Lúkɑ́shi 2
2
Nɛpí-Yɛ́su
(Mɑtʉ̈ɔ 1.18-25)
1Ɛ́ kɑ ɡɔ ḿbɔ́#2.1 Ɛ́ kɑ ɡɔ ḿbɔ́: Ɛ́ lɔk ḿbɔ́ ŋɡɔ pɛ́ kɑ ɡɔ́ ḿbí Jɑ̂ŋ., mbɔ Aɡúshi, ẅi ɑ m̄bɔ́nɛ Kɑ́sɑ-Pɑlɔ́mɑ ŋwɑꞋnɛ ŋwɑꞋnɛ, ńzɑ́p ŋɡɔ pɛ́ sɑ́ŋ ŋɡɔŋ pʉɔ tsʉʉ pi ɑ sɛ́ ɛ́sɑ́Ꞌ wɔ́p. 2Ɛ́ lɔk ḿbɔ́ nduŋmbi nɛsɑ́ŋ pʉɔ pɔ́Ꞌɔ. Kilinyûs pɔ́ ŋkɑ́ yîyɑ́, ḿbɔ́ Ŋɡɔ́mnɑɑ tsɛt ŋɡɔŋ Siliyɑ. 3Mbɑ wɔ̌ lɑ́ ɡɔ́ɔ ŋ́kɛ́ ḿbɔ́ ḿbɛn nɛsɑ́Ꞌ pɔ́p, ŋ́ɡɛ pɛ́ sɑ́ŋ wɛ́.
4Yɔsɛ̂p fú tʉ́sɔŋ-Nɑ́ɑzɑlɛt, tsɛt ŋɡɔ́ŋ-Ŋɡɑlilɛ́, ńtɔ́ tsɛt ŋɡɔ́ŋ-Jẅidɛ̂, tʉ́sɔŋ-Mbɛ́tɛ́lɛ́hɛm, nǔu zʉꞋ yinɛ pɛ́ kɑ pinɛ fɔɔ Ndɑvît zúꞋu, ḿbɔ́ ŋ́ɡʉ zúꞋu pɔ́Ꞌɔ, mbíꞋŋɡɔ ɑ ŋu nǔu njẅɛt ndɑ́-fɔɔ Ndɑvît. 5Pɔ́p nzwɛ́ wɛ Mɑlíyɑ ɡɔ ŋ́ɡʉ pɛ́ sɑ́ŋ wɔ́pmɛ́, ɑ pɔ́ shǔutɛ. 6Ŋ́kúu zúꞋu, mɔ́ɔ zɛ nɛnɛ́m Mɑlíyɑ. 7A pí mɔ́ɔ nɛtú wɛ, ɑ pɔ́ mɔ́ɔ mbɛ́ɛnɛ. A lɔk yúu-ndẅí ŋ́kɑ́tɛ wɛ́, ńníꞋ tsɛt ŋkɔp-yúujʉ́-mɛyúumɛku, mbɔ pɔ́p lɑ́Ꞌ ńjɑ́k yɔ́p zʉꞋ nɛlɛ́ tsɛt ndɑ́-pɛɡʉʉ. 8Ɛ́ pɔ́ ŋkɑ́ ɛ̂yɑ́, pɑpyɛ́p mbí shʉ́ zúꞋu pɔ́ ńdɛ́ píi ḿbyɛ́p mbí yɔ́p, 9ŋ́ɡɔ ńjʉ́ɔ, Cʉ̈ɔꞋ-Sɛ́ cẅɛt mbi pɔ́p, vuvuk-Tsɑpʉɔ ɡẅɛɛ wɔ́p, zʉꞋ puu ŋ́kíɛꞋnɛ, pɔ́p tsʉ́Ꞌ ḿbɔ́k pɔ́knɛ. 10Lɑ́ Cʉ̈ɔꞋ-Sɛ́ ɛ̂wɑ́ cú mbɔ̌ pɔ́p ŋɡɔ: «Kɔɔ pʉʉ pɔ́k! N tɔ́ pɔ nɛpʉ́ wʉ́ʉ nɛ́ nu sʉ́Ꞌnɛ, ɛ́ pɔ́ yi ɛ́ ɡɛ ŋ́ɡɑ́ mɑ́mɑ́ tsɑ́ɑtɛ tsɛt ŋɡɔŋ wʉ́ʉ. 11Pɛ́ lɛ́ tʉ́sɔŋ-fɔɔ Ndɑvît lɔ́Ꞌnɛ, ḿbí ŋu ẅi ɑ ɡɛ ŋ́ɡɛ pʉʉ luk. A Kɛlístɔ#2.11 Kɛlístɔ: Ɛ́ lɔk ńcú ŋɡɔ Nzɑ́Ꞌŋkʉ., ḿbɔ́ Tsɑpʉɔ ẅi Sɛ́ kɑ kɑꞋnɛ. 12Yúu mi pʉʉ ɡɛ ńtɔ́ ńdɔk ńjí wɛ́, ɛ́ ŋɡɔ: Pʉʉ ɡʉ ńtɔ́ ńjʉ́ɔ mɔ́ɔ mbɔ́t, mbɔ pɛ́ lɔk yúu-ndẅí ŋ́kút wɛ́, ńnɔŋ wɛ́ tsɛt ŋkɔp-yúujʉ́-mɛyúumɛku.»
