Meŋiigíe 1
1
Baapótɛlɛ bá gɛ́gana go úle gá Gimmúmpúu gá Mefúnyi
1-2Tiófili, naá kálata yamɛ ya busío#1.1-2 Go ɛ́na naá Lók 1.1-4; kálata ya Meŋiigíe bó lɔ́mɔ́ gó ɛ́da naá busío gá Gɛnɔ́gɔ́ gá Cɔ́mɔ gá Lókasɛ. yɛ́ɛyɛ mmbɔɔ́ ɔ́ŋɔ́, mmbo oyáa kɔ́ɔ boóma buimée bɔ́ɔbɔ Yésusu a mbaá ŋanánáa, a báá gundé a báá húúnényée gó dúme naá mabayɛga gó ɛ́da bola naá buisí bɔ́ɔbɔ Asaŋa a mbaá mo gɔ́lɔ́ naá mmoɛná. Hɔ́ɔlɔ́, na bogaaga bá Gimmúmpúu gá Giliíli, a báa go síe a bíí íŋéné baapótɛlɛ báaba a mbií iyídé, bɛlɔsɛnɔ bɛ́hɛ́. 3Naá nnyimé ya nigúe nɛ́hɛ́, goŋaá á ba loodío goŋaá a lɛ́ ogɔ́sɔ, a báá bó bédúfényée mbɔ́dɔ mbɔ́dɔ; a mba ŋaáa nɔ́ɔnɔ medúgú otíno áhandɛ́, a bó ɛ́nɛganɛna, a bó oyanɛna masɔ́mɔ má Nigúli ná Asaŋa.
4Budúgú búmmue, bá lɛ́ naá manyáanya, gɛ́hɛ́ go bó lɔsɛnɔ a amɔ́: No do úlúkíe naá Yolósalɛmɛ, no gɛ́gana hɔ́ɔ tánɔ yɛ́ɛyɛ Baaba a mbaá dáná, pááná yɛ́ɛyɛ mmbaá nyó oyáná#1.4 Go ɛ́na Lók 24.49.. 5Ɛɛ́ɛŋ, Sáŋa a mba yuménínyée na miimpo, kanɛ́ bɛɛnyɔ́ɔ, naá baaná bá medúgú, no ná bɛ́ɛmba yuménínyéelú naá Gimmúmpúu gá Giliíli#1.5 Go ɛ́na naá Mot 3.11; Mél 1.8; Lók 3.16; Sáŋa 1.33..
Asaŋa a á gɔ́lɔ Yésusu naá mmoɛná
6Aŋa bá mbaá lɔmɔ́ bábándɛ́gɛ́náalú, Baapótɛlɛ go mo úhune bá amɔ́: Daadáa, naá gɛcamɛna gɛ́ɛgɛ gɔ́ɔ o ná gɔnɔmɔ́ díliminye bufuŋe bá boɛ́nɔ bá Ɛ́sɛlahɛ́ɛlɛ#1.6 O bana, go eninye na Ámoso 9.11-12; Lók 19.11. lí? 7Yésusu go bó gundie a amɔ́: No do bɛanánáa goŋaá no íyime gɛcamɛna gɛ́ɛgɛ Baaba moatɛ́ a mbaá sómbá go nɛgaŋa nɛ́hɛ́#1.7 O bana, go eninye na Mél 13.32.. 8Kanɛ́ no ná bɛa bogaaga bɔ́ɔbɔ Gimmúmpúu gá Giliíli a ná nyó siisenemú na bɔ́, gɔ́ɔ no ná bɛ́ɛmbamɔ́ ŋgominyo sámɛ naá Yolósalɛmɛ, naá Yudée uŋkimée, naá Samalɛ́ɛ na naá cí iŋkimée#1.8 Mot 28.19; Mél 16.15; Lók 24.47-48.. 9Naá nnyimé ya dogálɔ dɔ́ɔdɔ, Asaŋa go gɔ́lɔ Yésusu naá mmoɛná naá oŋgíso yábɔ́, nogálámbá go mo lindige bá dɛ gɔnɔ́ mo ɛ́na#1.9 O bana, go eninye na Mél 16.19; Lók 24.50-51.. 10Bá gá lɛ́ oŋgíso áfɛ́gáalú go mmoɛná go go núune anáa Yésusu a mbaá lɔmɔ́ ɛ́dáalú, batɔ báandɛ́ na bɛla bimmúmpúu go bó basɛna#1.10 O bana, go eninye na Lók 24.4.. 11Bá amɔ́ gáábɔ́ bá amɔ́: Bégelilée báaba, nɛɛ́nɛ no cɛ́ɛnamɔ́ hɔ́ɔlɔ́ go go núune mmoɛná o? Yésusu mɔ́ɔnyɔ a nyó úlukinyemú go go ɛ́da naá mmoɛná mɔ́ɔnyɔ, a ŋga ncó gunde caŋa táŋɛ́ mmue aŋa no báá ná mo ɛ́ná ɛ ɛ́dana.
