Lúkɑ́shi 3
3
Jɑ̂ŋ cúnɛ ŋɡɔ pʉɔ kúpmɛ mɑt wɔp
(Mɑtʉ̈ɔ 3.1-10; Mɑ́lɛ́kúshi 1.1-6)
1-2Jɑ̂ŋ mɔ́ɔ Sɑkɑlíyɑ lɑ́Ꞌ ńtswɛ́ kɔ̂ŋtɛt tɛ Sɛ́ túu wɛ́ ŋɡɔ ɑ ɡʉ ɛ́sẅíi nu yɛ́. Ɛ́ pɔ́ ŋɡuꞋ ɛ̂yɑ́, mbɔ Kɑ́sɑ Tíbɛɛ ẅi ɑ m̄bɔ́nɛ ɛ́sɑ́Ꞌ ŋɡɔŋ nɛ́ ŋɡɔŋ, mbɔ ɑ nɑ́ŋ nǔu kɔꞋ ŋɡuꞋ ntsɔ̌pɛ́tɑɑ nɛ́ nɛɡɛ́m. Pɔ́ŋnti Pilɑ́tɔ pɔ́ ŋɡɔ́mnɑɑ ŋɡɔ́ŋ-Jẅidɛ̂, Ɛlɔ̂dɛ pɔ́ sɑ́Ꞌ ŋɡɔ́ŋ-Ŋɡɑlilɛ́, mɔ́ɔmɑ́ wɛ Filîp pɔ́ sɑ́Ꞌ Itẅílíyɑ pɔ́p Tɛ́lɑkɔnît, Lisɑníyɑs pɔ́nɛ ɛ́sɑ́Ꞌ Abilɛ̂n. Ánɑ pɔ́p Kɑyífɑ pɔ́ pɛtɑ́tndɑ́-pɑnɔ́ŋpɔꞋ. 3Jɑ̂ŋ ɡɔ́ɔ ŋ́ɡʉ tsɛt mɛlɑ́Ꞌ mi ɛ́ ŋkɑŋ-ŋki Juudɛŋ, ńnɛn sɑ́Ꞌ lɑ́Ꞌ ŋɡɔ:
Pɔ́p kúpmɛ mɑt wɔp ńnuꞋ wɔ́p ŋki, Sɛ́ likŋɛ mɛnu kɛpɔŋ mɔ́p ŋ́ɡɑ́ mbɔ̌ pɔ́p.
4Ɛ́ lɔk ḿbuutɛ nǔu nu yí Ɛsɑ̌yɑ, ŋɡɛ́mndʉ̈ɔ́Ꞌ-Sɛ́ kɑ ŋwɑꞋnɛnɛ ŋɡɔ:
«Ŋɡi-ŋu kɔ́Ꞌ ɛ́fú kɔ̂ŋtɛt ńcú ŋɡɔ:
Pʉʉ niitɛ sɛ̂ndúŋ Tsɑpʉɔ,
ŋ́ɡɛ mɛlɛ̌ɛndúŋ mɛ́ tʉ́ʉ ndʉ́ŋndʉŋ!
5Ńdẅíkŋɛ mɛfúꞋ tsʉʉ mi ɛ́ nǔu,
ŋ́kɔk mɛmbɑ́t pɔ́p mɛŋkɔ́Ꞌ tsʉʉ,
ɛ́sɛn ndúŋ ŋɔ́Ꞌnɛ́nɛ ɛ́ tʉ́ʉ ndʉ́ŋndʉŋ,
ŋ́kwɑk mɛlút mi ɛ́ ndǔ sɛ̂ndúŋ ɛ́sɑŋtɛ!
6Lɑ́ ɛ́ lɛɛ pɔ́Ꞌɔ, pʉɔ pɛtsʉʉ jʉ́ɔ pɑ́Ꞌ Sɛ́ ɡʉ ŋ́ɡɛ pɛkŋɛ luk.»