13A cú tɛ ŋ́ɡɔ ḿmɛkŋɛ, kɑt-pɛcʉ̈ɔ́Ꞌ-Sɛ́ tɛ ńzɑ́ɑ pɛn ɛ́fú tʉ́nɛ́pú ńtɔ́ ŋ́kẅiꞋ nǔu wɛ́, pɔ́p pɛpɔ́p zɔp, ŋ́ɡúꞋlɛ Sɛ́ ḿbɔ́ ńcú ŋɡɔ: 14«Gúꞌlɛ pɔ́ mbɔ̌ Sɛ́ tɛ tʉ́nɛ́pú, mbɔ́tnɛ pɔ́ mbɔ̌ pʉɔmɛsɔŋ ndǔ tsɛ́tsɑ́Ꞌ. Sɛ́ kɔŋ wɔ́p.»
15Pɛcʉ̈ɔꞋ-Sɛ́ kɑ lɛɛ tɛ ḿbɛn nɛ́ tʉ́nɛ́pú, pɑpyɛ́p mbí cú tsɛtsɛt pɔ́p ŋɡɔ: «Pɛkŋɛ ɡʉ tɛ ŋ́kúu Mbɛ́tɛlɛhɛ̂m, lɑ ńjʉ́ɔ nu yi ɛ́ cẅɛtnɛ zúꞋu liinɛ, nu yi ɛ́ cẅɛtnɛ tɛ Tsɑpʉɔ túu ŋɡɔ pɛ́ tɔ́ ɛ́sẅíi wɛkŋɛ lɑ́ɑ.» 16Pɔ́p cú pɑ́Ꞌɑ, ŋ́ɡɔ́ɔ ńdɔ sɛ́ ŋ́ɡʉ nɛ́ tʉʉ tɛ ŋ́kúu zúꞋu, ńjʉ́ɔ Mɑlíyɑ pɔ́p Yɔsɛ̂p, ńjʉ́ɔ mɔ́ɔ mbɔ́t, ɑ nɔɔ tsɛt ŋkɔp-yúujʉ́-mɛyúumɛku, 17ḿbɔ́ tɛ ńjʉ́ɔ wɛ́, ńzɛ nɛpɛ́ɛtɛ ŋɡɔŋ mɛnu tsʉʉ mi Cʉ̈ɔꞋ-Sɛ́ sẅíinɛ wɔ́p ntɛ́ wɛ́. 18Mbɑ wɔ̌ lɑ́ pɔ́ ńzúꞋ mɔnɛ mɛnu ntsu-pɑpyɛ́p mbí, ḿmɑɑ tɛꞋ. 19Ŋ́ɡʉ nǔu Mɑlíyɑ, ɑ lẅɛꞋ mɛnu ɛ̂mɑ́ pɔ tsɛt tʉ́m yɛ́, ḿbɔ́ ŋ́kwɑŋɛ nu nǔu. 20Pɑpyɛ́p mbí ɡɔ ḿbɛn nzʉʉ, ńnɛn ńzɔp ńdɔk ŋ́ɡúꞋlɛ Sɛ́, ŋ́ɡɛ́mtɛ wɛ́ mbíꞋ mɛnu mi pɔ́p zúꞋnɛ, pɔ́p pɛn ńjʉ́ɔ mbɑ kʉ̈ɔ́ lɑ́ pɔ́ pɔ pɑ́Ꞌ Cʉ̈ɔꞋ-Sɛ́ lɑ́Ꞌnɛ ɛ́sẅíi wɔ́p.
