Meŋiigíe 2
2
Goúle gá Gimmúmpúu gá Giliíli
1Aŋa buisí bá gibíné gá Beyúdene gɛ́ɛgɛ bá dɔ́ŋɔnɔmɔ́ bá amɔ́ Pantɛkótɛ#2.1 Go ɛ́na naá Léfi 23.15-21; Bicele 16.9-11. bó mbaá bolá, boolímínyí biimée bá mba lɛ́ bábándɛ́gɛ́náalú hoóma táŋɛ́ hémmue. 2Hɔ́ɔ na hɔ́ɔ, giuŋgúlú go báŋa gɛ́ ɛ́da go úlene naá mmoɛná, giuŋgúlú gɛ́ɛgɔ gɛ́ fóanɛna aŋa gɛantáanta gá ufufu gɛ́ɛgɛ gɛ́ úlenemú na bogaaga, gá gɛ́ go hóogo naá nnyaŋá yɛ́ɛyɛ bá mbaá lɔmɔ́ kɔ́ɔ. 3Kɔ́ɔ bɛ́ ɛ́namɔ́ boóma bó fóanɛna aŋa bɛlɛ́mbɛ bá íyuke bɛ́ɛbɛ bɛ́ mbaá lɔmɔ́ bɛ́ báádona, bɛ́ badɛmana gímmue go gímmue naá onyɔ moánɛ. 4Gɔ́ɔ Gimmúmpúu gá Giliíli a dómbamɔ́ go hóogo boolímínyí biimée, bá báa lɛ gó bayɛga go gálagala dogálɔ dúncodío, aŋa Giliíli a mbaá lɔmɔ́ a bó fáanana bogaaga bá go gálagala.
5Kanɛ́ naá Yolósalɛmɛ, Beyúdene báaba bá búlugenyemú Asaŋa mammana mammana bá mba lɛ́ bɔ́ ɔyɔ hɔ́ɔ, bɛ́ ɛ́da go úlene naá bɛdɔŋɔ bá cí iŋkimée. 6Aŋa bá mbɔɔ́ ɔ́bɔ́ giuŋgúlú gɛ́ɛgɔ, gáábɔ́ go bábándɛgɛna go gitúu, bá ná lɛ́ go éte go ŋgéte, goakɛ́, onyɔ moánɛ a mba lɛ́ ɔ ɔ́bɔnɔ boolímínyí bá gálagala nogálɔ nɛ́hɛ́ ná mbíényée. 7Boóma bɔ́ɔbɔ go bó dómba odóɛ, bá békúke, bá bágálɛnagalɛna bá amɔ́: «Batɔ biimée báaba bá gálagalamɔ́ báaba caá bá lɔ́mɔ́ bégelilée o? 8Nɛɛ́nɛ kanɛ́ dɛ bó ɔ́bɔnɔ onyɔ moánɛ naá nogálɔ nɛ́hɛ́ ná mbíényée o? 9Dɛ lɛ́ háalá na batɔ báaba bɛ́ ɛ́damɔ́ go úlene naá bɛdɔŋɔ bɛ́ɛbɛ bɛ́ lɔ́mɔ́: Pálátɛsɛ, Mɛ́dɛsɛ na Elemíite, batɔ bá Mɛsɔpɔtɛmɛ́ɛ, bá Yudée na bá Kapadósɛ, bá Pɔ́ŋɔ na bá Esíi, 10bá Filisíi na bá Peŋefilíi, bá Egíbítene na bá Libíi mɔ́ɔnyɔ a lɔ́mɔ́ naá Siléene, na batɔ bá Olóma, 11bɛɛcɔ́ɔ biimée, akɛ́ Beyúdene akɛ́ bidugúnúu bá batɔ bɛ́ɛbɛ bɛ́ mbií íŋéné naá gioliminyo gá Beyúdene, Bákɛlɛ́tɛ na Baaláabɛ, dɛ bó ɔ́bɔnɔ bá gálagala bisi bá moóma bá Asaŋa na dogálɔ dɛ́cɔ́ dá mbíényée.» 12Boóma bɔ́ɔbɔ go bó dómba odóɛ, bá békúke bá bágálɛnagalɛna bá amɔ́: «Bɔ́ɔbɔ náana bó lo go bɛ́ɛmba ŋkádɛ naá cí o?» 13Batɔ bóncodío bá hɔnɔ boolímínyí, bá gálagala bá amɔ́: «Batɔ báaba bá báa go gúe mɔgɛ́bɔ.»
