gá Cɔ́mɔ gá nogálɔ ná Asaŋa.
Fílibi a dúmenye nogálɔ ná Asaŋa naá Samalɛ́ɛ
5Nɔ́ɔ gɔ́ɔ Fílibi, mɔ́ɔnyɔ a mbaá lɔmɔ́ gɔsɔ́ɔlú naá tɛ́sɔnɔ mmue ya Samalɛ́ɛ, a mboó oyáa hɔ́ɔ bosɔ́mɔ bá Mesíi. 6Bitúu bá batɔ bɛ́ mba lɛ́ ukelú yúmmue, bɛ́ ágana ɛdɛ́má yabɔ́ naá ŋgoyáamɔ́ ya Fílibi; goakɛ́ bá mba lɛ́ bɔ́ ɔ́bɔnɔ bá gunde bɛ́ ɛ́nana muune máama a mbaá lɔmɔ́ a ŋanana. 7Nɔ́ɔnɔ gɔ́ɔ bɛgáda bá biliíli bɛ́ mba lɛ́ bɛ́ hémene naá gɛca gá batɔ báaba bá mbaá lɔmɔ́ na bɛ́, bɛ́ ɛ́da bɛ́ ágana kóokóo, gɛca gá bicúgulu na banɛ́mɔnɛmɔ bé éŋugene tɔ́nɔ. 8Gɔ́ɔ bɛyaŋa makɔ́nɔ́ bɛ́ bɛ́ɛmbamɔ́ naá tɛ́sɔnɔ yɛ́ɛyɔ.
9Otóotoɛ naá tɛ́sɔnɔ yɛ́ɛyɔ, mɔtɔ ummue a mba lɛ́ hɔ́ɔ ufíno yɛ́hɛ́ Símono, a mba lɛ́ a ŋanana méncigi, batɔ báaba naá Samalɛ́ɛ bá mo békúke, a mba lɛ́ a bɛ́ɛ́nana sótá ya mɔtɔ. 10Batɔ biimée, baábayɔ́ na bagɔ́nɔ́, bá mba lɛ́ bá mo bienene, bó oya bá amɔ́: «Mɔtɔ mɔ́ɔnyɔ a lɔ́mɔ́ bogaaga bá Asaŋa, bɔ́ɔbɔ bá dɔ́ŋɔnɔmɔ́ bá amɔ́ Boantáanta.» 11Aáŋa bá mba lɛ́ bá mo bienene, bó mbaá lɛ goŋaá a mba bó lékényée gɛantá gá gɛcamɛna na meŋiigíe mɛ́hɛ́ má méncigi. 12Kanɛ́, gɔ́ɔgɔ aŋa bá mboó olímínyóo Fílibi mɔ́ɔnyɔ a mbaá lɔmɔ́ a bó oyanɛna Gɛnɔ́gɔ́ gá Cɔ́mɔ na ufíno yá Yésu Kilítu, banɔ́mɔtɔ́ na bakɔ́dɔ gáábɔ́ go ŋa goŋaá bá bó yuminye. 13Símono moatɛ́ moatɛ a mbo olímínyóo tɔ́nɔ; aŋa bá mbaá ŋá bá báa go mo yuminye, gɛ́hɛ́ go lámpɛmɛna Fílibi, a békúke muune na bɛantáanta bá bieninye bá gobékúke mɔ́ɔmɔ mó mbaá lɔmɔ́ mó báŋanana naá oŋgíso yɛ́hɛ́.
14Aŋa baapótɛlɛ báaba bá mbaá lɔmɔ́ síénéelú naá Yolósalɛmɛ bá mbɔɔ́ ɔ́bɔ́ goŋaá batɔ bá Samalɛ́ɛ bá á gɛ́ndɛ́gɛ́ná nogálɔ ná Asaŋa, gáábɔ́ go bó dómɛna Píele na Sáŋa. 15Aŋa báaba bá mbɛɛ́ ɛ́dá bola, gáábɔ́ go bósógolonyo go busío bá batɔ bá Samalɛ́ɛ goŋaá bá bɛa Gimmúmpúu gá Giliíli. 16Mammana, Giliíli a mbaá ŋá a gá lɛ́ a dɛ siiséné akɛ́ mɔtɔ ummue mɔ́ɔnyɔ naá bɔ́ɔ; bá mbaá lɔmɔ́ goana béyumínyéelú go ufíno yá Daadáa Yésusu. 17Píele na Sáŋa go ɛ́da go bó dálana ɛmbɔ́gɔ, bá bɛanana Gimmúmpúu gá Giliíli.