Lík-mɔ́ɔ
21Pɛ́ kɑ pí mɔ́ɔ, ɛ́ ɡɔ ḿbɔ́ lɛ́Ꞌ pɛ́nɛ́fɔ́m, pɛ́ púꞋ wɛ́, ńcẅi lík yɛ́ ŋɡɔ Yɛ́su, ɛ́ pɔ́ lík yi Cʉ̈ɔꞋ-Sɛ́ kɑ ɡɑ́nɛ lɑ mɑ́ wɛ lɑ́Ꞌ ɛ́shuŋ wɛ́.
Pɛ́ ɡʉ nyɛt Yɛ́su zʉꞋ-Sɛ́
22Lɛ́ꞌ nɛsuk lɔ́Ꞌ-mɑ́pfu nǔu Mɑlíyɑ pɔ́p Yɔsɛ̂p kɑ pɔ́ tɛ ḿbɔ́ ŋ́kuꞋ, pɑ́Ꞌ nɛpʉ́ʉ-Mɔ̌sɛ̂ɛ kɑ pɔ́ ḿbíkŋɛ, Yɔsɛ̂p pɔ́p Mɑlíyɑ tíi mɔ́ɔ ńdɔk ŋ́ɡʉ nɛ́ Yɛlúsɑlɛm nɛnyɛt wɛ́ mbɔ̌ Tsɑpʉɔ. 23Ɛ́ zɛɛ ŋ́ɡɔ ḿbɔ́, mbɔ pɛ́ kɑ ŋwɑꞋnɛ tsɛt nînɑ́ nɛpʉ́ʉ ŋɡɔ ŋu lɑɑ ḿbí mɔ́ɔ nɛtú wɛ, ɑ pɔ́ mɔ́ɔ mbɛ́ɛnɛ, ɑ ɡɑ́ wɛ́ mbɔ̌ Tsɑpʉɔ. 24Mɑlíyɑ pɔ́p Yɔsɛ̂p tɔ́ yɔ́p nɛnɔŋpɔꞋ pɑ́Ꞌ nɛpʉ́ʉ-Sɛ́ sɛ́ ḿbíkŋɛ ŋɡɔ pɛ ɡɑ́ pɛpuutɛ pɛ́pɑ́ kɛ pɛmɔ́kɔ́ŋ sɛ̂ndúŋ pɛ́pɑ́.
Símɔ̂ŋ ɡɛ́mtɛ Sɛ́ nǔu tú Yɛ́su
25Ɛ́ pɔ́ ŋkɑ́ ɛ̂yɑ́, wɛcɔ́ ŋu pɔ́ Yɛlúsɑlɛm, lík yɛ́ pɔ́ Símɔ̂ŋ, ɑ pɔ́ ŋu, ŋ́ɡẅɛɛ nɛpʉ́ʉ-Sɛ́ ḿbɛn ńzúꞋ ntsu wɛ́. Mbɔ ɑ lɔ ńjúk ńzẅíꞋlɛ ŋu ẅi ɑ ɡʉ ńdɑ́Ꞌ ńtɔ́, pʉɔ Íslɑɛ̂l lɔk pɔ wɛ́ ńtʉʉ, Zẅikŋɛ Lɛ́ɛnɛ́nɛ pɔ́ tʉ́m yɛ́. 26Mbɔ ɑ kɑ lɑ́Ꞌ ńzɑ́Ꞌ njí ɛ́sẅíi wɛ́ ŋɡɔ ɑ kɛ́ lɑ́Ꞌ ḿpfú kɛ́ pɔ yi ɑ ńzɑ́p lík nǔu Nzɑ́Ꞌŋkʉ ẅi ɑ túunɛ pɔ́. 