Píele a falonanɛna batɔ bɔ́ɔbɔ bó bádómbanamɔ́
14Gɔ́ɔ Píele a dómbamɔ́ go fadɛgɛna tɛ́nɛ́ɛ, olɔŋɔ na Baapótɛlɛ báaba bóncodío bɔ́ɔ́dɔ́ na ummue, gɛ́hɛ́ go ɛ́da go gálagala na bogaaga a amɔ́ gá gitúu a amɔ́: «Bɛɛnyɔ́ɔ Beyúdene, na bɛɛnyɔ́ɔ biimée báaba no ɔyɔmɔ́ háalá naá Yolósalɛmɛ, dámbá nɔnɔ edúu, no ɔ́bɔ bɔ́ɔbɔ ndɔ́mɔ́ goŋaá nnyó oyana. 15Akɛ́ɛ, batɔ báaba bá lɛ́ kanɛ go gúe mɔgɛ́bɔ aŋa gɔ́ɔgɔ no béeniŋenyemú; goakɛ́ dɛ gá lɛ́ goana naá bigúlí bɛ́nnámanyɛ́ na gímmue bá gɛyɛ́nɛ́. 16Kanɛ́ háalá godɔ́ɔdɔ yɛ́ɛyɛ, bó lɔ́mɔ́ go bóhóogio gá dogálɔ dɔ́ɔdɔ mbúsí ya Asaŋa Soɛ́lɛ a mbaá gálágáláa a amɔ́: 17“Mammana, Daadáa Asaŋa o oya a amɔ́: naá medúgú má go súgudinye, ka ŋga fáá mɔtɔ uŋkimée Giliíli bamɛ, kɔ́ɔ bahaŋa na babóla bɛ́nyɔ́ bá ŋgaá húményée dogálɔ dá nɛɔsɛgɔ. Tɔmbɔ́ɔ sɛ́nyɔ́ sɛ́ ŋgɛ ɛ́nánáa biínigie. Gɔnɔ́ bilunú bɛ́nyɔ́ bɛ́ ŋga bɛanánáa ndɛmá. 18Mammana, naá medúgú moánɛ, ka ŋga fáánánáa boyogóní bámɛ bá banɔ́mɔtɔ́ na bá bakɔ́dɔ Giliíli bamɛ, bá ŋga héményée dogálɔ dá nɛɔsɛgɔ. 19Ka ŋga ŋanánáa biseyi bá moóma naá mmoɛná, ŋŋanana bɛsɛɔ háalá naá cí: manɔ́ŋɔ́, íyuke na ncóki gɛca, mó ŋga bɛ́ɛ́mbá. 20Buisí bó ŋgo obá mbíno, ofɛ́ yó gunde bɛ́lɛ́ŋɛ́ bɛlɛŋɛ aŋa manɔ́ŋɔ́, naá busío goŋaá gɛantáanta gá buisí bá nigúmi bá Daadáa bó úle. 21Gɔ́ɔ kanɛ́ mɔtɔ uŋkimée mɔ́ɔnyɔ a ŋgaá buŋé ufíno yá Daadáa a ŋgɛɛ́ ɛ́ná gɛɔyɔ.”