7Jɑ̂ŋ cú pɔ́Ꞌɔ, pʉɔ tɛ ńzɑ́ɑ pɔ́ ńtɔ́ pɑ́Ꞌ ɑ ńnuꞋ wɔ́p ŋki. A pɔ́ ńcú mbɔ̌ pɔ́p ŋɡɔ: «Njẅɛt-mɛnɔ́, pɑtɑ́ɑ mɛzúŋ! Wɔ̌ sẅíinɛ wʉ́ʉ nɛkʉɔ ŋɡʉ̈ɔ́Ꞌ yi pʉʉ lɔ́ɔnɛ tɛ ɛ́ pɔ́ ŋ́ɡʉ ŋ́kúu nǔu pʉʉ? 8Pʉʉ kúp pɔ mɑt, ŋ́ɡɛ mɛnu sʉ́Ꞌnɛ mi ɛ́ nyɛtnɛ ŋɡɔ pʉʉ kúpmɛ. Pʉʉ pɑ́ɑ nɛlɔk ndɑꞋ ntsu wʉ́ʉ ńcú ŋɡɔ: Pɛk pɔ́ɔ-Ábɛlɛhɑm. Lɑ́ ŋ kɛ́ ɛ́sẅíi wʉ́ʉ: Sɛ́ kuꞋ nɛshɔt mɛŋɡɔꞋ mɔnɛ ńdɔk ŋ́ɡɛ njẅɛt-Ábɛlɛhɑ̂m. 9Pɛ́ kɛ́ mɔ́ ńzɛ ńtíi nzɑɑ nɛlɔk ŋ́kʉ́ɔꞋ mbɑ yɛ́tɛ́ tʉ́ lɑ́ yi ɛ́ sɛ́ ḿbɔɔ ńzɛ́m ntɑ́ɑ-sʉ́Ꞌnɛ pɔ́, ɛ́fú sɛ́ ŋ́kʉ́ɔꞋ wɛ́ ḿmɑꞋ pɔ múk.»
10Lɑ́Ꞌ zúꞋ, ḿbíkŋɛ wɛ́ ŋɡɔ:
«Tɛ pɛk ŋ́ɡɛ pɑ́Ꞌɑ?»
11A tsɔ́Ꞌ mbɔ̌ pɔ́p ŋɡɔ:
«Ŋu wʉʉ lɑ́ɑ ŋ́ɡẅɛɛ mɛndẅí mɛ́mbɑ́, ɑ ɡɑ́ tɑ́Ꞌ mbɔ̌ ŋu ẅi ɑ zɛ ḿbɔɔ yɛcɔ́ ɡẅɛɛ. Ŋu ẅi ɑ ɡẅɛɛnɛ yúujʉ́, ɡɑ́ yɛ ŋu ẅí nji sɛ́ ńzɑ́ŋ wɛ́.»
12Pɑcẅɛ́ɛntsup-Pʉɔlɔ́mɑ kɑ tɔ́ yɔ́p pɑ́Ꞌ pɛ́ ɡɛ ńnuꞋ wɔ́p ŋki, ḿbíkŋɛ ŋɡɔ:
«Cícɑ, tɛ pɛk ɡʉ ŋ́ɡɛ yɛk ŋɡɔ ku?» 13Jɑ̂ŋ tsɔ́Ꞌ mbɔ̌ pɔ́p ŋɡɔ:
«Pʉʉ cẅɛ́ɛ ndɑꞋ yúu mi nɛpʉ́ʉ-Sɛ́ sɛ́ ḿbíkŋɛ, kɔɔ pʉʉ kẅiꞋ!»
14Pɑlʉ̈ɔ́Ꞌntsɔ pɛn ḿbíkŋɛ yɔ́p ŋɡɔ: «Ŋ́ɡʉ nǔu pɛk, pɛk ŋ́ɡɛ pɑ́Ꞌɑ?» A pʉ̈ɔt ŋɡɔ:
«Kɔɔ pʉʉ lɔk mɛtʉʉ mbɑ cɔtnu ɛ́fyɛ́t ŋu ńcẅɛ́ɛ ŋkɑ́p yɛ. Pʉʉ zẅiꞋlɛ pɔ ndɑꞋ ŋkɑ́p-fɑꞋ yʉʉ.»