27Zẅikŋɛ Lɛ́ɛnɛ́nɛ ɡɛ, ɑ ɡʉ ndɑ́-nɔŋpɔꞋ, ɛ́ pɛn ḿbɔ́ pɔ ŋkɑ́ yîyɑ́, mbɔ Yɔsɛ̂p pɔ́p Mɑlíyɑ lɔk mɔ́ɔ ńtɔ́ nɛɡɛ yúu mi nɛpʉ́ʉ-Sɛ́ kɑ pɔ́ ḿbíkŋɛ. 28Símɔ̂ŋ cẅɛ́ɛ wɛ́, ŋ́ɡẅɛɛ wɛ́ mbɔ́ wɛ, ḿbɔ́ ŋ́ɡɛ́mtɛ Sɛ́, ńcú ŋɡɔ: 29«Tsɑpʉɔ, ŋkɔ̂ɔnɛ pɑ́Ꞌɑ,
ḿbɔ́ ɔ nɑ́ ŋɡɑŋfɑꞋ wu ɑ pɔ́tnɛ ḿpfú pɑ́Ꞌ ɔ kɑ cúnɛ. 30Ɔ́ɔŋ, n dɔk mík mɑ́ɑ ńjʉ́ɔ pɑ́Ꞌ ɔ ɡʉ ŋ́ɡɛ
pʉɔmɛsɔŋ luk. 31Luk yi ɔ kɑ lɑ́Ꞌnɛ ńniitɛ ńzɑ́p nɛnyɛt mbɔ̌ ŋɡɔŋ nɛ́ ŋɡɔŋ. 32Ɛ́ pɔ́ kyɛꞌ yi ɛ́ ɡʉ ŋ́ɡɛ pɛ́ jí wú zʉꞋ tsʉʉ. Pɔ́Ꞌɔ, ɔ lɔk ŋ́ɡɑ́ ɡúꞋlɛ
mbɔ̌ Íslɑɛ̂l, lɑ́Ꞌ yú.»
Nu yi Sɛ́ níꞋnɛ ntsu-Símɔ̂ŋ, ɑ cú nǔu Yɛ́su
33Yɔsɛ̂p pɔ́p Mɑlíyɑ zúꞋ mɛnu mi Símɔ̂ŋ cúnɛ nǔu mɔ́ɔ ɛ́ kʉꞋnɛ wɔ́p. 34Símɔ̂ŋ níꞋ mbɔ́tnɛ nǔu pɔ́p ḿbɛn ńcú mbɔ̌ Mɑlíyɑ ŋɡɔ: «Mɔ́ɔ nu wɔ pɑ́Ꞌɑ ḿbɔ́ ẅi Sɛ́ ɡʉ ńdɛɛ nzʉʉ yɛ ŋ́ɡɛ sʉ́ʉ kɔ́ pʉɔ tɛ ńzɑ́ɑ Íslɑɛ̂l wɔ, ḿbɛn ŋ́ɡɛ pɛ́ ɡɑ́ mɛkuꞋ nɛlʉ́m-pʉɔ, mbíꞋŋɡɔ ɑ ŋu ẅi Sɛ́ lɔk pɔ wɛ́ ńnyɛt yúu mi ɛ́ ɡɛnɛ, lɑ pʉɔmɛsɔŋ kɛ́ ŋ́ɡwɑ́k wɛ́ ɡwɑ́knɛ. 35Ɛ́ lɛɛ pɔ́Ꞌɔ, lɑ mɛkwɑŋɛ mi ɛ́ mɛlɔ́ŋ-pʉɔ cẅɛt mɑ́ntɑ́ɑ. Ɛ́ ɡʉ nǔu ɡu Mɑlíyɑ, mbɔ nu ɡʉ ńdɑ́Ꞌ ŋ́ɡɛ wú tɛ ɔ zúꞋ ɛ́ pɔ́ pɔ pɑ́Ꞌɑ pɛ́ lɔk mɔ́níi ɛ́sɔp tʉ́m yú lɑ́.»