22«Batɔ bá Ɛ́sɛlahɛ́ɛlɛ, ɔ́bɔ́ nɔnɔ bɔ́ɔbɔ ndɔ́mɔ́ goŋaá nnyó oyana: Yésusu, moɔnɔ́ ba Násalɛdɛ#2.22 O bana, go eninye na Mot 2.23; Lók 18.37., mɔ́ɔ a lɔ́mɔ́ mɔtɔ mɔ́ɔnyɔ Asaŋa a mbaá dómá naá kadɛ́gadɛ́ɛ yɛnyɔ́, a báá mo fáá nɛgaŋa ná go ŋanana bɛsɛɔ, muune na biseyi bá moóma aŋa gɔ́ɔgɔ bɛɛnyɔ́ɔ moatɛ́ no íyimenemú. 23Mɔ́ɔ a lɔ́mɔ́ tɔ́nɔ mɔtɔ mɔ́ɔnyɔ bá mbaá nyó dúéné gɔgɔ́ aŋa gokɛsa gá Asaŋa gá moóma gá fueké fueké gó mbaá lɔmɔ́, no mba mo gɔ́lɔ́ no báá mo íŋéné go bologílógí, bá báá mo óná naá kolósi#2.23 Go ɛ́na naá Mot 27.35; Mél 15.24; Lók 23.33; Sáŋa 19.18.. 24Kanɛ́ Asaŋa a mba mo fúfúné, a báá mo dúgúné go makánya má nigúe. Ɛɛ́ɛŋ, bó do mbáa lɛ ba go báŋa goŋaá nigúe a lɔbɛnɔ nɛhɛ́ naá mɔ́ magálá#2.24 Go ɛ́na naá Mot 28.5-6; Mél 16.6; Lók 24.5.. 25Mammana, Défidi a mbo oyɛ́dá go busío bɛ́hɛ́ bá moatɛ́ a amɔ́: Bɛcamɛna biimée mmba lɛ́ nnúune Daadáa naá yɔmɔ́ busío, a lɛ́ naá ombɔ́gɔ onɔ́mɛ yámɛ goŋaá cɛ dagádánáa. 26Boóma bá ndiemi bɔ́ odɛ́má yámɛ yó lɔ́mɔ́ dácɛ na besé, gɔnɔ́ dogálɔ dámɛ dácɛ na bɛyaŋa; goŋaá akɛ́ aŋa nnyɔ́dɔ yamɛ ɛ lɔ́mɔ́ na bonɔ́nɔ́, ka ŋga fuugée na mbémineminie. 27Mammana o do ná bóso go dɛ́ɛna giliíli gámɛ naá begúe, gɔnɔ́ o do ná bóso go dɛ́ɛna Gimmúmpúu bahɔ a yɛka. 28O lɛ́ túfíelú pɛ́ sá gɛɔyɔ, o ná kóogio na bɛyaŋa goŋaá o lɛ́ namɛ#2.28 Go big. 25-28, go ɛ́na naá Ɛsagɔ 16.8-11, naá ŋgɔ́ŋɛ́ sá nogɛlɛ́gɛ ná cóá cóá..
29«Boɔmɛ, ndɛ́ ba go nyó oyana mammana caá: Défidi, isée kɔ́nɔ́ɔ ba biisée bɛcɔ́, a mba lɛ́ gúelú, bá báá mo miée, gɛbɛ́lá gɛ́hɛ́ gɛ́ lɛ́ hɔ́ɔ gó nco go éme ínoni.#2.29 go ɛ́na naá 1 Mefuŋe 2.10. 30Kanɛ́ a mba lɛ́ mbúsí ya Asaŋa, a gɔnɔ go íyimene goŋaá Asaŋa a mba mo gálɛ́dá a báa bálɛáa a amɔ́ a ŋga lukúményée mɔtɔ mɔ́ɔnyɔ naá nogɔgɔ́ nɛ́hɛ́, naá oŋgɛ́yɔ́ yɛ́hɛ́ yá bufuŋe#2.30 Go ɛ́na naá Ɛsagɔ 132.11; 2 Sémuele 7.12-13.. 31Défidi a mba dóáná go ɛ́na bɔ́ɔbɔ bó úlenemú, a báa cambɛ́dá gofúfuge gá Kilítusu a amɔ́: “A dɛ mbáa lɛ dɛ́ɛ́náalú naá begúe, gɔnɔ́ nnyɔ́dɔ yɛhɛ́ ɛ dɛ mbá yɛka.” 32Asaŋa a mba fúfúné Yésusu mɔ́ɔnyɔ kálagalamɔ́, bɛɛcɔ́ɔ biimée báaba dɛ íyimene nɔ́ɔnɔ. 33Asaŋa a mba mo búlúgíe naá ombɔ́gɔ onɔ́mɛ yɛ́hɛ́, a báa gɔ́lɔ́ naá Isée Gimmúmpúu gá Giliíli mɔ́ɔnyɔ a mbaá dáná: mɔ́ a á ná có fáánánáa, gɔ́ɔ gó lɔ́mɔ́ aŋa no núunemú, no ɔ́bɔnɔ náana. 34Défidi, mɔ́ɔ moatɛ́ kanɛ go ɛ́da naá mmoɛná, a mbo oyɛ́dá kanɛ́ a amɔ́: “Daadáa Asaŋa a mbo oyáná Daadáa bamɛ a amɔ́: Lukúméne naá ombɔ́gɔ onɔ́mɛ yámɛ, 35gó ɛ́da go éme aŋa nná ŋamɔ́ goŋaá babɛlɔ́bɛlɔ báhɔ bɛ́ ɛ́ya gɛdálɛ́ná bɛgɔ́ndɔ́ báhɔ#2.35 Ɛsagɔ 110.1..”