18Kanɛ́ aŋa Símono a mbɛɛ́ ɛ́ná goŋaá baapótɛlɛ bá fáanana Gimmúmpúu gá Giliíli na go godálana, gɛ́hɛ́ go ɛ́da na muinyí a báá bó oyáná a amɔ́: 19«Páamɔ́ nɔnɔ tɔ́nɔ nɛgaŋa nɛ́ɛnɛ, mbɔ́dɔ ya goŋaá mɔ́ɔnyɔ nná ŋamɔ́ mmo dála ɛmbɔ́gɔ, a bɛa Gimmúmpúu gá Giliíli.» 20Kanɛ́ Píele go mo gundie a amɔ́: «Ŋgáa muinyí máhɔ mó yíme olɔŋɔ nahɔ; goŋaá go á fegé goŋaá bá lɛ́ ba go ɔ́ndɔ pááná ya Asaŋa na muinyí. 21O do bɛanánáa akɛ́ bodáŋɔ, akɛ́ gɛdɛ́fɛ́ná naá bosɔ́mɔ bɔ́ɔbɔ, goakɛ́ odɛ́má yáhɔ yó do báá tɛ́nɛ́ɛ naá busío bá Asaŋa. 22Básáŋónáamɔ́ gɛgáda gá mbééníŋínyí gɛ́ɛgɛ o báá ná bɛáa, o bósógolonyo Daadáa goŋaá a go héehinye go gɛbɛ́ gá gofege gáhɔ gɛ́ɛgɛ o lɔ́mɔ́ na gɛ́ naá odɛ́má, aáŋa bó lɛ́ ba go báŋa. 23Mammana, ŋgɛ́nana goŋaá odɛ́má yáhɔ yó lala, gɔnɔ́ bobɛ́ bó go bɛanana.» 24Símono go gundie a amɔ́: «Bɛɛnyɔ́ɔ moatɛ́ moatɛ bósógólónyóomú nɔnɔ Daadáa go busío bámɛ goŋaá boóma bá gɛbɛ́ bɔ́ɔbɔ no báá nó oyɛ́dá bó do ŋŋaáa.»
25Píele na Sáŋa aŋa bá mbaá ŋá bá báa go dúfenye moóma mɔ́ɔmɔ bá mbɛɛ́ ɛ́ná, bá bóó oyáa nogálɔ ná Daadáa, gáábɔ́ go gunde naá Yolósalɛmɛ, bɛ́ ɛ́da bó oya Gɛnɔ́gɔ́ gá Cɔ́mɔ naá gɛcɛcá gá bɛdɔŋɔ bá Samalɛ́ɛ.
Fílibi na gɛancanca gá mɔtɔ ummue ba Etiopíi
26Naá nnyimé hɔ́ɔlɔ́, ɛ́ŋgɛlɛsɛ ba Daadáa go oyana Fílibi a amɔ́: «Fadɛ́gɛ́na go ɛ́da gɛayá gá nnú ya gɛdɔŋɔ, go ɛ́da naá gɛbala gɛ́ɛgɛ gɛ́ ɛ́damɔ́ go úlenine naá Yolósalɛmɛ go go ɛ́da naá Gása. Gɛbala moánɛ gɛ́ lɛ́ gɔdɔɔ́ kanɛ batɔ kɔ́ɔ.» 27Fílibi go dómba go fadɛgɛna, a báá biené pɛ́. Naá gɛbala moánɛ, gɛanyanca gá mɔtɔ ba gɛdɔŋɔ gá Etiopíi, gɛgaaga gá uyogóní ba Kandáasɛ, ufuŋe yá okɔ́dɔ yá Etiopíi, umbídígíní bonɔ́mɛ bá ufuŋe yɔ́ɔyɔ buimée, gɛ́ mba lɛ́ gɛ́ dómbana hɔ́ɔ. A mba lɛ́ ɛ́dáalú naá Yolósalɛmɛ go go ɛ́da búlugenye Asaŋa, 28gɔ́ɔ a mbaá ŋá a ná lɛ́ go gúlugene ndukíi naá gɛkáládá gɛ́hɛ́ ɛ ɛ́da a bana kálata ya mbúsí ya Asaŋa Iseyíi. 29Gimmúmpúu gá Giliíli go oyana Fílibi a amɔ́: «Ɛ́dá gíde gɛkáládá gíiní.» 30Fílibi go ɛ́da na matɛ́tɛ́da, go ɔ́bɔ gɛanyanca gá mɔtɔ gɛ́ɛgɔ gɛ́ ná lɛ́ go bana kálata ya mbúsí ya Asaŋa Iseyíi. Fílibi go mo úhune a amɔ́: «Go ɔ́bɔnɔ boóma bɔ́ɔbɔ o banamɔ́ naá cí lí?» 31Mɔ́ɔ go mo gundie a amɔ́: «Ndɔ́mɔ́ ba go ɔ́bɔ nɛɛ́nɛ aáŋa mɔtɔ a dɛ palónɛ́ná o?» Go dómba go oyana Fílibi a amɔ́ ŋgáa a bólɛga, a lukumene nɛhɛ́ naá gɛkáládá. 32Gigísi gá Ŋgɔ́ŋɛ́ gɛ́ɛgɛ a mbaá lɔmɔ́ a bana gɛ́ mbaá lɔmɔ́ gɛ́ oya gɛ́ amɔ́:
«Bá mba lɛ́ bá mo indenye aŋa gɛdómbáa
gɛ́ɛgɛ bɛ́ ɛ́danamɔ́ na gɛ́ naá nɛónɛ́ná ná bidúgé;
Gɔnɔ́ gɔgɔ́ aŋa moɔnɔ́ ba gɛdómbáa ba kanɛ go ásana naá
ɛmbɔ́gɔ ya mɔ́ɔnyɔ a mo sómbamɔ́ binúmpe,
a dɛ bémúkúné.