15Pɑ́Ꞌ ɛ́ kɑ ɡɔ ḿbɔ́ lɑ́Ꞌ pɔ́ ńzẅíꞋlɛ Nzɑ́Ꞌŋkʉ ẅí Sɛ́ kɑ kɑꞋnɛ lɑ́, mbɑ wɔ̌ lɑ́ pɔ́ ḿbíkŋɛ tsɛt tʉ́m yɛ́ ŋɡɔ: Kɛ Jɑ̂ŋ lɔk ḿbɔ́ pɔ jʉ́? 16Lɑ́ ɑ pʉ̈ɔt mbɔ́ pɔ́p pɛ́tsʉʉ ŋɡɔ: «Mɔ, ŋ ɡẅɛɛ yɑ́ɑ pɔ ndɑꞋ nɛnuꞋ wʉ́ʉ ŋki. Lɑ́ kwɑꞋ ŋu ɡwɛ́ sɛ́ ńtɔ́; ɑ lɛɛ wɑ́ɑ tɛꞋ, ŋ kɑ́ kuꞋ nɛkyɛ́Ꞌ mɛŋkʉ-mɛtɑp mɛ́ pɔ́. A ɡʉ ńtɔ́ ńníꞋ pʉɔ tsɛt mbɔ́-Zẅikŋɛ Lɛ́ɛnɛ́nɛ, ḿbɛn ńníꞋ pʉɔ tsɛt múk.» 17A ɡʉ ńtɔ́ ɛ́fɑ́k yúu mi pɛ́ púꞋnɛ, ńníꞋ yi sʉ́Ꞌnɛ ŋkɛn, ńtsʉ́ꞌ kyɑŋɛ, ḿbʉ̈ɔt tsɛt múk ẅi ɛ́ ŋ́ɡʉ ńdɑ́Ꞌ ḿbɛ́ pɔ́.
18Jɑ̂ŋ pɔ́ ɛ́sɑ́Ꞌ Ŋkʉʉ sʉ́Ꞌnɛ pɔ́Ꞌɔ, ḿbɛn ŋ́ɡɑ́ mɛntík tɛ ńzɑ́ɑ mbɔ̌ lɑ́Ꞌ.
19A kɑ kɑkŋɛ mbɑ ŋɡɔ́mnɑɑ Ɛlɔ̂dɛ ntɛ́ pɑ́Ꞌ ɑ kɑ tíinɛ Ɛlɔ̂díyɑ ẅi ɑ m̄bɔ́nɛ nzwɛ́-mɔ́ɔmɑ́ wɛ, ḿbɛn ŋ́kɑkŋɛ wɛ́ ntɛ́ mɛcɔ́ mɛnu kɛpɔŋ tɛ ńzɑ́ɑ. 20Ɛlɔ̂dɛ ɡɔ mɛkŋɛ ńcɔp, ńcú pɛ́ ɡẅɛɛ Jɑ̂ŋ ḿmɑꞋ ndɑ́tsɑ́ŋ.
Yɛ́su tɔ́, pɛ́ nuꞋ wɛ́ ŋki
21Jɑ̂ŋ kɑ kɛ́ ŋ́ɡɔ ŋ́kúu tsɑ́ŋ, mbɔ ɛ́ m̄bɔ́ yɛcɔ́ lɛ́Ꞌ, ɑ nuꞋ pʉɔ ŋki tɛ ɛ́ mɛ, Yɛ́su tɔ́ yɛ́, ɑ nuꞋ wɛ́ ɡúu ŋki. Pɑ́Ꞌ ɑ ḿbɔ́ ŋ́ɡúꞋlɛ Sɛ́, ntsu-tʉ́ nɛpú tsɔ́Ꞌnɛ ntʉ́ʉ. 22Zẅikŋɛ Lɛ́ɛnɛ́nɛ cúŋ pɑ́Ꞌ puutɛ lɑ́, ńtʉ́ʉ nǔu yɛ, ŋɡi fú tʉ́nɛ́pú ŋɡɔ: «Ɔ mɔ́ɔ wɑɑ, ŋ kɔŋ wú tɛꞋ, ɔ yɑ́ɑ tsɑ́ɑtɛ.»