Ánɑ ɡɛ́mtɛ Sɛ́ ntɛ́ Yɛ́su
36Wɛcɔ́ ŋɡɛ́mndʉ̈ɔ́Ꞌ wɛ mɑŋɡɛ́ kɑ pɛn ḿbɔ́ yɛ́ Yɛlúsɑlɛm ŋkɑ́ ɛ̂yɑ́, lík yɛ́ kɑ pɔ́ Ánɑ. A pɔ́ mɔ́ɔ-Fɑnuɛl nǔu njẅɛtndɑ́-Asɛ̂ɛ. A ḿbɔ́ ńzúꞋ nu mbɔ̌ Sɛ́ ɛ́sẅíi lɑ́Ꞌ. Ɛ́ kɑ ɡɔ ḿbɔ́, mbɔ ɑ kɑ zɔ́Ꞌ, ŋ́ɡɛ ndɑꞋ ŋɡuꞋ sɑɑmbɑ́, ndúu mɛ pfú. 37A kɑ tsʉ́Ꞌ mpfúk pɔ́Ꞌɔ, ŋ́kɛ́ ḿbɔɔ ńtẅí ndɑ́-nɛnɔŋpɔꞋ pɔ́, ńdɛn tɛ ńtsʉ́Ꞌ ŋ́kɔŋ kɔŋnɛ ńnɑ́ŋ ńji ŋki, ŋ́ɡúꞋlɛ Sɛ́, ńtswɛ́ ŋ́ɡúꞋlɛ wɛ́ nɛnɛm mbɑ nɛtúꞋ,tɛ ńdɑ́Ꞌ ŋ́ɡẅɛɛ ŋɡuꞋ ntsɔ̌pɛ́nɛ́kwɑ mɛɡɛ́mɛ́nɛ́fɔ́m. 38Yɛcɔ́ lɛ́Ꞌ ɑ tɔ́ ndɑ́-nɔŋpɔꞋ pɑ́Ꞌ ɑ lɔ ńzɛɛ ńtɔ́. Ŋ́ɡɔ kúu zúꞋu ŋkɑ́ ɛ̂yɑ́, mbɔ pɛ́ lɔk mɔ́ɔ ńtɔ́, ɑ jʉ́ɔ wɛ́, ŋ́ɡɛ́mtɛ Sɛ́, ŋ́ɡɔ́ɔ ŋ́kɛ́ ńzɛ nɛsẅíi nu nǔu wɔ mɔ́ɔ mbɔ̌ pʉɔ tsʉʉ pi pɔ́p kɑ pɔ́ ḿbyɛ́p lɛ́Ꞌ yinɛ Sɛ́ ŋ́ɡɛ ńdɑ́Ꞌ ńcẅɛ́ɛ Yɛlúsɑlɛm.
Ntɛ́ yi Yɛ́su lɔknɛ ŋ́ɡúꞋ Nɑ̌ɑzɑlɛt
39Yɔsɛ̂p pɔ́p Mɑlíyɑ ɡɛ ɛ́sẅíi nu yi pɔ́p tɔ́nɛ nǔu tɛ ḿmɛk pɑ́Ꞌ nɛpʉ́ʉ-Tsɑpʉɔ kɑ pɔ́ ḿbíkŋɛ, ḿbɛn nzʉʉ nɛ́ Ŋɡɑlilɛɛ, tʉ́sɔŋ pɔ́p Nɑ̌ɑzɑlɛt. 40Mɔ́ɔ pɔ́ ŋ́ɡúꞋ, jínu yɛ́ pɔ́ ŋ́kẅiꞋ tɛꞋ, ɑ pɛn ḿbɔ́ ńjí yúu mi Sɛ́ sɛ́ ŋ́kɔŋ ŋɡɔ pʉɔmɛsɔŋ ɡɛ, Sɛ́ pɛn ḿbɔ́ nɛ́ jʉ́.