Matɛ́asɛ a á gɔ́lɔ́ undukí yá Yódasɛ
12Gɔ́ɔ Baapótɛlɛ bá fadɛgɛnamɔ́ naá gɛɛnɛ gɛ́ɛgɛ bá dɔ́ŋɔnɔmɔ́ bá mɔ́ Ogɔndɔ yá magónɛ́dá má boolifíe, bá báá gundé naá Yolósalɛmɛ; gɛɛnɛ moánɛ gɛ́ lɛ́ mekúígíi na Yolósalɛmɛ boóma bá kílo mɛ́da mmue. 13Bá á bolá naá Yolósalɛmɛ, gáábɔ́ go bólɛga naá nɛgɛlɛ́ nɛ́ɛnɛ nɛ́ mbaá lɔmɔ́ naá nnyaŋá mmoɛná anáa bá mbaá lɔmɔ́ bá gɛ́ga gɛcamɛna giimée; bá mba lɔmɔ́: Píele, Sáŋa, Sáakɛ na Andɛlɛ́ɛ, Fílibi, Tómasɛ, Betelemíi na Motíosi, Sáakɛ ohaŋa ba Alɛfɛ́ɛ, Símono ba go noanana goŋaá gɛdɔŋɔ gɛ́hɛ́ gɛ́ bábɛa, na Yúude, ohaŋa ba Sáakɛ#1.13 O bana, go eninye na Mot 10.2-4; Mél 3.16-19; Lók 6.14-16.. 14Biimée, ukelú yúmmue, bá mba lɛ́ bá bénebigenye bɛcamɛna biimée bá bósógolonyo, olɔŋɔ na bakɔ́dɔ, na Malɛ́a, nnyeedíi ba Yésusu, na bolimóní bá Yésusu.
15Buisí búmmue, boolímínyí bá go húme boóma bá ntɛdɛ na nitíno bá mba lɛ́ bábándɛ́gɛ́náalú. Kɔ́ɔ Píele a fadɛgɛnamɔ́ naá kadɛ́gadɛ́ɛ yabɔ́, go dúme a amɔ́:
16Bolimóní, boóma bɔ́ɔbɔ Gimmúmpúu gá Giliíli a mboó oyáa naá ŋgɔ́ŋɛ́ naá nyuudé ná Défidi, bó mba lɛ́ bó háanana go bóhóogio; goŋaá gɛ́ mba dóáná go gálagala go Yódasɛ#1.16 O bana, go eninye na Ɛsagɔ 41.10. mɔ́ɔnyɔ a lɔ́mɔ́ ɛ́yáalú ugógí ba batɔ báaba bá mbaá gumbéné Yésusu.
17Yódasɛ ba ndiemi a mba lɛ́ ummue mɔ́ɔnyɔ naá olɔŋɔ yɛ́cɔ́; a báá bɛáa bɛ́hɛ́ bodáŋɔ naá buelí bɛ́cɔ́.