36«Ŋgáa boɛ́nɔ bá Ɛ́sɛlahɛ́ɛlɛ buimée bó íyime nɔ́ɔnɔ naá mammana: Yésusu mɔ́ɔnyɔ no lɔ́mɔ́ ónáalú naá kolósi, mɔ́ɔ Asaŋa a lɔ́mɔ́ mo íyíelú Daadáa gɔnɔ́ Mesíi.»
37Aŋa bá mbɔɔ́ ɔ́bɔ́ dogálɔ dɔ́ɔdɔ, gáábɔ́ go sómbɛga odɛ́má. Kɔ́ɔ bú úhunemú Píele na baapótɛlɛ báaba bóncodío bá amɔ́: «Boɔmɛ, kanɛ́ dɛ lɔ́mɔ́ ba go ŋa nɛɛ́nɛ o?» 38Píele go bó gundie a amɔ́: «Núgíe nɔnɔ gɛɔyɔ gɛ́nyɔ́, uŋkimée a béyuminye go ufíno yá Yésu Kilítu goŋaá Asaŋa a nyó héehinye bɛlɔgɔ bɛ́nyɔ́. Hɔ́ɔlɔ́ gɔ́ɔ no gaá ná bɛáa pááná ya Asaŋa, ɛ lɔ́mɔ́ Gimmúmpúu gá Giliíli. 39Mammana, tánɔ ya Asaŋa ɛ lɔ́mɔ́ go busío bɛ́nyɔ́ na baaná bɛ́nyɔ́, na biiménénée báaba bɔ́ ɔyɔmɔ́ halaháláa háalá, gɛca aŋa Daadáa Asaŋa bɛcɔ́ a ná bó dɔ́ŋɔnɔmɔ́.» 40Na dogálɔ gɔnɔ́ dúncodío, Píele a mbɛ ɛ́dá naá busío a bó dúfenye, a bó gíndenye, o oya a amɔ́: «Bósódíomú nɔnɔ go gɛgáda gá ogɛlɛ yɔ́ɔyɔ.» 41Gɛca naá bɔ́ɔ gɛ́ mbo olímínyóo dogálɔ dá Píele, gɛ́ báá béyumínyée. Buisí moánɛ bɔ́ɔbɔ, batɔ makana tɔ́sɛnɔ ɛ́dadɔ́ gáábɔ́ go bégídene naá olɔŋɔ yá boolímínyí.
42Bá mba lɛ́ bá bííŋenene go go ɔ́bɔnɔ gohúunenye gá baapótɛlɛ. Bé ebinye ebinye aŋa bolimóní. Bá nyáanya émmué, bá bósógolonyo olɔŋɔ.
Gɛɔyɔ naá kadɛ́gadɛ́ɛ ya boolímínyí bá busío
43Mɔtɔ uŋkimée a mba lɛ́ a díine Asaŋa, goakɛ́ baapótɛlɛ bá mba lɛ́ bá ŋanana gɛca gá muune na bieninye bá go békúke. 44Biimée báaba bá mbaá lɔmɔ́ olímínyóolú bá mba lɛ́ báladáalú, bé ebinye ebinye buimée bɔ́ɔbɔ bá mbaá lɔmɔ́ na bɔ́. 45Bá mba lɛ́ bá dúenene cí sábɔ́ na moóma mɔ́ɔmɔ bá mbaá lɔmɔ́ bá bɛanana, bá lɛ go ɛ́da go dáŋabana muinyí mɔ́ɔmɔ mó húmemú hɔ́ɔ, onyɔ moánɛ a bɛa aŋa masɔ́mɔ mɛ́hɛ́ má lɔ́mɔ́. 46Ukelú yúmmue, bá mbá lɛ́ miisí miimée, bɛ́ ɛ́da bábánda naá Nnyaŋá ya Asaŋa kanɛ go súge, bá mba lɛ́ bá nyáanya olɔŋɔ yúmmue naá nnyaŋá sábɔ́ na bɛyaŋa tɔ́nɔ na odɛ́má yá lɛbɛlɛbɛ. 47Bá mba lɛ́ bá búlugenye Asaŋa, batɔ biimée bá bó maamana. Kɔ́ɔ Daadáa a mbaá lɔmɔ́ a gídenine miisí miimée naá olɔŋɔ yá boolímínyí batɔ báaba a mbaá lɛ bó sódíolú.
Currently Selected:
Meŋiigíe 2: YAS
Highlight
Share
Copy
Want to have your highlights saved across all your devices? Sign up or sign in