Yɛ́su ɡẅɛɛ ŋɡuꞋ ntsɔ̌ppɑ́
41Yɔsɛ̂p pɔ́p Mɑlíyɑ kɑ pɔ́ ŋɡɔŋ ŋɡuꞋ tsʉʉ ḿbɔ́ ŋ́ɡʉ Yɛlúsɑlɛm nɛjʉ́ ndínɑ Pɑ́skɑ. 42Yɛ́su ɡɛ ḿbɔ́ tɛ ŋ́ɡẅɛɛ ŋɡuꞋ ntsɔ̌ppɑ́ pɔ́p pɛ́ pɔ́p ɡʉ pɑ́Ꞌ mɑt-lɑ́Ꞌ wɔp kɑ pɔ́ ḿbíkŋɛ pɔ́Ꞌɔ. 43Pɔ́p jʉ́ ndínɑ tɛ ɛ́ mɛ, ŋ́ɡɔ ḿbɛn nzʉʉ. Mɔ́ɔ ɡɔ́ŋ Yɛlúsɑlɛm, pɔ́p pɔɔ jí. 44Pɔ́p kɑ pɔ́ ŋ́kwɑŋɛ ŋɡɔ ɑ tsɛtsɛt ku yɔ́p, tɛ ńnɛn tɑ́Ꞌ lɛ́Ꞌ. Ńnɛn pɔ́Ꞌɔ, ńdíŋɛ wɛ́ tsɛtsɛt pʉɔ-njẅɛt ndɑ́ yɔp pɔ́p pɛsúu, 45ńdɑ́Ꞌ ḿbɔɔ wɛ́ jʉ́ɔ, kɛ́kɑ́ŋ tɛ ḿbɛn Yɛlúsɑlɛm, ńnɛn ńdɔ́ɔ wɛ́. 46Ɛ́ ɡɔ ŋ́kuꞋ lɛ́Ꞌ pɛ́tɑ́t, pɔ́p jʉ́ɔ wɛ́ ndɑ́-nɛnɔŋpɔꞋ. A nɑ́ŋ tsɛtsɛt pɑkyɛ́Ꞌtɛ nɛpʉ́ʉ-Sɛ́, ḿbɔ́ ńzúꞋ mɛnu mi pɔ́p ḿbɔ́nɛ ńcú, ḿbɛn ḿbɔ́ ḿbíkŋɛ wɔ́p nɛ́ mɛcɔ́. 47Pʉɔ pi pɔ́p kɑ pɔ́ ńzúꞋ sẅíiŋɛ yɛ́ ḿbɔ́ ŋ́ɡʉ̈ɔꞋtɛ jínu yɛ́ mbɑ yɛ ntɛ́ nɛtsɔ́Ꞌ nu. 48Yɔsɛ̂p pɔ́p Mɑlíyɑ pɔ́ tɛ ńjʉ́ɔ wɛ́, ḿmɑɑ tɛꞋ. Mɑ́ wɛ cú mbɔ̌ wɛ́ ŋɡɔ: «Mɔ́ɔ wɑɑ, ɔ ɡɔ ŋ́ɡɛ yɔ nu nǔu pɛk pɑ́Ꞌɑ, mbíꞋku? Ɔ tsɔ́Ꞌ lɛ́m yɛk tɑ́t wu. Pɛk júk nɛlɔ́ɔ wú, ḿbɔ́ ḿbɔ́k ŋɡɔ kɛ yɛcɔ́ yúu ɡɛnɛ wú ɔ́ɔ?» 49A pʉ̈ɔt mbɔ̌ pɔ́p ŋɡɔ: «Pʉʉ pɛn ńdɔ́ɔ wɑ́ɑ pɔ́Ꞌɔ, mɛlɑ́Ꞌ ku? Pʉʉ kɑ́ pɔ́ ńjí ŋɡɔ ɛ́ pɔ́ŋ ɛ shɛp mɛnu-Tɑ̌ɑ mɔ pɔ́ ɔɔ?» 50A kɑ pʉ̈ɔt pɔ́Ꞌɔ, pɔ́p pɔɔ ɡɔ́ɔ ńzúꞋ nu yi ɑ lɔknɛ ńcú pɔ́. 51Ɛ́ lɛɛ pɔ́Ꞌɔ, pɔ́p pɛ́ pɔ́p pɛn nzʉʉ nɛ́ Nɑ̌ɑzɑlɛt, ɑ pɔ́ ńzúꞋ ntsu wɔ́p. Mɑ́ wɛ kɛ́ ńdẅɛꞋ mɔnɛ mɛnu tsʉʉ pɔ tsɛt tʉ́m yɛ́. 52Yɛ́su pɔ́ ŋ́ɡúꞋ, jínu yɛ́ pɔ́ ŋ́kẅiꞋ, Sɛ́ pɔ́ nɛ́ jʉ́. Pʉɔmɛ́sɔŋ pɔ́ ŋ́kɔŋ wɛ́.
Currently Selected:
Lúkɑ́shi 2: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