Pɛmɑ̂ɑŋɡɑpnjẅɛt-Yɛ́su
23Yɛ́su kɑ ɡɔ ńzɛ nɛsɑ́Ꞌ Ŋkʉʉ sʉ́Ꞌnɛ, ɛ́ ńtsʉ́Ꞌ mɔ́yúu ɑ ɡẅɛɛ ŋɡuꞋ mɛɡɛ́mɛ́ntɑ́t, pɛ́ pɔ́ ŋ́kwɑŋɛ ŋɡɔ ɑ mɔ́ɔ-Yɔsɛ̂p. Yɔsɛ̂p pɔ́ mɔ́ɔ-Ɛlîi. 24Ɛlîi pɔ́ mɔ́ɔ-Mɑtɑt. Mɑtɑt pɔ́ mɔ́ɔ-Lɛ́vi. Lɛ́vi pɔ́ mɔ́ɔ-Mɛ̂lshi. Mɛ́lshi pɔ́ mɔ́ɔ-Jɑnɑ̂y. Jɑnɑ̂y pɔ́ mɔ́ɔ-Yɔsɛ̂p. 25Yɔsɛ̂p pɔ́ mɔ́ɔ-Mɑtɑtíɑs. Mɑtɑtíɑs pɔ́ mɔ́ɔ-Ámɔs. Ámɔs pɔ́ mɔ́ɔ-Nɑwûm. Nɑwûm pɔ́ mɔ́ɔ-Ɛslí. Ɛslí pɔ́ mɔ́ɔ-Nɑɡɑ̂y. 26Nɑɡɑ̂y pɔ́ mɔ́ɔ-Mɑɑt. Mɑɑt pɔ́ mɔ́ɔ-Mɑtɑtíɑs. Mɑtɑtíɑs pɔ́ mɔ́ɔ-Sɛ́mɛ̂n. Sɛ́mɛ̂n pɔ́ mɔ́ɔ-Yɔsɛ̂k. Yɔsɛ̂k pɔ́ mɔ́ɔ-Jɔ́dɑ. 27Yɔ́dɑ pɔ́ mɔ́ɔ-Yɔɑ́nɑŋ. Yɔɑ́nɑŋ pɔ́ mɔ́ɔ-Lɛ́sɑ. Lɛ́sɑ pɔ́ mɔ́ɔ-Zɔlɔbɑbɛl. Zɔlɔbɑbɛl pɔ́ mɔ́ɔ-Sɑlɑtiɛ̂l. Sɑlɑtyɛl pɔ́ mɔ́ɔ-Nɛlí. 28Nɛlí pɔ́ mɔ́ɔ-Mɛ̂lshi. Mɛ̂lshi pɔ́ mɔ́ɔ-Adí. Adî pɔ́ mɔ́ɔ-Kɔsɑm. Kɔsɑm pɔ́ mɔ́ɔ-Ɛlmɑ́ndɑm. Ɛlmɑndɑm pɔ́ mɔ́ɔ-Ɛt. 29Ɛt pɔ́ mɔ́ɔ-Yɛ́su. Yɛ́su pɔ́ mɔ́ɔ-Ɛliyɛ́zɛɛ. Ɛliyɛ́zɛɛ pɔ́ mɔ́ɔ-Yɔlîm. Yɔlîm pɔ́ mɔ́ɔ-Mɑtɑt. Mɑtɑt pɔ́ mɔ́ɔ-Lɛ́vi. 30Lɛ́vi pɔ́ mɔ́ɔ-Simɛyɔ̂ŋ. Simɛyɔ̂ŋ pɔ́ mɔ́ɔ-Jẅídɑ. Jẅídɑ pɔ́ mɔ́ɔ-Yɔsɛ̂p. Yɔsɛ̂p pɔ́ mɔ́ɔ-Yɔnɑ̂m. Yɔnɑ̂m pɔ́ mɔ́ɔ-Ɛliyɑ́kim. 31Ɛlíyɑkim pɔ́ mɔ́ɔ-Mɛlɛ́yɑ. Mɛlɛ́yɑ pɔ́ mɔ́ɔ-Mɛ́nɑ. Mɛ́nɑ pɔ́ mɔ́ɔ-Mɑtɑtɑ. Mɑtɑtɑ pɔ́ mɔ́ɔ-Nɑtɑ̂ŋ. Nɑtɑ̂ŋ pɔ́ mɔ́ɔ-Ndɑvît, 32Ndɑvît pɔ́ mɔ́ɔ-Jɛsɛ́. Jɛsɛ́ pɔ́ mɔ́ɔ-Ɔbɛ̂t Ɔbɛ̂d pɔ́ mɔ́ɔ-Mbɔ̂ɔz. Mbɔ̂ɔz pɔ́ mɔ́ɔ-Sɑllɑ. Sɑllɑ pɔ́ mɔ́ɔ-Nɑɑsɔ̂n. 33Nɑɑsɔŋ pɔ́ mɔ́ɔ-Amínɑdɑp. Amínɑdɑp pɔ́ mɔ́ɔ-Admin. Admin pɔ́ mɔ́ɔ-Aɑnî. Aɑnî pɔ́ mɔ́ɔ-Ɛ́slɔm. Ɛslɔm pɔ́ mɔ́ɔ-Pɛlɛ̂s. Pɛlɛ̂s pɔ́ mɔ́ɔ-Jẅídɑ, 34Jẅídɑ pɔ́ mɔ́ɔ-Yɑkɔ̂p. Yɑkɔ̂p pɔ́ mɔ́ɔ-Ɛ́sɑk. Ɛ́sɑk pɔ́ mɔ́ɔ-Ábɛlɛhɑ̂m. Ábɛlɛhɑ̂m pɔ́ mɔ́ɔ-Tɛlɑ́. Tɛlɑ́ pɔ́ mɔ́ɔ-Nɑhɔ̂ɔ. 35Nɑhɔ̂ɔ pɔ́ mɔ́ɔ-Sɛluk. Sɛluk pɔ́ mɔ́ɔ-Lɑɡɑ́ɔ. Lɑɡɑ́ɔ pɔ́ mɔ́ɔ-Fɑlɛk. Fɑlɛk pɔ́ mɔ́ɔ-Hɛbɛ̂ɛ. Hɛbɛ̂ɛ pɔ́ mɔ́ɔ-Sɑllɑ. 36Sɑllɑ pɔ́ mɔ́ɔ-Kɑynɑm. Kɑynɑm pɔ́ mɔ́ɔ-Álfɑksɑ̂t. Alfɑksɑ̂t pɔ́ mɔ́ɔ-Sɛ̂m. Sɛ̂m pɔ́ mɔ́ɔ-Nɔwɛ́. Nɔwɛ pɔ́ mɔ́ɔ-Lɑmɛ̂k. 37Lɑmɛ̂k pɔ́ mɔ́ɔ-Mɑtúsɑlɑ. Mɑtúsɑlɑ pɔ́ mɔ́ɔ-Hɛnɔk. Hɛnɔk pɔ́ mɔ́ɔ-Yɑlɛ̂t. Yɑlɛ̂t pɔ́ mɔ́ɔ-Mɑlɛlɛ̂l. Mɑlɛlɛ̂l pɔ́ mɔ́ɔ-Kɑynɑm. 38Kɑynɑm pɔ́ mɔ́ɔ-Ɛ́nɔs. Ɛnɔs pɔ́ mɔ́ɔ-Sɛt. Sɛt pɔ́ mɔ́ɔ-Ádɑm. Ádɑm pɔ́ ẅi Sɛ́ kɑ pɔ́ɔnɛ́ wɛ́.
Currently Selected:
Lúkɑ́shi 3: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