18Na muinyí mɔ́ɔmɔ bá mbaá mo soɛná go ŋgónana yɛhɛ́, a báá bɔ́ɔ́ndɛ́nɔ́ ntɛ́mɛ́; gɔ́ɔ a mboó obá hɔ́ɔ na odóɛ, nnyɔ́dɔ yɛhɛ́ ɛ báá bumúgé go tɛ́mádɛ́má, mágadɛ́ɛ mɛ́hɛ́ miimée má báá sugúgé go cí. 19Batɔ bá Yolósalɛmɛ biimée bá mbɔ ɔ́bɔ́nɔ́ɔ bosɔ́mɔ moánɛ. Kɔ́ɔ bá mbaá dɔ́ŋɛ́nɔ́ ntɛ́mɛ́ yɛ́ɛyɔ, na nogálɔ nábɔ́, bá amɔ́ Hakɛlɛdáma, naá cí goŋaá Ntɛ́mɛ́ ya manɔ́ŋɔ́#1.19 Go big. 18-19, go ɛ́na Mot 27.3-8.. 20Kanɛ́ bó lɛ́ ɔ́ŋɔ́ɔlú naá kálata ya Ɛsagɔ goŋaá: Ŋgáa nnyaŋá yɛhɛ́ ɛ síene gɔdɔɔ́. Mɔtɔ a dɛ gɔnɔ́ bɛ́dɛmɛna kɔ́ɔ; bó lɛ́ ɔ́ŋɔ́ɔlú gɔ́nɔ́ goŋaá: Ŋgáa mɔtɔ uncodío a gɔ́lɔ undukí yɛ́hɛ́#1.20 Ɛsagɔ 69.26; 109.8.. 21-22Bó úhene kanɛ́ goŋaá mɔtɔ ummue naá olɔŋɔ yá batɔ báaba bá á ná lɔmɔ́ bá có díligenene gɛcamɛna giimée gɛ́ɛgɛ Daadáa Yésusu a á nɔ́ ɔyɔ́ɔ naá kadɛ́gadɛ́ɛ yɛcɔ́, a có bégídene, go go bɛ́ɛmba ŋgominyo ya púfuge naá begúe ya Daadáa Yésusu. Gó bayɛga aŋa Sáŋa a mbaá mo yumínyée, gó nco húme aŋa bá lɔ́mɔ́ mo gɔ́lɔ́ɔlú go go ɛ́da naá mmoɛná.
23Gɔ́ɔ bá sɔ́nɔmɔ́ batɔ báandɛ́: Yósɛbɛ, mɔ́ɔnyɔ bá dɔ́ŋɔnɔmɔ́ bá amɔ́ Balasábasɛ, bá gɔnɔ mo fínenye bá amɔ́ Yútusu, na Matɛ́asɛ. 24Gɔ́ɔ biimée bɛ́ ɛ́damɔ́ go bósógolonyo bá amɔ́: Daadáa, maamɔ́ɔ mɔ́ɔnyɔ go íyimenemú ɛdɛ́má ya batɔ biimée, có dúfíemú naá batɔ bá báandɛ́ báaba, mɔ́ɔnyɔ go iyidemú. 25A gɔ́lɔ undukí yá Yódasɛ naá buelí bá go dúmenye gɛnɔ́gɔ́ gá cɔ́mɔ, bɔ́ɔbɔ a mbaá síé a báá cecúgíe go go ɛ́da naá undukí yɔ́ɔyɔ yó háananamɔ́ nɛhɛ́. 26Gɔ́ɔ bá nɔɔmɔ́ adɔ go go iyide ummue naá batɔ bá báandɛ́ bɔ́ɔbɔ; adɔ go iyide Matɛ́asɛ, a báá bégídéné naá ombanɔ yá baapótɛlɛ bɔ́ɔ́dɔ́ na ummue.
Currently Selected:
Meŋiigíe 1: YAS
Highlight
Share
Copy
Want to have your highlights saved across all your devices? Sign up or sign in