33Naá gobésiisie gɛ́hɛ́, a dɛ mbá bɛa ŋgágɛna.
Ánɛ́ɛ a ŋgoó oyáa bigíndé bɛ́hɛ́ o?
Mammana#8.33 Iseyíi 53.7-8. bá lɛ́ sómbáalú gɛɔyɔ gɛ́hɛ́ gɛ́ɛgɛ naá cí.»
34Gɛanyanca gá mɔtɔ go bákoɛlɛda Fílibi, go mo úhune a amɔ́: «Sɔ́kɔlɛ, mbúsí ya Asaŋa ɛ gálagalamɔ́ náana gá ánɛ́ɛ o? Ŋgoyánáamɔ́ kanɛ́. Bó lɔ́mɔ́ gɛ́hɛ́ moatɛ́, lí go mɔtɔ uncodío o?» 35Gɔ́ɔ Fílibi a gɔ́lɔmɔ́ dogálɔ naá Ŋgɔ́ŋɛ́ yɛ́ɛyɔ, go ɛ́da go mo oyanɛna Gɛnɔ́gɔ́ gá Cɔ́mɔ gá Yésusu. 36Aŋa bá mbaá lɔmɔ́ bɛ́ ɛ́da bɛ́ ɛnda, gáábɔ́ go bola naá hoóma háaha miimpo má mbaá lɔmɔ́ hɔ́ɔ, Gɛanyanca gá mɔtɔ go oyɛda gɛ́ amɔ́: «Miimpo mámáa. Ɛkádɛ gɛ́ legenemú goŋaá mba bɛáa giyuminye o?» 37[Fílibi go mo gundie a amɔ́: «Aáŋa go olimonyo na odɛ́má yáhɔ uŋkimée, o lɛ́ ba go béyuminye.» Mɔ́ɔnyɔ go gundie a amɔ́: «Ɛɛ́ɛŋ, ŋgolimonyo goŋaá Yésusu a lɛ́ moɔnɔ́ ba Asaŋa.»] 38Gɛ́hɛ́ go oyɛda a amɔ́ ŋgáa bá díliminye gɛkáládá. Nɛhɛ́ na Fílibi, bɔ́ɔ biimée báandɛ́ gáábɔ́ go siise bá bɛ́ɛ́ ɛ́dá naá miimpo, Fílibi go mo yuminye hɔ́ɔ. 39Aŋa bá mbaá hémé naá miimpo hɔ́ɔlɔ́, Giliíli ba Daadáa go dómba na Fílibi. Gɛanyanca gá mɔtɔ gɛ́ɛgɔ gɛ́ dɛ gɔnɔ́ mo ɛ́na. Gɔ́ɔ gɛ́ dúmbenyemú na pɛ́ ya gɛ́, gɛ́ ɛ́da gɛ́ ɔ́bɔnɔ bɛyaŋa. 40Fílibi mɔ́ɔ go ɛ́da béteme naá Asótɛ; gɛ́hɛ́ go ɛ́da o oya Gɛnɔ́gɔ́ gá Cɔ́mɔ naá tɛ́sɔnɔ sɛ́ɛsɛ a mbaá dómbánáa hɔ́ɔ, gó ɛ́da go éme aŋa a mbɛɛ́ ɛ́dá bola naá Sɛsalɛ́ɛ.
Currently Selected:
Meŋiigíe 8: YAS
Highlight
Share
Copy
Want to have your highlights saved across all your devices? Sign up or sign in
